Deuteronomy 28

Iboysɨ zɨ̀ a wùl nɨ̀n yvɨnɨ isaʼ i Fɨyini, a wù keli

¹Mosìs nɨn læ meyn bè sɨ̂ ghelɨ Isìlæ̀ na, “Yì kæ sɨ nà yvɨnɨ̂ Bôbo Fɨyini, ɨ Fɨyini fifɨ, lêm tɨ̀saʼ tɨ ŋweyn tìtɨ̀ a mà fù sɨ̂ zɨ̀ layn kɨ tɨ̀ jɨ̀m, a wù nì a yì na ngaŋtɨ̂ chwo nô mɨ ìlaʼ ì kà a mbzɨ. ²Yì kæ nà yvɨnɨ Bôbo Fɨyini, ɨ Fɨyini fifɨ, a wù fu ɨfwo ɨ jûŋ wèyn sɨ̂ zɨ̀ nô ɨ̀ jɨ̀m.”

³Bôbo Fɨyini nɨn boysɨ̂ ntèʼ sisɨ, ɨ̀ bòysɨ gvêyn sisɨ.

⁴Bôbo Fɨyini nɨn boysɨ̂ zɨ̀ nɨ̀ woyn kɨ̀ sɨ a idvɨ̀, ɨ̀ boysɨ zɨ̀ nɨ̀ ɨ̀fwo ɨ yɨnɨ kɨ sɨ a idvɨ̀, ɨ̀ bòysɨ zɨ̀ nɨ̀ nyamsɨ mbòloʼsɨ baʼsɨ̂ nɨ̀ njìsɨ̀ kɨ̀ sɨ a idvɨ̀.

⁵Bôbo Fɨyini nɨn boysɨ̂ zɨ̀ nɨ̀ àsaŋ a, a yì na wo wi afo sɨ yɨ.

⁶Yì læ̀ nà lêm àwu à ki-a nô mɨ ghà, yi nà ndû kɨ nɨ̀ àsɨ-a.

⁷Bôbo Fɨyini nɨn ni-à a yì tɨm yɨ mbàynɨ̀ sisɨ. Àŋena na gvì sɨ nu zɨ, jelɨ̀ avɨ àmòʼ, ghɨ bèynlɨ̀ nɨ̀ ìnyɨŋ i, nô mɨ ndà ɨ nà nyɨŋ leʼ ndù kɨ a kɨ ŋweyn abâs à.

⁸Bôbo Fɨyini nɨn boysɨ̂ zɨ̀, ɨ̀ lùynsɨ tɨ̀kâŋ titɨ nɨ̀ ɨ̀fwo ɨ yɨnɨ, ɨ̀ bòysɨ nô mɨ ghà ta yi n-nî. Wu n-boysɨ̂ zɨ̀ a ilaʼ nâ ghàyn a wù fù sɨ̂ zɨ̀ têyn.

⁹Bôbo Fɨyini nɨn boysɨ̂ zɨ̀, a yì na ghɨ ghelɨ ŋweyn sɨ a nyɨŋ, kɨ̀ ighel ta wu n-læ chfɨ̀nɨ, ɨlvɨ ta yi n-yvɨnɨ ŋweyn lêm tɨsaʼ tɨ ŋweyn nô tɨ̀ jɨ̀m. ¹⁰Wu n-ni à, a ghelɨ ghɨ̀ jɨ̀m a mbzɨ yeyn na yi n-ghɨ woyn ŋweyn, nà fâyn zɨ̀. ¹¹Bôbo Fɨyini nɨn fu woyn sɨ̂ zɨ̀ kɨ̀ sɨ a idvɨ̀, ɨ̀ fu ɨfwo ɨ yɨnɨ kɨ̀ sɨ a idvɨ̀, ɨ̀ fu nyamsɨ kɨ̀ sɨ a idvɨ̀ a ilaʼ nâ ghàyn a wù fù sɨ̂ zɨ̀ têyn, kɨ̀ ighel ta wu n-læ chfɨ̀nɨ sɨ̂ ghɨ̀bo ghi.

¹²Bôbo Fɨyini ɨ nì nà suʼsɨ ìvɨ kɨ̀ ɨlvɨ, boysɨ̂ ìfêl awu nɨ̀ zɨ̀. Tɨlaʼtɨ læ̀ nà sam ɨ̀fwo sɨ̂ zɨ̀ kɨ̀ sɨ a idvɨ̀ mɨtì a yì læ̂ faŋ tɨ̀ sam afo sɨ̂ wùl. ¹³Bôbo Fɨyini nɨn ni-à, a yì na saʼ tɨ̀laʼ kɨ sɨ a idvɨ̀ mɨtì a nô ìlaʼ i læ̂ faŋ tɨ̀ saʼ zɨ. Yì læ̀ nà ghalɨ nô mɨ ghà sɨ nì, yi nà ndû kɨ nɨ̀ àsɨ-a. Iwo i nɨn ghɨ wi a ka yì læ̀ ghalɨ sɨ nì a yi fe ɨlvɨ ta yi n-lêm tɨsaʼ tɨ Bôbo Fɨyini tèyntɨ a mɨ n-fu sɨ̂ zɨ̀ layn tèyn nô tɨ̀ jɨ̀m. ¹⁴Ka yi n-læ̀ chas nô ìsaʼ ìmòʼ antêynɨ̀ tɨ̀saʼ afêyn a mà fù sɨ̂ zɨ̀ layn tèyn. Ka yî n-læ̀ vìsi Bôbo Fɨyini fifɨ, ɨ̀ ndù nà koʼsɨ̂ mɨyini ɨn lì, felɨ̀ sɨ̂ ɨ̀mêyn.

Ndòyn zɨ̂ a wùl ɨ̀ faŋ tɨ̀ yvɨ̀nɨ isaʼ Fɨyini a wù keli

¹⁵Mosìs nɨ̀n fi meyn bè sɨ̂ ghelɨ Isìlæ̀ na, “Wùl ɨ̀ kæ faŋ tɨ̀ yvɨ̀nɨ Bôbo Fɨyini, ɨ Fɨyini fifɨ, ɨ̀ faŋ tɨ̀ lèm tɨsaʼ tɨ ŋweyn tèyntɨ̀ kɨ tɨ̀ jɨ̀m a mà fu sɨ̂ zɨ̀ layn tèyn, a ndòyn koli ŋweyn.”

¹⁶Yì faŋ tɨ̀ lem tɨsaʼ nâ tèyntɨ̀, a Bôbo Fɨyini te ntèʼ sisɨ, ɨ̀ bèbsɨ nse, ¹⁷a ɨfwo ɨ yɨnɨ na bu fì koʼ wi ateyn, yi bu kelɨ wi afo sɨ yɨ.

¹⁸Bôbo Fɨyini nɨn te zɨ̀ a yì na bu fì kelɨ wi woyn sɨ a idvɨ̀, bu kelɨ wi ɨfwo ɨ yɨnɨ nɨ̀ nyamsɨ mbòloʼsɨ baʼsɨ̂ nɨ̀ njìsɨ̀ sɨ a idvɨ̀.

¹⁹Yì læ̀ nà lêm àwu à ki-a nô mɨ ghà, yi nà ndû kɨ nɨ̀ ìbam i.

²⁰Yì kæ sɨ ni mbɨ, ɨ̀ chàsɨ̀ Bôbo Fɨyini, a wù maʼ ndòyn a yi atu ɨ̀ nì a yì jiŋi, nà ghalɨ nô mɨ ghà sɨ nì, yi nà ndû kɨ nɨ̀ ìbam i, nô ta ka yì læ̂ kfɨ̀tɨ mèsì. ²¹Bôbo Fɨyini nɨn màʼ tɨkoʼi a yi ɨwùyn, a tɨ faŋ kɨ̀ faŋ nô ta ka yì kfɨtɨ mæ̀ nô ghɨ̀ jɨ̀m sɨ a ilaʼ nâ ghàyn a yi ndû sɨ lì sɨ nà chi ateyn tèyn. ²²Bôbo Fɨyini nɨn maʼ tɨ̀koʼi tɨ dyaŋnɨtɨ a yi ɨwuyn, ɨ̀ màʼ agvɨl ato-a ɨ̀ màʼ ɨ̀lwêʼ ɨ lûmnɨ̀ baʼsɨ̂ nɨ̀ ìkoʼi a ɨfwo ɨ yɨnɨ nɨ̀ zɨ̀, a yì læ̂ lufɨ kɨ nɨ̀ tɨ̀koʼi tɨ ateyn tɨ têyn, ɨ̀ kfɨ̀tɨ mèsì. ²³Bôbo Fɨyini nɨn nì-à a nô ìsɨ ivɨ i na bu fì chem wi a nse, a nse na to kɨ tèyn nteŋ, ²⁴abɨl à ɨ ghɨ kɨ ɨlwêʼ ɨ̀ jɨ̀m baʼsɨ̂ nɨ̀ àsese a, suʼî kɨ a yi atu tèyn ta ivɨ, nô ta ka yì læ̂ kfɨ̀tɨ mèsì.

²⁵Bôbo Fɨyini nɨn ni-à a mbàynɨ̀ sisɨ tɨm yɨ̀ zɨ, a yì na seʼ ìwoŋ avɨ àmòʼ, yi bèynlɨ̀ nɨ̀ ìnyɨŋ i, nô mɨ nda nà nyiŋ leʼ ndù kɨ akɨ ŋweyn a abâs à. A tɨlaʼ tɨ mbzɨ tɨ yeyn iwo zɨ̀ a yi n-gâyn sɨ̂ zɨ̀ nà faynà. ²⁶Yi nì kfɨtɨ à, a mɨ̀nyûyn baʼsɨ̂ nɨ̀ nyamsɨ ɨtwaʼsɨ na kfɨlɨ tɨ̀gvɨyn titɨ, wùl ɨ ghɨ wi sɨ nà saŋà. ²⁷Bôbo nɨn màʼ mɨ̀mɨ a yi ɨwùyn kɨ̀ ta wu n-læ màʼ ɨwuyn nɨ̀ ghelɨ Ijìb, ɨ̀ màʼ ɨ̀dzɨ̀ nɨ̀ nkàysɨ̀ nɨ̀ ànyùsà a yi ɨwùyn, ma wùl kàʼ wu bû chuʼ. ²⁸Bôbo Fɨyini nɨn nì-à a tɨtof titɨ leʼ, ɨ̀ nì a yì na bu yeyn wi ɨlwêʼ, ɨ̀ fì nì a yì jiŋi, nà bu kya wi nô ìwo. ²⁹Wu nì-à a à na nî nà ghɨ nô mɨ nɨ̀nchuè, yi mômtɨ̀ ɨ̀lwêʼ ta ànfèf, ghalɨ nô mɨ ghà sɨ nì, yi nà ndû kɨ nɨ̀ ìbam i. Ghɨ nì nà nyâblɨ̀ nɨ̀ zɨ̀, fî choŋ ɨ̀fwo vzɨ kɨ̀ mɨchi ɨ̀n jɨ̀m, mɨtì wùl ɨ ghɨ wi sɨ gàmtɨ̀ zɨ.

³⁰Wùl sɨ̂ zɨ̀ na fu àfo atu nɨ̀ wul ɨ wi, wùl ɨ wûlù ɨ ghal ɨ chi nɨ̀ ŋweyn sɨ adyaʼ, bàʼlɨ̀ nô mɨ ndo, wù bû læ̀ chi ateyn, fèlɨ̀ mɨ gveyn, wù bû læ̀ ghàyn afo ateyn. ³¹Ghɨ na ghalɨ sɨ nyâm sisɨ kɨ̀ a yi asɨ mɨtì yi ghɨ wi sɨ kfɨl nô fɨ̀kaʼlɨ̂ ateyn. Ghɨ na ghalɨ fsɨtɨ̂ njàkây sisɨ sɨ adyaʼ bu fì kasî fu wi sɨ̂ zɨ̀, mbàynɨ̀ sisɨ ɨ ghalɨ fsɨtɨ̂ njɨ̀ sisɨ, wùl ɨ ghɨ wi sɨ gàmtɨ zɨ. ³²Bôbo Fɨyini nɨn ni-à a ɨtum na lî woyn ghi ghɨ lûmnɨ̀ nɨ ghɨki sɨ a ɨkòs kɨ̀ nô a yi asɨ, yi nà kfâʼ mbzɨ mɨchi ɨ̀n jɨ̀m, mɨtì kelɨ wi iwo sɨ bè, ma yì kaʼ yi bû tùynsɨ. ³³Ghelɨ ghɨ li bula yi timi nà kya nô mɨ àŋena, na ghayn ɨ̀fwo vzɨ, ma à fèlɨ̀ kɨ̀ nô zɨ̀ nɨ̀ ɨ̀wu vzɨ, yi kelɨ wi iwo i li sɨ nì, a bu kɨ na àŋena na nyàblɨ̀ nɨ̀ zɨ̀ kɨ̀ mɨchi ɨ̀n jɨ̀m. ³⁴Yi n-yeyn àwo a kɨ ni a itof ì zɨ-i leʼ, ³⁵a Bôbo Fɨyini maʼ mɨmɨ a yi ɨwùyn kɨ̀ sɨ zɨ̀tɨ̀ atu sɨ kàlì sɨ chem a ɨvɨ̀ ma wùl ɨ̀ kàʼ wu bû chuʼ.

³⁶Bôbo Fɨyini ɨ nì ni-à, a mbàynɨ̀ sisɨ ghalɨ zɨ baʼsɨ̂ nɨ̀ fòyn vzɨ ɨ̀ ndù nɨ̀ zɨ̀ ilaʼ atum, bula ghɨ̀bo ghi timi nà kya, bula yi timi nà kya, a yì ndu na koʼsɨ̂ mɨyini ɨ̀n lì afu ma ghɨ faytɨ nɨ̀ ɨ̀nkàʼ, nɨ ɨ̀n lì ma ghɨ faytɨ nɨ̀ ngòʼsɨ̀. ³⁷Bôbo Fɨyini na nì-à mbàynɨ̀ sisɨ ghal ɨ̀ ndù nɨ̀ zɨ̀ nô mɨ ilaʼ ì kà, ghelɨ ateyn nà wêysɨ̀ zɨ̀ fî kayn kɨ nô na à n-gâyn ghà sɨ̂ zɨ̀ a.

³⁸Yì na tòʼ ɨ̀fwo a gvêynsɨ̀ kɨ̀ sɨ idvɨ̀, mɨtì ngumisɨ ɨ kfɨl yi kfi kɨ sɨ ilæ, ³⁹tôʼ gɨ̀lêbsɨ̀, yi nà faytɨ-à, mɨtì ɨ læ faŋ tɨ̀ kœ̀ nô fɨ̀tam sɨ kam mɨlûʼ ateyn sɨ nyvɨ, ma ɨ̀ngèʼ kfɨlɨ meyn nô mɨ ghà. ⁴⁰Ɨ̀nkàʼ mɨ̀ olìfsɨ̀ na ghɨ kɨ ilaʼ ì zɨ-i ì jɨ̀m, mɨtì yi kelɨ wi mɨvɨl mɨ̀ olìf sɨ yisi ɨwuyn ateyn bòm ta mɨ̀tam mɨ̀ àteyn na yàlà bula mɨ̀ to. ⁴¹Yì na bzɨ̂ woyn, mbàynɨ̀ sisɨ ghaytɨ lù nɨ̀ àŋena sɨ ɨkòs yi nà kelɨ wi. ⁴²Ngumisɨ ɨ nì kfɨlɨ mèsì ɨnkâʼ mzɨ̂ nô ɨ̀n jɨ̀m sɨ a yi a gvêynsɨ̀, baʼsɨ̂ nɨ̀ ɨ̀fwo vzɨ̀ a yì tòʼ a yi a gvêynsɨ̀ nô ɨ̀ jɨ̀m.

⁴³Ghelɨ ɨtum ghì a ghɨ n-chi a yi ilaʼ ɨ nì nà lemâ kɨ lema, fî kelɨ àdyaʼ chwô zɨ̀, mɨtì yi fê ndû kɨ ndu, ⁴⁴àŋena ɨ samsɨ ɨ̀kwo sɨ̂ zɨ̀, mɨtì yi kelɨ wi afo sɨ samsɨ sɨ̂ wùl. Àŋena læ̀ nà ghɨ ghelɨ ghɨ tisɨnɨ yi jelɨ̀ kɨ isas isaʼ nɨ̀ àŋena.

⁴⁵Ngeʼ nâ sèynsɨ̀ nô sɨ̀ jɨ̀m læ̀ faŋ kɨ̀ faŋ a yi atu nô ta ka yì læ̂ kfɨ̀tɨ mèsì bòm ta yì faŋ tɨ̀ yvɨ̀nɨ isaʼ zɨ̀ a Bôbo Fɨyini ɨ Fɨyini fifɨ fù sɨ̂ zɨ̀. ⁴⁶Awo nâ kèynà læ̀ gâyn sɨ̂ zɨ̀ sɨ a nchwæ sɨ dyèyn ɨtoŋ ɨ yafɨnɨ nɨ̀ Bôbo Fɨyini sɨ̂ zɨ̂ woyn ghi kɨ̀ sɨ a mɨlvɨ ɨ̀n jɨ̀m. ⁴⁷Bôbo Fɨyini boysɨ meyn zɨ̀ kɨ̀ dzɨ sɨ̀ jɨ̀m mɨtì yi na koʼsɨ̂ wì ŋweyn nɨ̀ ìsaŋlɨ i, nɨ̀ àtem à ki-a à jɨ̀m à. ⁴⁸Wu nì-à, a mbàynɨ̀ sisɨ gvi nù yɨ zɨ, ɨ̀ lì zɨ̀ a yì na fèlɨ̀ àkôs sɨ̂ àŋena. Jèŋ læ̀ yafɨ zɨ̀, a ɨtoŋ mu yumtɨ zɨ, a yì na kelɨ wi ndzɨsɨ sɨ màʼ, kelɨ wi nô àfo a li-a. Bôbo Fɨyini læ̀ ni-à a yì faŋ kɨ̀ sɨ a ɨkòs nô ta ka yì læ̂ kfɨ.

⁴⁹Bôbo Fɨyini læ̀ ni-à a ilaʼ i lu nô a ndyèyn gvì kèʼ zɨ̀, ɨ̀ sùʼi a yi atu ta awumawum, yi kya wi itaŋi àŋena, ⁵⁰a ghɨ ghelɨ bema, kelɨ wi ikoynsɨ isuyn sɨ̂ woyn ghɨ bolɨ kèsa sɨ̂ ghɨ̀lema. ⁵¹Ghelɨ ateyn læ̀ kfɨlɨ mèsì nyam sisɨ, ɨ̀ yɨ mèsì ɨ̀fwo ɨ yɨnɨ nɨ̀ zɨ̀, a yì kfɨ jeŋ. Àŋena læ̀ mesì ɨ̀fwo ɨ yɨnɨ nɨ̀ zɨ̀, mèsì mɨ̀lûʼ mzɨ̂, mèsì mɨ̀vɨl mɨ̀ olìfsɨ̀ nɨ̀ zɨ̀, mèsì nyamsɨ mbòloʼ nɨ̀ zɨ̀, baʼsɨ̂ nɨ̀ njɨ̀ sisɨ, a yì kfɨtɨ nô ghɨ̀ jɨ̀m. ⁵²Àŋena læ̀ jɨŋ kalɨ ntèʼ sisɨ nô sɨ̀ jɨ̀m a ilaʼ nâ ghàyn a Bôbo Fɨyini ɨ Fɨyini fifɨ nɨn fu sɨ̂ zɨ̀ têyn, ɨ̀ tɨm yɨ̀ zɨ, ɨ̀ bɨ̀ytɨ̀ mbàyn itonɨ zɨ̀ a yì bom jɨ̀ŋ kal nɨ̀ ntèʼ sisɨ ateyn.

⁵³Mbàynɨ̀ sisɨ læ̀ jɨ̂ŋ kalî ntèʼ sisɨ, a yì na bu fì kelɨ wi afo sɨ yɨ, ɨ̀ kàsi nà sɨ kfɨlɨ woyn ghì a Bôbo Fɨyini fù sɨ̂ zɨ̀. ⁵⁴Nô mɨ wul ɨ̀ jùŋ a yi antêynɨ̀ læ̀ nà kelɨ wi ikoynsɨ isuyn sɨ̂ wâyna ŋweyn kèsa sɨ̂ wî ŋweyn nɨ̀ woyn ŋweyn ghì a ghɨ bu chi. ⁵⁵Wù læ̀ nà sɨ wayn ɨ̀ se sɨ kfɨl wù bû fù nô mɨ wî ŋweyn nɨ̀ woyn bòm ta wù bu kelɨ wi afo sɨ yɨ nô sakos bòm ànjɨ̀ŋ kì a mbàynɨ̀ sɨ ŋweynsɨ we ŋweyn ateyn. ^56-57Nô mɨ wùl ɨ wi ɨ̀ jùŋ vzɨ̀ a wù n-ghɨ a yi antêynɨ̀ bula wù timi tom avɨ a ŋweyn a nse ɨ̀ fèl àfo læ̀ nî kɨ ighel ta lûm ŋweyn nì. Mbàynɨ̀sɨ̀ læ̀ jɨ̂ŋ kalɨ ntèʼsɨ àŋena a jeŋ na yafɨ ŋweyn wù bzɨ wayn wu nyaʼtɨ kfɨl wayn àteyn baʼsɨ̂ kɨ nɨ̀ ɨ̀fwo wayn. Wù læ̀ nà se sɨ kfɨl wù bû gwòtɨ̀ fù lûm ŋweyn kèsa woyn ŋweyn ghì a ghɨ bu chi.

⁵⁸Mosìs nɨn læ meyn bè sɨ̂ ghelɨ Isìlæ̀ na, “Yì kæ faŋ tɨ̀ yvɨ̀nɨ tɨsaʼ tɨ Bôbo Fɨyini nâ tèyntɨ̀ nô tɨ̀ jɨ̀m, ɨ̀ faŋ tɨ̀ ngvɨ̀mlɨ izɨyn i Bôbo Fɨyini, ɨ Fɨyini fifɨ, ⁵⁹a wù tum tɨkoʼi tɨ bemnɨtɨ a tɨ faŋ sɨ̂ zɨ̂ woyn ghi, ma ghɨ kàʼ ghɨ bû læ̀ chuʼ.” ⁶⁰Wu læ̀ mâʼ tɨ̀koʼi tɨ bemnɨ tìtɨ̀ a yi ɨwuyn a wu n-læ màʼ a Ijìb yi nà faynà, a yì læ̂ faŋ tɨ̀ fì tɨ̀ to. ⁶¹Yì faŋ tɨ̀ yvɨ̀nɨ tɨsaʼ tɨ Bôbo nâ tèyntɨ̀, a wù tum kɨ̀mɨ tɨ̀koʼi tɨ bemnɨ tɨlitɨ nɨ̀ àwo a bemnɨ-a a li-a bula ghɨ nyâʼ a ŋwàʼlɨ̀ tɨsaʼ afêyn a mà fù sɨ̂ zɨ̀ layn tèyn, nô ta ka yì læ̂ kfɨ̀tɨ ɨ̀ mæ̀. ⁶²Yì faŋ tɨ̀ yvɨ̀nɨ Bôbo Fɨyini ɨ Fɨyini fifɨ a yì læ̂ kfɨ̀tɨ ɨ̀ faŋ kɨ̀ sɨ ilæ nô mɨ ta yi n-dvɨ̂ ta mɨnjêyn iyvɨ. ⁶³Kɨ̀ ighel ta Bôbo Fɨyini nɨn kôŋ sɨ nì na anôyn à ki-a dvɨ, yi ghalɨ nô mɨ ghà yi ndû kɨ nɨ̀ àsɨ-a, nɨn ghɨ kɨmɨ ighel ta wù læ̀ bebsɨ zɨ. Wù læ̀ fvɨsɨ̀ zɨ̀ sɨ a ilaʼ nâ ghàyn a yi n-zɨ ndû sɨ lì tèyn.

⁶⁴Bôbo Fɨyini læ̀ sasɨ̀ zɨ̀, a yì ndu kɨ̀ tɨlaʼ tɨ̀ jɨ̀m atu nse afêyn, jelɨ̀ koʼsɨ̂ mɨyini ma ghɨ faytɨ nɨ̀ ɨ̀nkàʼ, nɨ ɨ̀n lì ma ghɨ faytɨ nɨ̀ ngòʼsɨ̀, a ghɨ mɨyini bula ghɨ̀bo ghi timî nà kya, bula yi timi nà kya. ⁶⁵Yì læ̀ nà ndû nô mɨ wo, kelɨ wi mbôynɨ̀, kelɨ wi alêʼ a ngeŋ nɨ̀ zɨ̀. Bôbo Fɨyini læ̀ ni-à, a yì na kelɨ mɨ̀tem ɨ̀n lumnɨ̂, iwo i juŋì ɨ ghɨ wi sɨ̂ zɨ̀, yi kya wi na yi n-ndû wo dzɨ a. ⁶⁶Yì læ̀ nà lum chî kɨ nɨ̀ ìkfâʼ i mbzɨ-i, fâyn kɨ na mbàynɨ̀ sisɨ nɨn gvì zuetɨ̂ zɨ̀. ⁶⁷Yì læ̀ nà faynà bòm àwo kì a yi n-yeyn, ɨtuʼ kfa jɨ, yi dzɨ̀ na ndà kya ndà ma à n-ghɨ nɨ̀nchuè a, ɨtuʼ nî bɨsɨ layn, yi dzɨ̀ na, ndà kya ndà ma à n-ghɨ nɨ̀ntuʼ a? ⁶⁸Bôbo Fɨyini læ̀ kasî lî ndù nɨ̀ zɨ a Ijìb a ngùʼsɨ, nô mɨ ta wu n-læ bè na wù læ̀ visî wì na yì kasi ndù a Ijìb. Yì læ̀ kasî ndu-à nà dzɨ na mbàynɨ̀ sisɨ li zɨ sɨ a ɨkòs mɨtì wùl ɨ bu fì kôŋ wì sɨ li zɨ.