Deuteronomy 20

Tɨsaʼ kûm dzɨ zɨ̀ a ka ghɨ na tɨm ìwoŋ ateyn

¹Mosìs nɨn læ meyn bè sɨ̂ ghelɨ Isìlæ̀ na, “Yi na seʼ sɨ nu mbàynɨ̀ sisɨ, ɨ̀ yeyn àŋena kelɨ nyamsɨ kfaŋ, nɨ̀ mɨ̀nchaʼ mɨ̀ ìwòŋ, nɨ̀ sugèyʼsɨ̀, chwô zɨ̀, ka yi n-fàyn bòm ta Bôbo Fɨyini, ɨ Fɨyini fifɨ fì a fɨ n-læ fvɨ̀sɨ zɨ a Ijìb nɨn ghɨ zɨ̂ àŋena.” ²Sugèyʼ sisɨ ndû tìmi ɨchfɨ iwòŋ, ngàŋ ndô Fɨyini ɨ fvɨ̀ ɨ timi ɨ tebtɨ àŋena, ³ɨ bè na, “Yì yvɨtɨ a ghelɨ Isìlæ̀, yi n-nseʼ layn sɨ nu mbàynɨ̀ sisɨ, ka mɨ̀têm mzɨ̂ na lùmà, ka yì na fàynà, ka yi n-vìsi na àŋena faynsɨ zɨ nô sakos. ⁴Bôbo Fɨyini, ɨ Fɨyini Fifɨ, nɨn ndû a yi asɨ, ghɨ sɨ nu mbàynɨ̀ sisɨ, sɨ gàmtɨ zɨ na yì tɨm yɨ àŋena.”

⁵Ngàŋ ndô Fɨyini taŋi mesì, ghelɨ ghɨ tisɨnɨ ɨ bè sɨ̂ sugèyʼsɨ̀ na, “Wùl ɨ̀ na ghɨ afêyn ma wù baʼlɨ meyn ndo nà bu duʼ tɨ̀ lèm ndo àteyn sɨ a nyɨŋ sɨ̂ Bôbo Fɨyini, wu kasi kfa, bu tì wù ndû kfɨ ɨtwaʼ iwòŋ, a wùl ɨ wûlù gvi lèm ndo àteyn sɨ a nyɨŋ sɨ̂ Bôbo. ⁶Wùl na ghɨ afêyn kelɨ gvêyn gɨ̀lebsɨ̀ bu duʼ tɨ̀ zɨ̀tɨ̀ sɨ kœ̀, wu kasi nà kfâ bù tì wù kfɨ ɨtwaʼ iwòŋ, a wùl ɨ wûlù gvi nà kœ à. ⁷Wùl na ghɨ afêyn ma wù fu meyn àfo atu nɨ̀ wul ɨ wi, wu kasi nà kfâ, bu tì wù kfɨ ɨtwaʼ iwòŋ, a wùl ɨwû lù gvi lì wul ɨ wi àteyn.” ⁸Ghelɨ ghɨ tisɨnɨ ateyn nî ghɨ fi be na, “Wùl ɨ̀ na ghɨ afêyn, atem a ŋweyn a ɨ lumà, wu faynà, wu kasi nà kfâ bu tì a wù ni a ghelɨ ghɨ li na sɨ boŋ fàynà.” ⁹Ghelɨ ghɨ tisɨnɨ taŋî mesì sɨ̂ sugèyʼsɨ̀ nô mɨ ɨlvɨ gha, ghɨ choʼtɨ ɨ̀tu sugèyʼsɨ̀ vzɨ̀ a ka wu na tisɨ̂ ìnôyn i sugèyʼsɨ̀.

¹⁰Yi ndû sɨ nu nô mɨ ntèʼ ì kà, yi bɨf sɨ̂ ghelɨ ateyn na àŋena nɨn kɨŋ ìnû ma . ¹¹Àŋena kæ fsɨsɨ zɨ nɨ̀ mbôynɨ̀ ɨ̀ dzɨ̀sì ɨ̀chfɨ mbàyn na yì zɨ a ntèʼ afu, a ghelɨ ntèʼ nâ ghì nô ghɨ̀ jɨ̀m nà sɨ ghɨ kɨ ɨ̀kôs sɨ̂ zɨ̀, yi kaynà, àŋena felɨ̀ sɨ̂ zɨ̀. ¹²Mɨtì yi ndû a ntèʼ, ghelɨ ateyn faŋ tɨ̀ fsɨ̀sɨ zɨ nɨ̀ mbôynɨ̀, nà kɨŋ sɨ nu zɨ, yi nù ntèʼ àteyn. ¹³Bôbo Fɨyini ɨ Fɨyini fifɨ nî fu ntèʼ àteyn a yi awu, yi zuetɨ ghɨ̀lûmnɨ̀ a ntèʼ afu nô ghɨ̀ jɨ̀m. ¹⁴Yi zuetɨ ghɨ̀lûmnɨ̀, yi lì ghɨ̀kì àŋena, nɨ̀ woyn, nɨ̀ nyamsɨ, baʼsɨ̂ nô mɨ nɨ̀ ghà a ntèʼ afu, sɨ ɨfwo a yì yɨ iwòŋ, a ghɨ ɨ̀fwo ma à fù Bôbo Fɨyini na à na kelɨ kɨ nô zɨ̀. ¹⁵À ti ta kà yì na nì sɨ̂ ntèʼ sîsɨ̀ a sɨ n-baʼsɨ wi a ilaʼ afî a yi ndû sɨ zɨ ateyn tèyn.

¹⁶Mɨtì yi tɨm yɨ ntèʼ ilaʼ afî a Bôbo Fɨyini ɨ Fɨyini fifɨ fù sɨ̂ zɨ̀, yi zue nô mɨ ghà zue ateyn. ¹⁷Yi n-kelɨ sɨ zuetɨ ghelɨ Hît nɨ̀ ghelɨ Amò kɨ̀mɨ nɨ̀ ghelɨ Kenàn, nɨ̀ ghelɨ Belìz, kɨ̀mɨ nɨ̀ ghelɨ Hîv, baʼsɨ̂ nɨ̀ ghelɨ Jebùs nô ghɨ̀ jɨ̀m kɨ̀ ighel ta Bôbo Fɨyini bè. ¹⁸Yì kæ faŋ tɨ̀ zuètɨ, a àŋena yeʼi zɨ, a yì na, koʼsɨ̂ mɨyini mɨ̀ àŋena a ghɨ ìwo i chaʼnɨnɨ-i asɨ nɨ̀ Bôbo Fɨyini ɨ Fɨyini fifɨ.

¹⁹Yi ndû sɨ nù sɨ fsɨ ntèʼ, inû ateyn i dyêf, yi nà kfɨlɨ gɨ̀lêb sìsɨ̀ a sɨ n-ghɨ a ntèʼ afu, ka yi n-gvèytɨ̀ ɨ̀nkâʼ mɨ̀ àteyn bòm ta ɨ̀nkàʼ nâ mzɨ̀ nɨn ghɨ wi mbàynɨ̀ sisɨ. ²⁰Yì kàʼ a yì gvel ɨnkâʼ mzɨ̀ a ghɨ n-kfɨlɨ wi mɨtam mɨ̀ àteyn, ɨ̀ fàytɨ ɨ̀fwo iwòŋ vzɨ̂ a yi n-kelɨ sɨ nà nu mbàynsɨ̀ sisɨ ateyn, nô ta ka yì læ tɨm yɨ ntèʼ ateyn.