Genesis 33

Jàkôb ɨ ndu yeyn Esò

¹À nà n-ghɨ ta Jàkôb lù sɨ a Benìyèl ɨ ki ndùsɨ̀ ɨ yeyn Esò wu gvî ŋêyn ghelɨ ŋweyn ghì ighɨ ì kæ̀. Ta wù yèyn tî ɨ bè na woyn Liyà ndu ŋêyn Liyà, ɨ ghɨ Lashèl ndu ŋêyn Lashèl woyn ghɨki ghɨ felɨnɨ ghì ɨ ndù ŋêyn ghɨ̀na àŋena. ²Wu lèm ghelɨ ghɨ felɨnɨ nɨ̀ ŋweyn baʼsɨ̂ nɨ̀ woyn àŋena asɨ, ɨ lèm Liyà ŋêyn woyn ŋweyn ibàm, ɨ lem gòʼsɨ̀ Lashèl ŋêyn wâyn ŋweyn Josèf. ³Jàkôb nɨ̂n lèm tî ɨ chwò ɨ ndù asɨ ɨ se sɨ baʼsɨ sɨ̂ wâynà ŋweyn Esò ɨ ngvɨmtɨ a nse ìngal nsòmbo.

⁴Esò ɨ kwo nyɨŋ ɨ ndu baʼnɨ ŋweyn iwo ateyn i ɨ fom ɨwùyn nɨ̀ àŋena ghɨ nà sɨ dzɨ-à. ⁵Esò ɨ se sɨ ki ɨ yeyn ghɨ̀ki Jàkôb nɨ̀ woyn ɨ bɨf sɨ̂ ŋweyn na, “Ɨghêyn nɨn ghɨ ghɨ̀ ndà a zɨ̂ àŋena nɨn ghɨ amoʼ teyn a?” Jàkôb ɨ bè sɨ̂ ŋweyn na, “À n-ghɨ ghelɨ ghì a Fɨyini fɨ tî dyèyn atem a juŋà sɨ̂ wul ɨ̀ felɨnɨ nɨ̀ và ɨ̀ bòysɨ ŋweyn nɨ̀ àŋena.”

⁶Nô mɨ ɨlvɨ gha, ghelɨ ghɨ felɨnɨ ghɨki nɨ̀ woyn àŋena ɨ kɨŋtɨ ɨ baʼsɨ asɨ nɨ̀ Esò ɨ ngvɨmtɨ a nse. ⁷Liyà ŋêyn woyn ŋweyn ɨ boŋ gvì ɨ ngvɨmtɨ. Josèf ŋêyn Lashèl ɨ kæ gvì sɨ ngvɨmtɨ sɨ gòʼsɨ̀ asɨ nɨ̀ Esò.

⁸Wu bɨf sɨ̂ Jàkôb na, “Nyam sèynsɨ̀ a mà yèyn têyn nɨn ghɨ ɨsɨ gha sɨ a?” Jàkôb ɨ bè na, “Mɨ n-fu sɨ̂ và ta ka wà dyeyn atem a juŋà sɨ̂ mà a bô.”

⁹Mɨtì Esò ɨ bè sɨ̂ wâynà ŋweyn na, “Mɨ n-kelɨ nyamsɨ sɨ dvɨ̂ kfeynɨ-à. Lèm nyâm shyasɨ.”

¹⁰Jàkôb ɨ bè sɨ̂ Esò na, “Mɨ n-chwotɨ̂ a bô. Wà kæ nà kelɨ àtem a juŋà sɨ̂ mà, wa fsɨ ifu ì yemi yèynì. Wà toŋtɨ meyn mà kɨ̀ nô a jûŋ yi dyêyn na wà lesɨ meyn ɨ̀ fù ma. Mà yèyn vâ yi na kêʼ tèyn ta mà yeyn Fɨyini. ¹¹Mɨ n-chwotɨ na wà fsɨ ifu yèynì a mɨ n-fu sɨ̂ và tèyn bòm ta Fɨyini fɨ dyeyn meyn àtem a juŋà sɨ̂ mà ɨ̀ fù nô mɨ ghà sɨ̂ mà ta mɨ n-kɨŋ.” Wu n-chwòtɨ chwòsɨ wâynà ŋweyn tì wu fsɨ ifu ateyn, ¹²ɨ kæ bè sɨ̂ Jàkôb na, “Gvi ghesɨ̀và lu. Mà na ndû asɨ wa gvî ibàm.”

¹³Mɨtì Jàkôb ɨ bè sɨ̂ ŋweyn na, “Wà n-kya a bô na woyn ghèyn bu lælɨ-à ma ghɨ kàʼ ghɨ bû nà nyâŋsɨ̀ jelɨ̀-à, ma kelɨ kɨmɨ sɨ nà tôʼnɨ nɨ̀ nyam sìsɨ̀ a sɨ bu nyoŋsɨ woyn. Mà kæ nì na nyamsɨ ateynsɨ na nyɨŋ nyɨŋ kɨ̀ nô sɨ a achi àmòʼ a sɨ kfɨtɨ. ¹⁴Wa ndû asɨ a bô mà na jèlɨ̀ kɨ sijya-sijya ghesɨ̀ woynda nɨ̀ nyamsɨ nô ta ka ghès nî gvì ɨ̀ kòli và a Seyì.”

¹⁵Esò ɨ bè na, “Yi kæ sɨ nà ghɨ tì, a mà visi ghelɨ̀ ghem ghɨli a zɨ̂ àŋena na gvî amoʼ.” Jàkôb ɨ bè na, “Àyòŋnɨ̀ à kya a bô. Ka wa n-vìsi àŋena sɨ̂ ma. Wà sɨ ghɨ ma wà dyeyn meyn àtem a juŋà sɨ̂ mà.”

¹⁶Wu n-bè tî, Esò ɨ lù kɨ achi nâ ghè ɨ nà sɨ kasi kfa sɨ a Seyì. ¹⁷Jàkôb ɨ kwo lù ŋêyn ghelɨ ŋweyn ɨ ndù a Sukòt ɨ bàʼlɨ̀ ndo afu ɨ fi bàʼlɨ̀ mɨ̀two ɨ lèm nyamsɨ ŋweyn ateyn. À ti iwo zɨ̀-ì a ghɨ n-toŋtɨ alêʼ ateyn na Sukòt.

Jàkôb ɨ ndu chem a Shekèm

¹⁸Jàkôb nɨ̀n læ se sɨ kasi sɨ kfa sɨ a Badan Alàm tì ɨ jelɨ kɨ nô a jûŋ ɨ ndu chem a ngùŋ ntèʼ nɨ̀ Shekèm a Kenàn ɨ bɨ̀ afu. ¹⁹Jàkôb nɨn yùyn alêʼ nâ kì a wu n-læ bàʼlɨ ndo ɨ bɨ̀ ateyn tì sɨ a aso ɨkwo a fɨfâ ɨvɨ sɨ̂ woyn Hamò, ɨ bò Shekèm. ²⁰Wu n-yùyn tî ɨ bàʼlɨ̀ àbaŋ ifu afu ɨ fu izɨyn ateyn na, El Elòhè Isìlæ̀.