2 Chronicles 17

Jèhoshafàt ɨ koʼ fòyn a Isìlæ̀

¹Asà nɨn læ kfɨ, Jèhoshafàt ɨ wâyn ŋweyn ɨ yɨ ŋweyn sɨ a fòyn/ɨ lì àlêʼ a ŋweyn ɨ kwo nì ghelɨ Isìlæ̀ ɨ keli àdyaʼ na nu ghelɨ Isìlæ̀/ ɨ kwo keli àtem a to-a sɨ nu ghelɨ Isìlæ̀. ²Wù n-lem meyn sugèyʼsɨ̀ nô mɨ a ntèʼ ì kà ta ghɨ tɨm mbàyn jɨ̀ŋ kàli a Judà ɨ lèm ìnôyn i sugèyʼsɨ̀ a Judà baʼsɨ̂ nɨ̀ ntèʼsɨ Eflèm afî a bò ŋweyn nɨn læ tɨm yɨ.

³Bôbo Fɨyini nà n-ghɨ ŋêyn Jèhoshafàt bòm ta wu nà n-jelɨ̀ a dzɨsɨ ghê a bò ŋweyn Devìt nà n-jelɨ̀ ateyn. Wù n-bu læ nà bɨfɨ ìgâmtɨ̀ sɨ̂ Bâl, ⁴mɨtì bɨfɨ kɨ sɨ̂ Fɨyini fɨ bò ŋweyn, jelɨ̀ kɨ ta tɨsaʼ tɨ ŋweyntɨ nɨn dyêyn nî wì awo a bɨ-a kì a ghelɨ Isìlæ̀ nɨn nî. ⁵Bôbo Fɨyini nɨn lem meyn Jèhoshafàt na wù na saʼ Judà, ghelɨ Judà nô ghɨ̀ jɨ̀m ɨ nà gvî nɨ̀ tɨ̀futɨ sɨ̀ ŋweyn, yi nì wu nà sɨ ghɨ wul ɨ̀ ghaʼnɨ/ɨtwo, ghelɨ ɨ fî ngvɨmlɨ̂ ŋweyn. ⁶Wù nà n-kôŋ sɨ nà yvɨnɨ Fɨyini nô a jûŋ/kɨ nɨ̀ àtem a ŋweyn à jɨ̀mà, ɨ bebsɨ ɨ̀lwêʼ vzɨ̀ a ghɨ n-koʼsɨ mɨ̀yìnì ateyn a Judà ɨ kòytɨ̀ ɨ̀tôʼ ɨ Ashelà.

⁷À nà n-ghɨ ta Jèhoshafàt saʼ sɨ a bèŋsɨ̀ tal, wu tum ghelɨ ghɨ felɨnɨ/tisɨnɨ nɨ̀ ŋweyn na ghɨ jel ɨ̀ yèʼi a ntèʼsɨ a Judà. Àŋena nà n-ghɨ Ben Hèl ŋêyn Obàdayà kɨ̀mɨ nɨ̀ Zèkàliyà ŋêyn Nètanìyèl baʼsɨ̂ nɨ̀ Mìkayà. ⁸Wù n-læ tum àŋena ŋêyn ghelɨ ndo nɨ̀ Levì ghɨ li azɨyn a àŋena ɨ ghɨ Shèmayà nɨ̀ Nètànayà ŋêyn Zèbàdayà nɨ̀ Asahèl ŋêyn Shèmìlamòt nɨ̀ Jèhonatàn ŋêyn Adonijà nɨ̀ Tobijà baʼsɨ̀ nɨ̀ Tob Àdonijà kɨ̀mɨ nɨ̀ Elishamà ŋêyn Jèholàm a ghɨ ngàŋsɨ ndô Fɨyini.

⁹Àŋena nɨn læ ndu nɨ̀ ŋwàʼlɨ̀ zɨ̀ a ghɨ nyàʼ isaʼ i Bôbo Fɨyini ateyn, ɨ jèl ɨ kal ntèʼsɨ Judà kɨ sɨ̀ jɨ̀m, jelɨ yeʼî ghelɨ nɨ̀ ɨ̀nyeyn.

¹⁰Bôbo Fɨyini ɨ nì ifaynì ɨ ku ghelɨ tɨlaʼ tìtɨ̀ a tɨ nà n-baʼsɨ a Judà, àŋena ɨ faŋ tɨ nu Jèhoshafàt. ¹¹Ghelɨ Fìlisìyà ɨ gvì nɨ̀ tɨ̀futɨ sɨ̂ Jèhoshafàt baʼsɨ̂ nɨ̀ àso ɨkwo a fɨfâ sɨ a tâksɨ̀, ghelɨ Alàb ɨ gvì nɨ̀ ɨ̀ywaʼ nkamsɨ nsòmbo nɨ̀ ɨ̀ywaʼ ighɨ nsòmbo baʼsɨ̂ nɨ̀ bzɨsɨ ndoŋsɨ kɨ̀mɨ nkamsɨ nsòmbo nɨ̀ bzɨsɨ ndoŋsɨ ighɨ nsòmbo.

¹²Adyaʼ a Jèhoshafàt ɨ nà fî tôʼ kfeynsɨ̂ ndû kɨ ndu, wu bàʼlɨ̀ mbàynsɨ̀ sɨ to kɨ tèyn ɨ fi bàʼlɨ̀ ɨ̀lwêʼ vzɨ̀ a ka ghɨ na lèm ɨ̀fwo ateyn a Judà. ¹³Wù n-lem meyn ɨ̀fwo a ntèʼsɨ a Judà kɨ̀ sɨ a idvɨ̀, ɨ lèm sugèyʼsɨ̀ a Jèlusalèm a ghɨ ghelɨ faytɨ̂ kya sɨ tɨm iwoŋ. ¹⁴Akeynà nɨn ghɨ àzɨyn a sugèyʼ

nâ sìsɨ̀ kɨ̀ asas a ndosɨ asas a ndosɨ: Sugèyʼ sìsɨ̀ a sɨ n-lù a Judà nà n-ghɨ nkam ighɨ ì tal ma ghɨ gwotɨ meyn inîyn nkam, a tisɨ̂ Adnà.

¹⁵Wùl ɨ̀ vzɨ̀ a wu nà n-baʼsɨ sɨ̂ Adnà nà n-ghɨ Jèhohanàn tisɨ̂ sugèyʼsɨ̀ ighɨ ì bò nɨ̀ sugèyʼsɨ̀ mɨ̀vɨm nfama.

¹⁶Ɨvzɨ̂ a wù n-baʼsɨ sɨ̂ Jèhòhanàn ɨ ghɨ Amàsaya ɨ wâyn Ziklì vzɨ̀ a wu n-choʼnɨ sɨ nà felɨ̀ sɨ̂ Bôbo Fɨyini. Wù nà n-tisɨ̂ sugèyʼsɨ̀ nkam ighɨ ì bò.

¹⁷Sugèyʼ sìsɨ̀ a sɨ n-lù a Benjamìn nà n-ghɨ nkam ighɨ ì bò a tisɨ̂ Elìyadà a ghɨ sugèyʼ kelɨ àtem a to-a. Sugèyʼsɨ ateynsɨ nà n-kelɨ mɨ̀nchya nɨ̀ nkyàsɨ iwòŋ.

¹⁸Wùl ɨ̀ vzɨ̀ a wu nà n-baʼsɨ sɨ̂ Elìyadà nà n-ghɨ Jèhozabàd, tisɨ̂ sugèyʼsɨ̀ ɨvɨ nɨ̀ sugèyʼsɨ̀ mɨ̀vɨm nfama sɨ kelɨ ɨ̀fwo iwòŋ gvɨ̂tɨ̀ sɨ nù.

¹⁹À ti sugèyʼ sìsɨ̀ a sɨ nà n-felɨ̀ sɨ̂ fòyn sɨ baʼsɨ sɨ̂ ɨsîsɨ̀ a wu n-læ lèm a ntèʼsɨ ghê a ghɨ tɨm mbàyn jɨ̀ŋ kàli nò sɨ̀ jɨ̀m a Judà.