Genesis 12

Fɨyini fɨ ɨ jàŋ Ablàm

¹Bôbo Fɨyini nɨ̀n læ meyn jàŋ Ablàm ɨ bè sɨ̂ ŋweyn na, “Fvɨ̀ sɨ a yi ilaʼ ɨ visi ghelɨ isas i ndo nɨ̀ zɨ̀ baʼsɨ̂ nɨ̀ ghelɨ abe nɨ̀ zɨ ɨ ndù ilaʼ ghè a ka mà dyeyn sɨ̂ và.

²“Mɨ n-fu woyn sɨ̂ và kɨ̀ sɨ i dvɨ̀ ɨ̀ boysɨ và a woyn ghya læ nà ghɨ ghelɨ ilaʼ i to i. Mà læ̀ ni-à a izɨyn ì zæ na ngaŋtɨ-à ta ka wà na boysɨ̂ ghelɨ ghɨ li.

³À læ̀ dyèyn nô mɨ ndà atem a juŋà sɨ̂ và a mà dyeyn atem a juŋà sɨ̂ ŋweyn, à nî nô mɨ ndà ngeʼ sɨ̂ và a mà ni ngeʼ sɨ̂ ŋweyn a nô ghelɨ ghɨ̀ jɨ̀m a mbzɨ læ̂ kèli ìboysɨ toynɨ̂ kɨ a vâ.”

⁴Ablàm ɨ lu kɨ ta Bôbo Fɨyini bè ɨ se sɨ lù tî Lôt ɨ lù ŋêyn ŋweyn. Wù n-læ se sɨ lu sɨ a Halàn ghɨ bèŋsɨ̀ mɨ̀vɨm nsòmbo njvàsɨ̀ tâyn. ⁵Ablàm nɨ̀n læ se sɨ lù ɨ lì wî ŋweyn Selày nɨ̀ Lôt ɨ wâyn waynà ŋweyn nɨ̀ ghelɨ ghɨ felɨnɨ nɨ̀ ŋweyn nô ghɨ̀ jɨ̀m baʼsɨ̂ nɨ̀ ɨ̀fwo vzɨ̀ a wu nà n-kelɨ a Halàn nô ɨ̀ jɨ̀m, àŋena jelɨ kɨ têyn ɨ ndu zɨ a Kenàn.

⁶Àŋena ndu zɨ a Kenàn tì Ablàm ɨ chwo ndu chem isas i fɨ̂kàʼ fɨ ôk nɨ̀ Molè a ngùŋ Shekèm, a ghɨ tì ghelɨ Kenàn ɨ bu ghɨ kɨ nô ilaʼ nâ ghè. ⁷Bôbo Fɨyini ɨ fvɨ ikèʼ nɨ̀ Ablàm afu ɨ bè sɨ̂ ŋweyn na, “Mɨ n-fu ìlaʼ yèynì sɨ̂ woyn ghya.” Ta Bôbo taŋi tî, Ablàm ɨ bàʼlɨ̀ àbaŋ ifu sɨ̂ ŋweyn alèʼ nâ ghè a wù fvɨ̀ a ŋweyn ikèʼ ateyn tì.

⁸Ablàm nɨ̀n fi meyn lù sɨ afu ɨ kɨŋtɨ ndù a ntèʼ kfɨ̀ynsɨ ì lì a Betèl dzɨ abàs ghè a ɨchfɨ̂-iyvɨ i nɨn sal ateyn ɨ kas ɨ two ŋweyn afu, ighami nɨ̀ Ây. Betèl nà n-ghɨ dzɨ abàs ghè a ɨchfɨ-iyvɨ i nɨn sœ ateyn, Ây ɨ ghɨ dzɨ abàs ghè a yi n-sal ateyn. Ablàm nɨ̀n baʼlɨ meyn kɨmɨ àbaŋ ifu a li-a afu ɨ nà koʼsɨ̂ Bôbo ateyn.

⁹Ablàm ɨ chitɨ kɨ afu tèyn ɨ fi lù ɨ nà ndû dzɨ abàs a Negèf.

Ablàm ɨ ndù a Ijìb

¹⁰Jèŋ i bemnɨ ì lì nɨn læ meyn ku a Kenàn, Ablàm ɨ leʼ kàlì sɨ chiti a Ijìb. ¹¹À nà n-ghɨ ta Ablàm jèl baʼsɨ a Ijìb, wu bè sɨ̂ wi ŋweyn Selày na, “Mɨ n-ghɨ tèyn kya na wà n-ghɨ kɨ nô àtu a ngòyn. ¹²Mɨ n-fâyn na ghelɨ Ijìb ghèyn nɨn yeyn ta wà n-jofɨ̀ ɨ̀ kèli na wà n-ghɨ wi wom ɨ̀ zue ma vìsi và. ¹³Bòm tèyn, àŋena bɨf wa be kɨ na wà n-ghɨ jêmtɨ̀ yem ta ka àŋena faŋ tɨ̀ zuè ma nà tôʼnɨ̀ nɨ̀ mà bòm và.”

¹⁴A nà ghɨ ta Ablàm zɨ chem a Ijìb, ghelɨ Ijìb ɨ yeyn na Selày nɨn ghɨ wul ɨ wi jofà kɨ̀ ta wù nì bè. ¹⁵Nchìsɨ ntôʼ Ijìbsɨ̀ ɨ yeyn Selày ta wù n-jôf tî ɨ ndu bɨtɨ ìjôf i ŋweyn sɨ̂ fòyn, wu tum jàŋ ŋweyn a ntoʼ. ¹⁶Fòyn Ijìb ɨ nà sɨ tôʼnɨ̀ nɨ̀ Ablàm bòm Selày ɨ fu bzɨsɨ nɨ̀ nyamsɨ mbòloʼsɨ sɨ̂ ŋweyn nɨ̀ njàkâysɨ kisɨ nɨ sɨ lûmnɨ̀sɨ̀ kɨ̀mɨ nɨ̀ Kàmêlsɨ̀ nɨ̀ ghelɨ ghɨ felɨnɨ ghɨki nɨ woyn ghɨ lûmnɨ̀.

¹⁷Mɨtì Bôbo Fɨyini ɨ màʼ tɨ̀koʼi tɨkaynɨtɨ ɨwuyn nɨ̀ fòyn nɨ̀ ghelɨ ŋweyn kɨ bòm Selày ɨ wî Ablàm. ¹⁸Ta tɨkoʼi tìtɨ̀ ku fòyn tì wu tum jàŋ Ablàm a ntoʼ ɨ bɨf sɨ̂ ŋweyn na, “Wà mòm ghà sɨ̂ mà teyn a? Bòm ghà ta wà tî faŋ tɨ̀ fèʼtɨ sɨ̂ mà na wul ɨ wi wèyn nɨ̀n ghɨ wî vâ a? ¹⁹Bòm ghà ta wà tî bè sɨ̂ mà na wù n-ghɨ jêmtɨ̀ zyâ ɨ̀ lɨ̀sɨ mà ma lî sɨ a ma wi a? Wù wèyn afêyn, li lu nɨ̀ ŋweyn.” ²⁰Ta wù tàŋi tî ɨ̀ fyeʼtɨ bè kɨ̀ sɨ̂ ghelɨ ghɨ felɨnɨ nɨ̀ ŋweyn na àŋena li Ablàm nɨ̀ wî ŋweyn baʼsɨ̂ nô mɨ nɨ̀ ghà ta wù nà n-kelɨ ɨ̀ ndù chɨ̀ynsɨ àŋena, àŋena lu.