2 Kings 15

Azalìyà ɨ koʼ ɨfôyn a Judà

¹Azalìyà ɨ wâyn fòyn Amàzayà nɨn læ koʼ ɨfôyn a Judà ma à sɨ ghɨ Bèŋsɨ̀ mɨ̀vɨm ɨ̀m bò njvàsɨ̀ nsòmbo ta fòyn Jèlobòwàm nɨn saʼ Isìlæ̀. ²Wu n-læ koʼ ɨfôyn ghɨ bèŋsɨ̀ njvàsɨ̀ ntufa ɨ saʼ sɨ a bèŋ mɨ̀vɨm ɨ̀n tâyn njvàsɨ̀ bò chî a Jèlusalèm. Izɨyn i nà ŋweyni nà n-ghɨ Jèkòliyà a ghɨ wul ɨ̀ Jèlusalèm. ³Wu n-li kɨ avɨ̀ nɨ̀ bò ŋweyn ɨ Amàzayà, ɨ nà nî kɨ àwo kì a kɨ n-ghɨ àti-ati asɨ nɨ̀ Bôbo Fɨyini. ⁴Mɨtì wù n-bu læ bebsɨ ɨlwêʼ vzɨ̀ a ghɨ nà n-koʼsɨ mɨyini ateyn, ghelɨ Isìlæ̀ ɨ nà bu fu kɨ tɨ̀fu ɨlwèʼ nâ ghè fî nyôʼ ìleŋ.

⁵Bôbo Fɨyini nɨn nî meyn ànsàsì-à ɨ ku fòyn Azalìyà, wu læ jèl ɨ kfɨ kɨ nɨ̀ ànkeyna. Wu nà n-chî kɨ a ndo ŋêyn nì nyɨŋ wâyn ŋweyn Jotàm ɨ nà sɨ kinî ntoʼ, saʼ ìlaʼ ateyn.

⁶Awo a li-a kì a ki n-læ gàyn ta Azalìyà nà n-saʼ nɨ̀ àwo kì nô à jɨ̀m a wù n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Judàtɨ̀. ⁷Fòyn Azalìyà nɨn læ kfɨ ɨ kfa ndu yeyn ghɨ̀bo ŋweyn, ghɨ gvɨ̀mì ŋweyn a ngvɨ̀misɨ nɨ̀ ghɨ̀bo ŋweyn a ntèʼ nɨ̀ Devìt, wâyn ŋweyn Jotàm ɨ koʼ ɨfôyn a Judà.

Sàkàliyà ɨ koʼ ɨfôyn a Isìlæ̀

⁸Sàkàliyà ɨ wâyn Jèlobòwàm nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ nfama ta Azalìyà nɨn saʼ Judà. Sàkàliyà nɨn læ saʼ sɨ a njoŋsɨ ntufa, chî a Sàmalìyà. ⁹Wu n-ni meyn mbɨ asɨ nɨ̀ Bôbo Fɨyini kɨ̀ ta ghɨ̀bo ŋweyn nɨn læ nì. Wu n-bu læ kasi sɨ a ibàm i mbɨsɨ ghê a Jèlobòwàm ɨ wâyn Nebàt nɨn læ nà ni-à ɨ nì ghelɨ Isìlæ̀ ɨ nà chî ateyn.

¹⁰Shalùm ɨ wâyn Jabèsh nɨn kulɨ meyn mɨ̀nàŋ sɨ zue Sàkàliyà ɨ ghal ɨ zue ŋweyn asɨ nɨ̀ ghelɨ a Sàmalìyà ɨ koʼ ɨfôyn. ¹¹Awo a li-a kì a kɨ n-læ gàyn ta Sàkàliyà nà n-saʼ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyntɨ Isìlæ̀tɨ̀. ¹²Yi n-læ gàyn têyn sɨ luynsɨ iwo zɨ̀ a Bôbo Fɨyini nɨn læ bè sɨ̂ Jehù na, “À læ̀ nà lum saʼ kɨ wul ɨ̀ wayn nɨ̀ và saʼ Isìlæ̀ sɨ chem ɨjwâŋ ɨ̀ kfæ̀.”

Shalùm ɨ koʼ ɨfôyn a Isìlæ̀

¹³Shalùm ɨ wâyn Jabèsh nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ bulamòʼ ta fòyn Uzayà nɨn saʼ Judà. Shalùm nɨn læ saʼ sɨ a njoŋ ìmòʼ chî a Sàmalìyà. ¹⁴Shalùm ɨ wâyn Jabèsh nɨn læ koʼ ɨfôyn tì, Mènahèm ɨ wâyn Gadì ɨ lù a ntèʼ Tizà ɨ koʼ ghal ɨ zue ŋweyn a Sàmalìyà, ɨ koʼ ɨfôyn.

¹⁵Awo a li-a kì a kɨ n-læ gàyn ta fòyn Shalùm nà n-saʼ nɨ̀ mɨ̀nàŋ mzɨ̂ a wù n-læ kul nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀.

¹⁶À nà n-ghɨ ɨtuʼ nâ ghè, Mènahèm ɨ lù a Tizà ɨ ndu nù ghelɨ ntèʼ Tifsà baʼsɨ̂ nɨ̀ ghelɨ ghì a ghɨ nà n-ghɨ a ntèʼ nâ ghè nɨ̀ ghelɨ ghì a ghɨ n-baʼsɨ afu bòm ta àŋena nɨn teyn na ghɨ n-choʼ wi achfɨ̂ a mbàyn na ghelɨ ŋweyn zɨ. Wu bebsɨ ntèʼ Tifsà ɨ ghaytɨ ghɨ̀na woyn mɨ̂lɨ̀ nô ghɨ̀ jɨ̀m ɨ ɨ zuetɨ baʼsɨ kɨ nɨ̀ woyn a àŋena mɨ̂lɨ̀.

Fòyn Mènahèm ɨ koʼ ɨfôyn a Isìlæ̀

¹⁷Mènahèm ɨ wâyn Gadì nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ mɨ̀vɨm ɨ̀n tal njvàsɨ̀ bulamòʼ ta Azalìyà nɨn saʼ Judà. Mènahèm nɨn læ saʼ sɨ a bèŋsɨ̀ ìvɨm chî a Sàmalìyà. ¹⁸À nà n-ghɨ ta Mènahèm nɨn saʼ wu nì mbɨ asɨ nɨ̀ Bôbo Fɨyini ɨ læ faŋ tɨ̀ kasi sɨ a ibàm awo a bɨ-a ghê a Jèlobòwàm ɨ wâyn Nebàt nà n-nî ɨ nì ghelɨ Isìlæ̀ ɨ nà chî ateyn.

¹⁹Bûl ɨ fòyn Asilìyà nɨn gvi meyn kèʼ Isìlæ̀, Mènahèm ɨ fu aso ɨkwo a fɨfâ sɨ̂ ŋweyn kɨ dɨlɨ̀ chem kilùsɨ̀ nkamsɨ mɨ̀vɨm ɨ̀n tal njvàsɨ̀ kæ̀ na wù gamtɨ Mènahèm na kelɨ àdyaʼ sɨ saʼ ghelɨ Isìlæ̀. ²⁰Menahèm nɨn læ fsɨtɨ ɨkwo nâ wèyn sɨ̂ ghelɨ Isìlæ̀ sɨ a tâksɨ̀. Nô mɨ wul ɨ̀ ghaʼnɨ ɨ̀ kfà nà n-fu aso ɨkwo a fɨfâ kɨ dɨlɨ̀ chem ndû kilù ìmòʼ na ghɨ fu sɨ̂ fòyn Asilìyà. Ghɨ n-fu tî, fòyn àteyn ɨ kasi ndù a ŋweyn ilaʼ.

²¹Awo a li-a kì a kɨ n-læ gàyn ta Mènahèm nà n-saʼ nɨ̀ àwo kì nô à jɨ̀m a wu n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ nɨ̀ tɨ̂fôyn tɨ Isìlæ̀tɨ̀. ²²Mènahèm nɨn læ kfɨ ɨ kfa ndu yeyn ghɨ̀bo ŋweyn, Bèkàhayà ɨ wâyn ŋweyn ɨ koʼ ɨfôyn.

Bèkahayà ɨ koʼ ɨfôyn a Isìlæ̀

²³Bèkàhayà ɨ wâyn Mènahèm nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ njvàsɨ̀ tâyn ta Azalìyà nɨn saʼ Judà. Bèkàhayà nɨn læ saʼ sɨ a bèŋsɨ̀ bò chî a Sàmalìyà. ²⁴Bèkalìyà nɨn ni meyn mbɨ asɨ nɨ̀ Bôbo Fɨyini ɨ faŋ nà nî kɨ àwo a bɨ-a kì a Jèlobòwàm ɨ wâyn Nebàt nà n-nî ɨ nì ghelɨ Isìlæ̀ ɨ nà chî ateyn. ²⁵Bekà ɨ wâyn Lèmalìyà atu a sugèyʼsɨ̀ nɨ̀ ŋweyn a li-a ɨ kul mɨ̀nàŋ sɨ zue Bèkàhayà ɨ lì ghelɨ Gilèd mɨ̀vɨm ɨ̀n tâyn, ŋêyn àŋena ɨ ndu zue Bèkàhayà baʼsɨ̂ nɨ̀ Agòb ŋêyn Alìyè a ntoʼ a Sàmalìyà. Bekà nɨn zue Bèkàhayà tì ɨ koʼ ɨfôyn a Isìlæ̀.

²⁶Awo a li-a kì a kɨ n-læ gàyn ta Bèkàhayà nà n-saʼ nɨ̀ àwo kì nô à jɨ̀m a wù n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀.

Bekà ɨ koʼ ɨfôyn a Isìlæ̀

²⁷Bekà ɨ wâyn Lèmalìyà nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ mɨ̀vɨm ɨ̀n tâyn njvàsɨ̀ bò ta fòyn Azalìyà nɨn saʼ Judà. ²⁸Wù n-ni meyn mbɨ asɨ nɨ̀ Bôbo Fɨyini ɨ faŋ tɨ̀ kàsi sɨ a ibàm i mbɨsɨ ghè a Jèlobòwàm ɨ wâyn Nebàt nà n-nî ɨ nì ghelɨ Isìlæ̀ ɨ nà chî àteyn.

²⁹À nà n-ghɨ ta Bekà ɨ fòyn Isìlæ̀ nɨn saʼ, Tiglat-Bìlesà ɨ fòyn Asilìyà ɨ gvì ɨ tɨm yɨ ntèʼ Ijòn nɨ̀ Abel Bet Makà nɨ̀ Janùwà nɨ̀ Kedèsh baʼsɨ̂ nɨ̀ Hazò. Wù n-tim meyn yɨ kɨmɨ Gilèd nɨ̀ Galìlî baʼsɨ̂ nɨ̀ Naftalì nô ì jɨ̀m. Wu n-tɨm yɨ tî ɨ ghaytɨ ghelɨ ateyn ɨ ndù nɨ̀ àŋena a Asilìyà. ³⁰Hosìyà ɨ wâyn Elà ɨ kul mɨ̀nàŋ sɨ zue Bekà ɨ wâyn Lèmalìyà ɨ ndu ghal ɨ zue ŋweyn ɨ koʼ ɨfôyn ma à sɨ ghɨ bèŋsɨ̀ mɨ̀vɨm ɨ̀m bò ta Jotàm ɨ wâyn Uzayà nɨn saʼ.

³¹Awo a li-a kì a kɨ n-læ gàyn ta Bekà nà n-saʼ nɨ̀ àwo kì nô à jɨ̀m a wù n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀.

Jotàm ɨ koʼ ɨfôyn a Judà

³²Jotàm ɨ wâyn Uzayà nɨn læ koʼ ɨfôyn a Judà ma à sɨ ghɨ bèŋsɨ̀ bò ta Bekà ɨ wâyn Lèmalìyà nɨn saʼ Isìlæ̀. ³³Jotàm nɨn læ koʼ ɨfôyn ghɨ bèŋsɨ̀ mɨ̀vɨm ɨ̀m bò njvàsɨ̀ tâyn ɨ saʼ sɨ a bèŋsɨ̀ njvàsɨ̀ ntufa chî a Jèlusalèm. Izɨyn i nà ŋweyni nà n-ghɨ Jèlushà ɨ wâyn Zadòk. ³⁴Wu nà n-nî kɨ àwo kì a kɨ n-ghɨ àtì-ati asɨ nɨ̀ Bôbo Fɨyini kɨ̀ ta bò ŋweyn Uzayà nà n-nî. ³⁵Mɨtì wù n-bu læ bebsɨ ɨlwêʼ vzɨ̀ a ghɨ nà n-koʼsɨ mɨyini ateyn, ghelɨ Judà ɨ nà bu fu kɨ tɨ̀fu ɨlwèʼ nâ ghè fî nyôʼ ìleŋ. Jotàm nɨn læ meyn kasi bàʼlɨ̀ ɨ̀chfɨ̂ mbàyn ndô Fɨyini vzɨ̀ a wu nà n-ghɨ abàs ikuè.

³⁶Awo a li-a kì a kɨ n-læ gàyn ta fòyn Jotàm nà n-saʼ nɨ̀ àwo kì nô à jɨ̀m a wù n-læ nì nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Judàtɨ̀. ³⁷(À nà n-ghɨ ta fòyn Jotàm nɨn saʼ, Bôbo Fɨyini ɨ nì Lezìn ɨ fòyn Alàm ŋêyn Bekà ɨ wâyn Lèmalìyà ɨ zɨ̀tɨ̀ sɨ fu ngeʼ sɨ̂ ghelɨ Judà.) ³⁸Jotàm nɨn læ kfɨ ɨ kfa ndu yeyn ghɨ̀bo ŋweyn ghɨ gvɨ̀mì ŋweyn a ngvɨ̀misɨ nɨ̀ ghɨ̀bo ŋweyn a ntèʼ nɨ̀ Devìt, wâyn ŋweyn Ahàz ɨ koʼ ɨfôyn.