Genesis 11

Fɨyini fɨ nì tɨtaŋi tɨ dvɨ̀ a mbzɨ

¹À n-læ nà ghɨ sɨ asɨ mbzɨ ì jɨ̀m ɨ taŋî kɨ ìtaŋi ìmòʼ, taŋî kɨ a dzɨ ìmòʼ. ²Ghelɨ læ lù abàs ghè a ɨchfɨ-iyvɨ i nɨn sal ateyn ɨ jel chem ibal i li ilaʼ i Shinà ɨ bàʼlɨ̀ afu.

³A læ nà ghɨ achi a li-a, àŋena be kɨ sɨ a àŋena ngeŋsɨ na, “Ghesɨ̀nà bom achaʼ ɨ̀ nyòʼ ta ka kɨ yum nà faytɨ to.” Àŋena bè tì ɨ nyòʼ àchaʼ ateyn ɨ nà sɨ bâʼlɨ̀ nɨ̀ ànkeyna a ghɨ wi nɨ̀ ngòʼsɨ̀, mâytɨ̀ nɨ̀ àle a, a ghɨ wi nɨ̀ àchaʼ a taynɨnɨ-a. ⁴Àŋena nɨ̀n fi meyn be kɨ sɨ a àŋena ngeŋsɨ na, “Ghesɨ̀nà baʼlɨ ntèʼ ighaʼnɨ nɨ̀ ndo ateyn yɨ dyêf nô tèyn koʼ kûm ìyvɨ ta ka ghesɨ̀nà keli izɨyn ɨ̀ faŋ tɨ̀ sàsà sɨ ndù a mbzɨ.”

⁵Bôbo Fɨyini ɨ suʼi gvì sɨ yeyn ntèʼ nâ zɨ̀ nɨ̀ ndo ìdyefɨnɨ zɨ̀ a àŋena nà n-bâʼlɨ̀. ⁶A nà ghɨ ta Bôbo Fɨyini yèyn tî ɨ kæ be kɨ sɨ a ŋweyn a ngeŋ na, “Ghelɨ ghèyn ti kæ nà (bu) ghɨ kɨ sɨ afo àmòʼ taŋî kɨ ìtaŋi ìmòʼ ɨ̀ zɨ̀tɨ̀ nà sɨ nî ìwo yèynì, a yi na dyêyn na àŋena kæ baʼtɨ sɨ ni nô mɨ ghà a àŋena ni kɨ̀ ni. ⁷Yì gvi ghesɨ̀nà suʼi ndù fyes itaŋi àŋena ta ka wùl sɨ ateyn na bu fì yvɨ kelî wì iwo zɨ̀-ì a waynà ŋweyn nɨ̀n bê.”

⁸Bôbo Fɨyini ɨ taŋi tì ɨ sàs àŋena sɨ afu, ghɨ waŋtɨ ndù kɨ mbzɨ ì jɨ̀m ɨ faŋ tɨ fì tɨ̀ baʼlɨ ntèʼ ìghaʼnɨ nɨ̀ àŋena nâ zɨ̀. ⁹Ghɨ nà sɨ toŋtɨ̂ ntèʼ nâ zɨ̀ na Babèl bòm ta Bôbo nɨn læ fyes itaŋi i mbzɨ afu ɨ fi gwòsɨ̀ ghelɨ kɨ̀ mbzɨ ì jɨ̀m.

Woyn woyn Shêm

¹⁰À nà n-ghɨ ta Shêm lèma nà sɨ ghɨ bèŋsɨ̀ ɨvɨ, wu bzɨ Afazàd ma à sɨ ghɨ bèŋ sɨ̀ bò ta ànkuŋa chwò. Akeynà nɨn ghɨ àzɨyn a woyn woyn Shêm nâ ghì. ¹¹Shêm nɨ̀n læ bzɨ Afazàd tì ɨ chi kfeynsɨ bèŋsɨ̀ ighɨ ì tâyn ɨ fi bzɨ woyn ghɨ lûmnɨ̀ ghɨli nɨ̀ woyn ghɨ̂ki. ¹²A nà ghɨ ta Afazàd lèma nà sɨ ghɨ bèŋ mɨ̀vɨm ɨ̀n tal njvàsɨ̀ tâyn, wu bzɨ Shelà. ¹³Afazàd nɨn læ bzɨ Shelà tì, ɨ fi chi kfeynsɨ bèŋ ighɨ ì kæ̀ nɨ̀ beŋsɨ̀ tal ɨ fi bzɨ woyn ghɨ lûmnɨ̀ ghɨli nɨ̀ woyn ghɨ̂ki. ¹⁴A nà ghɨ ta Shelà lèma nà sɨ ghɨ bèŋsɨ̀ mɨ̀vɨm ɨ̀n tal, wu bzɨ Ebà. ¹⁵Shelà nɨn læ bzɨ Ebà tì ɨ fi chi kfeynsɨ bèŋ ighɨ ì kæ̀ nɨ̀ bèŋsɨ̀ tal ɨ fi bzɨ woyn woyn ghɨ lûmnɨ̀ ghɨli nɨ̀ woyn ghɨ̂ki.

¹⁶A nà ghɨ ta Ebà lèma nà sɨ ghɨ bèŋ mɨ̀vɨm ɨ̀n tal njvàsɨ̀ kæ̀, wu bzɨ Belèk. ¹⁷Ebà nɨ̀n læ bzɨ Belèk tì ɨ fi chi kfeynsɨ bèŋ ighɨ ì kæ̀ nɨ̀ bèŋsɨ̀ mɨ̀vɨm ɨ̀n tal ɨ fi bzɨ woyn woyn ghɨ lûmnɨ̀ ghɨ li nɨ̀ woyn ghɨ̂ki. ¹⁸A nà ghɨ ta Belèk lèma nà sɨ ghɨ bèŋsɨ̀ mɨ̀vɨm ɨ̀n tal, wu bzɨ Liyù. ¹⁹Belèk nɨ̀n læ bzɨ Liyù tì ɨ fi chi kfeynsɨ bèŋ ighɨ ì bò nɨ̀ bèŋsɨ̀ bulamòʼ ɨ fi bzɨ woyn woyn ghɨ lûmnɨ̀ ghɨli nɨ̀ woyn ghɨ̂ki. ²⁰A nà ghɨ ta Liyù lèma nà sɨ ghɨ bèŋ mɨ̀vɨm ɨ̀n tal njvàsɨ̀ bò, wu bzɨ Selùk. ²¹Liyù nɨ̀n læ bzɨ Selùk tì ɨ fi chi kfeynsɨ bèŋ ighɨ ì bò nɨ̀ bèŋsɨ̀ nsòmbo ɨ fi bzɨ woyn woyn ghɨ lûmnɨ̀ ghɨli nɨ̀ woyn ghɨ̂ki. ²²A nà ghɨ ta Selùk lèma nà sɨ ghɨ bèŋsɨ̀ mɨ̀vɨm ɨ̀n tal wu bzɨ Nahò. ²³Selùk nɨ̀n læ bzɨ Nahò tì ɨ fi chi kfeynsɨ bèŋsɨ̀ ighɨ ì bò ɨ fi bzɨ woyn woyn ghɨ lûmnɨ̀ ghɨli nɨ̀ woyn ghɨ̂ki. ²⁴A nà ghɨ ta Nahò lèma nà sɨ ghɨ bèŋsɨ̀ mɨ̀vɨm ɨ̀m bò nɨ̀ bèŋsɨ̀ bulamòʼ, wu bzɨ Telà. ²⁵Nahò nɨ̀n læ bzɨ Telà tì ɨ fi chi kfeynsɨ bèŋ ɨvɨ̂ nɨ̀ bèŋsɨ̀ njvàsɨ̀ bulamòʼ ɨ fi bzɨ woyn woyn ghɨ lûmnɨ̀ ghɨli nɨ̀ woyn ghɨ̂ki. ²⁶A nà ghɨ ta Telà lèma nà sɨ ghɨ bèŋsɨ̀ mɨ̀vɨm nsòmbo, wu bzɨ Ablàm ŋêyn Nahò nɨ̀ Halàn.

Woyn woyn Telà

²⁷Akeynà nɨn ghɨ àzɨyn a woyn woyn Telà. Telà nɨn læ nà ghɨ bò Ablàm ŋêyn Nahò nɨ̀ Halàn, Halàn ɨ ghɨ bò Lôt. ²⁸Halàn nɨn læ kfɨ sɨ asɨ nɨ̀ bò ŋweyn Telà alèʼ ghɨ toŋtɨ̂ na Ûl a Babilòn, kɨ̀mɨ alèʼ ghè a ghɨ n-læ bzɨ ŋweyn ateyn. ²⁹Ablàm ŋêyn Nahò nɨn læ meyn ndù ghɨ̀kì. Izɨyn i wî Ablàm nà n-ghɨ Selày i yi wî Nahò ɨ ghɨ Milkà ɨ wâyn Halàn. Halàn nà n-ghɨ kɨmɨ bò Iskà. ³⁰Selày nà n-kelɨ wi wayn bòm ta wù nà n-ghɨ àkâyn. ³¹Telà ɨ lì wâyn ŋweyn Ablàm nɨ̀ wâyn wayn ŋweyn Lôt ma à ti wâyn Halàn nɨ̀ wî Ablàm ɨ Selày ŋêyn àŋena chɨ̀yntɨ lù sɨ a Ûl a ntèʼ Kaldì ɨ nà ndû a Kenàn. Mɨtì ɨ ndu chem kɨ a Halàn ɨ bàʼlɨ̀ afu. ³²Yi ti n-dyêyn na Telà nɨ̀n læ chɨ̀yntɨ chi bèŋ ighɨ ì bò nɨ̀ bèŋsɨ̀ tâyn ɨ kfɨ a Halàn.