2 Samuel 18

Absalòm ɨ kfɨ

¹Devìt nɨn baʼtɨ meyn sɨ nù ɨ yvɨ̀ŋtɨ̀ sugyèyʼsɨ̀ inòyn inòyn ɨ choʼtɨ ghɨli na ghɨ na tisɨ̂ ànôyn a sugèyʼsɨ̀ nkam, ghɨli tisɨ̂ ànôyn a sugèyʼsɨ̀ ɨvɨ. ²Wu n-læ gwòtɨ inôyn ìtal. Jowàb ɨ nà tisɨ̂ ànôyn a li-a, Abishà ɨ wâynà Jowab ɨ wâyn Zèluwà ɨ tisɨ̂ a li-a, Itày ɨ wâyn wùl ɨ̀ Gât ɨ tisɨ̂ kɨmɨ a li-a. Devìt nɨn se sɨ tum àŋena ɨ bè na, “Nô mà nɨn seʼ ghesɨ̀nà amoʼ.”

³Mɨtì àŋena bè sɨ̂ ŋweyn na, “Ka wa n-fvɨ̀. Ghɨ kæ shɨŋsɨ ghes na ghɨ leʼ wùl bû bzɨ̀sɨ̀. Ma ghɨ kæ gwòtɨ ghès ɨlweŋ ɨ̀ bwò ɨ̀ zuètɨ àleŋ àmòʼ à bû nà ghɨ nô mɨ ìwo sɨ̂ àŋena. Àŋena kæ zuetɨ mɨ ghès nkamsɨ ìvɨm ghèsɨ bû nà ghɨ ta vâ. À ti iwo zɨ̀-i a ghès nɨn kɨŋ na wà faŋ kɨ̀ a ntèʼ nà tum ìgâmtɨ̀.

⁴Fòyn Devìt ɨ yvɨ tî ɨ bè na, “Mɨ n-nì kɨ ìwo zɨ̀ a yi n-jôf sɨ̂ zɨ̀.”

Wu taŋi tì ɨ timi ɨchfɨ mbàyn ɨ nà ki ta sugèyʼsɨ ŋweynsɨ nɨn fvɨ̂ seʼ ndû iwòŋ kɨ̀ inòyn inòyn, anôyn a li-a ɨ ghɨ nkam, a li-a ɨ ghɨ ɨvɨ. ⁵A nà ghɨ ta àŋena nɨn lû, fòyn Devìt ɨ bè sɨ̂ Jowàb ŋêyn Abishà nɨ̀ Itày na, “Mɨ n-chwotɨ̂ zɨ̀ ka yi n-lèmsɨ wâyn wom Absalòm.” Wu nà n-taŋî sɨ̂ àŋena tî, sugèyʼsɨ̀ ɨ yvɨ ìwo zɨ̀ a wù n-bê kɨ sɨ̀ jɨ̀m.

⁶Sugèyʼsɨ̀ ateynsɨ ɨ lu ɨ ndù akù a Eflèm ɨ zɨ̀tɨ̀ sɨ nu sugèyʼsɨ Isìlæ̀ afu. ⁷Sugèyʼsɨ Devìtsɨ̀ ɨ nù ɨ yɨ sugèyʼsɨ Isìlæ̀. Sugèyʼsɨ Isìlæ̀sɨ̀ nɨn chɨ̀yntɨ kfɨtɨ nkam mɨ̀vɨm ɨ̀m bò. ⁸Iwoŋ ateyn i nɨ̀n læ meyn yam ndu kɨ abâs ilaʼ nâ kì à jɨ̀m, ghelɨ ɨ kfɨtɨ akù chwô ɨghî a ghɨ kàʼlɨ nɨ̀ tɨ̀fôtɨ̀. ⁹A nà n-ghɨ ta ghɨ n-nû, Absalòm ɨ gvɨ̀tɨ fvɨ̀ asɨ nɨ̀ sugèyʼsɨ Devìtsɨ̀ ghɨ atû nyàm nɨ̀ ŋweyn, nyàm àteyn ɨ se sɨ soli sɨ chwò isas fɨ̂kàʼfɨ ôk fɨlifɨ, atu a Absalòm ɨ ghàŋtɨ̀ a nfaynɨsɨ fɨ̂kàʼ mɨtì nyàm ŋweyn ɨ chwò ɨ nà nyɨŋ ndù kɨ ndu.

¹⁰Sugèyʼ îli ɨ yeyn ɨ ndu feʼtɨ̀ sɨ̂ Jowàb na, “Mà yèyn Absalòm wu ghaŋlɨ̂ a fɨ̂kàʼ fɨ ôk.”

¹¹Jowàb ɨ bɨf sɨ̂ ŋweyn na, “Wà bè na wà yeyn meyn ŋweyn a? Wà nì yeyn ɨ̀ fàŋ tɨ zue kɨ zue bòm ghà? Wa nà n-zue ma ma fu meyn àso ɨkwo a fɨfâ nɨ̀ àkue iwòŋa sɨ̂ và.”

¹²Sugèyʼ àteyn ɨ bèynsɨ bè sɨ̂ ŋweyn na, “Ghɨ nà n-fu ɨ̀kwo sɨ̂ mà wu dvɨ̂ mɨ ti ma bû kùm wâyn fòyn. Ba ghèsɨ ni meyn yvɨ ta fòyn nɨ̀n bê sɨ̂ và zɨ̂ Abishà nɨ̀ Itày na, ka yi n-lèmsɨ wàyn ŋweyn. ¹³Mɨ nà n-zue ŋweyn fòyn yvɨ ìwo ateyn, wà bû nì ìwo sɨ gàmtɨ ma.”

¹⁴Wu se sɨ taŋi Jowàb ɨ bè sɨ̂ ŋweyn na, “Mɨ n-kelɨ wi ɨlvɨ sɨ yvɨtɨ iwo zɨ̀ a wà n-bê.” Wu bè tì ɨ lì àwoŋ à tal ɨ lu kɨ lu ɨ ndu sù a ichɨ ibɨ̀ nɨ̀ Absalòm. A nà n-ghɨ tì Absalòm ɨ bu ghɨ ɨ two atû fɨ̀kàʼ nâ ghè. ¹⁵Sugèyʼ sîsɨ̀ a sɨ nà n-beʼì ɨfwo iwòŋ nɨ̀ Jowàb ɨ jɨ̀ŋ ɨ kali Absalòm ɨ zue ŋweyn.

¹⁶Jowàb ɨ kæ toŋ isoŋ na iwoŋ i mæ̀. Sugèyʼsɨ Devìtsɨ̀ ɨ kasi sɨ ibàm nɨ̀ sugèyʼsɨ Isìlæ̀sɨ̀. ¹⁷Àŋena lì ìgvɨyn i Absalòm ɨ màʼ ibɨ ighaʼnɨ ili akù ɨ màʼ ngòʼsɨ̀ a ŋweyn atu kɨ̀ sɨ a idvɨ̀. Sugèyʼsɨ Isìlæ̀sɨ̀ ɨ kasi leʼnɨ kfa nô sɨ̀ jɨ̀m.

¹⁸Absalòm nɨn læ nà kelɨ wi wayn ɨ lûmnɨ̀ ta ka wù læ̂ yɨ̀ ŋweyn ɨ kæ bom atuŋ a li-a afoŋlɨ nɨ̀ Fòyn sɨ toŋtɨ na Atuŋ a Absalòm, ghɨ na bu toŋtɨ̂ kɨ tì sɨ chem layn.

Devìt ɨ yvɨ ikfɨ i Absalòm

¹⁹A nà n-ghɨ ta ghɨ zuè Absalòm, Ahimàz ɨ bè na, “Mɨ n-nyɨŋ ndù fêʼtɨ̀ sɨ̂ fòyn na Bôbo Fɨyini bœsɨ meyn ŋweyn sɨ ɨwu nɨ̀ mbàynɨ̀sɨ ŋweynsɨ.”

²⁰Jowàb ɨ bè sɨ̂ ŋweyn na, “Mɨ n-kɨŋ wi na à ndu fèʼtɨ̀ và saʼgha sɨ̂ fòyn layn. Wà læ̀ ndû achi a kɨ lu-à, bòm ta à kfɨ̀ wâyn fòyn tèyn.”

²¹Jowàb nɨn taŋi tî ɨ kwo bè sɨ̂ wul ɨ̀ Kûsh na, “Ndu fèʼtɨ iwo zɨ̀ sɨ̂ fòyn a wà yeyn. Wulɨ̀ Kûsh nâ vzɨ̀ ɨ ngvɨmtɨ a nse sɨ ngvɨmlɨ Jowàb ɨ làlì ɨ choʼa nɨ̀ inyɨŋi sɨ ndu sɨ fèʼtɨ̀.

²²Ahimàz ɨ wâyn Zadòk ɨ fi bè sɨ̂ Jowàb na, “Mɨ n-chwotɨ̂-à, à na ghɨ mɨ sɨ gayn gha wa visi mà jumtɨ ndù nɨ̀ wul ɨ̀ Kûsh vzɨ̀.”

Jowàb ɨ fi tuynsɨ kɨ tuynsɨ ɨ bɨf sɨ̂ ŋweyn na, “Bòm nô ghà ta wà n-kɨŋ sɨ ndù sɨ fèʼtɨ̀ saʼgha nâ yèyn a wâyn wom? Iyeyn nâ yèyn nɨn ghɨ wi saʼgha zɨ̀ a wà feʼtɨ a ghɨ maʼtɨ vâ.”

²³Ahimàz ɨ fi bèynsɨ kɨ na, “À kôŋ mɨ ghà yi gàyn mɨtì visi mà nyɨŋ ndù fèʼtɨ̀.” Jowàb ɨ kæ visi na wù ndu. Wu lù ɨ nyɨŋ teynɨ dzɨ a afoŋlɨ a Jodàn ɨ ndu zɨ sɨ asɨ nɨ̀ wul ɨ̀ Kûsh vzɨ̀.

²⁴Devìt nà n-ghɨ ma wù duʼi meyn a nfaynɨsɨ ɨchfɨ mbàyn ɨyî àsɨ nɨ̀ ànkùmtɨ̀-à a dzɨ ta yi nà n-zɨ ndû a ntèʼ. Nchì ŋweyn ɨ koʼ timi atû mbàyn ɨ se sɨ ki ɨ yeyn wul wu nyɨŋ gvî kɨ ŋweyn nìnyɨŋ. ²⁵Nchì àteyn ɨ jàŋ ɨ fèʼtɨ̀ sɨ̂ fòyn na, wùl nɨ̀n nyɨŋ gvî kɨ nìnyɨŋ.

Fòyn ɨ bè sɨ̂ ŋweyn na, “Wù kæ nà gvî kɨ nìnyɨŋ a yi na dyèyn na wù n-kelɨ saʼgha ì jùŋ.” Wu nà n-taŋî tì, wùl àteyn ɨ nyɨŋ baʼsɨ̂ gvî kɨ gvi.

²⁶Kɨ̀ têyn nchì àteyn ɨ fi yeyn wul ɨ̂lvì ta wù n-nyɨŋ gvì, wu byal ɨ bè sɨ̂ wul vzɨ̀ a wu n-ti ɨchfɨ mbàyn na, “Yeyn kfeynsɨ wul ɨ̀lvì a wù n-nyɨŋ gvì kɨ nìnyɨŋa.”

Fòyn ɨ fi be kɨ na, “Wù n-gvî kɨmɨ nɨ̀ saʼgha ì jùŋ.”

²⁷Nchì zɨ̀ ɨ bè na, “Yi n-kêʼ kɨ ta wùl ɨwû àsɨ vzɨ nɨn ghɨ Ahimàz ɨ wayn Zadòk.” Fòyn ɨ bè na, “Wù n-ghɨ kɨ nô wul ɨ̀ jùŋ, wù n-gvî nɨ̀ saʼgha ì jùŋ.”

²⁸Kɨ̀ têyn Ahimàz ɨ jàŋ ɨ bè sɨ̂ fòyn na, “Awo a nɨn ghɨ a jûŋ” ɨ gvi baʼsɨ ɨ ngvɨmtɨ a nse asɨ nɨ̀ fòyn ɨ bè na, “Mɨ n-bemsɨ̂ Bôbo Fɨyini ɨ Fɨyini fyafɨ. Fɨ bœsɨ meyn và sɨ ɨwu nɨ̀ mbàynɨ̀ shyasɨ a mbæ̀.”

²⁹Fòyn ɨ bɨf sɨ̂ ŋweyn na, “Wâyn wom Absalòm nɨ̀n ghɨ ɨ two-a?” Ahimàz ɨ bèynsɨ bè na, “Jowàb tùm ma ghesɨ̀ wul ɨ̀felinɨ nɨ̀ fòyn wèyn ma se sɨ lù ɨ̀ ki ndùsɨ̀ ɨ̀ yèyn ta ghɨ n-shɨŋnɨ mɨtì ɨ̀ faŋ tɨ̀ kèli na à ngâyn ghà a?”

³⁰Fòyn Devìt ɨ bè sɨ̂ ŋweyn na, “Chwo ɨ timi dzɨ afêyn.” Wu chwò ɨ timi.

³¹Wulɨ̀ Kûsh vzɨ̀ ɨ gvi baʼsɨ bè sɨ̂ fòyn na, “Mà gvì nɨ̀ saʼgha ijûŋ a mbæ̀. Bôbo Fɨyini bœsɨ meyn và sɨ ɨwu nɨ̀ ghelɨ ghì a ghɨ tî làlì kèʼ và.”

³²Fòyn ɨ bɨf sɨ̂ ŋweyn na, “Wâyn wom Absalòm nɨn ghɨ ɨ two a?” Wu bèynsɨ̀ ɨ bè na, “Mɨ n-jêm na iwo zɨ̀-ì a yi gàyn sɨ̂ ŋweyn gayn kɨ̀ tî sɨ̂ mbàynɨ̀ shyasɨ a mbæ̀, nô mɨ nɨ̀ ndà ɨ̂lvi ta wù chàs vâ.”

³³Wu n-taŋi tî iwo ateyn ɨ nèʼ fòyn wu zɨ koʼ ndù antêynɨ̀ ndo dzɨ atû mbàyn ɨ dzɨ̀ afu nô sɨ a ŋaŋ. Wu nà n-dzɨ̂-a bê na, “Womê wâyn wom Absalòm. Wayn wom, ndà fu ma ɨkfɨ-i gvì lì mà kwo vìsì và a. Womê wayn wom.”