Daniel 8

Jèm ɨ chɨ Danìyèl kûm àyaʼ nɨ̀ bzɨ ndoŋ

¹À nà n-ghɨ a bêŋ ghè a fòyn Bèlshazà nɨn saʼ Babilòn na à na sɨ ghɨ bèŋ sɨ̀ tal, jem ì lì ɨ fi chɨ ma ɨ Danìyèl. ²À nà n-ghɨ a Jem nâ ghàyn ma gvɨ̀tɨ̀ ɨ yeyn ngêŋ yem ti a ntèʼ i ghaʼnɨ a Suzà abàs a Elàm. Mɨ nà n-ghɨ a mbæ̀ jvà Yulày a jem nâ ghè. ³Ma se sɨ ki ɨ yeyn ayaʼ kɨ ti a mbæ̀ jvà nâ ghè, kelɨ ndoŋsɨ̀ bò, ndoŋ ì lì ɨ dyefɨ̀ chwô ìlì nô mɨ ta yì læ fvɨ koʼ sɨ ibàm. ⁴Ma nà bu ki kɨ ki, ɨ yeyn ayaʼ ateyn a ɨ fêyn nô mɨ ghà ta kɨ n-ghɨ abàs ikuè, fêyn abàs itsɨyn baʼsɨ̂ nɨ̀ àbâs kì a ɨchfɨ̂-iyvɨ i nɨn sœ ateyn. Nô nyam ì lì nà n-ghɨ wi a yì kàʼ a yì to chwò àyaʼ ateyn a, ìlì ɨ ghɨ wi a yì kàʼ a yì fsɨ ìli sɨ awu nɨ̀ ànkeyna. Ayaʼ ateyn a nà n-nî kɨ ta kɨ n-kôŋ ɨ nà kelɨ àdyaʼ nô a jûŋ.

⁵A nà ghɨ ta mà bu kayntɨ kɨ kayntɨ na jèm nâ yèyn nɨn dyêyn na gha a, ɨ gvɨtɨ̀ ɨ yeyn ifef yi gvî dzɨ abàs ghè a ɨchfɨ-iyvɨ i nɨn sœ ateyn kelɨ kɨ ndoŋ ìmòʼ, ndoŋ àteyn ɨ ghɨ a ngwònɨ àsɨ nɨ̀ ɨ̀nyeyn. Ifef ateyn i ɨ nyɨŋ teynɨ̂ kɨ mbzɨ ì jɨ̀m, avɨ-a ɨ kûm wì nse. ⁶Ifef ateyn i ɨ nà sɨ chefa ɨ lu ɨ nà nyɨŋ ndù dzɨ a ngùŋ àyaʼ afî a mà nì yèyn a mbæ̀ jvà tì kɨ kelɨ ndoŋ sɨ̀ bò. ⁷Ma yeyn ta ifef nâ zɨ̀ chef ndù fèyn ayaʼ nâ kì ɨ̀ kòytɨ̀ ndoŋsɨ ateynsɨ. Ayaʼ ateyn a ɨ nà bu kelɨ wi adyaʼ sɨ nu ifef ateyn i, nô nyàm î lì ɨ ghɨ wi sɨ gàmtɨ ayaʼ nâ kì. ⁸Ifef ateyn i ɨ keli àdyaʼ nô sɨ a ŋaŋ, adyaʼ ateyn a ɨ koʼ kfeyn nô mɨ ɨlvɨ gha, ndoŋ ì ghaʼnɨ nɨ̀ ɨ̀nyeyn zɨ̀ ɨ kolà. Yi n-kòla tî ndoŋsɨ lisɨ sɨ̀ kæ̀ ɨ fvɨ koʼ alèʼ nâ ghè. Ndoŋsɨ ateynsɨ nà n-kêʼ ndû nɨ̀ tɨ̀ghaŋ tɨ mbzɨ tɨ̀ kæ̀.

⁹Ndoŋ itelâ nɨn fvɨ meyn koʼ ateyn nɨ̀ ìlì ma yì zɨ̀tɨ̀ kɨ̀ sɨ ilæ ɨ̀ lèma ɨ̀ kèli àdyaʼ nô a jûŋ ɨ kèʼ tɨ̀ghaŋ tɨ mbzɨ tɨ̀ tal, kɨ̀mɨ nɨ̀ ìlaʼ i juŋì ma à ti ilaʼ i Isìlæ̀. ¹⁰Ndoŋ àteyn nɨn læ meyn keli àdyaʼ ɨ kèʼ mɨ̀njêyn ɨ kutɨ màʼ a nse ɨ jèylɨ̀. ¹¹Ndoŋ àteyn nɨn koʼsɨ meyn ngeŋ ɨ̀nyeyn ɨ nà ghɨ ta atu a sugèyʼsɨ̀ nɨ̀ Bôbo Fɨyini. Yì n-læ meyn nì ghɨ nà bu fu wi tɨfu tìtɨ̀ a ghɨ nà n-fu sɨ̂ Bôbo Fɨyini mɨchɨ ɨ̀n jɨ̀m, ɨ bebsɨ ndô Fɨyini. ¹²Ndoŋ nâ yèyn nɨn læ meyn nì mbɨ, ghelɨ Fɨyini ɨ nà fu tɨ̀fu tìtɨ̀ a ghɨ nà n-fu sɨ̂ Bôbo Fɨyini mɨchɨ ɨ̀n jɨ̀m tì sɨ̂ ɨ̀nyeyn. Ndoŋ àteyn nà n-nî nô mɨ ìwo ì kà yi ndû kɨ nɨ̀ àsɨ-a, ghelɨ ɨ nà bu bɨmî wì iwo zɨ̀ a yi n-ghɨ samoʼ.

¹³Mɨ n-yvɨ meyn ta nchì Fɨyini nɨ̀n taŋi, î lì ɨ bɨfɨ sɨ̂ ɨ̀nyeyn na, “Awo kèynà a kɨ tî fvɨ̀ a jêm têyn ti læ̀ gâyn ɨtuʼ gha? Mbɨ nâ yèyn a yì bèbsɨ ndô Fɨyini ghɨ na bu fu wi tɨfu tìtɨ̀ a ghɨ tî nà fu têyn ti læ̀ mæ̂ ɨtuʼ gha? Ghɨ ti læ̀ bebsɨ̂ ndô Fɨyini ɨ̀ jèylɨ̀ sugèyʼsɨ Bôbo Fɨyini ndù chèm wo?”

¹⁴Nchì Fɨyini ì lì zɨ̂ ɨ bèynsɨ̀ ɨ bè na, “Yi na ghɨ kɨ tèyn sɨ a mɨchi nkamsɨ̀ bò nɨ̀ mɨ̀chi ighɨ ì tal, a ghɨ kæ sɨ kasi sɨ lem ndô Fɨyini na yì na layn ta isaʼi nɨn dyêyn.”

Ghɨ fèʼtɨ̀ ìwo zɨ̀ a jem àteyn nɨn dyêyn

¹⁵À nà n-ghɨ ta mà bu kfâʼtɨ̀ kɨ kfaʼtɨ iwo zɨ̀ a jem àteyn nɨn dyêyn, wùl ɨ gvɨ̀tɨ ɨ timi a ma asɨ fɨsɨ̂ wul ɨ lûmnɨ̀. ¹⁶Ma yvɨ ta gyà nɨ̀n taŋi gvisɨ̀ a jvâ Yulày bê na, “Fèʼtɨ iwo zɨ̀ sɨ̂ wùl ɨ̀ wèyn a jèm àteyn nɨ̀n ndyêyn.”

¹⁷Wu n-bè tî, Gabìyèl ɨ gvi timi a ma ngùŋ, ifayn ì ɨ ku ma, ma fe ɨ kfɨsɨ ìkêʼ ì yemi a nse, wu bè sɨ̂ mà na, “Wâyn wùl, wa kya na awo kì a wà yèyn a jem nɨn dyêyn àwo kì a kɨ n-læ̀ gâyn a ngoʼsɨ mbzɨ.”

¹⁸Wu nà n-taŋî sɨ̂ mà tî ma mbuni sɨ bemnɨsɨ ku meyn mà, ma bu nyɨŋ kɨ a nse ta mà nì fe ɨ̀ kfɨ̀sɨ ìkêʼ tì, wu ghal ɨ làysɨ̀ mà ma timi.

¹⁹Wu n-bè sɨ̂ mà na, “Mɨ n-fèʼtɨ àwo kì sɨ̂ và a kɨ læ̀ gâyn ɨtuʼ ghê a Fɨyini fɨ nyòʼsɨ̀ ɨtoŋ. Jèm nâ yèyn nɨ̀n dyêyn àwo kûm mɨ̀chi ɨ̀n gòʼsɨnɨ̂. ²⁰Ayaʼ kì a wà tî yeyn kɨ kelɨ ndoŋ sɨ̀ bò tî nɨn dyêyn tɨ̀fôyn tɨ Midìyà nɨ̀ ɨ tɨ Besìyàtɨ̀. ²¹Ifef zɨ̀ a wà tî yèyn tî nɨn dyêyn ìlaʼ i Glîs, ndoŋ ì ghaʼnɨ zɨ̀ a gwònɨ àsɨ nɨ̀ ɨ̀nyeyn ɨ dyêyn fòyn vzɨ̀ a wù læ̀ saʼ ilaʼ ateyn sɨ asɨ. ²²Ndoŋ sìsɨ̀ sɨ̀ kæ̀ a sɨ tî fvɨ̀ koʼ alèʼ ghè a ndoŋ ì ghaʼnɨ zɨ̀ kòlà ateyn tì ɨ dyêyn tɨ̀laʼ tɨ̀ kæ̀ ta tɨ n-læ̀ fvɨ̂ koʼ ilaʼ i Glîs, mɨtì tɨfôyn tɨ ateyntɨ læ̀ na kelɨ wi adyaʼ ta fôyn ɨ wû àsɨ.

²³À læ̀ nà ghɨ ta ɨfôyn àŋena sɨ mæ̂, ma àŋena ni meyn àwo a bɨ-a chèm aleŋ ta ka ghɨ fu ngeʼ sɨ̂ àŋena, a fòyn ɨ̀lvì koʼ bem kɨ tèyn, kôŋ sɨ nà lɨsɨ ghelɨ. ²⁴Fòyn nâ wèyn læ̀ nà kelɨ àdyaʼ nô sɨ a ŋaŋ mɨtì a ghɨ wi adyaʼ a ŋweyn. Wù læ̀ nà bebsɨ̂ àwo nô sɨ a idvɨ, nî nô mɨ ghà yi ndû kɨ nɨ̀ àsɨ-a. Wù læ̀ bebsɨ̂ ghelɨ ghɨ li ghì a ghɨ n-kelɨ adyaʼ, ɨ̀ bèbsɨ kɨ̀mɨ ghelɨ ghɨ laynɨ nɨ̀ Fɨyini. ²⁵Wu læ̀ nà lɨsɨ̂ ghelɨ sɨ keli ɨfwo, ghaŋsɨ̂ ɨ̀wuyn. Ghelɨ læ̀ nà se sɨ kfàʼtɨ̀ na àŋena nɨn kelɨ mbôynɨ̀, wu zuetɨ ghelɨ kɨ̀ sɨ idvɨ̀ ɨ nà nû fòyn tɨ̀fòyn mɨtì a ɨfôyn ŋweyn læ̂ mæ̀ bula à mesì wul ɨ̀ mɨ̀sòŋ.”

²⁶“Iwo zɨ̀ a wà tî yèyn a jem kûm tɨ̀fu tìtɨ̀ a ghɨ n-fu bɨsì bɨsì, fu aleŋ ɨlvɨ ikfa nɨn ghɨ samoʼ mɨtì lèytɨ kɨ leytɨ jem àteyn bòm ta ndèyn nɨn dyefà jæ ta ka yi læ̂ gàyn.”

²⁷Jem àteyn nɨn mæ̀ nô mɨ ɨlvɨ gha ma boli, ɨ koʼi sɨ a mɨchi ɨ kæ làlì sɨ nà felɨ ifêl zɨ̀ a fòyn tî fù sɨ̂ mà. Jem àteyn nɨn fu meyn ngeʼ sɨ̂ mà bòm ta mɨ nà n-kya wi iwo zɨ̀ a yì n-dyêyn.