Daniel 1

Danìyèl ŋêyn suynsɨ ŋweynsɨ asɨ nɨ̀ fòyn Nèbùkànezà.

¹A nà n-ghɨ a bêŋ ghè a fòyn Jèhoyakìm nɨn saʼ Judà na à na sɨ ghɨ bèŋ sɨ̀ tal, Nèbùkànezà ɨ fòyn Babilòn ŋêyn sugèyʼsɨ ŋweynsɨ ɨ ndu kèʼ Jèlusalèm ɨ gèmtɨ kal nɨ̀ ntèʼ àteyn. ²Bôbo Fɨyini ɨ nì àŋena tɨm yɨ fòyn Jèhòyakìm, ɨ lì lù nɨ̀ ɨ̀fwo ɨ jûŋ ɨlvɨ a ndô Fɨyini ɨ ndu lèm alèʼ ghè a ghɨ n-lêm ɨfwo ndô mɨyini nɨ̀ ŋweyn ateyn a Babilòn.

³Fòyn Nèbùkànezà ɨ kæ be sɨ̂ Ashbenàz atu a ghelɨ ghɨ felɨnɨ a ntoʼ, na wù choʼtɨ tɨkuŋtɨ Isìlæ̀ tɨ litɨ antêynɨ̀ ɨghî a ghɨ tî yɨ iwoŋ ɨ̀ ghàyti gvì nɨ̀ àŋena a ghɨ woyn ntoʼ nɨ̀ woyn ghelɨ ghɨ to. ⁴Woynda tɨ̂kùŋ nâ ghèyn nɨn kelɨ sɨ nà ghɨ ghelɨ kelɨ wi nseʼi, kêʼ ajûŋ, tofa ma ghɨ kàʼ a ghɨ nyaŋsɨ yèʼi ìwo, kfeynɨ̂ sɨ fèl a ntoʼ. Ashbenàz nɨn choʼtɨ-à ɨ̀ yeʼî àŋena ta ka àŋena na nyaʼà fî jaŋ itaŋi i Babilòn. ⁵Fòyn Nèbùkanezà nɨn bê meyn kɨmɨ na ghɨ na yɨsɨ̂ àŋena nɨ̀ ɨ̀fwo yɨnɨ ntoʼ, fu mɨ̀lûʼ mɨ̀ ntoʼ àŋena nyvɨ-a. Wu n-fi meyn be kɨmɨ na ghɨ n-kelɨ sɨ yeʼi àŋena sɨ a bèŋsɨ̀ tal na àŋena na felɨ̀ a ntoʼ.

⁶Danìyèl nɨ̀ Hànànayà nɨ̀ Mishèl baʼsɨ̂ nɨ̀ Azalìyà nà ghɨ antêynɨ̀ tɨkuŋ ghê a Ashbenàz nɨn choʼtɨ, a ghɨ ghelɨ Judà. ⁷Atu a ghelɨ ghɨ felɨnɨ a ntoʼ nɨ̀n kfɨnɨ meyn àzɨyn a àŋena ɨ fu azɨyn a Babilòn. Ghɨ nà sɨ toŋtɨ̂ Danìyèl na Bèlteshazà, toŋtɨ̂ Hànànayà na Shadɨ̀làk, toŋtɨ̂ Mishèl na Meshàk, toŋtɨ̂ Azalìyà na Abednegò.

⁸Mɨtì Danìyèl ɨ lèm na yi n-yɨ wi ɨfwo ɨ yɨnɨ vzɨ̀ a wu n-fvɨ̂ a ntoʼ ɨ̀ faŋ tɨ̀ nyvɨ mɨlûʼ mɨ̀ ntoʼ sɨ bebsɨ ngêŋ ŋweyn sɨ nà layn wi ta isaʼi nɨn ndyêyn. Wu n-lèm tî ɨ chwotɨ àtu a ghelɨ ghɨ felɨnɨ a ntoʼ na wù visi yì na yɨ wi ɨfwo yɨnɨ ntoʼ nyvɨ wi mɨlû mɨ̀ ntoʼ. ⁹Fɨyini fɨ ɨ nì Ashbenàz atu a ghelɨ ghɨ felɨnɨ a ntoʼ ɨ dyèyn àtem a juŋà sɨ̂ Danìyèl fî koynsɨ̂ ìsuyn sɨ̂ ŋweyn. ¹⁰Ashbenàz ɨ nà sɨ fâyn fòyn, ɨ kæ bè sɨ̂ Danìyèl na, “À chòʼnɨ fòyn ɨfwo ɨ yɨnɨ vzɨ̀ a ka yì na yɨ-a nɨ̀ mɨ̀lùʼ mzɨ̀ a ka yì na nyvɨ-a, ma wà kæ faŋtɨ̀ nà yɨ-a ɨ̀ yum chwò ngvâʼ zyâ, a fòyn teyn atu à kema.

¹¹Wu n-taŋi tî Danìyèl ɨ kæ sɨ bè sɨ̂ wùlɨ̀ vzɨ̀ a ghɨ n-lèm na wù na kinî ŋweyn, nɨ̀ Hananìyà nɨ̀ Mishèl baʼsɨ̂ nɨ̀ Àzalìyà na, ¹²“Mɨ n-chwotɨ̂ na, wa mom ghes sɨ a mɨchi ìvɨm fu kɨ mbàs ìkfɨ̀ sɨ̂ ghès ɨ lo, nɨ̀ mû ghès ɨ nyvɨ-a. ¹³À na ghɨ ibàm i mɨchi ìvɨm a wà feʼnɨ ghes nɨ̀ tɨ̀kuŋ tɨli tìtɨ̀ a tɨ tî nà yɨ ɨfwo ɨ yɨnɨ vzɨ̀ a ghɨ n-fu a ntoʼ, nyvɨ mɨlûʼ mɨ̀ fòyn ɨ̀ yeyn na a n-kêʼ ghɨ̀ dà ajuŋa.” ¹⁴Wùl ɨ̀ vzɨ̀ a wu nà n-chi àŋena ɨ bɨmi sɨ nì iwo zɨ̀ a Danìyèl bè, ɨ nà fu kɨ mbàs Danìyèl ŋêyn suynsɨ ŋweynsɨ lo, nyvɨ mu sɨ a mɨchi ìvɨm.

¹⁵A nà ghɨ ìbàm i mɨchi ìvɨm, àŋena nà kêʼ a jûŋ fî ghɨ ɨ̀wuyn two chwô tɨ̀kuŋ tìtɨ̀ a tɨ nà n-yɨ ɨfwo ɨ yɨnɨ nɨ̀ fòyn. ¹⁶Wùl ɨ felɨnɨ vzɨ̀ ɨ kæ sɨ lisɨ̀ ɨ̀fwo ɨ yɨnɨ nɨ̀ mɨ̀lùʼ mzɨ̀ a fòyn nà fu, ɨ nà sɨ fu kɨ mbàs àŋena lo.

¹⁷Fɨyini nɨn fu meyn ìtof sɨ̂ tɨ̂kùŋ nâ tèyntɨ̀ tɨ̀kæ̀, àŋena nà kya sɨ nà jaŋ ŋwàʼlɨsɨ̀ kɨ tɨ̀nki tì jɨ̀m, yeʼî àwo sɨ a nyɨŋ. Danìyèl nɨn læ meyn nà fî kelɨ ìtof sɨ nà feʼtɨ jemsɨ nɨ̀ àwo a li-a kì a wùl nɨ̀n yeyn ta wù yèyn a jem nô a jûŋ.

¹⁸A nà ghɨ ta beŋ sisɨ̀ sɨ̀ tal a ghɨ tî nà ghɨ sɨ yeʼi tɨkuŋ tìtɨ chwò, Ashbenàz ɨ lì ndù nɨ̀ àŋena asɨ nɨ̀ fòyn Nèbùkànezà. ¹⁹Fòyn nɨn bɨbtɨ meyn àwo sɨ̂ àŋena, a kfeynɨ̂ kɨ Danìyèl nɨ̀ Hànànayà nɨ̀ Mishèl baʼsɨ̂ nɨ̀ Azalìyà sɨ nà fêl a ntoʼ, fòyn ɨ kæ choʼ àŋena na ghɨ na fêl a ntoʼ. ²⁰Fòyn nà n-bɨf nô mɨ ìnkì iwo ì kà sɨ̂ àŋena, àŋena fɨ̂ysɨ̀ wu yeyn na àŋena kya àwo fî tofɨ chwò ghelɨ mɨnyaʼ nɨ̀ ghelɨ ghì a ghɨ nfèʼtɨ awo nô ghɨ̀ jɨ̀m a Babilòn.

²¹Danìyèl ɨ kæ sɨ faŋ sɨ nà felɨ̀ kɨ a ntoʼ sɨ chem ta ka fòyn Saylùs læ̂ koʼ ɨfôyn a Babilòn.