Daniel 9

Danìyèl ɨ jèm

¹À nà n-ghɨ a bêŋ ɨ yî àsɨ ta Dalìyùs ɨ wâyn Zekzès ɨ wul ɨ̀ Medè nɨ̀n nsaʼ Babilòn, ²mà ɨ Danìyèl ɨ yeyn keli ìwo zɨ̀ a Bôbo Fɨyini nɨ̀n læ bè sɨ̂ Jèlìmayà ɨ nfèʼtɨ̀ ìghaʼnɨ a ŋwàʼlɨ̀ Fɨyini. Wù n-læ bè na Jèlusalèm læ̀ nà ghɨ kɨ iyum sɨ a bèŋsɨ̀ mɨ̀vɨm nsòmbo. ³Mɨ n-yeyn tî ɨ màʼ fɨ̀ntsɨ ɨ fuʼ abvɨ ɨ nà jemà, bam ɨ̀chfɨ̂ chwotɨ̂ na Bôbo Fɨyini gamtɨ ghelɨ Jèlusalèm.

⁴Mɨ n-læ jèm sɨ̂ Bôbo Fɨyini ɨ Fɨyini femfɨ loyn ilêsɨ̀ ifu bê nà,

“Bôbo, wà n-ngaŋtɨ-à, nî àwo ɨchfɨ̀ ɨ yumnɨ, ghelɨ ɨ ngvɨmlɨ̂ và. Wà n-luynsɨ̂ ìchfɨ̂nɨ̀ ì zæ sɨ̂ ghelɨ ghì a ghɨ n-kôŋ vâ yvɨnɨ̂ ìsaʼ ì zæ. ⁵Ghèsɨ ni meyn mbɨ asɨ nɨ̀ và ɨ̀ nì àwo kɨ kfeynɨ̂ wì. Ghèsɨ ni meyn àwo a bɨ-a, ɨ̀ to nɨ̀ àtu a sɨ̂ và. Ghèsɨ chasɨ meyn và, ɨ̀ faŋ tɨ̀ yvɨ̀nɨ isaʼ ì zæ. ⁶Ghèsɨ bû yvɨ̀nɨ ghelɨ ghɨ felɨnɨ nɨ̀ và, ɨ nfèʼtɨ̀ sɨ ghaʼnɨ sìsɨ̀ a sɨ n-taŋi a wa alèʼ sɨ̂ tɨ̀fôyn teytɨ nɨ̀ ghelɨ ghɨ tisɨnɨ nɨ̀ ghès kɨ̀mɨ nɨ̀ ghɨ̀bo ghesɨ baʼsɨ̂ nɨ̀ ghelɨ Isìlæ̀ nô ghɨ̀ jɨ̀m.”

⁷“Bôbo wà n-nî kɨ àwo kì a kɨ n-ghɨ àtì-ati, mɨtì ghès ghelɨ Judà nɨ̀ ghelɨ Jèlusalèm baʼsɨ̂ nɨ̀ ghelɨ Isìlæ̀ ghì nô ghɨ̀ jɨ̀m a wà tî nì, ghɨ gwôsɨ̀ ndù a tîlàʼ ghè a tɨ n-ghɨ a ndyèyn nɨ̀ ɨ tîtɨ̀ a tɨ n-baʼsɨ nɨn wumî nô sɨ a ŋaŋ bòm ta ghèsɨ bû yvɨ̀nɨ và. ⁸Bôbo Fɨyini, ghès ɨ ghelɨ Isìlæ̀ nɨ̀ tɨ̀fôyn teytɨ nɨ̀ ghelɨ̀ ghɨ tisɨnɨ nɨ̀ ghès baʼsɨ̂ nɨ̀ ghɨ̀bo ghesɨ nɨn wumi-à bòm ta ghèsɨ ni meyn mbɨ asɨ nɨ̀ và. ⁹Bôbo Fɨyini ɨ Fɨyini feyfɨ, wà n-koynsɨ̂ ìsuyn, lêsɨ̀ fu ghès nô mɨ ta ghès nɨn to nɨ̀ àtu a sɨ̂ và. ¹⁰Ghèsɨ bû yvɨnɨ và a Bôbo Fɨyini ɨ Fɨyini feyfɨ, ɨ̀ faŋ tɨ̀ yvɨ̀nɨ tɨsaʼ tìtɨ̀ a wà n-læ fu sɨ̂ ghès toynɨ̂ a nfèʼtɨ̀ sɨ ghaʼnɨsɨ. ¹¹Ghelɨ Isìlæ̀ nô ghɨ̀ jɨ̀m chasɨ meyn ìsaʼ ì zæ nà bu yvɨnɨ̂ wì vâ.”

“À ti iwo zɨ̀ a wà nì ngeʼ sɨ bemnɨ sìsɨ̀ a ghɨ nyàʼ a ŋwàʼlɨ̀ ìsaʼ nɨ̀ Mosìs ɨ wul ɨ̀ felɨnɨ nɨ̀ và koli ghès bòm ta ghèsɨ ni meyn mbɨ asɨ nɨ̀ và. ¹²Wà fu meyn ngeʼ ì bemnɨ zɨ̀ a wà n-læ bè na wa n-fu sɨ̂ ghès nɨ̀ ghelɨ ghɨ tisɨnɨ nɨ̀ ghès. Wà fu meyn ngeʼ sɨ̂ Jèlusalèm bula wà timi fù nô sɨ̂ ntèʼ ì lì a mbzɨ. ¹³Ngeʼ sìsɨ̀ nô sɨ̀ jɨ̀m a ghɨ nyàʼ a ŋwàʼlɨ̀ ìsaʼ nɨ̀ Mosìs koli meyn ghès. Mɨtì ghèsɨ faŋ tɨ̀ loyn ilêsɨ̀ ifu sɨ̂ và a Fɨyini feyfɨ, sɨ bèynlɨ sɨ a mbɨsɨ nɨ̀ ghès sɨ nà yvɨnɨ vâ. ¹⁴Wà ti meyn bàʼtɨ sɨ fu ngeʼ ì bemnɨ sɨ̂ ghès, ɨ̀ fu. Wa n-nì têyn a Bôbo bòm ta nô mɨ ghà ta wà n-nî nɨn ghɨ kɨ àtì-ati mɨtì ghès ɨ yvɨnɨ̂ wì và.”

¹⁵“Bôbo Fɨyini ɨ Fɨyini feyfɨ, à n-læ fvɨ̀sɨ va ghelɨ̀ ghya sɨ a Ijìb nɨ̀ àdyaʼ a bemnɨ-a nɨ̀ và ɨ nì tɨlaʼ tɨ litɨ ɨ keli àdyaʼ à kya sɨ chem layn. Ghèsɨ jasɨ meyn, ghèsɨ ni meyn mbɨ. ¹⁶Bôbo, wà nî meyn àwo a àtì-ati kɨ dvɨ̂ kɨ tèyn. Mɨ n-chwotɨ̂ na ka wa n-fì nyòʼsɨ̀ ɨ̀toŋ sɨ̂ ghelɨ Jèlusalèm ɨ ntèʼ zyâ, ɨ kfɨyn ì laynɨ nɨ̀ và. Mbɨ seysɨ, nɨ̀ ɨ sɨ ghɨ̀bo ghesɨ nî meyn tɨlaʼ tìtɨ̀ a tɨ n-baʼsɨ sɨ̂ ghès na wêsɨ̀ ghès.”

¹⁷“Mɨ n-chwotɨ̂ na wà yvɨ ijêm i wul ɨ̀ felɨnɨ nɨ̀ và bòm wul ɨ vzɨ̀ a wà n-ghɨ ɨ̀ŋweyn. Koynsɨ isuyn sɨ̂ ndo ì laynɨ nɨ̀ và yèyn a ghɨ bèbsɨ têyn. ¹⁸Fɨyini femfɨ, mɨ n-chwotɨ̂ na wà yvɨ ijêm ì yemi. Yeyn ta ghɨ bèbsɨ ntèʼ zɨ̀ a ghɨ n-koʼsɨ vâ ateyn a. Ghès nɨn dzɨ̂ sɨ̂ và bòm ta wà n-kelɨ ìkoynsɨ isuyn, a ghɨ wi bòm ìwo i juŋì i li ta ghèsɨ̀ nì. ¹⁹Yvɨ ijêm ì yesi a Bôbo ɨ lèsɨ fu mbɨ seysɨ ɨ gàmtɨ̀ ghès. Ka wa n-làytɨ a Fɨyini femfɨ bòm wul ɨ vzɨ̀ a wà n-ghɨ ɨ̀ŋweyn. Ghelɨ Isìlæ̀ nɨn ghɨ ghelɨ̀ ghya, Jèlusalèm ɨ ghɨ ntèʼ zyâ.”

Gabìyèl ɨ fèʼtɨ̀ ìwo zɨ̀ a yi læ̀ jæ gàyn

²⁰À nà n-ghɨ ta mà bu jêm kɨ jem na Fɨyini fɨ lesɨ fù mbɨ semsɨ nɨ̀ mbɨsɨ ghelɨ Isìlæ̀, ma nà dzɨ̂ na Bôbo Fɨyini ɨ Fɨyini femfɨ gamtɨ Jèlusalèm, ɨ kfɨyn ì laynɨ nɨ̀ ŋweyn, ²¹nchì Fɨyini ɨ Gabìyèl vzɨ̀ a mɨ n-læ yeyn a jem ɨ yî àsɨ tì, ɨ gvɨ̀tɨ fvɨ a ma ikèʼ, tâyn gvî alèʼ ghè a mɨ n-ghɨ ateyn ɨlvɨ ghê a ghɨ nî ghɨ nà fu ìfu aleŋ ɨlvɨ ikfa ateyn. ²²Yi n-gvì tî ɨ bè sɨ̂ mà na, “Danìyèl, mà gvì sɨ nì na wà na yeyn kelî àwo kì a Fɨyini fɨ nɨn læ bè ɨ toynɨ a Jèlìmayà na kɨ læ̀ gayn à. ²³Wà tî zɨ̀tɨ̀ kɨ̀ zɨtɨ sɨ jèm, Fɨyini fɨ bêynsɨ̀ ìjêm ì zæ bòm ta wù n-kôŋ và nô sɨ a ŋaŋ, ma gvî lvɨ̂yn nɨ̀ ìbêynsɨ̀ ateyn i. Toʼ yvɨtɨ̂ ntûm Fɨyini nâ yèyn a ka wà keli iwo zɨ̀ a jem àteyn nɨ̀n ndyêyn.”

²⁴“Fɨyini fɨ choʼnɨ meyn na ghelɨ̀ ghya nɨ̀ ntèʼ ì laynɨ yèyn a wà n-chi ateyn tèyn nɨn yeyn ngeʼ sɨ a bèŋsɨ̀ mɨ̀vɨm nsòmbo ìngal nsòmbo jæ ta ka wù gàmtɨ̀ àŋena ɨ̀ lèsɨ̀ fù mbɨsɨ àŋena ɨ̀ yuyn atu a àŋena nà saʼ ghelɨ kɨ àtì-ati nô ta ka ghɨ̀ læ̂ ghɨ̀, a iwo zɨ̀ a wà tî yèyn a jem nɨ̀ ìwo zɨ̀ a nfèʼtɨ̀ Jèlìmayà tî bè na yi læ̀ jæ gàyn kfeyn. Yi læ̀ kfeyna a ghɨ kæ kasi sɨ lem ndô Fɨyini sɨ a nyɨŋ na yì na layn ta isaʼi nɨn ndyêyn.”

²⁵“Mɨ n-kɨŋ na wà na kya na bèŋsɨ̀ nɨn chwò mɨ̀vɨm ɨ̀n kæ̀ njvàsɨ̀ bulamòʼ nɨ̀ bèŋsɨ̀ mɨ̀vɨm ɨ̀n tal njvàsɨ̀ kæ̀ kɨ̀ sɨ zɨ̀tɨ ɨtuʼ ghê a Fɨyini fu isaʼ na ghɨ kasi bàʼlɨ̀ Jèlusalèm ateyn, sɨ chem ta ka fòyn vzɨ̀ a ghɨ choʼ lèm gvi. Ghɨ læ̀ kasî bâʼlɨ̀ ntèʼ Jèlusalèm ɨ̀ fàytɨ dzɨsɨ ɨ̀ bàʼlɨ̀ mbàyn kɨ̀ a mɨ̂lùmchuŋ. ²⁶À na ghɨ ibàm i bèŋsɨ̀ ighɨ ì kæ̀ nɨ̀ bèŋsɨ̀ mɨ̀vɨm ɨ̀n tal njvàsɨ̀ kæ̀ a ghɨ zue wul ɨ̀ tisɨnɨ vzɨ̀ a Fɨyini fɨ choʼ lèm, wùl ɨ ghɨ wi sɨ lì alêʼ a ŋweyn. Fòyn ɨ̀lvì læ̀ koʼa, a ghɨ wul àtum, a sugèyʼ sɨ ŋweynsɨ bebsɨ ntèʼ Jèlusalèm ɨ̀ bèbsɨ ndô Fɨyini. Ngòʼsɨ àteyn læ̀ nà ghɨ ta ànkuŋ, a iwoŋ i faŋ kɨ̀ faŋ nô ta ka iwo zɨ̀ a Fɨyini fɨ nɨn læ bè kfeyn. ²⁷Wù læ̀ yɨ mɨ̀kâyn ŋêyn ghelɨ ghɨ dvɨ̂ kɨ tèyn sɨ a bèŋsɨ̀ nsòmbo. Mɨtì a à na ghɨ kɨ ibàm i bèŋsɨ̀ tal nɨ̀ àbeʼa a wù tuynsɨ na ka ghɨ na fî sɨ nyamsɨ sɨ ifu, fî fu tɨ̀fu tɨ litɨ sɨ̂ Fɨyini fɨ. Wù læ̀ lêm ànfèʼsɨ̀ a chaʼnɨnɨ-a alèʼ a ngaŋtɨnɨ-a a ndô Fɨyini, kɨ gvî nɨ̀ ngeʼ, sɨ chem ta ka Fɨyini lisi wul ɨ vzɨ̀ a wù lem ànfèʼsɨ̀ nâ kèyn sɨ atû nse kɨ ighel ta Fɨyini fɨ nɨn læ bè.