Isaiah 24
This book is a draft. It has been translated but has not yet finished checking, and is published here so the community can read and respond to it.
Bôbo Fɨyini nɨn saʼ kɨ ghelɨ ghɨ̀ jɨ̀m a mbzɨ
1(Yì) Yeyna, Bôbo Fɨyini ɨ nì bebsɨ̂ tɨ̀laʼ tɨ mbzɨ nô tɨ̀ jɨ̀m, nì a yì na ghɨ kɨ ɨ̀twaʼ ghaʼ ndù kɨ ta nse ìyum. Wu n-nì-à a nse na læ̂ kɨ tèyn, ɨ̀ nì a ghelɨ ghì a ghɨ n-chi ateyn gwosɨ wàŋtɨ ndù kɨ̀ tɨghaŋ tɨ̀ jɨ̀m.
2Wu læ̀ gwôsɨ̀ ngàŋsɨ ndô Fɨyini ŋêyn ghelɨ ghì a àŋena nɨn tisɨ, gwòsɨ̀ ɨ̀kôs ɨ lûmnɨ̀ nɨ̀ ɨ ki ŋêyn ghɨ̀bo ifèl nɨ̀ àŋena nɨ̀ ghɨ̀na ifèl nɨ̀ àŋena. Wù læ̀ gwôsɨ̀ ghelɨ ghɨ beyʼlɨnɨ ŋêyn ghelɨ ghì a ghɨ n-yuyn ɨfwo ɨ̀ gwòsɨ̀ ghelɨ ghì a ghɨ samsɨ ɨfwo ŋêyn ghelɨ ghì a ghɨ n-sam ɨfwo, ɨ gwòsɨ̀ kɨ̀mɨ ghelɨ ghì a ghɨ n-lêm mɨkwo ŋêyn ghelɨ ghì a ghɨ sàm ɨkwo sɨ̂ àŋena.
3Ghɨ læ̀ bebsɨ̂ nô mɨ ghà ta kɨ n-ghɨ a mbzɨ afêyn a mbzɨ ì jɨ̀m na ghɨ kɨ ta nse iyum. À bè Bôbo Fɨyini, yi kelɨ sɨ gayn kɨ ta wù bè.
4Nse yum meyn, ɨfwo vzɨ̀ a wu n-lema ateyn kfɨ, mbzɨ yèyn boli meyn nô mɨ ghà ta kɨ n-ghɨ ateyn yum. (Nô mɨ) ghelɨ ghɨ to ghì a ghɨ n-ghɨ a mbzɨ boli meyn.
5Ghelɨ ghì a ghɨ n-chi a mbzɨ (afêyn) bebsɨ meyn nse, àŋena nɨn yvɨnɨ̂ wì isaʼ i Fɨyini, nî wì awo kì a iyeʼi i ŋweyn i nɨn bê. Àŋena nɨn yvɨnɨ̂ wì tɨsaʼ tɨ mɨ̂kàyn tìtɨ̀ a àŋena yɨ ŋêyn Bôbo Fɨyini kɨ̀ sɨ a mɨ̂lvɨ ɨ̀n jɨ̀m.
6À ti iwo zɨ̀ a Fɨyini fɨ tè ghelɨ a mbzɨ (nse). Àŋena nɨn yeyn ngeʼ boòm àwo a bɨ-a kì a àŋena nì ɨvɨsɨ nyoʼ meyn ghelɨ ghì a ghɨ nchi a mbzɨ, àŋena faŋ kɨ sɨ ilæ (a faŋ kɨ̀ asɨ a ghêl tèyn).
7Ntàŋsɨ/ɨìnkàʼ mɨ̀ gɨ̀lêbsɨ yum meyn, yi na boynɨ̂ wì sɨ keli mɨlûʼ. Ghelɨ ghì a ghɨ tî nà saŋlɨ ta ghɨ n-yvɨ mɨlûʼ na sɨ koynsɨ̂ kêʼ kɨ tèyn.
8Ghɨ n-bu yvɨ wi tɨchaʼachaʼ tìtɨ̀ a àŋena tî nà buʼa saŋlɨ-à, yvɨ wi gya sɨ ghêl ta ghɨ n-yɨ ayɨ saŋlɨ-à, bu yvɨ wi tɨluŋ tɨ fomnɨ tìtɨ̀ a àŋena tî nà buʼa ɨlvɨ ta ghɨ n-saŋlɨ.
9Àŋena nɨn bu yem wi njàŋsɨ̀ ta ghɨ nyvɨ mɨlûʼ. Mɨ̀lûʼ ɨnto nɨn luê sɨ̂ ghelɨ ghì a ghɨ n-yvɨ.
10Ntèʼ sɨ ghɨ ma yì befɨ meyn nà sɨ ghɨ kɨ ɨtwaʼ. Ghelɨ fotɨ meyn àchfɨ̂ a ndosɨ nɨ̀ àŋena na ka wùl ɨ̀ fî zɨ ateyn.
11Ghelɨ nɨn byaytɨ̂ dzɨ̂ a dzɨ sɨ tosɨ bòm ta ghɨ n-kelɨ wi mɨlûʼ sɨ nyvɨ. Isaŋlɨ i àŋena mæ̂ meyn kɨ̀ samoʼ (Kɨ ta achi a nî kɨ mæ̀ ɨlvɨ ta ɨtuʼ jɨ) ghɨ lâŋ meyn àwo a saŋlɨnɨ-a kì a ghelɨ nɨn nî a mbzɨ/ntèʼ nô à jɨ̀m.
12Ntèʼ àteyn sɨ ghɨ ma yì koli meyn nà ghɨ kɨ ta ɨtwaʼ, achfɨ̂ a mbàyn bɨ̂ytɨ̀/kôytɨ̀.
13Samoʼ iwo nâ yèynì nɨn gâyn kɨ tèyn kɨ tɨlaʼ tɨ̀ jɨ̀m a mbzɨ. (À ti iwo zɨ̀ a yi n-gâyn kɨ̀ tɨlaʼ tɨ̀ jɨ̀m a mbzɨ. Ghelɨ læ̀ faŋ a mbzɨ kɨ̀ sɨ ilæ nà ghɨ kɨ ta fɨkâʼ fɨ olìfsɨ̀ ɨlvɨ ta ghɨ kœ̀tɨ mɨtam ateyn mɨ̀ faŋ kɨ̀ sɨ ilæ atu, kèsa ta fɨkâʼ fɨ gɨ̀lêbsɨ̀ ɨlvɨ ta ghɨ kœ gɨ̀lêb sɨ ateyn sɨ faŋ kɨ sɨ̀ sèʼ têyn atu.
14Ghelɨ ghì a ghɨ faŋ tɨ̀ kfɨ̀tɨ læ̀ nà yem njàŋsɨ̀ saŋlɨ-à. Ghelɨ ghì a ghɨ n-chi abàs ghè a ɨchfɨ̂ iyvɨ i nɨn sœ ateyn koʼsɨ̂ Bôbo Fɨyini, fêʼtɨ̀ na wù n-ghɨ Fɨyini fɨ ngaŋtɨnɨ fɨ.
15Ghelɨ ghì a ghɨ n-chi abàs ghè a ɨchfɨ̂ iyvɨ i nɨn sal ateyn, yì na boŋ koʼsɨ̂ Bôbo Fɨyini. Ghelɨ ghì a ghɨ n-chi a tɨ̂laʼ ghè a tɨ n-ghɨ antêynɨ̀ jvà i ghaʼnɨ na koʼsɨ̂ Bôbo Fɨyini ɨ Fɨyini fɨ ghelɨ Isìlæ̀.
16Ghesɨ̀ nɨn yvɨ ta ghɨ n-yem njàŋsɨ̀ ikoʼsɨ kɨ̀ tɨghaŋ tɨ mbzɨ tɨ̀ jɨ̀m bê na, “Bôbo Fɨyini nɨn ŋwaʼà.” Mɨtì ma dzɨ̂ na ma boli meyn, mɨ n-ghɨ a ngeʼ. Ghelɨ ghɨ bɨ nɨn nî ndû kɨ nɨ̀ àwo a bɨ-a sɨ̂ ghelɨ àŋena, nî àwo a bɨ-a kɨ̀ ɨlwêʼ ɨ̀ jɨ̀m.
17Ghelɨ ghì a ghɨ n-chi a mbzɨ nô ghɨ̀ jɨ̀m, ngeʼ i ghaʼnɨ/i bemnɨ nɨn kolî zɨ̀. Zɨ̀ ghɨli nì felɨ̂ a tɨ̂bɨ̀, a ghɨli li ɨtwam.
18Ghelɨ ghì a ghɨ n-læ̀ nà mômsɨ̀ sɨ leʼ ngeʼ i bemnɨ (nâ yèyn) læ̀ felɨ̂ a ibɨ a atama ku ghelɨ ghì a ghɨ n-mômsɨ̀ sɨ fvɨ sɨ a ibɨ nâ ghè. Ghɨ dzɨsɨ meyn àbûʼ kì a ivɨ i nɨn fvɨ̂ ateyn iyvɨ, (ɨfwo vzɨ̀ a wu nà n-ghɨ a nzɨ̀tɨ mbzɨ neʼà). Mbzɨ ì jɨ̀m na neʼà.
19Nse yèyn nɨn ghɨ ma yì kaʼtɨ meyn, nse yèyn nɨn ghɨ ma yì gwosɨ meyn, nse yèyn nɨn neʼà nô sɨ a ŋaŋ.
20Mbzɨ yèyn nɨ̀n yeŋnɨ̂/neʼà kɨ ta wul a mɨ̀lùʼ ku. Yì n-neʼa kɨ ta fɨtwo ɨlvɨ ta afyefa nɨn chwô. Mbɨ sìsɨ̀ a ghelɨ nɨn nî nɨn ghɨ àdɨli (atû nse) a mbzɨ. Mbzɨ yèyn nɨn fe-à læ̀ faŋ tɨ̀ fì tɨ̀ làlì.
21Àlæ̀ nà ghɨ ɨtuʼ/achi nâ ghè, a Bôbo Fɨyini fu ngeʼ sɨ̂ ɨ̀dwaʼ vzɨ̀ a wu n-ghɨ iyvɨ, fu kɨ̀mɨ ngeʼ sɨ̂ tɨ̀fôyn tìtɨ̀ a tɨ n-saʼ tɨlaʼ tɨ mbzɨ.
22Bôbo Fɨyini læ̀ yvɨ̂ŋtɨ̀ àŋena kɨ̀ ta ghelɨ ndô nchaʼ a ghɨ kul we ibɨ wù læ̂ fô àŋena a ndô nchaʼ a àŋena na chî afu nô sɨ ɨlvɨ ɨdyâ, a wù kæ fu ngeʼ sɨ̂ àŋena.
23Njoŋ læ̀ nà bɨ̂ylɨ̀ bayn kɨ bayn, ɨchfɨ̂ iyvɨ i bayna lûmtɨ̀ kɨ sɨ ilæ bòm ta Bôbo Fɨyini ɨ Bò Ɨ̀dwaʼ ɨ̀ Jɨ̀m læ̀ nà saʼ a kfɨ̂yn Aayòn a Jèlusalèm, ghelɨ ghì a ghɨ n-tisɨ ghelɨ ŋweyn ɨ yeyn ìŋwâʼ i ŋweyn.