2 Kings 3

Ghelɨ Isìlæ̀ ɨ nù ìwoŋ ŋêyn ghelɨ Mowàb

¹Jolàm ɨ wâyn Ahàb nɨn læ koʼ ɨfôyn a Sàmalìyà ma à sɨ ghɨ bèŋsɨ̀ njvàsɨ̀ nfama ta Jèhoshafàt nɨ̀n saʼ Judà ɨ saʼ sɨ a bèŋsɨ̀ njvàsɨ̀ bò. ²Jolàm nɨ̀n ni meyn mbɨ asɨ nɨ̀ Bôbo Fɨyini yi chem wi ta ɨ zɨ̂ a bò ŋweyn nɨ̀ nà ŋweyn nɨn læ nì. Wù n-maʼi meyn ngòʼ zɨ̀ a bò ŋweyn nɨ̀n læ faytɨ ghɨ nà koʼsɨ̂ Bâl ateyn.

³Wù n-faŋ meyn ɨ nà nî kɨ mbɨ sìsɨ̀ a Jèlobùwàm, ɨ wâyn Nebàt nɨn læ nà nî, ɨ nì ghelɨ Isìlæ̀ ɨ nà chî ateyn. Wù n-bu læ kasi sɨ a ibàm i mbɨsɨ nâ ghè.

⁴Meshà ɨ fòyn Mowàb nɨn læ nà mâʼ bzɨsɨ njɨ̀, kelɨ sɨ nà fu woyn njɨ̀sɨ̀ nkam ɨvɨ sɨ̂ fòyn Isìlæ̀ baʼsɨ̂ nɨ̀ ìwî ɨywaʼ ma ghɨ kom ɨwùyn nɨ̀ ɨ̀ywaʼ nkam ɨvɨ. ⁵Mɨtì a nà ghɨ ta fòyn Ahàb kfɨ, fòyn Mowàb ɨ to nɨ̀ àtu a sɨ̂ fòyn Isìlæ̀. ⁶A nà ghɨ ta Fòyn Jolàm yvɨ iwo ateyn, wu lu kɨ sɨ ɨlvɨ a Sàmalìyà ɨ jèl ɨ jàŋtɨ̀ ghelɨ kɨ̀ Isìlæ̀ ì jɨ̀m. ⁷Wù n-tum meyn kɨmɨ ntum sɨ̂ Jèhoshafàt, ɨ fòyn Judà ɨ bè na, “Fòyn mowàb to meyn nɨ̀ àtu a sɨ̂ mà. Wa n-gvì gâmtɨ̀ mà a ghesɨ̀và ndu nù ghelɨ Mowàb a?”

Fòyn Jèhoshafàt ɨ bè na, “Ghesɨ̀và nɨn ghɨ kɨ sɨ afo àmòʼ, ghelɨ ghesɨ̀và ɨ ghɨ kɨ sɨ afo àmòʼ, nyamsɨ kfaŋ nɨ̀ mà nɨ̀ ɨ shyasɨ ɨ ghɨ kɨ sɨ afo àmòʼ.”

⁸Wu n-bè tî ɨ bɨf nâ, “Ghesɨ̀nà nɨn ndù wo dzɨ sɨ nu àŋena a?” Fòyn Isìlæ̀ ɨ bè na, “Ghesɨ̀nà ndu dzɨ a nse iyum a Edòm.”

⁹Fòyn Isìlæ̀ nɨ̂n bè tî ɨ lù ŋêyn fòyn Judà nɨ̀ fòyn Edòm, àŋena jèl ɨ kal a nse iyum sɨ a mɨchi nsòmbo, mu mɨ̀ àŋena mæ, sugèyʼ sɨ àŋenasɨ nɨ̀ nyamsɨ ɨ nà bu kelɨ wi mu sɨ nyvɨ.

¹⁰Fòyn Isìlæ̀ ɨ bè na, “À n-gâyn ghà teyn a? A ti bè na Bôbo Fɨyini jàŋ ghesɨ̀nà tɨfôyn tɨ̀ tal sɨ fu ghesɨ̀nà awu nɨ̀ ghelɨ Mowàb a?”

¹¹Mɨtì fòyn Jèhoshafàt ɨ bɨf na, “Nfèʼtɨ̀ ì ghaʼnɨ nɨ̀ Bôbo Fɨyini ì lì nɨn ghɨ wi afêyn ta ka ghesɨ̀nà be wù bɨf iwo zɨ̀ a Bôbo Fɨyini nɨn kɨŋ na ghesɨ̀nà ni a ?”

Wùl ɨ̀ felɨnɨ nɨ̀ fòyn Isìlæ̀ ɨlvɨ̀ ɨ bè na, “Elishà ɨ wâyn Shafàt ɨ wul ɨ̀ felɨnɨ nɨ̀ Elajà nɨ̀n ghɨ afêyn.”

¹²Jèhoshafàt ɨ bè na, “Wù n-ghɨ kɨ nô nfèʼtɨ̀ ì ghaʼnɨ nɨ̀ Bôbo Fɨyini samoʼ.” Wu n-bè tî ɨ lù ŋêyn fòyn Isìlæ̀ nɨ̀ fòyn Edòm ɨ kàli ndu yeyn Elishà.

¹³Elishà ɨ bè sɨ̂ fòyn Isìlæ̀ na, “Mɨ n-kelɨ wi iwo sɨ ni nɨ̀ và wa kelɨ wi iwo sɨ ni nɨ̀ mà. Ndu yeyn nfèʼtɨ̀ sɨ ghaʼnɨsɨ nɨ̀ bò vâ nɨ̀ ɨsɨ nà vâ sɨ̀.” Fòyn Isìlæ̀ ɨ bè na, “Ɨ̀ngaŋ. À n-ghɨ bòm ta Bôbo Fɨyini tî jàŋ ghès tɨfôyn tɨ̀ tal sɨ fu awu nɨ̀ ghelɨ Mowàb.”

¹⁴Elishà ɨ bè sɨ̂ ŋweyn na, “Samoʼ ta Bôbo Fɨyini ɨ bò ɨ̀dwaʼ ɨ̀ jɨ̀m vzɨ̀ a mɨ n-koʼsɨ nɨn chi, ma bû nà n-gvɨmlɨ̂ Jèhoshafàt ɨ fòyn Judà vzɨ̀ a wù n-ghɨ a ma asɨ, ma bû zɨ̀ a wa iwo. ¹⁵Mɨtì gvi nɨ̀ wùl sɨ̂ mà wu kya sɨ buʼ iluŋ.”

A nà ghɨ ta wùl àteyn nɨn buʼ iluŋ, adyaʼ a Bôbo Fɨyini ɨ gvì atu nɨ̀ Elishà,” ¹⁶wu bè na, “Bôbo Fɨyini bè na, ‘Mɨ n-luynsɨ̂ àfoŋlɨ kèyn nɨ̀ mu.’ ¹⁷Bôbo Fɨyini bè na, ‘Yi n-yeyn wi afyef, ɨ̀ faŋ tɨ̀ yeyn ivɨ mɨtì a mû luyn afoŋlɨ afêyn a zɨ̂ nyamsɨ mbòloʼsɨ nɨ̀ zɨ̀, nɨ̀ nyamsɨ lisɨ nyvɨ.’ ¹⁸Iwo nâ yèynì nɨn ghɨ fɨ̀wôlɨ̀ sɨ̂ Bôbo Fɨyini. Wu nì fu kɨmɨ ghelɨ Mowàb a yi awu. ¹⁹Yi nì tɨm yɨ nô mɨ ntèʼ ì kà ta ghɨ tɨm mbàyn jɨ̀ŋ kàli baʼsɨ̂ nô mɨ nɨ̀ ntèʼ ì ghaʼnɨ ì kà. Yi nì gvelɨ̀ nô mɨ fɨ̀kâʼ fɨ jûŋ fɨ̀ kà ɨ̀ fèyntɨ̀ àsɨ a lɨmàlɨ̀mà nô à jɨ̀m ɨ̀ fì bèbsɨ gveyn sɨ jûŋsɨ̀ nɨ̀ ngòʼsɨ̀.”

²⁰Bôbo Fɨyini nɨn taŋi tî, ɨtuʼ ɨ layn, a ni nà ghɨ aleŋ ɨlvɨ ghê a ghɨ n-fu tɨfu ateyn nɨ̀ bɨsì bɨsì, ghɨ yeyn kɨ ta mu n-kalì gvî dzɨ abàs a Edòm, mu ɨ luyn kɨ ilaʼ ateyn ì jɨ̀m.

²¹À nà n-ghɨ tì ma ghelɨ Mowàb nô ghɨ̀ jɨ̀m yvɨ meyn na tɨfôyn tɨ gvi meyn tɨ̀ tal sɨ nu àŋena ɨ tum jàŋ nô mɨ ndà ta wù kàʼ a wù tɨm iwoŋ zɨ̂tɨ̀ kɨ a woynda tɨ̂kùŋ sɨ chem a ghɨ̀lema ɨ bè na àŋena ndu timi ighami. ²²Àŋena bɨs ɨ làlì, chuè ɨ bayn atû mù nâ ghè, ghelɨ Mowàb ghì a ghɨ n-ti injɨyn izɨ-i ɨ yeyna mɨ bâŋ ta mɨluŋ. ²³Àŋena bè na, “À n-ghɨ mɨ̀luŋ ti. Tɨfôyn tìtɨ̀ kàʼ a tɨ na ghɨ ma tɨ nu meyn ɨ̀ zuètɨ ngeŋsɨ àŋena. Yì gvi a ghelɨ Mowàb ghesɨ̀nà ndu lì ɨ̀fwo vzɨ̀ a àŋena kfɨ̀tɨ vìsi!”

²⁴Mɨtì a nà ghɨ ta ghelɨ Mowàb gvì alèʼ ghè a ghelɨ Isìlæ̀ bɨ̀ ateyn, ghelɨ Isìlæ̀ ɨ làlì ɨ ni nu kɨ àŋena têyn àŋena nyɨŋnɨ. Ghelɨ Isìlæ̀ ɨ zɨ ndù a ntèʼ Mowàb ɨ zuetɨ ghelɨ Mowàb. ²⁵Àŋena nɨn bebsɨ meyn ntèʼsɨ Mowàb, nô mɨ ndà ɨ nà beʼì ngòʼsɨ̀ mâʼ nô mɨ a gvêyn ì jùŋ ì kà nô sɨ chem ta ka ngòʼsɨ̀ luyn gveyn àteyn nô ì jɨ̀m. Àŋena nɨn læ meyn fèyntɨ̀ àsɨ a lɨmàlɨ̀mà nô à jɨ̀m, ɨ fi gvèl nô mɨ fɨ̀kâʼ fɨ jûŋ fɨ̀kà. À n-læ faŋ kɨ ntèʼ Kil Halesèt mɨtì ghelɨ ɨ jɨŋ kali ntèʼ àteyn kelɨ ɨ̀fwam nɨ̀ ngòʼsɨ̀ ateyn ɨ tɨm yɨ ntèʼ àteyn.

²⁶A nà ghɨ ta fòyn Mowàb yeyn na iwoŋ ateyn i ghaʼ meyn ŋweyn, wu lì sugèyʼsɨ̀ ighɨ nsòmbo sɨ nû nɨ̀ mɨ̀nyuè, ŋêyn àŋena mòmsɨ̀ sɨ toynɨ antêynɨ̀ ìwòŋ sɨ ndù sɨ loyn igâmtɨ̀ sɨ̂ fòyn Edòm mɨtì yi to ghaʼ àŋena. ²⁷Fòyn Mowàb ɨ kæ li wayn àsɨ nɨ̀ ŋweyn vzɨ̀ a wu nà n-ghɨ sɨ læ̀ sɨ koʼ ɨfôyn ɨlvɨ ta wù kfɨ ɨ sɨ sɨ a ifu sɨ̂ mɨyini atû mbàyn ntèʼ nâ ghè. Ghelɨ Isìlæ̀ ɨ yeyn dzɨ zɨ̀ a ɨtoŋ ghelɨ Mowàb yàf ateyn sɨ̂ àŋena, ifayn ì ɨ ku ghelɨ Isìlæ̀ àŋena kasi leʼ ndù a àŋena ilaʼ.