1 Samuel 9

Samwel ɨ yisi Sôl sɨ a fòyn ghelɨ Isìlæ̀

¹Wùl isas i ndo nɨ̀ Benjamìn ɨ̀lvɨ nɨn læ meyn nà ghɨ a ghɨ nô wul ɨ two, izɨyn i ŋweyn i ghɨ Kish, a ghɨ wâyn Abiyèl. Abiyèl nà n-ghɨ wâyn Zelò, Zelò ɨ ghɨ wâyn Bekolàt, Bekolàt ɨ ghɨ wâyn Afìyà. ²Kish nà n-kelɨ wayn, izɨyn i ŋweyn i ghɨ Sôl, a ghɨ kɨ nô ɨ̀kuŋ, njetɨ̂ chwô nô mɨ ndà a Isìlæ̀, nô wul ɨ ghɨ wi sɨ fèʼnɨ ŋêyn ŋweyn.

³A læ nà ghɨ achi a li-a, njàkâsɨ Kîsh ma à ti bò Sôl ɨ jèl ɨ lèlɨ̀. Kish ɨ kæ be sɨ̂ wayn ŋweyn Sôl na wù li wul ɨ̀ felɨnɨ ɨ̀lvì ŋêyn ŋweyn jel kɨŋ njàkâs sɨ ateyn. ⁴Àŋena lù ɨ jèl ɨ toynɨ a Eflèm ilaʼ i kfɨynsɨ ɨ fi jèl ɨ chem nô abàs a Shàlishà mɨtì ɨ faŋ tɨ̀ yeyn ɨ lù sɨ afu ɨ ndù abàs a Shalìm, sɨ ghɨ wi afu ɨ fi jèlɨ toynɨ ìlaʼ i Benjamìn nô ì jɨ̀m mɨtì ɨ faŋ tɨ̀ yeyn njàkâs sɨ ateyn.

⁵A nà sɨ ghɨ ta àŋena jèlɨ̀ chem abàs a Zûf, Sôl ɨ bè sɨ̂ wùl ɨ̀ felɨnɨ vzɨ̀ a ŋêyn ŋweyn nà n-ghɨ amoʼ tî na, “Yi n-jofɨ̀ na ghesɨ̀và kasi nà kfa bu tì a bò wom lesɨ njàkâsɨ̀ nà sɨ kwo kayn kɨ mbzɨ kûm ghesɨ̀và.”

⁶Mɨtì wùl ɨ̀ felɨnɨ àteyn ɨ bè sɨ̂ Sôl na, “Wùlɨ̀ Fɨyini ɨ̂lvɨ̀ nɨn ghɨ a ntèʼ afêyn ghelɨ ngvɨmlɨ̂ ŋweyn nô a jûŋ. Wù n-bê mɨ na gha, yi gâyn kɨ tì. Yi n-jofɨ̀ na ghesɨ̀và ndu yèyn ŋweyn, lvɨfili a wù feʼtɨ nâ ghesɨ̀và kàʼ a ghɨ kɨ̂ŋ ndù wo dzɨ nɨ̀ njàkâsɨ ateynsɨ a.”

⁷Sôl ɨ bèynsɨ̀ ɨ bɨf sɨ̂ ŋweyn nâ, “Ghesɨ̀và ti n-ndù ghɨ fu nô ghà sɨ̂ ŋweyn ma ɨfwo ɨ yɨnɨ mæ meyn sɨ a bòsɨ̀ nô ɨ̀ jɨ̀m a? Afo a bu ghɨ wi sɨ ndù sɨ fu sɨ̂ ŋweyn.”

⁸Wul ɨ̀ felɨnɨ àteyn ɨ bè na, “Mɨ n-kelɨ fɨ̀kwôtɨ̀ ma mà kàʼ a mà fu sɨ̂ ŋweyn ta ka wù feʼtɨ nâ ghesɨvà nɨn kɨŋ ndû wo dzɨ nɨ̀ njàkâs sɨ ateynsɨ a.”

⁹À nà n-ghɨ sɨ asɨ a Isìlæ̀ wùl na kɨŋ sɨ yvɨ iwo sɨ̂ Fɨyini fɨ, wu bè na, yi n-jofɨ̀ na ghɨ ndu yèyn isɨ-ibayni, bê tì a ghɨ nfèʼtɨ̀ ìghaʼnɨ nɨ̀ Fɨyini fɨ bòm ta ghɨ nà n-toŋtɨ nfèʼtɨ̀ ìghaʼnɨ ilaʼ i Isìlæ̀ ɨtuʼ nâ ghè na isɨ-ibayni.

¹⁰Ta wùl ɨfelɨnɨ àteyn bè tî, Sôl ɨ bèynsɨ̀ kɨ na, “Wà bè samoʼ, gvi ghɨ lu.” Àŋena lu ndù a ntèʼ afî a nfèʼtɨ̀ Fɨyini nâ zɨ̀ nà n-chi ateyn.

¹¹A nà sɨ ghɨ ta àŋena lù ɨ̀ nà koʼ kfɨyn ì lì a dzɨ sɨ chem a ntèʼ afu, àŋena yeyn woynda ngòynsɨ̀ ghɨ li ta ghɨ fvɨ̀ gvì sɨ tu mû ɨ bɨf sɨ̂ àŋena na, “Isɨ i baynɨ-i nɨn ghɨ afêyn a?” ¹²Àŋena bèynsɨ̀ na, “Yi n-ghɨ. Wù n-kûʼ koʼ ndû kɨ a yi asɨ tèyn. Yì làytɨ̀ kɨ nɨ̀ avɨ̂ a têyn a yì koli ŋweyn. Wù gvì a ntèʼ afêyn layn tèyn bòm ta ghelɨ nɨn kelɨ ìfu sɨ fu alèʼ ifu sɨ̂ Fɨyini fɨ. ¹³Yì nyàŋsɨ̀ zɨ ndù kɨ̀ antêynɨ̀ ntèʼ lvɨ̂yn tèyn a yì yeyn ŋweyn jæ ta ka wù koʼ ndù alèʼ ifu sɨ yɨ. Ghelɨ ghì a ghɨ n-ghɨ alèʼ ifu nâ ghè kàʼ ghɨ bû zɨ̀tɨ̀ sɨ yɨ bula wù ndû sɨ bòysɨ ifu ateyn meyn. Yì nyàŋsɨ̀ ndù kɨ̀ lvɨ̂yn tèyn a yì koli ŋweyn.”

¹⁴Sôl ŋêyn wùl ɨ̀ felɨnɨ vzɨ̀ ɨ koʼ ɨ nà zɨ ndû kɨ têyn ɨ kòynɨ̀ nɨ̀ Samwèl wu koʼ ndû alèʼ ifu nâ ghè.

¹⁵A nà n-ghɨ jæ ta ka ɨtuʼ layn na Sôl gvi, ma Bôbo Fɨyini dyeyn meyn sɨ̂ Samwèl na, ¹⁶ɨtuʼ nɨn læ̀ layna a à ni nà ghɨ kɨmɨ aleŋ ɨlvɨ ghê a wù nì gvì sɨ̂ Samwèl ateyn, a wù tsɨynsɨ wul sɨ̂ ŋweyn a ghɨ wul ɨ̀ ndô Benjamìn, a Samwèl yisi ŋweyn sɨ a fòyn ta ka wù na saʼ ghelɨ̀ ŋweyn a Isìlæ̀. Na fòyn àteyn læ̀ bœ̂sɨ̀ ghelɨ Isìlæ̀ sɨ ɨwu nɨ̀ ghelɨ Fìlisìyà bòm ta wù yeyn meyn ngeʼ zɨ̀ a àŋena nɨn ghɨ ateyn fì yvɨ idzɨ̂ i àŋena.

¹⁷Samwèl ɨ ni nà yeyn gvî nɨ̀ Sôl tèyn, Bôbo bè sɨ̂ ŋweyn na, “Ɨwêyn nɨ̀n ghɨ wul vzɨ̀ a mà tî fèʼtɨ sɨ̂ và tì. À n-ghɨ ŋweyn vzɨ̀ a ka wù na saʼ ghelɨ̀ ghem.”

¹⁸Sôl ɨ koʼ ɨ baʼsɨ sɨ̂ Samwèl ɨchfɨ mbàyn ɨ bè sɨ̂ ŋweyn na, “Mɨ n-chwotɨ̂ và, fèʼtɨ sɨ̂ mà na isɨ-ibayni nɨn chi wo afêyn a?”

¹⁹Samwèl ɨ bèynsɨ̀ ɨ bè sɨ̂ Sôl na, “À n-ghɨ mà têyn. Yì koʼ ndayn alèʼ ifu bòm ta ghesɨ̀nà nɨn yɨ kɨ amoʼ layn. À læ̀ nà ghɨ a libɨs a mà se sɨ ndù sɨ tsɨynsɨ zɨ ɨ̀ fèʼtɨ nô mɨ ghà vzɨ̂ a wà n-kɨŋ sɨ nà kya jæ ta ka yì lù. ²⁰Sɨ iwo i njàkâsɨ̀ afî a sɨ tî lèlɨ̀ tî, layn na sɨ ghɨ mɨchi ɨ̀n tal, ka yì fî kfàʼ mbzɨ bòm ta ghɨ sɨ ghɨ ma ghɨ yeyn meyn. Ba wà n-kya na ghelɨ Isìlæ̀ nô ghɨ̀ jɨ̀m sɨ yeʼtɨ̂ kɨ a vâ zɨ̂ ìsas i ndo nɨ̀ bò va-ì.”

²¹Sôl ɨ bèynsɨ̀ ɨ bè na, “Mɨ n-ghɨ wul ɨ ndô Benjamìn, a ghɨ kɨ nô ìsas i ndo i boli a Isìlæ̀ tèyn, wà na bê ìwo nâ yèynì sɨ̂ mà têyn bòm ghà?”

²²Samwèl ɨ li zɨ nɨ̀ Sôl ŋêyn wùl ɨ̀ fèlɨnɨ vzɨ̀ alèʼ a yɨnɨ-a ɨ lèm àŋena nô alèʼ a ngaŋtɨnɨ-a antêynɨ̀ nɨ̀ ghelɨ ghì a ghɨ n-làʼì ghɨ koʼ ndû mɨ̀vɨm ɨ̀n tal. ²³Samwèl ɨ bè sɨ̂ wùl ɨ̀ kfenɨ na, “Li gvi nɨ̀ àleʼ a nyâm kì a mà nì fu na wà faytɨ lèm tì.”

²⁴Wùl ɨ̀ kfenɨ àteyn ɨ li gvì nɨ̀ àbî ɨnkùyna ɨ lèm asɨ nɨ̀ Sôl. Samwèl ɨ bè na, “À ti aleʼ a nyâm kì a mà tî lèm sɨ̂ và. Kfɨl. Mà tî lèm kɨ̀ nô sɨ achi ghè a mà zɨ̀tɨ̀ sɨ làʼi ghelɨ ateyn na wà gvi layn zɨ̂ àŋena kfɨl.” Sôl ɨ yɨ kɨ nô ŋêyn Samwèl achi nâ ghè.

²⁵A nà sɨ ghɨ ta àŋena kàsi meyn kàlì sɨ alèʼ ifu, Samwèl ɨ li ɨ koʼ nɨ̀ Sôl abàs a ndo a li-a dzɨ iyvɨ ŋêyn ŋweyn ɨ bèsɨ̀ àwo, ghɨ faytɨ àlêʼ Sôl ɨ chi sɨ afu. ²⁶Ɨtuʼ ni nà layn gvî kɨ tèyn Samwèl ɨ jàŋ bè sɨ̂ Sôl na, “Làli ɨ baʼtɨ mà ndu tsɨ̀ynsɨ và.” Sôl ɨ làlì ŋêyn Samwèl ɨ fvɨ̀ ɨ nà sɨ ndû-à. ²⁷Àŋena ni jèl kɨ têyn ɨ nà sɨ fvɨ̂ mesì ndû nɨ̀ ntèʼ, Samwèl ɨ bè sɨ̂ Sôl na, “Bè sɨ̂ wayn ɨ̀ felɨnɨ wèyn na wù chwo nà ndû asɨ. Wù chwô se sɨ ndù wa tɨmtɨ mà feʼtɨ iwo zɨ̀ a Bôbo bè sɨ̂ và.”