Isaiah 21

Saʼgha kûm ghelɨ Babilòn

¹Iyeyn nɨn ghɨ saʼgha kûm nse iyum a mbæ̀ jvà a Babilòn.

Ngeʼ ɨ nì kolî zɨ̀ kɨ̀ ta afyef ato-a a kɨ tòynɨ chwò a nse iyum abàs ɨtsɨyn, lû ilaʼ yi bem kɨ tèyn.

²Bôbo Fɨyini dyeyn meyn àwo a kaynɨ-a sɨ̂ mà ma yeyn ta mà yeyn a jem. Ma yeyn meyn ghelɨ ghì a ghɨ n-ghɨ ta ifô i ngvèleŋ jɨ̂ŋsɨ̀ kɨ jɨŋsɨ ghelɨ ghɨ choŋnɨ, choŋ kɨ choŋ ghelɨ. Ghelɨ Alàm, yì ndu kèʼ Babilòn, ghelɨ Medìyà yì ndu gèmtɨ̀ kal nɨ̀ ntèʼ àteyn. Fɨyini fɨ nɨn ni-à a ghelɨ Babilòn na bu fu wi ngeʼ sɨ̂ ghelɨ ta àŋena tî nà ni.

³Iwo nâ yèynì a mà yèyn têyn ni meyn ma na faynà, ghɨ kɨ a mɨ̂lùmchuŋ, mɨ n-yvɨ ìlûm kɨ̀ ta wul ɨ wi a wàyn nɨn lum ŋweyn. Ɨwuyn wom boli meyn bòm àwo kì a mà yvɨ, mɨ jɨŋi meyn bòm àwo kì a mà yeyn.

⁴Ikfâʼtɨ̀ ì yemi nɨn fu ngeʼ sɨ̂ mà, iwo ateyni nî meyn ma na chɨŋtɨ̂ fâyn kɨ tèyn. Mà tî nà jêm/kɨŋ na ɨtuʼ yaŋsɨ jɨ mɨtì wu kwo gvì kɨ nɨ̀ ngeʼ i bemnɨ/ighaʼnɨ sɨ̂ mà.

⁵Mà yèyn a jêm nâ ghè ma ghelɨ Babilòn ɨ baʼtɨ̂ àyɨ a ghaʼnɨ-a mâʼ/zɨ̂zɨ̀ mɨ̀ghâm a kî ndo na ghelɨ gvi dùʼì ateyn. Àŋena na sɨ yɨ-a fî yvɨ mɨ̀lûʼ ghɨ gvɨ̂tɨ̀ bè kɨ̀ na, “Sugèyʼsɨ̀ yì lali bàʼtɨ ɨ̀fwo iwòŋ nɨ̀ zɨ̀ nà gvɨ̂tɨ̀ sɨ nu.

⁶Bôbo Fɨyini ɨ kæ be sɨ̂ mà na, “Ndu lèm wul ɨ̀ nki abaŋ a nchì ɨ bè wù ki fèʼtɨ̀ ìwo zɨ̀ sɨ̂ và a wù n-yêyn.

⁷Wu kæ yeyn mɨ̀nchaʼ mɨ̀ ìwòŋ a gufɨ̀ nyamsɨ kfaŋ sɨ̀ bo sɨ̀bò, yeyn ghelɨ ghɨ nyɨŋ atû njàkâysɨ̀, ghɨli nyɨŋ atû Kàmêlsɨ̀, wu nà faytɨ̂ ki kɨ ki àŋena.

⁸Wùl ɨ̀ nki/nchì nâ vzɨ kæ byal ɨ̀ bè na, “Bô mɨ n-yisî kɨ abaŋ a nchì nɨ̀ mà mɨchi ɨ̀n jɨ̀m, ghɨ kɨ abaŋ a nchì nâ ghàyn nɨ̀ntuʼ kɨ̀ mɨchi ɨ̀n jɨ̀m.

⁹Yeyna! Ma yeyn meyn mɨ̀nchaʼ mɨ̀ ìwòŋ lvɨ̂yn ta mɨ̀ n-gvî, a gufɨ̀ nyamsɨ kfaŋ sɨ̀ bo sɨ̀ bò. Wu taŋi tì ɨ kæ bè na, “Ghɨ tɨm meyn yɨ̀ Babilòn, ghɨ bebsɨ meyn Babilòn nô ì jɨ̀m. Ɨnfyèʼsɨ̀ vzɨ̀ a ghelɨ Babilòn nɨn koʼsɨ nô ɨ̀ jɨ̀m nɨn nyɨŋ kɨ a nse ma wu beʼlɨ/kfɨlɨ meyn nô ɨ̀ jɨ̀m.

¹⁰Ghelɨ̀ ghem, ghɨ chyeʼsɨ meyn zɨ̀ ta ghɨ chyèʼ asaŋ alèʼ ghè a ghɨ n-chyeʼ asaŋ ateyn. Mɨ n-fèʼtɨ̀ ìwo zɨ̀ sɨ̂ zɨ̀ lvɨ̂yn a mà yvɨ Bôbo Fɨyini ɨ Bò Ɨ̀dwaʼ ɨ̀ jɨ̀m ɨ Fɨyini fɨ ghelɨ Isìlæ̀ bè sɨ̂ mà.

Saʼgha kûm ghelɨ Edòm

¹¹Ɨyêyn nɨn ghɨ saʼha zɨ̀ a yì gvì sɨ̂ mà (Isayà) kûm ghelɨ (Edòm) Dumà. Wùl ɨ lvì nɨn jâŋ mà a kfɨ̂yn Seyì bê na, “Nchì nɨ̀ntuʼ (wul ɨ̀ nchì) ɨtuʼ sɨ layn mesì gvi a? Ghɨ n-lam chem ti a jæ ta ka ɨtuʼ layn a?

¹²Nchì nɨ̀n tuʼ/ma bêynsɨ̀ ɨ̀ bè na, “Ɨtuʼ nɨn layna mɨtì ghɨ kɨmɨ sɨ fì sɨ jɨ. Wà kæ nà kɨŋ sɨ fì sɨ bɨf iwo, wa kasi gvi bɨf.

Saʼgha kûm ghelɨ Alabìyà

¹³Iyêyn nɨn ghɨ saʼgha zɨ̀ a Fɨyini fù sɨ̂ mà kûm ghelɨ Alàbìyà. Wù bè na,

“Zɨ̀ ghelɨ Dedàn ghì a Kàmêlsɨ̀ nɨn beʼì jêl nɨ̀ ɨ̀fwo mbèʼìnkùm nɨ̀ zɨ̀ tî, ɨ zɨ ghì a yì ndù bɨ̀ a ɨtwaʼ a nse ìyum a Alabìyà,

¹⁴yì fu mu sɨ̂ ghelɨ ghì a ɨtoŋ mu nɨn yumtɨ àŋena ghɨ nyvɨtɨ. Zɨ̀ ghî a yi n-chi a Temà, yì fu ɨfwo ɨ yɨnɨ sɨ̂ ghelɨ ghɨ jɨŋnɨ ghèyn a ghɨ n-jelɨ̀ chwô têyn.

¹⁵Àŋena nɨn ghi tèyn leʼ mɨ̀nyue mɨ̀ ìwòŋ ɨ mɨnyuè mzɨ̂ a ghɨ chòʼtɨ sɨ a ɨbuʼlɨ sɨ sɨ àŋena ateyn. Àŋena nɨn leʼ mɨ̀nchya mzɨ̀ a ghɨ bèyntɨ̀ sɨ tɨm àŋena ateyn. Àŋena nɨn leʼ ìwoŋ yi bem kɨ tèyn.

¹⁶Bôbo Fɨyini be meyn sɨ̂ mà na, “Bèŋ ìmòʼ nɨn se sɨ koʼ sɨ mæ̀, kɨ̀ ta wùl ɨ̀ vzɨ̀ a wù n-felɨ ghɨ lâʼ ŋweyn a bêŋ, nì wu nà taŋ mɨ̀chi mzɨ̀ a ghɨ n-lâʼ ŋweyn ateyn, a nô mɨ ghà ta ghelɨ Kedà nɨn ghaŋsɨ ɨwuyn bòm ɨ̀ŋweyn mæ nô ɨ̀ jɨ̀m. ¹⁷Ghelɨ ghì a ghɨ n-kya sɨ tɨm mɨ̀nchya nɨn ghɨ sugèyʼ sɨ to sìsɨ̀ a sɨ n-ghɨ a Kedà læ̀ faŋ kɨ sɨ ilæ. À bè Bôbo Fɨyini ɨ Fɨyini fɨ ghelɨ Isìlæ̀.