Isaiah 29

Ngeʼ nɨn kolî ntèʼ Devìt

¹Ngeʼ ighaʼnɨ nɨn kolî ghelɨ ntèʼ Alèl, ɨ ntèʼ zɨ̀ a Devìt nà n-chi ateyn. Yì na nî kɨ ni iwo zɨ̀ a yi n-fvɨ̂ nî kɨ bèŋ sɨ̀ jɨ̀m tì. Yì na yɨ kɨ yɨ ayɨ kì a yi n-fvɨ̂ yɨ kɨ bèŋ sɨ̀ jɨ̀m tì.

²Mɨtì ma ghɨ sɨ fu ngeʼ sɨ̂ zɨ̀. Yi n-nì nà dzɨ̂ nô sɨ a ŋaŋ, ntèʼ zɨ ɨ nì nà ghɨ kɨ sɨ̂ mà ta abaŋ ifu a ghɨ sfɨ̀sɨ̀ mɨluŋ ateyn.

³Mɨ n-gêmtɨ̀ jɨ̂ŋ kalɨ nɨ̀ ntèʼ zɨ ɨ̀ bàʼlɨ̀ kal nɨ̀ ɨ̀bwaŋ nchì vzɨ̀ a ka mbàynɨ̀sɨ̀ na tî ateyn ɨwuyn mbàyn nɨ̀ zɨ.

⁴Yi læ̀ nà taŋî ta ghelɨ a ghɨ tɨm yɨ, taŋî kɨ ta yi n-ghɨ a nse. Gyâ sisɨ læ̀ nà ghɨ ta gyasɨ nkfɨsɨ nse a sɨ gvɨ gvì a nse, nyaʼtɨ̂ taŋî kɨ taŋi.

⁵Mɨtì, ghɨ læ̀ gvâsɨ̀ sugèyʼsɨ mbàynɨ̀ sisɨ a sɨ na ghɨ kɨ ta abɨ̂l. Afyefa læ̀ tâynsɨ̀ ghelɨ ghɨ bɨ ghì a ghɨ n-fu ngeʼ sɨ̂ zɨ̀ kɨ̀ ta kɨ tàynsɨ̀ ɨ̀ywafà. Iwo ateyni læ̀ gvɨ̂tɨ̀ gâyn gvî nô mɨ ɨlvɨ gha, ⁶a Bôbo Fɨyini ɨ Bò Ɨ̀dwaʼ ɨ̀ jɨ̀m gvi gàmtɨ̀ zɨ̀. Wù læ̀ gvi-à, byaytɨ̂ ta ivɨ, ɨlwêʼ ɨ neʼà/seynlɨ-a, fî kû kɨ tèyn. Wù læ̀ gvî ta nkeylɨ nɨ̀ àfyef atô ɨ̀ gvì ta tɨlemi tɨ ɨvɨ̀s ɨ̀ nyòʼ nô mɨ ghà ta yi n-yeyn.

⁷Yi n-gâyn tì a sugèyʼ sɨ dvɨnɨsɨ ta sɨ lù a tɨ̂laʼ ghè a tɨ n-nû ghelɨ Alèl/Jèlusalèm mæ/sami kɨ̀ ta jem a yì n-chɨ wul. Ghelɨ ghì a ghɨ n-nû mbàyn Jèlusalèm læ̀ mæ̂ kɨ ta alɨŋsɨ iwo a yi n-chwô a wùl ikèʼ a jem nɨ̀ntuʼ.

⁸Àŋena læ̀ nà ghɨ kɨ ta wul a jèŋ nɨn yafɨ ŋweyn, jem chɨ ŋweyn a wù n-yɨ mɨtì wù lalì jèŋ ɨ bu yafɨ kɨ yafɨ ŋweyn, ghɨ kɨ wul a ɨtoŋ mu nɨn yum ŋweyn, jem chɨ ŋweyn a wù n-yvɨ mu mɨtì wù lalì ɨtoŋ mu ateyn bu yum kɨ yum ŋweyn. À ti ta yì læ̀ nà ghɨ sɨ̂ sugèyʼsɨ tɨ̂laʼ tìtɨ̀ nô tɨ̀ jɨ̀m a tɨ n-nû ghelɨ kfɨ̂yn Zayòn.

⁹Yi n-ghɨ ɨ̀ngù, yì faŋ nà gwôtɨ̀ kɨ gwotɨ, yi fefɨ meyn, fì faŋ kɨ̀ sɨ a ɨnfèf. Mɨ̀lùʼ ku meyn zɨ̀, bula yi nyvɨ mɨ̀lûʼ. Yi n-yeŋnɨ̂ jelɨ̀ jelɨ bula yi nyvɨ mɨ ìjol i mɨ̂lùʼ.

¹⁰Bôbo Fɨyini ni meyn mbuni sɨ bemnsɨ ku zɨ̀. Wù bɨytɨ meyn àsɨ à ki-a (ma à ti nfèʼtɨ̀ sɨ ghaʼnɨsɨ). Wù chɨytɨ meyn ɨ̀tû vzɨ̀ (ma à ti asɨ a baynɨ-a nɨ̀ zɨ̀).

¹¹Awo kì a mà yèyn a jem nô à jɨ̀m nɨn ghɨ kɨ sɨ̂ zɨ̀ ta awo a ghɨ nyàʼ a ŋwàʼlɨ̀ ɨ̀ chɨ̀ytɨ ŋwàʼlɨ̀ àteyn. Wa n-fu ŋwàʼlɨ̀ àteyn sɨ̂ wùl ɨ̀ vzɨ̀ a wù n-ka sɨ jàŋ na wù jaŋ fèʼtɨ̀ ìwo zɨ̀ a yi n-ghɨ ateyn sɨ̂ và, wu bè na, “Ghɨ chɨytɨ meyn ŋwàʼlɨ̀ àteyn, mà kàʼ ma bû jàŋ.” ¹²Wà kæ fu ŋwàʼlɨ̀ àteyn sɨ̂ wùl ɨ̀ vzɨ̀ a wù n-kya wi sɨ jàŋ, ɨ̀ bè na wù jaŋ iwo zɨ̀ a ghɨ nyàʼ ateyn, a wù be kɨ̀ na, “Mɨ n-kya wi sɨ jàŋ.”

¹³Bôbo Fɨyini nɨn bê na, “Ghelɨ ghèyn nɨn koʼsɨ̂ mà kɨ nɨ̀ ɨ̀chfɨ̂ mɨtì lî wì ma sɨ afo. Àŋena nɨn yeyn kɨ ngeʼ salû, bê na ghɨ n-koʼsɨ̂ mà bòm ta àŋena nɨn yeʼî àwo ma à fàytɨ ghelɨ lêm na à n-ghɨ tɨ̀saʼ temtɨ.

¹⁴À ti iwo zɨ̀ a ka mà na fu kɨ fu ngeʼ sɨ bemnɨsɨ sɨ̂ ghelɨ ghèyn, nî àwo ɨchfɨ̀ ɨ yumnɨ-a, iwo ateyni bem sɨ̂ àŋena nô sɨ a ŋaŋ. Ghelɨ ghɨ tofɨnɨ a àŋena antêynɨ̀ læ̀ nà bu kelɨ wi itof, ghelɨ ghì a ghɨ n-yeyn/yvɨ keli awo na bu kya wi nô ìwo.

¹⁵Ngeʼ ighaʼnɨ nɨn ghɨ sɨ̂ ghelɨ ghì a ghɨ n-mômsɨ̀ sɨ lèytɨ̀ awo kì a àŋena nɨn baʼtɨ sɨ̂ Bôbo Fɨyini. Àŋena nɨn nyaʼtɨ̂ nî kɨ ni awo, kfâʼtɨ̀ na nô wùl nɨ̀n yeyn wi àŋena, kya wi mɨ àwo kì a àŋena nɨn nî.

¹⁶Yi beynsɨ meyn nô mɨ ghà/àwo kɨ na ghɨ kɨ àtfɨ̀ŋ atfɨŋ. À kòʼnɨ chwò wul ɨ vzɨ̀ a wù n-bom ntòynsɨ̀ ma à kòʼnɨ àchaʼ kì a wù n-bom ntòynsɨ̀ ateyn a? A wùl kàʼ a wù faytɨ afo a afo ateyna na bê ŋweyn na, à bû fàytɨ và afo ateyn a? A ntòyn àchàʼ tî kàʼ a yì na bê sɨ̂ wùl ɨ̀ vzɨ̀ a wù bo ntòyn àteyn na wù n-kya wi nô ìwo a?

¹⁷Yi n-ghɨ samoʼ na ɨlvɨ sɨ baʼsɨ̂ gvi-à ta ka aku (ɨ̀nkàʼ) a Lebanòn na ghɨ ta gveyn ì jùŋ (zɨ̀ a) ɨfwo ɨ yɨnɨ (nɨn) koʼ ateyn, gvèyn î jùŋ zɨ̀ a ɨfwo ɨ yɨnɨ nɨn koʼ ateyn ɨ ghɨ ta aku ɨnkàʼ.

¹⁸À læ̀ nà ghɨ ɨtuʼ nâ ghè,, a ɨ̀nkùʼ yvɨ ta ghɨ n-jâŋ awo kì a (kɨ n-ghɨ) ghɨ nyàʼ a ŋwàʼlɨ̀ Fɨyini, a ghelɨ ghì a ghɨ tî na chi abe a fɨmnɨ-a bòm ànfèf yeyn ɨlwêʼ (awo kì a Fɨyini fɨ nì).

¹⁹Ghelɨ ghì a ghɨ n-yeʼtɨ àŋena læ̀ nà saŋlɨ-à bòm ìwo zɨ̀ a Bôbo Fɨyini nì, ghelɨ ànfɨf ɨ saŋlɨ-à bòm Fɨyini fɨ laynɨ fɨ nɨ̀ ghelɨ Isìlæ̀.

²⁰Ghelɨ awo a bɨ-a læ̀ mæ̂ nô ghɨ̀ jɨ̀m, a ghelɨ ghì a ghɨ n-chêsɨ Fɨyini na bu ghɨ wi. Ghɨ læ̀ zuetɨ̂ ghelɨ ghì a ghɨ n-kɨŋ kɨ dzɨ sɨ nà ni awo a bɨ-a nô ghɨ̀ jɨ̀m.

²¹Ghɨ læ̀ zuetɨ̂ kɨmɨ ghelɨ ghì a ghɨ n-wam ɨ̀nkfaŋ sɨ bebsɨ azɨyn a ghêl. Ghelɨ nâ ghèyn nɨn jɨ̂ŋsɨ̀ ghelɨ ghì a ghɨ n-saʼ fu nsaʼsɨ ghêl na ka ghɨ na saʼ nsaʼsɨ àtì-ati, wam ɨ̀nkfaŋ sɨ nì na ka ghɨ fu ngeʼ sɨ̂ ghelɨ ghì a ghɨ fê nsaʼ.

²²À ti iwo zɨ̀ a Bôbo Fɨyini vzɨ̀ a wù n-læ bœ̀sɨ Abɨ̀làhâm nɨn bê sɨ̂ ghelɨ ndo nɨ̀ Jàkôb na, “Woyn Jàkôb nɨn læ̀ nà bu wumî wì nô sakos. Ghɨ læ̀ bu wumsɨ̂ wì zɨ na yì na koynsɨ̂ kêʼ keʼ.

²³À læ̀ nà ghɨ ta yì yèyn woyn ghì a mɨ n-fu sɨ̂ zɨ̀, a yì (kæ) keli na mɨ n-ghɨ Fɨyini fɨ laynɨfɨ nɨ̀ ghelɨ Jàkôb, nà koʼsɨ̂ mà ɨ Fɨyini fɨ ghelɨ Isìlæ̀.

²⁴Ghelɨ ghì a awo nɨn fu ngeʼ a àŋena tɨ̂kfàʼtɨ̀, lay yeyn kelî àwo ɨtuʼ nâ ghè, a zɨ̀ ghî a ghɨ n-chɨ̂yn ghâm kɨ gham ghelɨ na kôŋ sɨ keli iyeʼi.