1 Samuel 13

Sôl ɨ faŋ tɨ̀ yvɨnɨ Bôbo

¹Sôl nɨ̀n læ koʼ sɨ a fòyn a Isìlæ̀ ghɨ bèŋ mɨ̀vɨm ɨ̀n tal ɨ saʼ sɨ a bèŋ mɨ̀vɨm ɨ̀n kæ̀ njvàsɨ̀ bò.

²Wù n-læ meyn choʼtɨ ghelɨ ndo ìwòŋ nɨ̀ ŋweyn nkamsɨ̀ tal na ŋêyn àŋena ndu nù ghelɨ Fìlisìyà. Ghelɨ faŋ nkam antêynɨ̀ nɨ̀ ghelɨ nâ ghì na ŋêyn àŋena nà tɨm ìwoŋ amoʼ a ntèʼ Mikmàsh nɨ̀ Betèl ɨ ntèʼ kfɨ̀ynsɨ. Ghɨli ghì nkam ɨ ndù ŋêyn Jònatàn a ntèʼ Gibìyà abàs a Benjamìn. Wu n-læ choʼtɨ tî ɨ bè sɨ̂ ɨghî a ghɨ faŋ na àŋena kasi kfa sɨ a àŋena mɨ̂bè.

³Jònatàn ɨ ndù ɨ tɨm yɨ sugèyʼsɨ Fìlisìyà sisɨ̀ a sɨ nà n-ghɨ a ntèʼ Gebà. Ghelɨ Fìlisìyà ɨ yvɨ iwo ateyn, Sôl ɨ bè na ghɨ toŋ isoŋ kɨ̀ ilaʼ i Isìlæ̀ ì jɨ̀m ɨ̀ nì ghelɨ yvɨŋtɨ ɨ̀ bàʼtɨ ìwoŋ. ⁴Ghelɨ ɨ yvɨ ntum nâ yèyn kɨ ntèʼ sɨ̀ jɨ̀m ilaʼi Isìlæ̀ na Sôl tɨm meyn yɨ̀ anôyn a ghelɨ iwoŋ nɨ̀ ghelɨ Fìlisìyà a li-a. Ghelɨ Fìlisìyà ɨ nà sɨ bàyn ghelɨ Isìlæ̀ nô sɨ a ŋaŋ. Ghelɨ iwoŋ nɨ̀ Sôl ghɨli kæ ndù sɨ koli ŋweyn a ntèʼ Gilgàl.

⁵À nà n-ghɨ kɨmɨ ɨlvɨ nâ ghè ghelɨ iwoŋ nɨ̀ ghelɨ Fìlìsìyà ɨ yvɨ̀ŋtɨ̀ sɨ baʼtɨ sɨ nu ghelɨ Isìlæ̀. Àŋena nà n-kelɨ mɨtùsɨ̀ nkamsɨ̀ tal a tisɨ̂ ghelɨ nkamsɨ ntufa, nɨ̀ sugèyʼsɨ̀ sɨ dvɨ̂ kɨ tèyn ma ghɨ kàʼ ghɨ bû taŋ. Àŋena tsɨ̀yntɨ̀ ɨ koʼ ndù a ntèʼ Mikmàsh. Alêʼ nâ kèynà nà n-baʼsɨ̂ a ntèʼ Bet Avèn. ⁶A nà sɨ ghɨ ta ghelɨ iwoŋ nɨ̀ Isìlæ̀ yèyn na kɨ n-bef sɨ̂ àŋena bòm ta ghelɨ iwoŋ nɨ̀ ghelɨ Fìlisìyà nà n-to chwô àŋena, ghɨ leʼnɨ ɨ lèytɨ̀ a tɨ̂fò, ghɨli lèytɨ̀ a tɨ̂wù, ghɨli lêytɨ̀ a tɨ̂bɨ̀, ghɨli lêytɨ̀ a tɨ̂bɨ̀ tɨ mu. ⁷Ghelɨ Isìlæ̀ ghɨli nɨ̀n leʼ meyn dyàŋ jvâ Jodàn ɨ ndu chem a ntèʼ Gâd nɨ̀ ntèʼ Gilgàl. Mɨtì Sôl ɨ faŋ kɨ a ntèʼ Gilgàl. Ghelɨ iwoŋ nɨ̀ ŋweyn ghì a ghɨ n-faŋ ŋêyn ŋweyn ɨ nà fayn nô sɨ a ŋaŋ. ⁸A nà n-ghɨ tì ma Samwèl be meyn sɨ̂ Sôl na wù chiti zɨ a ntèʼ Gilgàl sɨ a mɨ̂chi nsombo, mɨtì Samwèl ɨ faŋ tɨ̀ gvì, nô mɨ ɨlvɨ gha ghelɨ iwoŋ nɨ̀ Sôl ɨ zɨ̀tɨ̀ sɨ leʼnɨ. ⁹Sôl ɨ kæ bè na, “Yì li gvì nɨ̀ nyam sìsɨ̀ a ghɨ lèm sɨ nyòʼ sɨ ifu sɨ̂ Bôbo tî nɨ̀ ɨ sîsɨ̀ a ka ghesɨ̀nà kfɨl ɨlvɨ ta ghɨ fù meyn ìfu sɨ̂ Bôbo.” Sôl ɨ fu ifu i nyoʼnɨ-i nâ zɨ̀-ì sɨ̂ Bôbo kɨ̀ sɨ a ŋweyn a ngeŋ. ¹⁰Wu nà fu mesì gvî kɨ nɨ̀ ìfu ateyn i têyn, Samwèl ɨ gvì Sôl ɨ fvɨ ndù sɨ toŋtɨ ŋweyn.

¹¹Samwèl ɨ bɨf sɨ̂ ŋweyn nâ, “À ti gha a wà nì têyn a?” Sôl ɨ bè sɨ̂ ŋweyn na, “Mà nì yeyn na ɨlvɨ vzɨ̀ a wà tî bè na wà n-gvî ateyn chwô meyn, ghelɨ iwoŋ nɨ̀ ma na sɨ leʼnɨ̂-à, ma ghelɨ iwoŋ nɨ̀ ghelɨ Fìlisìyà sɨ yvɨ̂ŋtɨ̀ a ntèʼ Mikmàsh. ¹²Ma yeyn tì ɨ̀ nà sɨ kfâʼ na àŋena nɨn gvì nû mà ghesɨ̀ ghelɨ ghem a Gilgàl bula ma nî ìwo na Bôbo na saŋlɨ-à. À ti iwo zɨ̀-ì a mà nì yèyn na yi n-jofɨ̀ sɨ fu ifu sɨ̂ Bôbo.” ¹³Samwèl ɨ bè sɨ̂ ŋweyn na, “Wà ni meyn nô ìwo angù. Wà bû lèm ì saʼ zɨ̀ a Bôbo Fɨyini fyafɨ tî fù sɨ̂ và. Wa nà n-nî iwo zɨ̀-ì a Fɨ n-kɨŋ a Fɨ ni a zɨ̂ woyn gha læ̂ sàʼ Isìlæ̀ nô ta ka ghɨ̀ læ̂ ghɨ̀. ¹⁴Mɨtì yi bu fì boynɨ̂ wì. Zɨ̂ woyn ghya kàʼ ghɨ bû nà fî saʼ ìlaʼ i Isìlæ̀. Bôbo sɨ ghɨ ma wù choʼ meyn wul vzɨ̀ a wù n-kôŋ na wù na ghɨ fòyn ghelɨ Isìlæ̀ ɨ̀ lèm na wù li alêʼ à kya sɨ a fòyn bòm ta wà bû lèm ìsaʼ i ŋweyn.”

¹⁵Samwèl ɨ taŋi tì ɨ lù sɨ a Gilgàl ɨ ndù a Gibìyà a ntèʼ Benjamìn. Sôl ɨ taŋ ghelɨ ghì a ŋêyn àŋena nì nà ghɨ amoʼ ghɨ fvɨ̀ ighɨ ntufa (footnote).

Sôl ŋêyn Jònatàn ɨ tɨm yɨ ghelɨ Fìlisìyà

¹⁶Sôl ŋêyn wayn ŋweyn Jònatàn nɨ̀n ndu meyn ŋêyn ghelɨ iwoŋ nɨ̀ ŋweyn ɨ bɨ̀ a ntèʼ Gibìyà abàs ilaʼ a Benjamìn. Ghelɨ Fìlisìyà ɨ bɨ̀ a Mikmàsh. ¹⁷A nà ghɨ a mɨ̂lvɨ̀ a mɨ̂lvɨ̀ inôyn i ghelɨ iwoŋ nɨ̀ ghelɨ Fìlisìyà ìtal ɨ ndû a ntèʼ a ntèʼ ndû nû ghelɨ, beʼì lû nɨ̀ ɨ̀fwo àŋena. Anôyn a kɨ asɨ-a ɨ ndù a ntèʼ Ofɨ̀là, abàs a Shuwàl, ¹⁸a li-a ndù dzɨ a ntèʼ Bet Holòn, a li-a ndù dzɨ a kfɨynsɨ afî a sɨ nà n-ghɨ ighami ta yi nà n-keʼnɨ ntèʼ Zeboyìm a dzɨ̂ nse ìyum.

¹⁹Ghelɨ Isìlæ̀ nà n-faytɨ kelɨ wi ɨfwo iwòŋ bòm ta nô wùl ɨ̀ mòʼ nà n-ghɨ wi ilaʼ i Isìlæ̀ ta wu nà n-tsɨ alâm. Yi nà n-ghɨ tèyn bòm ta ghelɨ Fìlisìyà nà n-bɨmi wì na wùl ɨ̀ Isìlæ̀ na nî ìnkì ifèl nâ yèynì, a bu tì a ghelɨ Hibɨ̀lù na tsɨ tɨ̀fô nɨ̀ àwoŋa. ²⁰À ti iwo zɨ̀ a ghelɨ Isìlæ̀ nà n-se sɨ se njàmsɨ nɨ̀ fɨsɨ nɨ̀ mɨ̀nyuè nɨ̀ ɨ̀fwo felɨnɨ nɨ̀ àŋena ɨlvɨ, àŋena li kàlì kɨ nɨ̀ ɨ̀ŋweyn a Fìlisìyà. ²¹Ghelɨ alàm ilaʼ i Fìlisìyà nà n-bɨf ɨ̀kwo sɨ nà se ɨfwo nâ wèyn wu dvɨ̂ kɨ tèyn. Àŋena nà n-se sɨ se nô mɨ ghà ghɨ bɨf ɨkwo wu lætɨ̂ kɨ tèyn sɨ yuyn afɨ-a ateyn.

²²A nà ghɨ achi ghè a ghelɨ Isìlæ̀ ndù sɨ nu ghelɨ Fìlisìyà a kelɨ kɨ sôl ŋêyn wâyn ŋweyn Jònatàn kelɨ àwoŋ nɨ̀ mɨ̀nyuè.

²³À nà n-ghɨ tì ma anôyn a ghelɨ iwoŋ nɨ̀ ghelɨ Fìlisìyà a li-a ndu meyn ɨfyàyn a ntèʼ Mikmàsh.