2 Kings 14

Amàzayà ɨ koʼ ɨfôyn a Judà

¹Amàzayà ɨ wâyn Jòwâsh nɨn læ koʼ ɨfôyn a Judà ma à sɨ ghɨ bèŋsɨ̀ bò ta fòyn Jèhowàsh ɨ wâyn Jèhohàz nɨn saʼ Judà. ²Amàzayà nɨn læ koʼ ɨfôyn a Judà ghɨ bèŋsɨ̀ mɨ̀vɨm ɨ̀m bò njvàsɨ̀ tâyn, ɨ saʼ sɨ a bèŋsɨ̀ mɨ̀vɨm ɨ̀m bò njvàsɨ̀ bulamoʼ chî a Jèlusalèm. Izɨyn i nà ŋweyni nà n-ghɨ Jèhòyadìn a ghɨ wul ɨ wi Jèlusalèm. ³Wu nà n-nî àwo kì a kɨ n-ghɨ àti-ati asɨ nɨ̀ Bôbo Fɨyini mɨtì nî wì ta bò ŋweyn Devìt nà n-nî. Wu nà n-nî nô mɨ ghà kɨ̀ ta bò ŋweyn Jòwâsh. ⁴Mɨtì wù n-bu læ bebsɨ ɨlwêʼ vzɨ̀ a ghɨ nà n-koʼsɨ mɨyini ateyn, ghelɨ Isìlæ̀ ɨ nà bu fu kɨ tɨ̀fu ɨlwèʼ nâ ghè fî nyôʼ ìleŋ.

⁵A nà ghɨ ta Juda sɨ ghɨ isas i saʼ nɨ̀ ŋweyn, wu zuetɨ ghelɨ ghɨ felɨnɨ ghì a ghɨ n-læ zue bò ŋweyn ɨ fòyn Jòwâsh. ⁶Mɨtì Amàzayà nɨn bu læ zuetɨ woyn àŋena bòm ta wu nà n-yvɨnɨ isaʼ i Bôbo Fɨyini zɨ̀ a ghɨ nyàʼ a ŋwàʼlɨ̀ ìsaʼ nɨ̀ Mosìs na, “Ghɨ n-kelɨ wi sɨ zue wul bòm mbɨ wùl ɨ wûlù, wùl na kfɨ kɨ bòm mbɨ ŋweyn.”

⁷Àmàzayà nɨn tɨm meyn zuetɨ sugèyʼsɨ Edòm nkamsɨ ìvɨ̀m Ɨfyayn Fɨ̂ngvaŋ. Wu n-tim meyn yɨ kɨmɨ ntèʼ Selà ɨ kfɨnɨ ìzɨyn ateyn ghɨ nà sɨ toŋtɨ̂ na Joktìl sɨ koʼ sɨ chem layn.

⁸Fòyn Amàzayà ɨ kæ tum ntum sɨ̂ Jèhowàsh ɨ wâyn Jèhohàz na wù gvi nù ŋweyn. Jèhohàz nà n-ghɨ wâyn Jehù ɨ fòyn Isìlæ̀.

⁹Jèhowàsh ɨ fòyn Isìlæ̀ ɨ bèynsɨ̀ sɨ̂ Amàzayà ɨ fòyn Judà na, “À n-læ meyn nà ghɨ achi a li-a, sùnjoŋnjoŋ a Lebanòn ɨ tum ɨ bè sɨ̂ fɨ̀kâʼ fɨ sedàfɨ̀ a Lebanòn na fɨ fu wayn wi nɨ̀ ŋweyn sɨ̂ wâyn ŋweyn sɨ a wi. Ta wù bè mèsì kɨ̀ têyn, nyàm ɨ̀twaʼ ɨ lù a Lebanòn ɨ se sɨ chwò ɨ jèylɨ̀ ɨ zue sùnjoŋnjoŋ àteyn.” ¹⁰Wà n-ghaŋsɨ̂ ɨ̀wuyn na wà tɨm meyn yɨ̀ ghelɨ Edòm. Wa saŋlɨ-à na wà tɨm meyn yɨ̀ ghelɨ Edòm, mɨ̀tì faŋ kɨ a wa ndo, ka wa n-màʼ ngeʼ atu nɨ̀ zɨ̂ ghelɨ Judà.”

¹¹Mɨtì Amàzayà ɨ faŋ tɨ̀ yvɨ̀tɨ, Jèhowàsh ɨ fòyn Isìlæ̀ ɨ kèʼ ŋweyn. Jèhowàsh ŋêyn Amàzayà ɨ fòyn Judà ɨ ndu nù a ntèʼ Bet Shemèsh a Judà. ¹²Ghelɨ Isìlæ̀ ɨ tɨm yɨ ghelɨ Judà, nô mɨ wul ɨ̀ Judà ɨ̀ kfà ɨ leʼ kfa a ŋweyn a ndo. ¹³Jèhowàsh ɨ tɨm yɨ Amàzayà ɨ wâyn Jòwâsh a Bet Shemèsh ɨ ndù nɨ̀ ŋweyn a Jèlusalèm. Wu n-ndù tî ɨ bɨ̀s àzɨ a mbàyn kɨ dyefɨ̀ chem ndû ntàmsɨ̀ ɨvɨ nɨ̀ ntàmsɨ̀ mɨ̀vɨ̂m nfama, zɨ̂tɨ̀ ɨchfɨ mbàyn ghè a ghɨ n-toŋtɨ na Ɨchfɨ Mbàyn Eflèm sɨ ndu sɨ chem ɨchfɨ̀ ghè a wu n-ghɨ ibvɨ i mbàyn nâ ghè. Amàzayà nà n-ghɨ wâyn Jòwâsh, Jòwâsh ɨ ghɨ wâyn Ahàzayà. ¹⁴Jèhowàsh nɨ̀n læ meyn lì àso ɨkwo a baŋnɨ-a nɨ̀ a fɨfâ nô à jɨ̀m nɨ̀ ɨ̀fwo ɨ jûŋ vzɨ̀ a wu nà n-ghɨ a ndo nɨ̀ Bôbo Fɨyini. Wu n-li meyn kɨmɨ ɨ̀fwo ɨ jûŋ alèʼ ghè a ghɨ n-lêm ɨfwo ateyn a ntoʼ baʼsɨ̂ nɨ̀ ghelɨ ghɨ li a Judà ɨ ndù nɨ̀ àŋena a Sàmalìyà.

¹⁵Awo a li-a kì a kɨ n-læ gàyn ta Jèhowàsh nà n-saʼ nɨ̀ àwo kì a wu n-læ nì nɨ̀ tɨ̀woŋ tìtɨ̀ a sugèyʼsɨ ŋweynsɨ nɨn læ tɨm yɨ baʼsɨ̂ nɨ̀ ìwoŋ zɨ̀ a wù n-læ tɨm ŋêyn Amàzayà nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀. ¹⁶Jehowàsh nɨn læ kfɨ ɨ kfa ndu yeyn ghɨ̀bo ŋweyn ghɨ gvɨ̀mì ŋweyn a gvɨ̀misɨ nɨ̀ tɨ̀fôyntɨ̀ Isìlæ̀tɨ̀ a Sàmalìyà, wâyn ŋweyn Jèlobòwàm ɨ koʼ ɨfôyn.

¹⁷Jòwâsh ɨ fòyn Isìlæ̀ nɨn læ kfɨ Amàzayà ɨ fòyn Judà ɨ fi chi bèŋsɨ̀ njvàsɨ̀ tâyn ɨ kæ kfɨ. ¹⁸Awo a li-a kì a kɨ n-læ gàyn ta Amàzayà nà n-saʼ Judà nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyntɨ Judàtɨ̀.

¹⁹Ghelɨ ghɨ li a Jèlusalèm nɨn læ meyn kulɨ mɨ̀nàŋ sɨ zue Àmàzayà, wu leʼ ndù a ntèʼ Lakìsh mɨtì ghɨ tum ghelɨ a ŋweyn ibàm ghɨ ndu zue ŋweyn afu. ²⁰Ghɨ n-zue tî ɨ kasi gvì nɨ̀ ìgvɨyn i ŋweyni atû nyàm kfaŋ a Jèlusalèm ɨ gvɨ̀mì a ngvɨ̀misɨ nɨ̀ ghɨ̀bo ŋweyn a ntèʼ nɨ̀ Devìt.

²¹Ghɨ n-gvɨ̀mi ŋweyn, ghelɨ Judà nô ghɨ̀ jɨ̀m ɨ lèm wâyn ŋweyn Azalìyà sɨ a fòyn, wu ghɨ bèŋsɨ̀ njvàsɨ̀ ntufa. ²²Amàzayà nɨn læ kfɨ ɨ kfa ndu yeyn ghɨ̀bo ŋweyn, wâyn ŋweyn Àzalìyà ɨ tɨm yɨ ntèʼ Elàt ɨ kasi bàʼlɨ̀ ntèʼ àteyn a nà kasî ghɨ ntèʼ Judà.

Fòyn ɨ̀lvɨ ɨ koʼ ɨfôyn a Isìlæ̀ ghɨ toŋtɨ̂ kɨmɨ na Jèlobòwàm

²³Jèlobòwàm ɨ wâyn Jèhowàsh nɨn læ koʼ ɨfôyn a Isìlæ̀ ma à sɨ ghɨ bèŋsɨ̀ njvàsɨ̀ tâyn ta Amàzayà ɨ wâyn Jòwâsh nɨn saʼ Judà. Jèlobòwàm nɨn læ saʼ sɨ a bèŋ mɨ̀vɨm ɨ̀n kæ̀ chî a Sàmalìyà. ²⁴Wù n-læ meyn nì mbɨ asɨ nɨ̀ Bôbo Fɨyini. Wù n-bu læ kasi sɨ ibàm i mbɨsɨ ghê a Jèlobòwàm ɨ wâyn Nebàt nà n-nî, ɨ nì ghelɨ Isìlæ̀ ɨ nì mbɨ. ²⁵À n-læ kasi lèm ŋweyn tɨghami tɨ Isìlæ̀ kɨ̀ ɨ̀lwèʼ ghè a tɨ nà n-ghɨ ateyn sɨ asɨ sɨ zɨ̀tɨ̀ a Lebo Hamàt sɨ ndù sɨ chem a jvâ fɨ̀ngvaŋ. Yi n-læ gayn kɨ ighel ta Bôbo Fɨyini ɨ Fɨyini fɨ Isìlæ̀ nɨn læ bè sɨ̂ wul ɨ̀ fèlɨnɨ nɨ̀ ŋweyn ɨ Jonà ɨ wâyn Amìtây ma wù lù a Gat Hefà.

²⁶Bôbo Fɨyini nà n-ghɨ ma wù yeyn meyn ngeʼ ì bemnɨ zɨ̀ a ghelɨ Isìlæ̀ nô ghɨ̀ jɨ̀m nà n-yeyn kèsa à n-ghɨ ghelɨ Isìlæ̀ ma ɨkôs a, wùl ɨ ghɨ wi sɨ gàmtɨ àŋena. ²⁷Bôbo Fɨyini nɨ̀n ni meyn Jèlobòwàm ɨ wâyn Jèhowàsh ɨ gàmtɨ̀ àŋena bòm ta Bôbo Fɨyini nɨ̀n læ meyn bè na yì læ̀ bebsɨ̂ mesì wì ghelɨ Isìlæ̀ sɨ a mbzɨ.

²⁸Awo a li-a kì a kɨ n-læ gàyn ta fòyn Jèlobòwàm nɨn saʼ nɨ̀ àwo kì a wù n-læ nì nô à jɨ̀m nɨ̀ tɨ̀woŋ tìtɨ̀ a sugèyʼsɨ ŋweynsɨ nɨn læ tɨm yɨ baʼsɨ̂ nɨ̀ dzɨ zɨ̀ a wù n-læ kasi tɨm yɨ Dàmaskùs nɨ̀ Hamàt ateyn nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Isìlæ̀tɨ̀. Ɨlwêʼ nâ wèyn a wu n-læ kasi tɨm yɨ nà n-ghɨ ɨlwêʼ ɨ Judà. ²⁹Fòyn Jèlobòwàm nɨn læ kfɨ ɨ kfa ndu yeyn ghɨ̀bo ŋweyn ma à ti tɨfôyn tɨ Isìlæ̀ tɨ litɨ, wâyn ŋweyn Sàkàliyà ɨ koʼ ɨfôyn.