Deuteronomy 29

Mosìs ɨ bètɨ̀ Mɨ̀kâyn mɨ̀ Bôbo Fɨyini sɨ̂ Ghelɨ Isìlæ̀ a Mowàb

¹Akeynà nɨn ghɨ àwo a li-a kì a ghelɨ Isìlæ̀ nɨn kelɨ sɨ nì a Mowàb sɨ kfeynsɨ a mɨ̂kàyn ghè a àŋena nɨn læ yɨ ŋêyn Bôbo Fɨyini a Holèb.

²Mosìs nɨn læ meyn jàŋtɨ̀ ghelɨ Isìlæ̀ nô ghɨ̀ jɨ̀m, ɨ bè sɨ̂ àŋena na,

“Yi n-læ meyn yeyn awo kì a Bôbo Fɨyini nɨn læ ni sɨ̂ fòyn Ijìb ŋêyn ghelɨ ghɨ tisɨnɨ nɨ̀ ŋweyn baʼsɨ̂ nɨ̀ ìlaʼ i ŋweyni nô ì jɨ̀m.” ³Yi n-læ meyn yeyn tɨkoʼi tɨ bemnɨtɨ nɨ̀ àwo a kaynɨ-a nɨ̀ àwo ɨchfɨ̀ ɨ yumnɨ kì a Bôbo nɨn læ nì sɨ̂ ghelɨ Ijìb. ⁴Mɨtì, sɨ koʼ sɨ chem layn, Bôbo Fɨyini bû nì na yì yeyn kèli ìwo zɨ̀ a yi n-læ gàyn a Ijìb. ⁵Bôbo Fɨyini nɨn læ li zɨ, yi jèlɨ teynɨ a nse iyum sɨ a bèŋ mɨ̀vɨm ɨ̀n kæ̀, bula ndzɨsɨ timi bàsà a yi ɨwùyn, bula gvɨ àvɨ timî tèyna a yi avɨ̀. ⁶Yi n-bu læ nà kelɨ àfo sɨ yɨ, kelɨ wi sɨ nyvɨ, mɨtì Bôbo Fɨyini ɨ tòʼnɨ̀ nɨ̀ zɨ̀ ta ka yì keli na wù n-ghɨ Bôbo Fɨyini ɨ Fɨyini fifɨ.

⁷A n-læ nà ghɨ ta ghesɨ̀nà gvì chèm afêyn, Sihòn, ɨ fòyn Heshbòn, ŋêyn Ôg, ɨ fòyn Bashàn ɨ fvɨ̀ gvì sɨ nu ghesɨ̀nà mɨ̀tì ghesɨ̀nà tɨm yɨ àŋena, ⁸ɨ ghal ɨ fsɨ ilaʼ i àŋena ɨ fu sɨ̂ ghelɨ Lubèn, nɨ̀ ghelɨ Gâd, nɨ̀ ghelɨ Mànasè ghɨ li.

⁹Yì na faytɨ̂ yvɨnɨ̂ tɨ̀saʼ tɨ mɨ̂kàyn nâ tèyntɨ̀ nô tɨ̀ jɨ̀m ta ka awo à ki-a nô à jɨ̀m na jèlɨ̀ kɨ a jûŋ. ¹⁰Yi n-ti asɨ nɨ̀ Bôbo Fɨyini ɨ Fɨyini fifɨ layn kɨ ghɨ̀ jɨ̀m, nɨ̀ ghelɨ ghɨ tisɨnɨ nɨ̀ zɨ̀, baʼsɨ̂ nɨ̀ ghɨ̀lûmnɨ̀ nô ghɨ̀ jɨ̀m a Isìlæ̀, ¹¹nɨ̀ woyn ghi, nɨ ghɨ̀ki ghi, baʼsɨ̂ nɨ̀ ɨ̀tum vzɨ̀ a wu n-chi zɨ̂ àŋena, sɨ ɨ̀nkâʼ, tu mu sɨ̂ zɨ̀. ¹²Yi n-ghɨ afêyn layn sɨ yɨ mɨkâyn zɨ̂ Bôbo Fɨyini ɨ Fɨyini fifɨ, sɨ nà chi kɨ ta mɨ̀kâyn mɨ̀ àteyn bè, ¹³ta ka Bôbo Fɨyini li zɨ sɨ a woyn nɨ̀ ŋweyn, nà ghɨ Fɨyini fifɨ, kɨ ighel ta wù n-læ chfɨ̀nɨ sɨ̂ ghɨ̀bo ghi, ɨ Abɨ̀làhâm nɨ̀ Yisàk nɨ̀ Jàkôb. ¹⁴Mɨ̀kàyn nâ mèyn a yi n-yɨ layn tèyn baʼsɨ̂ nɨ̀ tɨ̀saʼ tɨ ateyn tɨ, nɨn ghɨ wi kɨ sɨ̂ zɨ̀. ¹⁵Mɨ̀kâyn mɨ̀ àteyn nɨn ghɨ sɨ̂ ghesɨ̀nà nô ghɨ̀ jɨ̀m ta ghɨ n-ti afêyn, ghɨ kɨmɨ sɨ̂ woyn ghesɨ̀nà ghì a ghɨ n-læ̀ jæ sɨ bzɨ.

¹⁶Yi n-kya dzɨ zɨ̀ a ghesɨ̀nà nɨn læ nà chi ateyn a Ijìb, kya ta ghesɨ̀nà nɨn læ lu ɨ jèl ɨ teynɨ chwò a tɨ̀laʼ tɨlitɨ. ¹⁷Yi n-yeyn meyn mɨyini ɨnyelɨnɨ̂ nɨ̀ àŋena ma ghɨ faytɨ nɨ̀ ɨ̀nkàʼ, ɨ̀n lì ɨ ghɨ ngòʼsɨ̀, ɨ̀n lì ghɨ ma ghɨ faytɨ nɨ̀ àso ɨkwo a baŋnɨ-a, ɨ̀n lì ɨ ghɨ ma ghɨ faytɨ nɨ̀ àso ɨkwo a fɨfâ. ¹⁸Yì na tòʼnɨ̀-à ka wùl, kèsa isas i ndo na ti zɨ̂ àŋena afêyn layn, læ̀ bèynlɨ̀ nà koʼsɨ̂ mɨyini mɨ̀ tɨ̀laʼ tɨ lûtɨ̀ a ghɨ wi Bôbo Fɨyini, ɨ Fɨyini fɨ ghesɨ̀nà. Ka yi n-læ̀ vìsi na ìnki ngœ̀ ìbɨ nâ zɨ̀ yam a yi antêynɨ̀.

¹⁹Yì na tòʼnɨ̀-à ka wùl ɨ̀ na ti afêyn layn, yvɨ mɨ̀kâyn nâ mèyn, nà kfâʼtɨ̀ na yì kàʼ a yì ndù nà nî àwo kì a yi n-kôŋ. À mòm mɨ ndà, a ngeʼ koli ŋweyn, ɨ̀ kòli ghelɨ Isìlæ̀ nô ghɨ̀ jɨ̀m kèsa à n-ghɨ wul ɨ̀ jùŋ, kèsa à n-ghɨ wul ɨ̀ bɨ. ²⁰Bôbo Fɨyini kàʼ wu bû læ̀ lèsɨ̀ fu ìnki wûl nâ yèynì. Bôbo Fɨyini nɨn kwo yabsɨ̂ ɨ̀toŋ sɨ̂ ŋweyn nô sɨ a ŋaŋ, a awo a bɨ-a kì a ghɨ nyàʼ a ŋwàʼlɨ̀ ìsaʼ afêyn nô à jɨ̀m koli ŋweyn, a Bôbo Fɨyini mesi ŋweyn baʼsɨ̂ kɨ nɨ̀ ìsas i ndo nɨ̀ ŋweyni. ²¹À mòm mɨ ndà ìnki iwo tì, a Bôbo Fɨyini choʼ fvɨ̀sɨ̀ ŋweyn sɨ antêynɨ̀ nɨ̀ ghelɨ Isìlæ̀, ɨ̀ màʼ ngeʼ sìsɨ̀ a ghɨ nyàʼ a ŋwàʼlɨ̀ ìsaʼ afêyn a ŋweyn atu sɨ a nchwæ sɨ̂ ghelɨ Isìlæ̀ nô ghɨ̀ jɨ̀m.

²²Woyn ghi ghì a ghɨ n-læ̀ koʼ ibàm nɨ̀ ɨ̀tum vzɨ̀ a wu læ̀ gvî a tɨ̂laʼ tɨ ndyèynsɨ̀ læ̀ yeyn ngeʼ sìsɨ̀ nɨ̀ tɨ̀koʼi tìtɨ̀ a Bôbo Fɨyini màʼ a yi ilaʼ. ²³Àŋena læ̀ yeyn na nse zɨ nɨn ghɨ ma yì befɨ meyn, ɨ̀ luyn kɨ nɨ̀ ngòʼsɨ baŋnɨ sɨ lisɨ ghɨ toŋtɨ̂ nà solfò, baʼsɨ̂ nɨ̀ fɨ̀ngvaŋfɨ, ma ghɨ kàʼ ghɨ bû fì tòʼ àfo a gvêyn, nô mɨ nkàyn àfùʼ ɨ bu fì koʼ wi ateyn. Ilaʼ ì ì zɨ-i na sɨ ghɨ kɨ ta ntèʼ Sodòm nɨ̀ Gòmolà, nɨ̀ ntèʼ Admà nɨ̀ Zeboyìm zɨ̀ a Bôbo Fɨyini nɨn læ yabsɨ ɨtoŋ ɨtuʼ ghê tì ɨ bebsɨ. ²⁴Mbzɨ ì jɨ̀m læ̀ nà bɨf kɨ na, “Bôbo Fɨyini ti mòm ìwo yèynì ilaʼ afêyn tèyn bòm ghà? Ɨtoŋ ŋweyn ti bɨ̂ yàf têyn bòm ghà?”

²⁵A ibêynsɨ̀ ateyn i na ghɨ kɨ na, “À n-ghɨ bòm ta àŋena kòl isaʼ i mɨ̂kàyn zɨ̂ a Bôbo Fɨyini, ɨ Fɨyini fɨ ghɨ̀bo àŋena, nɨn læ yɨ ŋêyn àŋena, ɨtuʼ ta wu n-læ fvɨ̀sɨ àŋena sɨ a Ijìb. ²⁶Àŋena ti meyn bèynlɨ̀ nà sɨ koʼsɨ̂ mɨyini ɨn lì kya wi nɨ̀ ɨ̀mêyn, ɨ mɨyini ma Bobo Fɨyini nɨn læ meyn tuynsɨ na ka àŋena læ̂ kòʼsɨ. ²⁷À ti iwo zɨ̀ a ɨtoŋ Bôbo Fɨyini yaf, wù maʼ ndòyn zɨ̂ a ghɨ nyàʼ a ŋwàʼlɨ̀ ìsaʼ afêyn, a àŋena atu. ²⁸Ɨtoŋ Bôbo Fɨyini ti meyn bàŋ, wù sâŋ fvɨ̀sɨ̀ àŋena sɨ a ilaʼ nɨ̀ àŋena, ɨ̀ làŋ àŋena nô ilaʼ atum afêyn a àŋena nɨn ghɨ ateyn lvɨ̂yn tèyn.”

²⁹Mosìs nɨn læ meyn bè na, “Awo a li-a nɨn ghɨ bula Bôbo Fɨyini bê bàynsɨ sɨ̂ ghesɨ̀nà, mɨtì wù dyeyn meyn bàynsɨ ìsaʼ i ŋweyn sɨ̂ ghesɨ̀nà. Gesɨ̀nà nɨ̀ woyn ghesɨ̀nà nɨn kelɨ sɨ nà lêm isaʼ i ŋweyni nô ì jɨ̀m nô ta ka ghɨ̀ læ̂ ghɨ̀.”