Ezra 1
This book is a draft. It has been translated but has not yet finished checking, and is published here so the community can read and respond to it.
Saylùs ɨ fu adyaʼ na ghelɨ Jûsɨ̀ kasi kfa sɨ a àŋena ilaʼ.
1À nà n-ghɨ a bêŋ ɨ yî àsɨ ta Saylùs ɨ fòyn Besìyà kòʼ achɨ, sɨ luynsɨ iwo zɨ̀ a Bôbo Fɨyini nɨn læ bè, Jèlìmayà ɨ taŋi, Bôbo Fɨyini ɨ taŋi ikfàʼtɨ̀ nɨ̀ Saylùs, ɨ fòyn Besìyà, na wù taŋi sɨ̂ ghelɨ nô ghɨ̀ jɨ̀m a ŋweyn ilaʼ fì nyàʼ nô nyaʼ iwo ateyn na,
2“Iyeynì nɨn ghɨ ìwo zɨ̀ a Sylùs ɨ fòyn Besìyà nɨ̂n bè.
Bôbo Fɨyini ɨ Fɨyini fìfɨ̀ a fɨ n-ghɨ iyvɨ fu meyn nô tɨ̀laʼ tɨ̀ jɨ̀m a mbzɨ sɨ̂ mà, ɨ̀ chòʼ ma na mà baʼlɨ ndo sɨ̂ ŋweyn a Jèlusalèm a ilaʼ i Judà. 3Yì visi nô mɨ wul ɨ̀ Bôbo Fɨyini ɨ̀ kfà a yi antêynɨ̀ ta wù n-kôŋ sɨ kasi sɨ kfa wù kfa ndù a Jèlusalèm ilaʼ i Judà ɨ̀ bàʼlɨ̀ ndô Bôbo Fɨyini ɨ Fɨyini fɨ Isìlæ̀ fìfɨ̀ a fɨ n-ghɨ a Jèlusalèm. Mɨ n-jêm na Fɨyini fɨ àŋena fɨ na ghɨ ŋêyn àŋena. 4Nô mɨ ntèʼ ì kà zɨ̂ a ghelɨ Isìlæ̀ nɨn bu chi ateyn lvɨ̂yn, ghelɨ ntèʼ nâ ghì nɨn kelɨ sɨ fu aso ɨkwo a fɨfâ nɨ̀ a baŋnɨ-a sɨ̂ àŋena baʼsɨ̂ nɨ̀ ɨ̀fwo nɨ̀ nyamsɨ nɨ̀ tɨ̀fu tìtɨ̀ a tɨ làlì a àŋena tɨtèm na ghɨ baʼlɨ ndô Fɨyini ateyn a Jèlusalèm.
Ghelɨ Jûsɨ̀ ɨ baʼtɨ sɨ kasi sɨ kfa sɨ a Jèlusalèm.
5Fòyn ɨ fu adyaʼ tî ɨtu asas a ndo nɨ̀ Judà baʼsɨ̂ nɨ̀ Benjamìn nɨ̀ ngàŋsɨ ndô Fɨyinisɨ̀ nɨ̀ ghelɨ isas i ndo nɨ̀ Levì baʼsɨ̂ nô mɨ nɨ̀ ndà vzɨ̂ a Fɨyini fɨ̀ tàŋi a ŋweyn ikfàʼtɨ̀ na wù kfa, àŋena baʼtɨ sɨ kfa sɨ bàʼlɨ ndô Fɨyini a Jèlusalèm. 6Ghelɨ ghì a ghɨ nà n-chi baʼsɨ sɨ̂ àŋena nô ghɨ̀ jɨ̀m ɨ gàmtɨ̀ àŋena nɨ̀ ɨ̀fwo vzɨ̀ a ghɨ fàytɨ nɨ̀ àso ɨkwo a fifâ nɨ̀ ɨvzɨ̂ a ghɨ fàytɨ nɨ̀ àso ɨkwo a baŋnɨ-a nɨ̀ ɨ̀fwo ɨlvɨ nɨ̀ tɨ̀fu tìtɨ̀ a tɨ làlì a tɨ̂tem nɨ̀ àŋena nô tɨ̀ jɨ̀m. 7Fòyn Saylùs ɨ fvɨ̀sɨ gvi kɨmɨ nɨ̀ ɨ̀fwo ndo nɨ̀ Bôbo Fɨyini vzɨ̀ a Nèbùkànezà nɨn læ li lu nɨ̀ ɨ̀ŋweyn a Jèlusalèm ɨ gvi lèm a ndo afî a wu nà n-koʼsɨ Fɨyini fɨ ŋweynfɨ ateyn. 8Saylùs ɨ fòyn Bèsiyà nɨn læ bè a gvì Mitledàt ɨ wul ɨ vzɨ̀ a wù nà n-lêm ɨkwo, nɨ̀ ɨ̀fwo ateyn, ɨ taŋ taŋ ɨ fu sɨ̂ Sheshbazà ɨ wâyn ntoʼ Judà.
9-10À ti akôyn ɨfwo ateyn tèyn: Ɨkfaŋ vzɨ̀ a ghɨ n-faytɨ nɨ̀ àso ɨkwo a baŋnɨ-a nà n-ghɨ mɨ̀vɨm ɨ̀n tal, ɨvzɨ̂ a ghɨ n-faytɨ nɨ̀ àsɨ ɨkwo a fɨfâ ɨ ghɨ nkam, ɨkwaŋ ɨ ghaʼlɨnɨ vzɨ̀ a ghɨ faytɨ nɨ̀ àsɨ ɨkwo a fɨfâ ɨ ghɨ mɨ̀vɨm ɨ̀m bò nɨ̀ ɨ̀kfaŋ bulamòʼ, ɨkfaŋ ɨ ghaʼlɨnɨ vzɨ̀ a ghɨ faytɨ nɨ̀ àso ɨkwo a baŋnɨ-a ɨ ghɨ mɨ̀vɨm ɨ̀n tal, ɨkfaŋ ɨ ghaʼlɨnɨ alèlalel ɨ ghɨ ighɨ ì kæ̀ nɨ̀ ɨ̀kfaŋ ìvɨm baʼsɨ̂ nɨ̀ ɨ̀fwo ɨlvɨ nkam.
11Ɨfwo nâ wèyn nô ɨ̀ jɨ̀m a ghɨ n-faytɨ nɨ̀ àso ɨkwo a baŋnɨ-a baʼsɨ̂ nɨ̀ a fɨfâ nà n-chɨ̂yntɨ̀ ghɨ nkamsɨ̀ tâyn nɨ̀ ɨ̀fwo ighɨ ì kæ̀. Ghɨ n-lù sɨ a Babilòn ɨ se sɨ kfa a Jèlusalèm, Shèshbazà ɨ li kfa nɨ̀ ɨ̀fwo ateyn nô ɨ̀ jɨ̀m baʼsɨ̂ nɨ̀ ghelɨ ghì a ghɨ n-læ ghaytɨ ɨ lù nɨ̀ àŋena.