2 Kings 4

Elishà ɨ gàmtɨ̀ wî nkfɨ

¹Nfèʼtɨ̀ ì ghaʼnɨ ì lì nɨn læ meyn kfɨ anòyn nɨ̀ nfèʼtɨ̀ sɨ ghaʼnɨsɨ, a nà ghɨ achi a li-a wî ŋweyn ɨ ndu dzɨ̀ sɨ̂ Elishà ɨ bè na, “Lûm wom ɨ wul ɨ̀ fèlɨnɨ nɨ̀ và ti meyn kfɨ fâyn Fɨyini wa kya. Wù tî se sɨ kfɨ, kelɨ ìkwo ŋêyn wùl, wùl àteyn na sɨ gvì sɨ li wôyn ghem ghɨ lûmnɨ̀ ghɨ̀ bò na ghɨ na felɨ̀ àkôs sɨ̂ ŋweyn.”

²Elishà ɨ bèynsɨ̀ ɨ bè sɨ̂ ŋweyn na, “Mà ti kàʼ ma gàmtɨ̀ ti vâ a? Wà n-kelɨ nô ghà a wa ndo a.”

Wùl ɨ wi àteyn ɨ bèynsɨ̀ na, “Wùl ɨ̀ felɨnɨ nɨ̀ và nɨ̀n kelɨ wi afo nô sakos a bu kɨ fɨ̀nshɨ̀ŋ fɨ mɨ̂vɨ̀l mɨ̀ olìf.”

³Elishà ɨ bè sɨ̂ ŋweyn na, “Ndu jèlɨ loyntɨ nshɨ̀ŋ sɨ mɨvɨ̂l sɨ yumsɨ sɨ̂ ghelɨ ghì a ghɨ n-chi baʼsɨ sɨ̂ và. Wà ndû wa loyn sɨ dvɨ.” ⁴Wà loyn tì wa zɨ nɨ̀ nseynsɨ a ndo ɨ kɨ̀ŋ ɨ̀chfɨ ndo à na ghɨ kɨ và zɨ̂ woyn ghɨ lûmnɨ̀ nɨ̀ và a ndo, wà li mɨvɨl mzɨ̀ a wa fɨnshɨ̀ŋ afî ɨ̀ we a nshɨ̀ŋsɨ̀ nâ ghè nô sɨ̀ jɨ̀m. Wà na wê nshɨ̀ŋ yì luyn, wa chwòsɨ̀ abàs a li-a.”

⁵Wî nkfɨ nâ vzɨ̀ ɨ lù sɨ a ngùŋ nɨ̀ Elishà ɨ ndu zɨ a ndo ŋêyn woyn ghɨ lûmnɨ̀ nɨ̀ ŋweyn ɨ kɨ̀ŋ ndo, woyn ateyn ɨ nà gvî nɨ̀ nshɨ̀ŋ sɨ ateynsɨ wu wê kɨ we mɨvɨl ateyn.

⁶A nà ghɨ ta nshɨ̀ŋsɨ ateynsɨ lùyn nô sɨ̀ jɨ̀m, wu bè sɨ̂ wâyn ŋweyn ɨ lûmnɨ̀ na, “Fu nshɨ̀ŋ ì lì sɨ̂ mà.”

Wayn àteyn ɨ bè na, “Nshɨ̀ŋ ìyum bu ghɨ wi.” Wu n-bè tî mɨlvɨ gha, mɨ̀vɨ̂l ɨ teyna ɨ nà bu fvɨ̀ wì a fɨnshɨ̀ŋ afu.

⁷Wî nfɨ àteyn ɨ ndù ɨ fèʼtɨ̀ ìwo ateyn sɨ̂ Elisha ɨ wul ɨ̀ Fɨyini, wu bè sɨ̂ ŋweyn na, “Ndu beyʼlɨ mɨvɨl mɨ̀ àteyn ɨ làʼ ìkwo ì zæ zɨ̂ woyn ghɨ lûmnɨ̀ nɨ̀ và na yɨ àbes ateyn.”

Elishà ɨ làysɨ wayn ɨ lûmnɨ̀ nɨ̀ wùl ɨ wi Shunèm sɨ a ikfɨ

⁸À n-læ meyn nà ghɨ achi a li-a, Elishà ɨ lu ɨ ndù a Shunèm, wùl ɨ wi ɨ̀lvɨ ɨ ghɨ afu kelɨ afo sɨ yɨ, wu chwotɨ ŋweyn na wù duʼi yɨ afo. Elishà ɨ nà sɨ ndû a ntèʼ nâ ghè mɨ ɨlvɨ gha, wu ndu yɨ a ndo afu. ⁹Wùl ɨ wi ateyn ɨ bè sɨ̂ lûm ŋweyn na, “Mɨ n-kya na wùl ɨ̀ wèyn a wù n-gvî a ndo afêyn tèyn nɨn ghɨ wul ɨ̀ làynɨ nɨ̀ Fɨyini fɨ. ¹⁰Ghesɨ̀và faytɨ fɨ̀ lûmtɨ̀ fɨ lifɨ a ndo ìyvɨ ɨ̀ lèm ɨ̀kuyn nɨ̀ àbaŋ a baʼsɨ̂ nɨ̀ àchɨ-a nɨ̀ lâm ateyn ta ka wù na gvî mɨ ɨlvɨ gha a ndo afêyn wu chi ateyn.”

¹¹Elishà ɨ læ gvì afu achi a li-a ɨ koʼ ndu nyɨ̀ŋtɨ̀ ɨ nà sɨ yvɨ̂tɨ̀-à sɨ a lûm nɨ̀ ŋweyn, ¹²ɨ bè sɨ̂ Gèhazì ɨ wul ɨ̀ felɨnɨ nɨ̀ ŋweyn na, “Ndu jaŋ gvi nɨ̀ wùl ɨ wî Shunèm wèyn.” Gèhazì ɨ ndu jàŋ wul ɨ wi àteyn wu gvi timi asɨ nɨ̀ Elishà. ¹³Elishà ɨ bè sɨ̂ Gèhazì na, “Bè sɨ̂ wùl ɨ wi àteyn na, ‘Ghès nɨn saŋlɨ-à bòm àtem a jûŋ kì a wà dyèyn sɨ̂ ghès. Ghès ti kàʼ a ghɨ ni gha sɨ̂ và a? A ghès ti kàʼ a ghɨ ndu tàŋi sɨ̂ fòyn kèsa sɨ̂ àtu a sugèyʼsɨ̀ kûm và a?’”

Wùl ɨ wi àteyn ɨ beynsɨ̀ ɨ bè na, “Mɨ n-chî ghesɨ̀ ghelɨ̀ ghem, àŋena tôʼnɨ̀ nɨ̀ mà.”

¹⁴Elishà ɨ fi bɨf sɨ̂ Gèhazì na, “Ghesɨ̀và ti kàʼ ghɨ nì ghà sɨ̂ ŋweyn a?” Gèhazì ɨ bè na, “Wù n-kelɨ wi wayn ɨ lûmnɨ̀ ma lûm ŋweyn dvɨyn meyn.”

¹⁵Elishà ɨ bè sɨ̂ Gèhazì na wù jaŋ wul ɨ̀ wi àteyn wù gvi, wu jàŋ wùl ɨ wi àteyn ɨ gvi timi ɨchfɨ ndo. ¹⁶Elishà ɨ bè sɨ̂ ŋweyn na, “À læ̀ nà ghɨ mɨ lvɨ̂yn a bêŋ i gvinɨ, a wà bzɨ wayn ɨ lûmnɨ̀.”

Wu bè na, “Ɨ̀ngaŋ a bô. Mɨ n-chwotɨ̂ na ka wa n-lɨ̀sɨ wul ɨ̀ fèlɨnɨ nɨ̀ và.”

¹⁷Mɨtì wùl ɨ wi àteyn ɨ timi ɨlvâ ɨ læ bzɨ wayn ɨ lûmnɨ̀ kɨ̀ ɨlvɨ ghê a Elishà nɨ̀n læ bè sɨ̂ ŋweyn

¹⁸Wayn àteyn ɨ lema, ɨ læ seʼ sɨ yeyn bò ŋweyn a gvêyn achi a li-a, wu ghɨ ŋêyn ghelɨ ghɨ felɨnɨ ghɨ li ghɨ ghayn ɨ̀fwo. ¹⁹Wayn àteyn ɨ gvɨ̀tɨ dzɨ̀ àtu sɨ̂ bò ŋweyn, bò ŋweyn bè na wùl ɨ̀ felɨnɨ bala ɨ̀ kfa fù sɨ̂ nà ŋweyn. ²⁰A nà ghɨ ta wùl àteyn bàla kfa nɨ̀ ŋweyn ɨ̀ fu sɨ̂ nà ŋweyn, wu kyakya ŋweyn a jèlɨ sɨ chem nɨ̀nchuè, wu kfɨ. ²¹Nà ŋweyn ɨ koʼ ɨ nyɨ̀ŋsɨ̀ ŋweyn ɨkuyn nɨ̀ Elishà ɨ wul ɨ̀ Fɨyini ɨ fvɨ ɨ kɨ̀ŋ ndo.

²²Wu n-kɨ̀ŋ tî ɨ jaŋ lûm ŋweyn ɨ bè na, “Mɨ n-chwotɨ-à, tum wul ɨ̀ felɨnɨ wù gvi nɨ̀ njàkâs mà ndu yeyn Elishà ɨ wul ɨ̀ Fɨyini ɨ̀ nyàŋsɨ gvì.”

²³Lûm ŋweyn ɨ bɨf sɨ̂ ŋweyn na, “Wà n-ndû sɨ yeyn ŋweyn sɨ a gha bula njoŋ mæ̂, a ghɨ wi achi ɨtuʼ ilaʼ a?

Wî ŋweyn ɨ be kɨ na, “Ngeʼ nɨn ghɨ wi.”

²⁴Wu n-taŋi tî ɨ kæ bè na wul ɨ̀ felɨnɨ nɨ̀ ŋweyn sali njàkâs. Wùl ɨ̀ felɨnɨ àteyn ɨ sali wu koʼ ɨ bè sɨ̂ ŋweyn na, “Wa n-nyɨŋ kɨ nyɨŋ ka wa n-tìmi alèʼ a bu kɨ na à bè mà.” ²⁵Wu n-taŋi tî ɨ lù ɨ nà ndû sɨ yeyn Elishà ɨ wul ɨ̀ Fɨyini a kfɨ̂yn Kamèl.

A nà ghɨ ta Elishà ki ndùsɨ̀ ɨ̀ yèyn ŋweyn sɨ a nje, ɨ bè sɨ̂ Gèhazì ɨ wul ɨ̀ felɨnɨ nɨ̀ ŋweyn na, “Yeyna, à n-gvî wùl ɨ wi Shunèm ti. ²⁶Nyɨŋ ndu kòynɨ zɨ̂ ŋweyn ɨ bɨf sɨ̂ ŋweyn na, “Wù n-ghɨ a jûŋa, lûm ŋweyn ɨ ghɨ a jûŋ ŋêyn wàyn a?

Wu bè na, Nô mɨ ghà nɨn ghɨ kɨ a jûŋ.

²⁷Wùl ɨ wi àteyn ɨ gvi chem asɨ nɨ̀ Elishà ɨ wul ɨ̀ Fɨyini atû kfɨ̀yn ɨ fe a ŋweyn asɨ ɨ ghal ɨvɨ ɨ ŋweyn. Gèhazì ɨ gvì sɨ chɨyn sɨ lìsi ŋweyn mɨtì Elishà ɨ bè na, “Visi kɨ ŋweyn tì. Wù n-ghɨ a mɨ̂lùmnchuŋ mɨtì bula Bôbo Fɨyini fêʼtɨ̀ sɨ̂ mà iwo zɨ̀ a yi n-gâyn sɨ̂ ŋweyn.”

²⁸Wul ɨ wi àteyn ɨ bɨf sɨ̂ ŋweyn na, “Ma ti meyn bè sɨ̂ và na mɨ n-kɨŋ wayn a? Ma ti meyn bè sɨ̂ và na ka wa n-lɨ̀sɨ mà.”

²⁹Elishà ɨ bè sɨ̂ Gèhazì na, “Kutɨ ndzɨ shyasɨ ɨ faytɨ kul ɨ lì mbàŋ yem ɨ nà nyɨŋ kɨ nyɨŋ. Ka wa n-tòŋtɨ wul a dzɨ, wùl ɨ̀ toŋtɨ và ka wa n-bèynsɨ̀. Wà ndû wa lèm mbàŋ yem a ŋweyn atu.”

³⁰Mɨtì nà wàyn nâ vzɨ̀ ɨ kàyn na, “Samoʼ ta Bôbo Fɨyini nɨ̀n chi, nô va Elishà ɨ chi-à, mɨ n-lù visî wì vâ.” Wu n-kàyn tî Elishà ɨ làlì ŋêyn ŋweyn ɨ lù.

³¹Gèhazì ɨ ndù sɨ asɨ ɨ lèm mbàŋ àteyn atu nɨ̀ wàyn nâ vzɨ̀ mɨtì wayn àteyn ɨ faŋ tɨ̀ tàŋi ɨ faŋ tɨ̀ nùlɨ̀. Gèhazì ɨ kasi ndù kòynɨ̀ ŋêyn Elishà ɨ bè sɨ̂ ŋweyn na, “Wayn àteyn bû làlì.”

³²Elishà ɨ ndu chem a ndo afu ɨ yeyn wayn àteyn wu nyɨŋ a ŋweyn ɨkuyn ma wù kfɨ meyn. ³³Wu zɨ a ndo ɨ kɨ̀ŋ ɨ faŋ kɨ ŋêyn àkfɨ a wayn nâ kì ɨ jèm sɨ̂ Bôbo Fɨyini. ³⁴Wu n-jèm tî ɨ koʼ ɨ nyɨ̀ŋì atu nɨ̀ wàyn nâ vzɨ̀ ɨ lèm ɨ̀chfɨ̂ ɨ ŋweyn ɨchfɨ̀ nɨ̀ wayn àteyn, ɨ lèm àsɨ a ŋweyn asɨ nɨ̀ wayn àteyn, ɨ lèm akœ a ŋweyn atû àkœ nɨ̀ wàyn nâ vzɨ̀. Wu n-nyɨ̀ŋi tî, ɨwuyn wayn àteyn ɨ zɨ̀tɨ̀ ɨ nà sɨ lûmtɨ̀ gvi-à. ³⁵Elishà ɨ làlì ɨ jèl ɨ kal a ndo nâ ghè ɨ fi kasi koʼ nyɨ̀ŋì atu nɨ̀ wayn àteyn. Wayn àteyn ɨ chem ìngal nsòmbo, ɨ yàsì àsɨ a ŋweyn.

³⁶Elishà ɨ jàŋ Gèhazì ɨ bè na wù ndu jàŋ wul ɨ wi Shunèm vzɨ̀. Wu ndu jàŋ wu gvì, Elishà ɨ bè sɨ̂ ŋweyn na, “Lì wâyn vâ.” ³⁷Wu zɨ gvì a ndo ɨ fe a ŋweyn ɨvɨ̀ ɨ nguʼ alvɨ a nse, ɨ làlì ɨ lì ɨ fvɨ̀ nɨ̀ wâyn ŋweyn.

Elishà ɨ ni kfeynsɨ àwo a kaynɨ-a à bò

³⁸Elishà nɨ̀n kasi meyn ndù a Gilgàl ma jeŋ ku meyn abàs ilaʼ nâ ghè. A nà ghɨ ta wù n-yeʼî ànôyn a nfèʼtɨ̀ sɨ ghaʼnɨsɨ wu bè sɨ̂ wùl ɨ̀ felɨnɨ nɨ̀ ŋweyn na, “Tom ntòyn i ghaʼnɨ ichɨ ɨ kfè mbàs sɨ̂ nfèʼtɨ̀sɨ ghaʼnɨ sèynsɨ̀.”

³⁹Nfèʼtɨ̀ ì ghaʼnɨ ì lì antêynɨ̀ nɨ̀ nfèʼtɨ̀sɨ ghaʼnɨsɨ nâ ghè ɨ fvɨ ndù a gvêyn sɨ kɨŋ mbàs ɨ yeyn inteŋ afo ɨtwaʼ yi ghɨ ta inteŋ abòʼ ɨ kœ̀ àboʼ ateyn kɨ luyn a ŋweyn a ndzɨsɨ, wu kasi kfa ɨ bàytɨ̀ ɨ we a ntòyn mbàs afî ichɨ nô mɨ ta nô wùl nɨ̀n bu læ nà kya na à n-ghɨ inkì àbòʼ à kà. ⁴⁰Ghɨ ni gwòtɨ̀ mbàs àteyn ghelɨ nâ ghì ɨ se sɨ yɨ ɨ bè na, “Elishà, afo a nɨn ghɨ a mbàs afêyn ma kɨ kàʼ a kɨ zue wul.” Àŋena nɨn bè tî, ɨ faŋ tɨ̀ fì tɨ̀ yɨ.

⁴¹Elishà ɨ bè na, “Yì li fu ɨnkfɨ̂ŋ sɨ̂ mà.” Ghɨ li fu wu we a ntòyn mbàs nâ ghè ɨ bè na, “Yì gwotɨ ghelɨ yɨ.” Ghɨ se sɨ yɨ ɨ faŋ tɨ̀ fì tɨ̀ yeyn afo ateyn ta kɨ kàʼ a kɨ zue wul.

Elishà ɨ yɨsɨ ghelɨ ɨvɨ weʼa

⁴²À n-læ meyn nà ghɨ achi a li-a wùl ɨ̂lvɨ̀ ɨ lù a ntèʼ Bal Shàlishà ɨ gvì nɨ̀ tɨ̀ghef tɨ abayn asaŋ a balì mɨ̀vɨm ɨ̀m bò sɨ̂ Elishà ɨ wùl ɨ̀ Fɨyini ma ghɨ kfì sɨ asɨ. Wu n-gvì ɨ baʼsɨ nɨ̀ ɨ̀tu asaŋ a fɨ-a ɨlvɨ ta wù sɨ. Elishà ɨ bè sɨ̂ wùl ɨ̀ felɨnɨ nɨ̀ ŋweyn na, “Fu ghelɨ ghèyn yɨ.”

⁴³Wul ɨ̀ felɨnɨ nɨ̀ ŋweyn ɨ bɨf na, “Mà ti kàʼ ma yɨsɨ ti ghelɨ ɨvɨ kɨ nɨ̀ ɨ̀fwo ɨ yɨnɨ nâ wèyn a?”

Mɨtì Elishà ɨ wul ɨ̀ Fɨyini ɨ bè sɨ̂ ŋweyn na, “Fu ɨfwo ɨ yɨnɨ ateyn ghelɨ nâ ghì yɨ bòm ta Bôbo Fɨyini be meyn na, ‘Àŋena nɨn yɨ-a, a wu bɨsɨ.’” ⁴⁴Wu n-bè tî wùl ɨ̀ felɨnɨ nɨ̀ ŋweyn ɨ tom ɨfwo ɨ yɨnɨ ateyn asɨ nɨ̀ àŋena ghɨ yɨ wu bɨsɨ kɨ ighel ta Bôbo Fɨyini bè.