2 Samuel 19

Jowàb ɨ fèʼtɨ̀ ìwo zɨ̀ a fòyn Devìt nì jas

¹Jowàb nɨ̀n yvɨ meyn na fòyn nɨ̀n dzɨ-à ta Absalòm kfɨ. ²Sugèyʼ sɨ̀jɨ̀msɨ̀ ɨ yvɨ na fòyn nɨ̀n dzɨ̂ ìkfɨ i wâyn ŋweyn, iwuyn i àŋena ɨ boli, àŋena nà bu fì saŋlɨ̂ wì nô mɨ ta ghɨ yɨ̀ iwoŋ. ³Àŋena nɨn kasi kuŋlɨ zɨ a ntèʼ ta ghelɨ ɨlvɨ ta ghɨ lèʼ iwòŋ nà wumi-à. ⁴Fòyn ɨ chɨytɨ ìkêʼ i ŋweyn nɨ̀ ɨwu ɨ̀ na byal dzɨ̀ nô sɨ a ŋaŋ bê na, “Wâyn wom Absalòm, womê wayn wom Absalòm, wayn wom, wayn wom.”

⁵Jowàb ɨ zɨ ndù ɨ yeyn fòyn a ndo ɨ bè sɨ̂ ŋweyn na, “Wà wumsɨ meyn sugèyʼ shyasɨ layn. A ghɨ àŋena a ghɨ bœ̀sɨ vâ nɨ̀ wôyn ghya, ghɨki nɨ woyn ghɨ lûmnɨ̀ baʼsɨ̂ nɨ̀ ghɨ̀ki ghya nɨ̀ suynsɨ. ⁶Wà dyeyn meyn layn na wà n-kwo kòŋ ghelɨ ghì a ghɨ n-bâyn vâ, bâyn ɨghî a ghɨ n-kôŋ vâ. Dyèyn kɨ̀mɨ na wà n-lî wì ɨtu sugèyʼsɨ̀ nɨ̀ sugèyʼsɨ̀ iwo ili. Ma yeyn meyn na a nà n-kwo kfɨtɨ ghes Absalòm faŋ a iwo ateyn i na jôf sɨ̂ và. ⁷Mɨ n-kɨŋ na wà fvɨ ndù bèmsɨ sugèyʼ shyasɨ. Mɨ n-bê samoʼ sɨ izɨyn nɨ̀ Bôbo Fɨyini na wà kæ faŋ tɨ̀ fvɨ̀ a ɨtuʼ nî se sɨ jɨ layn ma sugèyʼsɨ ateynsɨ lu meyn ɨ̀ vìsi và nô sɨ̀ jɨ̀m. Yi kæ gàyn tî, a iwo ateyn i na bef chwò nô mɨ ghà ta yi tìmi gàyn sɨ̂ và kɨ sɨ a ɨtuʼ ɨ wayndà.”

⁸Jowàb nɨn taŋi tî, fòyn ɨ làlì ɨ fvɨ duʼì ɨchfɨ afàf ta kɨ nà n-zɨ gvî a ntèʼ ighaʼnɨ. Sugèyʼsɨ̀ ɨ yvɨnɨ na, “Fòyn nɨ̀n nduʼ afàf,” ɨ chɨ̂yntɨ̀ gvì timi a ŋweyn asɨ.

Devìt ɨ kasi ndù a Jèlusalèm

A nà n-ghɨ tì ma ghelɨ Isìlæ̀ leʼnɨ meyn kàsi kfa a àŋena mɨ̂bè. ⁹Ghelɨ nà n-gûmnɨ̀ kɨ ntèʼsɨ Isìlæ̀ sɨ̀ jɨ̀m bê na, “Fòyn ti meyn bœ̀sɨ̀ ghesɨ̀nà sɨ awu nɨ mbàynɨ̀ sɨ ghesɨna. À n-læ bœ̀sɨ ŋweyn ghesɨ̀nà sɨ awu nɨ̀ ghelɨ Fìlisìyà mɨtì lvɨ̂yn na sɨ ghɨ ma wu leʼ meyn ilaʼ bòm Absalòm. ¹⁰Absalòm ta ghesɨ̀nà tî yìsi sɨ a fòyn kfɨ meyn iwòŋ, ghɨ na sɨ ndû wì sɨ kasi sɨ lì sɨ gvì nɨ̀ fòyn Devìt bòm ghà ”

¹¹Fòyn Devìt nɨn yvɨ meyn ìwo zɨ̀ a ghelɨ nà n-bê kûm ŋweyn a Isìlæ̀ ɨ tum Zadòk nɨ̀ Abìyatà ɨ ngàŋsɨ ndô Fɨyini na àŋena bɨf sɨ̂ chyeʼsɨ Judasɨ̀ na, “Bòm ghà ta àŋena nɨn kɨŋ sɨ nà ghɨ ghelɨ ghɨ goʼsɨnɨ sɨ bɨmi na mà kasi gvì sɨ a fòyn a? ¹²Ba yi n-ghɨ kɨ nô woynà ghem a ghɨ wi sɨ afi? À n-ghɨ wi zɨ sɨ bɨmi sɨ gòʼsɨ̀ na mà kasi gvì nà ghɨ fòyn.” ¹³Wù n-be meyn na ghɨ be kɨmɨ sɨ̂ Amasà na, “Wà n-ghɨ tèyn ghɨ kɨ nô wâynà wom a ghɨ wi sɨ afi. Ma na bè sɨ̂ và samoʼ na, Fɨyini fɨ fu ngeʼ ighaʼnɨ sɨ̂ mà ɨlvɨ ta mà faŋ tɨ̀ lem vâ na wà na ghɨ atu a sugèyʼsɨ̀ nɨ̀ mà alèʼ nɨ̀ Jowàb.”

¹⁴Wu n-tum ntum nâ sèynsɨ̀ ɨ nì ghelɨ Isìlæ̀ nô ghɨ̀ jɨ̀m ɨ nà sɨ kôŋ ŋweyn ɨ tum bè sɨ̂ ŋweyn na wù kasi kfa ŋêyn ghelɨ ŋweyn nô ghɨ̀ jɨ̀m. ¹⁵Fòyn ɨ lù ɨ nà sɨ kasî kfâ ɨ gvi chem a mbæ̀ jvà Jodàn, ma ghelɨ Judà fvɨ meyn gvì a ntèʼ Gilgàl sɨ li ŋweyn na ŋêyn àŋena dyaŋ jvâ Jodàn amòʼ. ¹⁶Àŋena nɨn læ se sɨ fvɨ̀, Shimè ɨ wâyn Gelà ɨ wul ɨ̀ Benjamìn vzɨ̀ a wu nà n-chi a ntèʼ Bahulìm ɨ boŋ nyàŋsɨ dyàŋ sɨ kòynɨ nɨ̀ fòyn Devìt. ¹⁷Shemè nà n-ghɨ ŋêyn ghelɨ Benjamìn nkam nɨ̀ Zibà ta wu nà n-fêl a ndo nɨ̀ Sôl baʼsɨ̂ nɨ̀ woyn ŋweyn njvàsɨ̀ tâyn nɨ̀ ghelɨ ghɨ felɨnɨ nɨ̀ ŋweyn mɨ̀vɨm ɨ̀m bò, àŋena chɨ̀yntɨ̀ ɨ gvi yeyn fòyn a jvâ Jodàn. ¹⁸Àŋena nɨn dyàŋ dzɨ a alèʼ ghè a ghɨ n-dyâŋ ateyn sɨ li fòyn ŋêyn ìsas i ndo nɨ̀ ŋweyni sɨ fì sɨ ni nô mɨ ghà ta fòyn nɨ̀n kɨŋ. A nà n-ghɨ ta Shimè ɨ wâyn Gelà dyàŋ mèsì ɨ̀ yeyn fòyn ɨ fe asɨ nɨ̀ ŋweyn ¹⁹ɨ bè sɨ̂ ŋweyn na, “Mɨ n-chwotɨ na wà lesɨ fù ma a mbæ̀. Ka wa n-fì kfaʼtɨ̀ iwo i bzɨ-i zɨ̀ a mɨ n-læ nì sɨ̂ và ta wa nà n-lû sɨ a Jèlusalèm. Mɨ n-chwotɨ̂ na ka wa n-fì kfàʼtɨ̀ ìwo ateyn. ²⁰Mɨ n-kya na mɨ n-læ meyn jas, à ti iwo zɨ̀ a mɨ n-ghɨ wul ɨwû àsɨ layn anòyn nɨ̀ ghelɨ Josèf sɨ gvì sɨ toŋtɨ vâ a mbæ̀.”

²¹Abishà ɨ bè na, “Ghɨ n-kelɨ sɨ zue Shimè sɨ iwo nâ ghàyn a wù n-læ ni. Wù n-telɨ meyn wul ma à chòʼ kɨ̀ nô Bôbo Fɨyini.”

²²Fòyn Devìt ɨ bè sɨ̂ ŋweyn na, “Ghesɨ̀nà nɨn kelɨ wi iwo a woyn Zèluwà ghèyn. Yi sɨ ghɨ kɨmɨ tèyn ta mbàynɨ̀ semsɨ. Mɨ n-kya na, à n-ghɨ mà ɨ fòyn, ghɨ n-zue wi wul a Isìlæ̀ layn. ²³Fòyn ɨ taŋi tì ɨ chfɨ̀nɨ̀ Shimè ɨ bè na, “Mɨ n-bê samoʼ, ghɨ n-zue wi vâ.”

²⁴Mèfiboshèt ɨ wâyn wâyn Sôl ɨ boŋ ndù sɨ yeyn fòyn. A nà n-ghɨ tì bula wù timi sù ɨ̀vɨ ŋweyn, bula wù timi kom idyel kesa sù ndzɨsɨ ŋweyn nô sɨ ɨtuʼ ta fòyn nɨn læ lù sɨ koʼ sɨ chem achi nâ ghè. ²⁵A nà n-ghɨ ta wù lù a Jèlusalèm gvì yeyn fòyn Devìt, fòyn ɨ bɨf sɨ̂ ŋweyn na, “Wa n-læ faŋ tɨ̀ gvi ghesɨ̀và bòm ghà a Mèfiboshèt?”

²⁶Wu bèynsɨ̀ ɨ bè na, “Mbæ̀, wà n-kya na wul ɨ̀ felɨnɨ nɨ̀ và lvɨŋ meyn. A nà n-ghɨ ta wà n-lû, ma bè na ghɨ zɨsɨ njàkâs yem mà koʼ atû àteyn ghesɨ̀và lu mɨtì Zibà ta wù n-fêl sɨ̂ mà ɨ beyʼlɨ mà. ²⁷Wù n-wam meyn ànkaŋ sɨ̂ và kûm mà a mbæ̀. Mɨ n-kya a mbæ̀ na wà n-ghɨ kɨmɨ ta nchì Fɨyini kya àwo, ma na bè na wà ni nô mɨ ghà ta yi n-kfeynɨ sɨ̂ và. ²⁸Ghelɨ isas i ndo nɨ̀ bòbò wom nà n-kfeynɨ̂ kɨ na wà zuetɨ nô ghɨ̀ jɨ̀m mɨtì wa visi mà, ma nà yɨ kɨ nô ghesɨ̀và amòʼ. Iwo ili bu fì ghɨ wi a mɨ n-kelɨ sɨ nà chwotɨ vâ sɨ ateyn.”

²⁹Fòyn Devìt ɨ bè sɨ̂ ŋweyn na, “Wà bu kelɨ wi sɨ bè iwo ili. Ma lem meyn na zɨ̂ Zibà nɨn kelɨ sɨ gwòtɨ gveynsɨ bòbò vâ amoʼ.”

³⁰Mèfiboshèt ɨ bè na, “Kɨ̀ ta wà kàsi kfa kɨ̀ nô a jûŋ a mbæ̀, wù kôŋ wu lì gveynsɨ ateyn nô sɨ̀ jɨ̀m.”

³¹Bàzilà ɨ wul ɨ̀ Gilèd ta wu n-chi a ntèʼ Logelìm nɨn boŋ meyn kàli a mbæ̀ jvà Jodàn sɨ tsɨynsɨ fòyn. ³²Wu nà n-ghɨ ma wù lema meyn nô a jûŋ, ghɨ bèŋ mɨ̀vɨ̂m nfama. Bàzilà nà n-ghɨ kɨ nô wul ɨ two. A nà n-ghɨ ta fòyn Devìt nɨn ghɨ a Màhanèm wu fu ɨfwo ɨ yɨnɨ sɨ̂ ŋweyn. ³³Wu n-kàli tî, fòyn Devìt ɨ bè sɨ̂ ŋweyn na, wù gvi ŋêyn ŋweyn dyaŋ ndù nà chi a Jèlusalèm yi tôʼnɨ̀ nɨ̀ ŋweyn.

³⁴Bàzilà ɨ bè sɨ̂ ŋweyn na, “Bèŋ semsɨ ti n-ghɨ ma sɨ mæ meyn tèyn, ma nà fî koʼ sɨ ni gha ghesɨ̀và a Jèlusalèm a mbæ̀? ³⁵Mà sɨ ghɨ bèŋ mɨ̀vɨ̂m nfama, bu fì kya wi njùŋ nɨ̀ mbɨ. Mà bu kya wi ifom afo a yɨnɨ-a kèsa a nyvɨnɨ-a. Mà bu yvɨ jôbsɨ̀ wì mɨ njàŋ ɨlvɨ ta ghelɨ nɨn yem. Mɨ n-kôŋ wì sɨ kfeynsɨ adɨli à kya a mbæ̀. ³⁶Mɨ n-dyàŋ kɨ nô jva Jodàn ghesɨ̀và mɨtì faŋ tɨ̀ ndu ndyèyn. Wà n-kelɨ wi sɨ màʼtɨ ma sɨ chwo tî. ³⁷Visi mà kasi kfa ɨ̀ kfɨ kɨ̀ nô a ma ntèʼ ghɨ gvimi bàʼsɨ mà a ngùŋ nɨ̀ bo wom ŋêyn nà wom. Kwo li Kimhàm zɨ̂ ŋweyn dyaŋ ɨ̀ ndù wù na felɨ sɨ̂ và. Wà ndu kòŋ mɨ ghà sɨ ni sɨ̂ ŋweyn wa nì.”

³⁸Fòyn Devìt ɨ bè sɨ̂ ŋweyn na, “Mɨ n-dyàŋ ghesɨ̀ Kimhàm ɨ̀ nì nô mɨ ghà ta wà n-kɨŋ na mà ni sɨ̂ ŋweyn. Wà n-kɨŋ na mà ni nô mɨ ghà sɨ̂ và a mà ni.”

³⁹Fòyn Devìt ŋêyn ghelɨ ghì a ŋêyn àŋena nà n-ghɨ amoʼ ɨ kæ dyàŋ jvâ Jodàn. Fòyn Devìt ɨ baʼnɨ Bàzilà ɨ bè na Fɨyini fɨ boysɨ ŋweyn, Bàzilà ɨ kasi kfa.

⁴⁰A nà ghɨ ta fòyn ŋêyn Kimhàm nɨn dyâŋ jvâ Jodàn, sugèyʼsɨ ilaʼ i Judàsɨ̀ nô sɨ̀ jɨ̀m nɨ̀ sugèyʼsɨ Isìlæ̀ sɨ lisɨ ɨ ndu ŋêyn fòyn Devìt baʼsɨ̂ nɨ̀ Kimhàm àŋena ɨ ndù a ntèʼ Gilgàl.

⁴¹Ghelɨ Isìlæ̀ ghɨli ɨ gvì ɨ nà sɨ bê sɨ̂ fòyn na, “Woynà ghes ɨ ghelɨ Jodàn, ghal meyn fsɨ̀ vâ sɨ a ghès awu a mbæ̀ zɨ̂ ghelɨ̀ ghya nô ghɨ̀ jɨ̀m ɨ̀ dyàŋsɨ̀ a Jodàn.”

⁴²Ghelɨ Judah ɨ bè na, “Ghès tî nì tì bòm ta fòyn fvɨ̀ a Judà. Iwo ateyn i nɨn yaf nô zɨ̀ bòm ghà? Fòyn bû fu afo sɨ̂ ghès, bula ghèsɨ tìmi nà yɨ a ŋweyn a bò.”

⁴³Ghelɨ Isìlæ̀ ghì ɨ fi boŋ bèynsɨ kɨ na, “Ghès nɨ̀n kelɨ asas a ndosɨ ìvɨ̀m kɨ baʼsɨ̂ sɨ fòyn Devìt, yi kelɨ kɨ ìmòʼ. Bòm ghà ta yi n-keysɨ ghes a? Ba à tî zɨ̀tɨ̀ ghès sɨ bè na ghɨ ndu lì gvì nɨ̀ fòyn?

Àŋena nɨn taŋi tî ghelɨ Judà ɨ fi tòʼ ɨ taŋi ndu kɨ nɨ̀ ìtaŋi iyafɨnɨ-i.