1 Samuel 10

¹Samwèl ɨ lì fɨ̀nshɨŋ fɨ mɨ̂vɨl ɨ sfɨ̀s atu nɨ̀ Sôl ɨ baʼnɨ ŋweyn ɨ bè sɨ̂ ŋweyn na, Wa kya samoʼ na Bôbo Fɨyini yisi meyn và sɨ a fòyn ghelɨ Isìlæ̀. Wa n-saʼ ghelɨ ŋweyn ɨ̀ bœ̀sɨ̀ àŋena sɨ a ɨwu nɨ̀ mbàynɨ̀sɨ àŋena. ²Ghesɨ̀và nɨn gwosɨ̀ afêyn a wà se sɨ ndù ɨ̀ kòynɨ̀ nɨ̀ ghɨ̀lûmnɨ̀ ghɨli ghɨ̀bò a ngùŋ ìsè nɨ̀ Lashèl a ntèʼ Zelzà, ighami nɨ̀ Benjamìn. Wa n-koynɨ̀ nɨ̀ àŋena, a ghɨ be sɨ̂ và na, “Ghɨ yeyn meyn njàkâs sìsɨ̀ a wà tî fvɨ̀ seʼ ikɨŋ ateyn tì. Bò vâ bu fì kfâʼ wì mbzɨ kûm njàkâs sɨ ateyn. Wù sɨ kwo kfâʼ kɨ mbzɨ kûm và. Wù sɨ kayn kɨ nâ, yi ti nî nô ghà sɨ yeyn wayn ɨvzɨ-a.”

³Wa nì visî àŋena ɨ̀ jèl kɨ̀ têyn ndù chem isas i fɨ̂kàʼ fɨ ôk ghè a ntèʼ Tabò a zɨ̂ ghɨ̀lûmnɨ̀ ghɨli ghɨ̀ tal koynɨ afu àŋena ndû sɨ koʼsɨ Fɨyini a ntèʼ Betèl. Wa nì yeyn àŋena wùl ɨ̀ mòʼ ɨ kelɨ woyn bzɨsɨ ghɨ̀ tal, ɨ̀lvì kelɨ tɨ̀ghef tɨ abayn tɨ̀ tal, ɨ̀lvì kelɨ nsàl mɨ̀lùʼ. ⁴Àŋena nì toŋtɨ̂ và, ɨ̀ fu tɨghef tɨ abayn tɨ̀ bò sɨ̂ và. Ghɨ fu, wa fsɨ.

⁵Sɨ ibàm ateyn, a wà lu kòʼ a Gibìyà a kfɨyn Fɨyini, alèʼ ghè a sugèʼsɨ Fìlisìyà sɨ nɨn seʼ felɨ̀ ateyn ɨ̀ lù afu ɨ̀ se sɨ zɨ sɨ ndù a ntèʼ ɨ̀ yeyn anôyn a nfèʼtɨ̀sɨ sɨ ghaʼnɨsɨ a li-a kɨ kalì gvî atû kfɨ̀yn, buʼ gvî nɨ̀ tɨ̀luŋtɨ nɨ̀ nchùmsɨ fî toŋ tɨ̀soŋ, jâŋ fêʼtɨ̀ àwo. ⁶A Ayvɨs a Bôbo suʼi gvì a wa atu nô nɨ̀ àdyaʼa, a zɨ̂ àŋena chɨyntɨ na bɨyna, jâŋ fêʼtɨ̀ àwo kì a kɨ n-ghɨ sɨ gàyn. Nô mɨ ɨlvɨ gha a wà kasi kɨ̀ sɨ a wûl ɨwû lù. ⁷Awo nâ kèyna gâyn mèsì tèyn, wa nà ni kɨ iwo zɨ̀ a wà n-kelɨ sɨ nì bòm ta Fɨyini fɨ nɨn ghɨ zɨ̂ ŋweyn.

⁸“Kàlì ndayn a Gilgàl. Mɨ n-kàlì gvî kolî và ɨ̀ fu tɨfu tɨ nyoʼnɨtɨ sɨ̂ Bôbo fì fu kɨ̀mɨ tɨ̀fu sɨ nà chî nɨ̀ mbôynɨ̀ ghesɨ̀ ghelɨ ghɨli. Wà n-kelɨ sɨ chìtɨ afu sɨ a mɨchi nsòmbo na mà gvi fèʼtɨ̀ ìwo zɨ̀-ì a ka wà ni.”

Ghɨ lèm Sôl sɨ a fòyn

⁹A nà sɨ ghɨ ta Sôl kàsi lù sɨ a ngùŋ nɨ̀ Samwèl, Fɨyini fɨ ɨ kfɨnɨ àtem a ŋweyn, nô mɨ ghà ɨ gàyn achi nâ ghè kɨ̀ ighel ta Samwèl nì bè sɨ̂ ŋweyn. ¹⁰Sôl ŋêyn wùl ɨ̀ fèlɨnɨ nɨ̀ ŋweyn ɨ ndu chem a Gibìyà ɨ kòynɨ̀ nɨ̀ anôyn a nfèʼtɨ̀sɨ ghaʼnɨsɨ kì, Ayvɨs a Bôbo ɨ gvì sɨ̂ ŋweyn nô nɨ̀ àdyaʼa ŋêyn àŋena chɨ̀yntɨ̀ ɨ nà sɨ jâŋ fêʼtɨ̀ àwo kì a kɨ n-ghɨ sɨ gàyn. ¹¹Ghelɨ ghì a ghɨ nà n-kya Sôl sɨ a asɨ ɨ yeyn ta wù sɨ fêʼtɨ̀ awo kɨ bu ghɨ sɨ jæ sɨ gàyn ɨ nà sɨ bɨf sɨ àŋena ngeŋsɨ nâ, “À ti gàyn ghà sɨ̂ wayn Kish wèyn a? Yi ti n-dyêyn na wù sɨ boŋ ghɨ kɨmɨ nfèʼtɨ̀ ìghaʼnɨ ìlì ma?”

¹²Wùl ɨ lvì a wù nà n-chi a ntèʼ afu tèyn ɨ bèynsɨ̀ ɨ bɨf nâ, “Ghɨ̀bo nfèʼtɨ̀ sɨ li sèynsɨ̀ nɨn ghɨ ghɨ̀ ndà a?” À ti ta ghɨ n-læ zɨtɨ ɨ nà sɨ mô sɨ a ngàyn na, “Ba yi ti n-ghɨ na Sôl sɨ boŋ ghɨ kɨ mɨ nfèʼtɨ̀ ìghaʼnɨ ma?” ¹³Sôl ɨ fèʼtɨ̀ mèsì awo kì a kɨ bu ghɨ sɨ jæ gàyn ɨ kasi koʼ alèʼ ifu.

¹⁴Waynà bò ŋweyn ɨ bɨf sɨ̂ ŋweyn ŋêyn wùl ɨfelɨnɨ vzɨ̀ na, “Yì tî lù ndù wo?” Sôl ɨ bè na, “Ghès tî nà jelɨ̀ kɨŋ njàkâs sɨ bò wom ɨ̀ kɨŋ fàŋ tɨ yeyn ɨ̀ lù ndù sɨ yeyn Samwèl kûm ìwo ateyn.”

¹⁵Wayn nà bò ŋweyn nâ vzɨ̀ ɨ bè sɨ̂ ŋweyn na, “Fèʼtɨ iwo zɨ̀ a Samwèl tî ndù bè sɨ̂ zɨ̀.” ¹⁶Sôl ɨ bè sɨ̂ ŋweyn na, “Wù tî bè sɨ̂ ghès na ghɨ yeyn meyn njàkâs sɨ ateyn.” Wù n-be têyn ɨ faŋ tɨ̀ fèʼtɨ̀ sɨ̂ ŋweyn na Samwèl tî bè tì fì bè kɨ̀mɨ na yi n-kelɨ sɨ nà ghɨ fòyn.

¹⁷Samwèl nɨ̀n jaŋtɨ meyn ghelɨ Isìlæ̀ nô ghɨ̀ jɨ̀m asɨ nɨ̀ Bôbo a ntèʼ Mizbà, ¹⁸ɨ bè sɨ̂ àŋena na, “Bôbo Fɨyini fɨ ghelɨ Isìlæ̀ fɨ bè na, ‘Mɨ n-læ meyn fvɨ̀sɨ̀ zɨ̀ sɨ a Ijìb ɨ bœ̀sɨ̀ zɨ̀ sɨ ɨwu nɨ̀ àŋena ɨ fi bœsɨ kɨmɨ zɨ̀ sɨ ɨwu nɨ̀ tɨ̀laʼ tɨli tìtɨ̀ a tɨ nà n-yeʼtɨ zɨ.’ ¹⁹Mɨtì yi na sɨ ghɨ ma yi chas meyn Fɨyini fifɨ ma à ti Fɨyini fìfɨ a fɨ n-bœ̂sɨ̀ zɨ sɨ a zɨ̀ a ngeʼsɨ nô sɨ̀ jɨ̀m ɨ̀ bè na mà fu ɨvzɨ̂ fòyn. Yi n-jofɨ̀ lvɨ̂yn na yì gvi asɨ nɨ̀ Bôbo kɨ̀ ta achfɨ̂ a ndosɨ nɨ̀ zɨ̀-a nɨn ghɨ, nô mɨ ndà timi kɨ̀ anòyn ta isas i ndo nɨ̀ ŋweyni nɨn ndêyn.”

²⁰A nà sɨ ghɨ ta Samwèl bè meyn asas a ndosɨ nɨ̀ ghelɨ Isìlæ̀ a fvɨ̂ gvì tì, ghɨ kìtɨ̀, yi fvɨ̀ na Bôbo choʼ meyn ɨchfɨ ndo nɨ̀ Benjamìn. ²¹Samwèl ɨ fi jàŋ ɨ fvɨ̀sɨ̀ ghelɨ ndo nɨ̀ Benjamìn ghɨ fvɨ gvi kɨ achfɨ a ndosɨ achfɨ a ndosɨ, Bôbo choʼ ɨchfɨ ndo nɨ̀ Matì. Ghelɨ ɨtweŋ nɨ̀ Matì ɨ fi fvɨ gvì kɨ ghɨ̀ jɨ̀m Bôbo choʼ Sôl ɨ wâyn kish. Mɨtì ghɨ kɨŋ ŋweyn ɨ faŋ tɨ̀ yeyn. ²²Àŋena fi bɨf sɨ̂ Bôbo nâ, “Wùl àteyn sɨ ghɨ afêyn a?” Bôbo bɨmi ɨ bè na, “Wù vzɨ nlêytɨ̀ ibàm ifwo.”

²³Ghelɨ ateyn ɨ nyɨŋ ndu ghal Sôl ɨ li gvì nɨ̀ ŋweyn antêynɨ̀ nɨ̀ ghelɨ. Wu timi antêynɨ̀ nɨ̀ ghelɨ ɨ nà njetɨ̂ chwô nô mɨ ndà afu. ²⁴Samwèl ɨ bè sɨ̂ ghelɨ ateyn nô ghɨ̀ jɨ̀m na, “Yì faytɨ̂ kì wul wèyn a Bôbo chòʼ têyn. Ba yi yèyn meyn wul vzɨ̀ a Bôbo chòʼ antêynɨ̀ nɨ̀ ghesɨ̀nà?” Ghelɨ ateyn ɨ nà sɨ byatɨ̂ kɨ byaytɨ bê na, “Mɨ̀chi mɨ̀ ŋweyn dyebtɨ.”

²⁵Samwèl ɨ faytɨ fèʼtɨ̀ àdyaʼ kì a fòyn nɨ̀n kelɨ atu nɨ̀ ghelɨ ŋweyn nɨ̀ àwo kì a wù n-kelɨ sɨ nà ni-à ɨ fi nyàʼ a ŋwàʼlɨ̀ ɨ lèm asɨ nɨ̀ Bôbo Fɨyini. A nà sɨ ghɨ ta wù mèsì, wu bè sɨ̂ ghelɨ ateyn na àŋena kasi kfa sɨ a àŋena mɨ̂bè.

²⁶Sôl ɨ boŋ Kasi kfa sɨ a ŋweyn abe a Gibìyà ɨ se sɨ kfa, Bôbo kùm mɨ̀tem mɨ̀ ghelɨ adyaʼ ghɨli àŋena jùmtɨ̀ ndù nɨ̀ ŋweyn. ²⁷Mɨtì ɨ̀ngù ɨ ghelɨ ghɨli nà bɨf nâ, “A ti bè na wùl tèyn ta Sôl kàʼ a wù gamtɨ na ghesɨ̀nà tɨm yɨ mbàynɨ̀sɨ ghesɨ̀nà-a?” Àŋena taŋi tì ɨ kesɨ Sôl ɨ faŋ tɨ̀ fu afo sɨ̂ ŋweyn mɨtì Sôl ɨ faŋ tɨ̀ bè iwo.