2 Chronicles 18
Nfèʼtɨ̀ Mikà ɨ fu nfàsì-nfàsì sɨ̂ Ahàb
1ɨ̀mês A nà n-ghɨ ta Jèhoshafàt ɨ fòyn Judà ghaʼ, ghelɨ na fì ngvɨmlɨ̂ ŋweyn, wu tisɨ ìwo i malâ isas i ndo nɨ̀ ŋweyn nɨ̀ ìsas i ndo nɨ̀ fòyn Ahàb ɨ wul ɨ̀ Isìlæ̀. 2Bèŋsɨ̀ ɨ chwo kɨ sɨ̀ sèʼ têyn, Jèhoshafàt ɨ kàlì sɨ mùtɨ Ahàb a Sàmalìyà. Ahàb ɨ sɨ bzɨsɨ nɨ̀ nyamsɨ mbòloʼ kɨ̀ sɨ a idvɨ̀ sɨ̂ ŋweyn ŋêyn ghelɨ ŋweyn, Ahàb ɨ tsfɨtɨ ŋweyn na ŋêyn ŋweyn ndu nù ntèʼ Lamot Gilèd. 3Ahàb ɨ fòyn Isìlæ̀ nɨn bɨfɨ meyn sɨ̂ Jèhoshafàt na, “A wà ti kàʼ a wà gvi a ghesɨ̀và ndu nù ntèʼ Lamot Gilèd a?
Jèhoshafàt ɨ bèynsɨ̀ ɨ bè sɨ̂ ŋweyn na, “Ghesɨ̀và nɨn ghɨ kɨ sɨ afo àmòʼ, ghelɨ ghesɨ̀và ɨ ghɨ kɨ sɨ afo àmòʼ. Ghèsɨ̀ nɨn chɨ̀yntɨ̀ và a ghɨ ndu nù.” 4Mɨtì Jèhoshafàt ɨ fi bè sɨ̂ fòyn Isìlæ̀ na,“Bɨf iwo zɨ̀ sɨ̂ Bôbo Fɨyini a wù n-kɨŋ na ghesɨ̀và ni.”
5Fòyn Isìlæ̀ ɨ kæ yvɨ̀ŋtɨ nfèʼtɨ̀ sɨ ghaʼnɨsɨ ighɨ ì kæ̀ sɨ bɨf sɨ̂ àŋena na, “Ghèsɨ̀ ndu nù ghelɨ Lamot Gilèd ma ghèsɨ̀ kasi a?”
Àŋena bè sɨ̂ ŋweyn na, “Yì ndu, yi ndù-à a Fɨyini fɨ fu àŋena a yi awu/nì a yì tɨm yɨ àŋena.”
6Mɨtì Jèhoshafàt ɨ bɨfɨ na, “Nfèʼtɨ̀ ì ghaʼnɨ nɨ̀ Bôbo Fɨyini nɨn ghɨ afêyn ta ka ghɨ fî bɨ̀f sɨ̂ ŋweyn a?”
7Fòyn Isìlæ̀ ɨ bè sɨ̂ ŋweyn na, “Wùl ɨ̀lvɨ̀ bu ghɨ ta ghɨ kàʼ a ghɨ bɨf sɨ̂ ŋweyn mɨtɨ ma bâyn ŋweyn/kôŋ wì ŋweyn bòm ta wù bû tìmi bè ìwo i juŋì sɨ̂ mà ta yi n-jæ gàyn a bu kɨ ìwo i bzɨ-i. Izɨyn i ŋweyni nɨn ghɨ Mìkayà ɨ wâyn Imlà.
Jèhoshafàt ɨ bè sɨ̀ ŋweyn na, “À n-ghɨ wi tî ta fòyn nɨ̀n kelɨ sɨ nà taŋi-à.”
8Fòyn Isìlæ̀ ɨ jàŋ wul ɨ̀ felɨnɨ nɨ̀ ŋweyn ɨ̀vɨ̀, ɨ bè sɨ̂ ŋweyn na, “Nyɨŋ kɨ nyɨŋ/nyaŋsɨ ndu jaŋ gvì nɨ̀ Mìkayà ɨ wâyn Imlà.”
9Ahàb ŋêyn Jèhoshafà ɨ màʼ Dàlasɨ ɨ dùʼì a mɨchɨ mɨ̀tɨ̀fòyn nɨ̀ àŋena alèʼ ghè a ghɨ n-leŋ asaŋ ateyn ɨchfɨ afàf ta kɨ n-zɨ ndû ɨchfɨ mbàyn Sàmalìyà, nfèʼtɨ̀ sɨ ghaʼnɨ sìsɨ̀ nô sɨ̀ jɨ̀m ɨ bê àwo kì a kɨ n-jæ sɨ gàyn asɨ nɨ̀ àŋena. 10À nà n-ghɨ tì ma Zèdèkayà ɨ wâyn Kènanà ɨ kelɨ ndoŋsɨ nyâm sɨ̀ bò ma wù fàytɨ nɨ̀ àkasa, wu byal jàŋ ɨ bè na, “Bôbo Fɨyini bè na, ‘Ndoŋ sèynsɨ̀ nɨn ghɨ nchwæ sɨ dyèyn adyaʼ kì a yi n-tɨm yɨ sugèyʼ sɨ Alàmsɨ̀ nɨ̀ ànkeyna.’”
11Nfèʼtɨ̀ sɨ ghaʼnɨ sɨ lisɨ nà n-bê kɨmɨ ìwo zɨ̀ a Zèdèkayà bè na, “ Yì ndu nù ntèʼ Lamot Gilèd ɨ̀ tɨm yɨ. Bôbo Fɨyini nɨn fu ntèʼ àteyn awu nɨ̀ fòyn/nɨn nì-à a fòyn tɨm yɨ.”
12Wùl ɨ̀ ntum vzɨ̀ a ghɨ nì tum na wù ndu jàŋ nfèʼtɨ̀ Mikayà ɨ bè sɨ̂ ŋweyn na, “YeynaS! Nfèʼtɨ̀ sɨ ghaʼnɨ sɨ lisɨ sìsɨ̀ nɨn bê kɨ àwo a juŋà/kɨ nà fòyn nɨn tɨm yɨ-a. Timi kɨ ɨchfɨ̀ ɨ̀ mòʼ zɨ̂ àŋena ɨ boŋ be kɨ iwo zɨ̀ a àŋena nɨn bê/ɨ boŋ be kɨ awo a juŋà sɨ̂ fòyn.”
13Mɨtì Mìkayà ɨ bè sɨ̂ ŋweyn na, “Sɨ yaʼi ta Bôbo Fɨyini nɨn chi, mɨ n-bè kɨ ìwo zɨ̀ a Fɨyini femfɨ bè.” 14A nà ghɨ ta Mìkayà gvì, fòyn ɨ bɨf sɨ̂ ŋweyn na, “Ghèsɨ̀ ndu nù Lamot Gilèd ma ghèsɨ̀ kasi nà kfâ a? Wu bè na, “Yì ndu ɨ̀ tɨm yɨ. Bôbo Fɨyini nɨn nì-à a yì tɨm yɨ àŋena.”
15Mɨtì Fòyn ɨ bèynsɨ̀ ɨ bè sɨ̂ ŋweyn na, “Ma be meyn sɨ̂ và kɨ̀ ingal ingal na wà chfɨnɨ na/ be kɨ iwo zɨ̀ sɨ̂ mà samoʼ a ghɨ ìwo zɨ̀ a Bôbo Fɨyini bè.”
16Mìkayà ɨ kæ bèynsɨ̀ sɨ bè na, “Mà tî yèyn ghelɨ Isìlæ̀ ma ghɨ bɨm meyn wàŋtɨ ndù kɨ̀ a kfɨynsɨ ta njɨ̀sɨ̀ bula nchì, Bôbo Fɨyini bè na, ‘Ghelɨ ghèyn nɨn kelɨ wi wul na wù na tisɨ̂ àŋena. Bè na àŋena kasi nà kfâ, ka wùl nɨ̂ nù.’”
17Ahàb ɨ bèynsɨ̀ ɨ bè sɨ̂ Jèhoshafàt na, “Ma ni meyn bè sɨ̀ và na nfèʼtɨ̀ ì ghaʼnɨ yèyn lum bê kɨ ìwo i bzɨ̀-i kûm ma wù bû tìmi bè ìwo i juŋi.”
18Mìkayà ɨ nà bu taŋî ndû kɨ ndu ɨ bè na, “Yvɨtɨ iwo zɨ̀ a Bôbo Fɨyini bè: Mà tî yèyn Bôbo Fɨyini wu duʼ achɨ a tɨ̂fòyn nɨ̀ ŋweyn nɨ̀ nchìsɨ ŋweyn nô sɨ̀ jɨ̀m, sɨ lisɨ ɨ ti ɨkœ ɨtwo, sɨ lisɨ ɨ ti ɨkœ nɨ̂nkœ̀. 19Bôbo Fɨyini ɨ bɨfɨ na, “A n-tfɨtɨ̂ ndà Ahàb ɨ fòyn Isìlæ̀ na wù ndu nù Lamot Gilèd ta ka ghɨ zue ŋweyn a?’ Nô mɨ ndà ɨ nà bê kɨ iyi i ŋweyn ikfâʼtɨ̀-ì. 20A nì nà ghɨ a ngòʼsɨ, ayvɨs a li-a ɨ timi asɨ nɨ̀ Bôbo Fɨyini ɨ bè na, “Mɨ n-tvɨtɨ̂ ŋweyn.”
Bôbo Fɨyini ɨ bɨf sɨ̂ ànkeyna na, ‘ Wa ti n-nî nô a dzɨ ì kà?’
21Ayvɨs ateyna ɨ bè na, ‘Mɨ n-dù nà ghɨ àyvɨs kì a kɨ n-wam achfɨ̀ nɨ̀ nfèʼtɨ̀ sɨ ghaʼnɨsɨ nô sɨ̀ jɨ̀m/Mɨ ndù ni-à a nfèʼtɨ̀ sɨ ghaʼnɨ nɨ̀ Ahàbsɨ̀ na wam kɨ ɨ̀nkfaŋ. Bôbo Fɨini ɨ bè sɨ̂ ànkeyna na, “Ndu tvɨtɨ ŋweyn. Wa n-dù tvɨtɨ-à a wù bɨmi sɨ ndù.’
22Bôbo Fɨyini ni meyn na nfèʼtɨ̀ shyasɨ nô sɨ̀ jɨ̀m wam ànkaŋ sɨ̂ và. Bôbo Fɨyini choʼnɨ meyn sɨ visi na ngeʼ koli vâ.”
23Zèdèkayà ɨ wâyn Kènanà ɨ kæ koʼ sɨ leŋ awu ikèʼ nɨ̀ Mìkayà. Wu n-lèŋ tî ɨ bɨf sɨ̂ ŋweyn na, “Ayvɨs a Bôbo Fɨyini tî vìsi ma achi à kà sɨ nà taŋi sɨ̂ và a?”
24Mìkayà ɨ bèynsɨ̀ ɨ bè na, “Wà læ̀ yeyn kɨ achɨ ghè a ka wà leʼ ɨ̀ ndù sɨ lèytɨ̀ nô antêynɨ̀ lûm/ndo.”
25Fòyn Isìlæ̀ ɨ bè na, “Yì ghalɨ wul ɨ wèyn ɨ̀ ndù nɨ̀ ŋweyn sɨ̂ Jòwâsh ɨ wâyn fòyn ŋêyn Amòn ta wù n-saʼ ntèʼ Sàmalìya. 26Yi ndû yi bè na, “Fòyn bè na yì we wul ɨ wèyn a ndô nchaʼ nà fu kɨ àbayn a nyoʼnɨ-a sɨ̂ ŋweyn nɨ̀ mu, bu fu wi afo a li-a nô sɨ chem ta ka mà læ̂ kàsi kfa kɨ nɨ̀ mbôynɨ̀.’”
27Mìkayà ɨ bè na, “Ɨlvɨ ta wà læ̀ kàsi kfa nɨ̀ mbôynɨ̀, a à na ghɨ bula Bôbo Fɨyini taŋi tòynɨ̀ a ma.” Wu n-bè tî ɨ fi bè na, “Zɨ̀ nô ghɨ̀ jɨ̀, yì faytɨ yvɨ̀tɨ ɨ̀ lèm àwo kì a mà bè.”
Ghɨ zue Ahàb a Lamot Gilèd
28Ahàb ŋêyn Jèhoshafàt ɨ fòyn Judà nɨ̀n koʼ meyn sɨ nu Lamot Gilèd. 29Fòyn Isìlæ̀ ɨ bè sɨ̂ Jèhoshafàt na, “Mɨ n-se sɨ seʼ ɨtwaʼ iwòŋ, ɨ̀ màʼ ndzɨsɨ lûsɨ̀ ta ka ghɨ na yeyn kelî wì ma, mɨtì a wà maʼ dàla/ndzɨsɨ tɨ̂fòyn nɨ̀ và.” Fòyn Isìlæ̀ ɨ kæ màʼ ndzɨsɨ lûsɨ̀ sɨ seʼ ɨtwaʼ iwòŋ.
30À nà n-ghɨ tì ma fòyn Alàm chwosɨ meyn ìsaʼ sɨ̂ ghelɨ ghì a ghɨ n-tisɨ mɨ̀nchaʼ mɨ̀ ìwò na, “Ka àŋena nɨ̂n nù wul ɨ wûlù a bu kɨ fòyn Isìlæ̀.” 31A nà ghɨ ta àŋena yeyn Jèhoshafàt, àŋena ɨ kfàʼtɨ kɨ sɨ a àŋena ngeŋsɨ na, “Ɨwêyn nɨn ghɨ fòyn Isìlæ̀.” Ta àŋena kfàʼtɨ̀ tî, ɨ nà sɨ ndû sɨ nu ŋweyn mɨtì wu byal ɨ dzɨ̀, Bôbo Fɨyini ɨ gàmtɨ̀ ŋweyn ɨ nì àŋena ɨ kasi sɨ a ŋweyn ibàm. 32Ghelɨ nâ ghì a ghɨ n-gufɨ̀/tisɨ mɨ̀nchaʼ mɨ̀ ìwòŋ nɨn yeyn na à n-ghɨ wi fòyn Isìlæ̀, àŋena faŋ tɨ̀ fì tɨ̀ nyɨŋ a ŋweyn ibàm.
33Sugèyʼ ì lì ɨ fvɨ̀sɨ̀ fɨ̀nchya fɨ ŋweyn ɨ bɨm tɨm kɨ tɨm, fɨ ndu ku fòyn Isìlæ̀ alèʼ bula nô àfo-a nî nà kɨ̂ŋtɨ-à. Wu bè sɨ̂ wùl ɨ̀ vzɨ̀ a wù n-gufɨ fɨ̀nchaʼ fɨ iwòŋ nɨ̀ ŋweyn na, “Bèynsɨ fɨ̀nchaʼ ɨ li fvɨ̀ nɨ̀ mà sɨ a ɨtwaʼ iwòŋ, ghɨ lemsɨ meyn mà nô sɨ a ŋaŋ.” 34Iwoŋi ɨ to koʼ ndu kɨ asɨ, ghɨ yisi kɨ sɨ tɨm iwoŋ, Ahàb ɨ ghɨ ma wù yeʼtɨ meyn kɨ̀ a fɨnchaʼ fɨ iwòŋ nɨ̀ ŋweyn nà ki ndûsɨ̀ nɨ̀ ghelɨ Alàm, ɨchfɨ̂ iyvɨ ɨ ni se sɨ sœ wu kfɨ.