Isaiah 23

Saʼgha kûm ghelɨ Tayà nɨ̀ ghelɨ Sidòn

¹Iyeynì nɨn ghɨ saʼgha zɨ̀ a Bôbo Fɨyini fù sɨ̂ mà kûm ghelɨ Tayà. Bôbo Fɨyini bè na,

zɨ̀ ghelɨ Tashìsh ghì a yi n-jelɨ̀ beyʼlɨ ɨfwo/nî mbèʼìnkùm a ngùʼsɨ, yì na dzɨ̂ nô sɨ a ŋaŋ, bòm ta ghɨ bebsɨ meyn ntèʼ Tayà, ghɨ bɨytɨ meyn ndosɨ afu. Saʼgha zɨ̀ a yì yvɨ a Sayblùs tì nɨn ghɨ kɨ nô samoʼ.

²Zɨ̀ ghelɨ mbèʼìnkùm a Sidòn nɨ̀ ghelɨ ghì a ghɨ n-chi a mbæ̀ jvà. Ghelɨ mbèʼìnkùm nɨ̀ zɨ dyaŋ meyn injɨyn i jvâ i ghaʼnɨ,

³ma ghɨ chwò alèʼ kɨ sœ̂ kɨ tèyn. Àŋena gvî meyn nɨ̀ àsaŋa sɨ̂ zɨ̀ ma ghɨ kfì a mbæ̀ jvà Nâyl a Ijìb. Yi n-beyʼlɨ̂ ɨ̀fwo kɨ̀ sɨ̂ ghelɨ tɨ̂laʼ tɨ̀ jɨ̀m a mbzɨ.

⁴Mɨtì yì na wumî lvɨ̂yn a ghelɨ ntèʼ Sidòn bòm ta Tayà, alêʼ a leytɨnɨ-a kì a kɨ n-ghɨ a jvâ ighaʼnɨ nɨn bê na, “Mɨ n-bu kelɨ wi wayn lvɨ̂yn. Mɨ n-kelɨ wi wayn ɨ wi, kelɨ wi wayn ɨ lûmnɨ̀.”

⁵Ghelɨ Ijìb ɨ nì yvɨ saʼgha nâ yèyn kûm ghelɨ Sidòn a iwo ateyni na fu ngeʼ sɨ̂ àŋena nô sɨ a ŋaŋ.

⁶Yì tum ntum sɨ̂ ghelɨ Tashìsh, yì na dzɨ̂ nô sɨ a ŋaŋ, ɨ zɨ ghì a yi n-chi a tɨ̂laʼ ghè a tɨ n-ghɨ a mbæ̀ jvà.

⁷A ɨyêyn ti n-ghɨ kɨ nô Tayà ɨ ntèʼ zɨ̀ a ghɨ tî nà saŋlɨ kɨ saŋlɨ ateyn. Ghɨ n-læ ku ntèʼ àteyn kɨ̀ nô ɨtuʼ ɨ mu. A ti n-ghɨ kɨ nô ntèʼ zɨ̀ a yì nì/sàŋ ghelɨ ghɨ ndû nà chî a tɨ̂laʼ ghè a tɨ n-ghɨ a mbæ̀ jvà tèyn?

⁸À mòm ndà iwo i kaynɨ-i nâ yèynì sɨ̂ ghelɨ Tayà a? Ɨ ghelɨ ma ghɨ tî nà bâʼlɨ̀ baʼlɨ tɨlaʼ. Ghelɨ mbèʼìnkùm ghɨ to ghì a ghɨ tî nà ghɨ ghelɨ ma ghɨ fvɨ̀ a ntèʼ nâ ghàyn.

⁹À nì Bôbo Fɨyini ɨ Bò ɨ̀dwaʼ ɨ̀ Jɨ̀m na yi gayn têyn. Wù nì tèyn sɨ bebsɨ ɨfwo vzɨ̀/awo kì a àŋena nɨn ghaŋsɨ ɨwuyn bòm ànkeyna, sɨ fì sɨ nì na ghelɨ mbzɨ na bu ngvɨmlɨ̂ wi àŋena.

¹⁰Ghelɨ Tashìsh, yì gvi zɨ ilaʼ nâ ghàyn kɨ̀ ta ànkuŋ a kɨ fvɨ̀ a jvâ Nâyl. Nô wùl bu ghɨ wi sɨ nà kɨ̂ŋtɨ ntèʼ Tayà.

¹¹Bôbo Fɨyini naysɨ meyn àwu a ŋweyn atû jvà ighaʼnɨ, nèʼ tɨ̀laʼ tɨ mbzɨ kɨ tɨ̀ jɨ̀m. Wù fu meyn àdyaʼ na ghɨ bebsɨ ntèʼsɨ Kenàn/Fònisìyà sìsɨ̀ a ghɨ tɨm mbàyn jɨ̀ŋ kàli nô sɨ̀ jɨ̀m.

¹²Bôbo Fɨyini nɨn bê na, “Ghelɨ Sidòn, isaŋlɨ ì zɨ-i mæ̂ meyn, ghɨ ghɨ sɨ ghaytɨ ghelɨ̀ ghi. Yì kæ leʼ ndù nô mɨ a Sayblùs, yi bû nà kelɨ nô mɨ mbôynɨ̀ afu.

¹³Yì yeyn ta ilaʼi Babilòn ì nɨn kêʼa, ghelɨ ateyn leʼnɨ/kfɨtɨ meyn nô ghɨ̀ jɨ̀m. Ghelɨ Asilìyà nî meyn à na sɨ chî kɨ nyamsɨ ɨtwaʼ a Babilòn. Àŋena baʼlɨ meyn ɨ̀bwaŋ nchì ɨwuyn mbàyn Babilòn, gèmtɨ̀ kal nɨ̀ ìlaʼ ateyni, bɨ̀ytɨ̀ ntoʼsɨ ilaʼ afu, nì alêʼ ateyna na ghɨ kɨ ta (ɨtwaʼ) alêʼ a ghɨ n-mâʼ ilɨŋ ateyn.

¹⁴Zɨ̀ ghelɨ Tashìsh ghì a ghɨ n-nî mbèʼìnkùm nɨ̀ ngùʼsɨ ghaʼlɨnɨsɨ a jvâ, yì na dzɨ̂ nô sɨ a ŋaŋ bòm ta ghɨ bebsɨ meyn àlêʼ kì a yì bèʼì ɨfwo ɨwe/mbèʼìnkùm nɨ̀ zɨ̀ ateyn.

¹⁵À læ̀ nà ghɨ ɨtuʼ nâ ghè a ghɨ lesɨ ntèʼ Tayà sɨ a bèŋsɨ̀ mɨ̀vɨm nsòmbo, kɨ̀ ta akôyn a bêŋsɨ̀ kì a fòyn nɨn kelɨ sɨ chi. À na ghɨ ibàm i bêŋsɨ̀ nâ ghè mɨ̀vɨ̂m nsòmbo, a ghelɨ kasi gvì nà chî ateyn, yem njàŋ sɨ fomnɨsɨ kɨ̀ ta ghɨ̀kì ghɨ jelɨnɨ (ɨ̀kfàlà).

¹⁶Àŋena læ̀ lî tɨ̀luŋ nà jelɨ̀ kal a dzɨ sɨ tosɨ a ntèʼ buʼa yem njàŋsɨ̀ ta ka ghelɨ kasi bètɨ̀ ntèʼ àteyn.”

¹⁷Samoʼ bèŋ nâ sèynsɨ̀ mɨ̀vɨm nsòmbo læ̀ mæ̂/chwô, a Bôbo Fɨyini ni a ghelɨ kasi gvì nà chî a Tayà, mɨtì a ghelɨ ateyn na nî kɨ àwo kì a àŋena tî nà nî sɨ asɨ. Àŋena læ̀ kasî ndu à nà nî kɨ àwo a bɨ-a kì a àŋena tî nà nî kɨ̀ tɨlaʼ tɨ mbzɨ tɨ̀ jɨ̀m. ¹⁸Ghelɨ mbèʼìnkùm nɨ̀ àŋena baʼsɨ̂ nɨ̀ ɨ̀kwo vzɨ̀ a àŋena nɨn keli a mbèʼìnkùm nɨ̀ àŋena nì/læ̀ nà layn asɨ nɨ̀ Bôbo Fɨyini. Àŋena læ̀ lêm wì ɨkwo ateyn alèʼ. Ghelɨ mbèʼìnkùm nɨ̀ àŋena læ̀ lî ɨ̀kwo ateyn, yuyn ɨ̀fwo ɨ yɨnɨ nô sɨ idvɨ̀ bàʼsɨ nɨ̀ ndzɨsɨ jûŋsɨ̀ sɨ̂ ngàŋsɨ ndô Fɨyini sìsɨ̀ a sɨ n-felɨ̀ a ndô Fɨyini.