Deuteronomy 19

Ntèʼ sîsɨ̀ a ka ghɨ na leʼ ndû lêytɨ̀ ateyn

¹Mosìs nɨn bê meyn sɨ̂ ghelɨ Isìlæ̀ na, Bôbo Fɨyini ɨ Fɨyini fifɨ nɨn sàŋ fvɨsɨ̀ ghelɨ ghì a yi n-ndû a àŋena ilaʼ, a yì zɨ nà chî a àŋena ntèʼsɨ, kɨ̀ nô a ndosɨ nɨ̀ àŋena. ²Yi zɨ ilaʼ nâ ghàyn a Bôbo Fɨyini ɨ Fɨyini fifɨ nɨn fu sɨ̂ zɨ̀ têyn, yi choʼtɨ ntèʼ sɨ̀ tal sɨ ghɨ antêynɨ̀ àntêynɨ̀, ³ɨ tɨm ndù nɨ̀ dzɨsɨ a ntèʼsɨ nâ ghè, ɨ gwòtɨ̀ ntèʼsɨ ateyn ɨlweŋ ɨ̀ twal, ta ka à na zue mɨ ndà wul, wu leʼ ndu lèytɨ̀ afu.

⁴“Iyeynì nɨn ghɨ ìsaʼ kûm wul ɨlvɨ ta wù zuè wul, ɨ̀ nyɨŋ ndù sɨ lèytɨ̀ a ntèʼ nâ ghè. Wùl ɨ̀ jas ɨ̀ zuè wul, bula ŋêyn ŋweyn timi nà kelɨ ɨ̀wuyn ɨ bɨ, wu leʼ ndu lèytɨ̀ a ntèʼsɨ nâ ghè. ⁵Wùl ɨ̀ kæ seʼ ɨtwaʼ ŋêyn wâynà ŋweyn sɨ gvèl ɨnkâʼ, ɨ̀ se sɨ gvèl, njam choʼa, ɨ̀ kfɨ̀yn zuè wâynà ŋweyn, a wùl ɨ̀ àteyn nyɨŋ ndù lèytɨ̀ a ntèʼ afî a yì n-baʼsɨ sɨ̂ ŋweyn antêynɨ̀ ntèʼsɨ ghê sɨ̀ tal. ⁶Ntèʼ zɨ̀ a ghɨ n-leʼ lèytɨ̀ ateyn kæ nà ghɨ kɨ ìmòʼ, wùl ɨ̀ jas ɨ̀ zuè wul alèʼ, ndyèyn àteyn ɨ dyêf chwôsɨ̀ sɨ nyɨŋ sɨ ndù sɨ lèytɨ̀, wâynà wùl ɨ kfɨnɨ kàʼ a wù nyɨŋ ghàl ŋweyn ɨ̀ boŋ zue, nô mɨ ta wù nì jas ɨ̀ zuè zue wul àteyn bula ŋêyn ŋweyn nî nà kelɨ ɨ̀wuyn bɨ. ⁷À ti iwo zɨ̀ a mà bè na yì choʼtɨ ntèʼ sɨ̀ tal, ghɨ na leʼ lêytɨ̀ ateyn.”

⁸Bôbo Fɨyini ɨ Fɨyini fifɨ kæ læ̀ kfèynsɨ ìlaʼ ì zɨ-i kɨ̀ ta wu n-læ chfɨ̀nɨ sɨ̂ ghɨ̀bo ghi, ɨ̀ fu ilaʼ ateyn kɨ ì jɨ̀m sɨ̂ zɨ̀ ta wu n-læ chfɨ̀nɨ, ⁹ma yi n-yvɨnɨ tɨsaʼ tèyntɨ̀ a mɨ n-fu sɨ̂ zɨ̀ layn kɨ tɨ̀ jɨ̀m, kôŋ Bôbo Fɨyini ɨ Fɨyini fifɨ, jelɨ̀ kɨ ta wù n-kɨŋ, a wù fu ilaʼ ateyn sɨ̂ zɨ̀, a yì na kelɨ sɨ choʼtɨ sɨ kfeynsɨ ntèʼ sɨ lisɨ sɨ̀ tal ta ghɨ kàʼ a ghɨ na leʼ lèytɨ̀ ateyn. ¹⁰Yì choʼtɨ ntèʼ nâ sìsɨ̀ ka wùl ɨ̀ na jas zue wul ilaʼ nâ ghàyn a Bôbo Fɨyini ɨ Fɨyini fifɨ nɨn fu sɨ̂ zɨ̀ têyn, ghɨ zue ŋweyn, mɨ̀luŋ mɨ̀ ŋweyn nà ghɨ a yi atu.

¹¹Mɨtì, wùl ɨ̀ kæ sɨ nà bâyn wul ɨ̀ Isìlæ̀ ɨ̀ lvɨ̀, ɨ̀ ndù gvɨ̀ ŋweyn ɨ̀ zue, ɨ̀ leʼ ndù lèytɨ̀ nô mɨ a ntèʼ ì kà antêynɨ̀ ntèʼsɨ nâ ghè, ¹²a ghelɨ ghɨ tisɨnɨ a ntèʼ nâ ghè tum ghelɨ a ghɨ ndu ɨ̀ kàsi gvì nɨ̀ ŋweyn, ɨ̀ fù sɨ̂ wùl ɨ̀ vzɨ̀ a wù n-kelɨ sɨ sɨ̀sɨ̀ ikfɨ i wâynà ŋweyn, a wù boŋ zuè. ¹³Wùl ɨ̀ môm ìnkì iwo nâ zɨ̀ ka yi n-kòynsɨ ìsuyn sɨ̂ ŋweyn, yi zue ŋweyn ta ka iwo nâ yèynì mæ sɨ a Isìlæ̀ a awo a na jèlɨ̀ kɨ a jûŋ sɨ̂ zɨ̀.

¹⁴Yi zɨ a ilaʼ nâ ghàyn a Bôbo Fɨyini ɨ Fɨyini fifɨ nɨn fu sɨ̂ zɨ̀ têyn, ghɨ fu àlêʼ sɨ̂ wùl, ka wu n-læ̀ mòm sɨ kfɨnɨ ighami zɨ̀ a ghɨ̀bo ghi nɨn læ lèm.

Mosìs ɨ taŋi ìwo kûm nchwò nsaʼ

¹⁵Mosìs nɨ̀n be meyn sɨ̂ ghelɨ Isìlæ̀ na, “Ghɨ kàʼ ghɨ bû zuè wul iwo ta wù nì, nchwò nsaʼ ɨ ghɨ kɨ ìmòʼ. Nchwòsɨ nsaʼsɨ nɨn kelɨ sɨ nà ghɨ sɨ chem sɨ̀ bò kèsa sɨ̀ tal jæ na ghɨ bɨmi na wùl ɨ̀ ni meyn bèbsɨ ìwo.”

¹⁶Wùl ɨ̀ kæ timi nchwò nsaʼ ànkaŋ na wùl ɨ̀ lvɨ ni meyn ìwo i bzɨ-i asɨ nɨ̀ Fɨyini fɨ, ¹⁷a ghɨ na kelɨ sɨ li nchwò nsaʼ àteyn nɨ̀ wùl ɨ̀ vzɨ̀ a wù bè na wù ni meyn ìwo i bzɨ-i asɨ nɨ̀ Fɨyini fɨ, sɨ ndu nɨ̀ àŋena asɨ nɨ̀ ghelɨ ghɨ saʼnɨ nɨ̀ ngàŋsɨ ndô Fɨyini sisɨ̀ a sɨ n-felɨ̀ achi nâ ghè, asɨ nɨ̀ Bôbo Fɨyini. ¹⁸Ghɨ ndû nɨ̀ àŋena, ghelɨ ghɨ saʼnɨ faytɨ ki iwo ateyn, ɨ̀ yeyn na à n-ghɨ nchwò nsaʼ ànkaŋ, ¹⁹ghɨ nì ìwo zɨ̀ a wù nà kɨŋ na ghɨ ni sɨ̂ wâynà ŋweyn sɨ̂ ŋweyn ta ka iwo i bzɨ-i nâ yèynì mæ sɨ a yi antêynɨ̀. ²⁰Yi gàyn tî, a ghelɨ Isìlæ̀ yvɨ nô ghɨ̀ jɨ̀m, ɨ̀ se sɨ fàyn, a ìnkì iwo nâ yèynì mæ sɨ a Isìlæ̀. ²¹Wùl ɨ̀ na mòm ìnkì iwo tì, ka yi n-kòynsɨ ìsuyn sɨ̂ ŋweyn. Wùl ɨ̀ zue wul, yi zue ŋweyn, Wùl ɨ̀ chuʼ isɨ i wûl, yi chu iyi ŋweyni ɨ̀ choʼ isoŋ i wûl, yi choʼ iyi ŋweyni. Wùl ɨ̀ teyn ɨ̀kœ ɨ wûl, yi teyn ɨwu ŋweyn, Wùl ɨ̀ teyn àvɨ a wûl, yi boŋ teyn a kɨ ŋweyn a.