Genesis 32

Jàkôb ŋêyn Esò

¹À nà n-ghɨ ta Jàkôb lù ɨ̀ nà ndû a Kenàn, nchìsɨ Fɨyini sɨ̀ ɨ fvɨ̀ a ŋweyn ikèʼ. ²Jàkôb nà n-yeyn gvî tèyn ɨ byal bè na, “Fɨyini fɨ bɨ meyn afêyn.” Wu n-bè tî ɨ chfɨ̀ ìzɨyn alèʼ nâ zɨ̀-ì na Màhanèm.

³Jàkôb ɨ tum ghelɨ ŋweyn sɨ a asɨ na ghɨ ndu ɨ̀ yèyn Esò ɨ waynà ŋweyn ɨlwema, wu chî abàs a Seyì ilaʼ i Edòm. ⁴Wu ntum na àŋena ndu bè sɨ̂ ŋweyn na, “Wùl ìfèl nɨ̀ và Jàkôb chi meyn ŋêyn Labàn sɨ a ndèyn ìdyà ɨ̀ nà sɨ kasi kfa. ⁵Na yi n-kelɨ nyamsɨ mbòloʼ nɨ̀ njàkâysɨ̀ kɨ̀mɨ nɨ̀ bzɨsɨ sɨ dvɨ̂ kɨ tèyn baʼsɨ̂ nɨ̀ ghelɨ ghɨ felɨnɨ ghɨki nɨ ghɨ lûmnɨ̀, ghɨ dvɨ̂ kɨmɨ tì. Na yi n-tum ntum nâ yèyn kfâʼtɨ̀ a bô, na wa nì dyêyn àtem a juŋà sɨ̂ zɨ ɨlvɨ ta yì kàsi kfa.”

⁶Ghelɨ ateyn nɨ̀n ndu meyn ɨ làʼì ntum àteyn ɨ kasi gvì ɨ bè sɨ̂ ŋweyn na, “Ghèsɨ ndu meyn ɨ̀ yèyn wâynà vâ, wù na sɨ gvî sɨ kòynɨ zɨ̂ ŋweyn ŋêyn ghelɨ ighɨ ì kæ̀ lvɨ̂yn.” ⁷Jàkôb ɨ yvɨ iwo ateyn, yi nà fu ngeʼ sɨ̂ ŋweyn. Ifayn ì ɨ fi ku ŋweyn. Wu gwòsɨ̀ ghelɨ ŋweyn inôyn ì bò ɨ fi gwòsɨ̀ bzɨsɨ nɨ̀ nyamsɨ mbòloʼsɨ baʼsɨ̂ nɨ̀ njàkâysɨ̀ nɨ̀ kàmêlsɨ̀ kɨ̀mɨ inôyn ì bò î bò. ⁸Wu nà n-kfâʼtɨ̀ na, Esò kæ gvì nɨ̀ ìnu-ì ɨ̀ zuètɨ ànôyn a kɨ asɨ-a, a a li-a leʼ.

⁹Wu gwòsɨ̀ tì ɨ nà sɨ jèmà bê na, “Ô Fɨyini fɨ bò bò wom Abɨ̀làhâm nɨ̀ bò wom Yisàk. Ô Bôbo à tî bè và na mà kasi kfa a ghès ilaʼ ɨ̀ ndù ɨ̀ yèyn ghelɨ̀ ghem, na wa nì ni-à, a awo na jelɨ̀ kɨ a jûŋ sɨ̂ mà. ¹⁰Mɨ n-kfeynɨ̂ wì awo a juŋà afî a wà nì sɨ̂ mà. Wà lum chfɨ̂nɨ̀ nô mɨ ghà sɨ̂ mà wul ɨ̀ felɨnɨ nɨ̀ và, nî kɨ tì. Mɨ n-læ dyàŋ jvâ Jodàn kelɨ kɨ mbàŋ ì nyamnɨ, lvɨ̂yn na sɨ ghɨ ma kfâ nɨ̀ ghelɨ baʼsɨ̂ nɨ̀ ɨ̀fwo ma wu sɨ ghɨ ɨlweŋ ɨ̀ bwò. ¹¹Mɨ n-chwotɨ̂ a Bôbo na wà fsɨ ma sɨ a awu nɨ̀ wâynà wom Esò. Mɨ n-fâyn na wù kàʼ a wù kàʼ a wù gvi ɨ̀ zuè ma ɨ̀ zuètɨ wôyn ghem baʼsɨ̂ nɨ̀ ghɨ̀nà ateyn. ¹²Wà n-læ meyn chfɨ̀nɨ̀ sɨ̂ mà na, wà læ̀ ni-à a awo na jelɨ̀ kɨ a jûŋ sɨ̂ mà ɨ̀ nì a wôyn ghem dvɨ nà ghɨ kɨ ta asese a mbæ̀ jvà ma ghɨ kàʼ ghɨ bû taŋ, na wà læ̀ nî tèyn, ghɨ wi sɨ faŋ.”

¹³Jàkôb ɨ jèm tì ɨ chi kɨ afu, ɨtuʼ layn wu teytɨ nyam sɨ lisɨ antêynɨ̀ nyamsɨ nɨ̀ ŋweyn sɨ fu sɨ̂ wâynà ŋweyn Esò. ¹⁴Wu n-tèytɨ tɨkfɨ tɨ bzɨ ighɨ ì bò nɨ̀ tɨ̀fef tɨ mɨ̀vɨ̂m mbò baʼsɨ̂ nɨ̀ njɨ̀sɨ̀ ighɨ ì bò nɨ̀ ɨ̀ywaʼ mɨ̀vɨ̂m mbò. ¹⁵Wù n-teytɨ meyn kɨmɨ kàmêl sɨ kisɨ mɨ̀vɨm ɨ̀n tal nɨ̀ woyn ateyn nɨ̀ nyamsɨ mbòloʼ sɨ kisɨ mɨ̀vɨm ɨ̀n kæ̀ baʼsɨ̂ nɨ sɨ lûmnɨ̀sɨ̀ ìvɨm kɨ̀mɨ nɨ̀ njàkâysɨ kisɨ mɨ̀vɨ̂m mbò nɨ sɨ lûmnɨ̀sɨ̀ ìvɨm. ¹⁶Jàkôb nɨn læ teytɨ nyamsɨ ateyn ɨ gwòsɨ̀ tì ɨ lèm ghelɨ ghɨ felɨnɨ nɨ̀ ŋweyn na ghɨ na tôʼnɨ̀ nɨ̀ ɨ̀nseynsɨ. Wu n-lèm tî ɨ bè sɨ̂ àŋena na, “Yì nà ndû a ma asɨ. Yi se sɨ ndù yi nì ta ka nô mɨ ànôyn a nyâmsɨ̀ à kà na fu àghaf sɨ a li-a.”

¹⁷Wù n-bê meyn sɨ̂ wùl ɨ̀ vzɨ̀ a wù n-tisɨ anôyn a kɨ asɨ-a na, “Wa n-ndu-à, lvɨfɨli a wâynà wom Esò yeyn vâ ɨ̀ bɨ̀f na, ‘Wà n-ndû wo a, wà n-ghɨ wul ɨ̀ felɨnɨ nɨ̀ ndà a, na nyam sèynsɨ̀ nɨn kelɨ ndà a?’ ¹⁸Wu bɨf tì wa bè sɨ̂ ŋweyn na, ‘À n-kelɨ wul ɨ̀ felɨnɨ nɨ̀ và ɨ Jàkôb, wù tùm na ghès gvi ɨ̀ fù sɨ̂ và a bô. Wù n-gvî ibàm.’”

¹⁹Jàkôb nɨ̀n fi meyn bè sɨ̂ ghelɨ ghì a ghɨ nà n-tisɨ inôyn i nyâmsɨ̀ i li zɨ̀ ì bò a yi nà n-gvî ibàm, nɨ̀ ghelɨ ghɨli ghì a ghɨ nà n-gvî ibàm i nyâmsɨ̀ nâ ghè na, “Esò yeyn zɨ̀ ɨ̀ bɨf yi be kɨ iwo yèynì a mà bè têyn. ²⁰Ka yi n-lèysɨ̀ sɨ be sɨ̂ ŋweyn na, wul ɨ̀ felɨnɨ nɨ̀ ŋweyn Jàkôb nɨ̀n gvî ibàm.” Jàkôb nɨ̀n bè têyn ta wù nà n-kfâʼtɨ̀ na, ɨfwo vzɨ̀ a wù tum nɨn yvɨ̂sɨ̀ àtem a wâynà ŋweyn Esò a wù sfɨsɨ ŋweyn nɨ̀ mbôynɨ̀. ²¹Ghelɨ ghì a ghɨ nà n-ndû nɨ̀ ɨ̀fwo ateyn nɨn lù sɨ a asɨ achi nâ ghè, Jàkôb ɨ fi chi kɨ alèʼ ghè a àŋena nɨn bɨ̀ ateyn tì.

Jàkôb ɨ nù ŋêyn Bôbo Fɨyini a Benìyèl

²²A ni nà ghɨ nɨ̀ntuʼ achi nâ ghè Jàkôb ɨ làlì ɨ lì ghɨ̀ki ŋweyn ghì ghɨ̀bò nɨ̀ ghelɨ ghɨ felɨnɨ nɨ̀ àŋena kɨ̀mɨ ghɨ̀bò baʼsɨ̂ nɨ̀ woyn ghɨ lûmnɨ̀ nɨ̀ ŋweyn ɨ dyàŋsɨ̀ àŋena a jvâ Jabòk. ²³Wu n-dyàŋsɨ àŋena tî ɨ fi dyàŋsɨ̀ ghelɨ ŋweyn ghɨli nɨ̀ ɨ̀fwo ŋweyn nô ɨ̀ jɨ̀m. ²⁴Jàkôb nɨn dyàŋsɨ tî ɨ faŋ ibàm kɨ̀ ŋêyn nìnyɨŋ. A ni nà ghɨ nɨ̀ntuʼ wùl ɨ gvì ɨ chi nu kɨ ŋêyn ŋweyn tèyn ɨtuʼ ni layn. ²⁵A nà ghɨ ta wùl nâ vzɨ̀ yèyn na Jàkôb to meyn chwò ŋweyn, wu kfɨ̀yn àkuʼtɨ a Jàkôb ɨ sèʼsɨ̀. ²⁶Ta wù sèʼsɨ̀ tî ɨ kæ bè na, “Ɨtuʼ sɨ layn gvi-à, visi ma, mà lu.” Mɨtì Jàkôb ɨ bè sɨ̂ ŋweyn na, “Wà faŋ tɨ̀ bòysɨ ma, ma bû vìsi na wà lu.”

²⁷Wùl àteyn ɨ bɨf na, “Izɨyn ì zæ nɨn ghɨ ndà?” Wu bè na, “Izɨyn ì yemi nɨn ghɨ Jàkôb.”

²⁸Wùl àteyn ɨ kæ be sɨ̂ ŋweyn na, “Ghɨ na bu fì toŋtɨ̂ wì vâ na Jàkôb, ghɨ na toŋtɨ̂ na Isìlæ̀. Wà nû meyn zɨ̂ ghelɨ ɨ̀ nù zɨ̂ Fɨyini fɨ ɨ̀ to chwò àŋena.”

²⁹Jàkôb ɨ bè na, “Mɨ n-chwotɨ-à fèʼtɨ izɨyn ì zæ sɨ̂ mà.” Mɨtì wu bɨf sɨ̂ Jàkôb na, “Wà n-bɨf sɨ ni gha nɨ̀ ìzɨyn ì yemi a?” Wu n-bɨf tî ɨ boysɨ Jàkôb. ³⁰Jàkôb ɨ kæ fu izɨyn alèʼ nâ zɨ̀-ì na Benìyèl bê na, “À n-ghɨ ta ghesɨ̀ Fɨyini fɨ kòynɨ̀ alèʼ ghàyn, ma yeyn ìkêʼ i ŋweyn mɨtì faŋ tɨ̀ kfɨ.” ³¹Jàkôb nɨ̀n se sɨ lu sɨ a Benìyèl ma ɨchfɨ̂-iyvɨ i sɨ salɨ gvi-à, jelɨ̀ nges nges bòm àkuʼtɨ a ŋweyn kì a ghɨ nì sèʼsɨ̀ tî. ³²À ti iwo zɨ̀-ì a à n-ghɨ sɨ koʼ sɨ chem layn ghelɨ Isìlæ̀ ɨ kfɨlɨ wi alêʼ a njwò kì a kɨ n-baʼsɨ̂ ayùŋ abì nɨ̀ nyàm bòm ta à n-ghɨ àlêʼ kì a wul ɨ̀ vzɨ̀ nɨn læ kfɨyn sèʼsɨ.