1 Chronicles 9

¹Yi n-dyêyn na ghɨ n-læ nyàʼ azɨyn a ghelɨ Isìlæ̀ nô ghɨ̀ jɨ̀m kɨ̀ sɨ a ibzɨ, kɨ̀ a ɨchfɨ ndo ɨchfɨ ndo, a ŋwàʼlɨ̀ tɨ̀fòyn nɨ̀ àŋena.

Fɨyini fɨ nɨn læ visi na mbàynɨ̀sɨ̀ ghaytɨ ndù nɨ̀ ghelɨ Judà a Babilòyn bòm àtu atona nɨ̀ àŋena sɨ̂ ŋweyn. ²Ghɨ n-læ ghaytɨ ndu nɨ̀ àŋena tî, àŋena læ kasi kfa sɨ àŋena ntèʼsɨ, ɨ lì ɨ̀lwêʼ àŋena. A n-læ kasi kfa ghelɨ Isìlæ̀ sɨ̀ asɨ, baʼsɨ̂ nɨ̀ ghelɨ ghì a ghɨ nà nyoʼ tɨfu a ndô Fɨyini, nɨ̀ ghelɨ isas i ndo nɨ̀ Levì, nɨ̀ ghelɨ ghì a ghɨ nà n-fêl a ndo Fɨyini. ³Ghelɨ isas i ndo nɨ̀ Judà, nɨ̀ ghelɨ Benjamìn nɨ̀ ghelɨ Eflèm, baʼsɨ̂ nɨ̀ ghelɨ Mànasè nà n-chi a Jèlusalèm. ⁴Utày nɨn læ nà chi a Jèlusalèm a ghɨ wâyn Amihùd, Amihùd nà n-ghɨ wâyn Omlì, Omlì ɨ ghɨ wâyn Imlì, Imlì ɨ ghɨ wâyn Banì, ɨ wâyn Belèz, bò Belèz ɨ ghɨ Judà. ⁵A woyn nɨ̀ Shelà, a ghɨ wayn ɨwu asɨ nɨ̀ ŋweyn ghɨ toŋtɨ na Àsayà. ⁶A ghɨ a woyn nɨ̀ Zelà, a ghɨ Jewèl. Ghelɨ isas i ndo nɨ̀ Judà ghi a ghɨ nà n-chɨ̂ntɨ̀ chi a Jèlusalè, nà n-ghɨ ighɨ ntufa nɨ̀ ghelɨ mɨ̀vɨm bulamòʼ. ⁷Ghelɨ Isìlæ̀ ghi a ghɨ nà n-chi a Jèlusalèm a ghɨ ghelɨ isas i ndo nɨ̀ Benjamìn nà ghɨ Salù, ɨ wâyn Meshulàm. Meshulàm nà n-ghɨ wayn Hodaviyà, ɨ wâyn Hasenuwà. ⁸Ibneyà nà n-chî kɨmɨ a Jèlusalèm, a ghɨ wâyn Jelohàm, nɨ̀ Elà, ɨ wâyn Uzì ta bò ŋweyn nà n-ghɨ Miklì, nɨ̀ Meshulàm, ɨ wâyn Shefàtayà. Shefàtayà nà n-ghɨ wâyn Lewèl, ɨ wâyn Ibnijà. ⁹Ghelɨ isas i ndo nɨ̀ Benjamìn ghì a ghɨ nà chi a Jèlusalèm nà n-chɨyntɨ̀ ghɨ ighɨ bulamòʼ nɨ̀ ghelɨ njvàsɨ̀ ntufa a mɨvɨm ɨ̀n tâyn. Ghelɨ nâ ghèyn nô ghɨ̀ jɨ̀m tèyn nà n-ghɨ kɨ ghɨ̀bo ntèʼsɨ. ¹⁰Ghelɨ ghi a ghɨ nà nyoʼ tɨfu a ndo Fɨyini nɨn læ meyn boŋ kasi gvi kɨmɨ a Jèlusalèm; ɨ Jèdayà nɨ̀ Jehoyalìb, nɨ̀ Jakìn. ¹¹Azaliyà nɨn kasi meyn gvi kɨmɨ a Jèlusalèm a ghɨ wâyn Hikayà. Hilkayà nà n-ghɨ wâyn Meshulàm, Meshulàm ɨ ghɨ wâyn Zadòk, Zadòk ɨ ghɨ wâyn Melayiwòt, Melayiwòt ɨ ghɨ wâyn Ahitùb vzɨ̀ a wu nà kini ndo Fɨyini. ¹²Adayà nà n-chî kɨmɨ a Jèlusalèm. Wu n-læ nà ghɨ wâyn Jèlohàm, Jèlohàm ɨ ghɨ wâyn Pashù, Pashù ɨ ghɨ wâyn Malkijà. Màsayà nɨn læ nà boŋ chi kɨmɨ afu. Bò Màsayà nà n-ghɨ Adiyèl, Adiyèl ɨ ghɨ wâyn Jazelà, Jazelà ɨ ghɨ wâyn Meshilemìt, ɨ wâyn Imè. ¹³Ghelɨ ghì a ghɨ nà n-nyôʼ tɨfu a ndô Fɨyini nà n-chɨyntɨ̀ ghɨ nkam nɨ ghelɨ ighɨ nsòmbo nɨ̀ ghelɨ mɨ̀vɨm ntufa. Àŋena nà n-ghɨ ghelɨ, kelɨ àdyaʼ nô a jûŋ, fêl a ndô Fɨyini. ¹⁴Woyn Levì ghɨli nɨn læ meyn kasi gvi nà chî a Jèlusalèm. Ɨlvi nà n-ghɨ izɨyn i ŋweyni ghɨ Shemayà. Bò Shemayà nà n-ghɨ Hashùb, ma Hashùb nà n-ghɨ wâyn Azlikàm, Azlikàm ɨ ghɨ wâyn Hashabyà, ɨ wul ɨ̀ Melalì; ¹⁵Woyn Levì ghɨli ghì a ghɨ n-læ boŋ kasi gvi nà chî a Jèlusalèm nà n-ghɨ Bakbakà, nɨ̀ Helèsh nɨ̀ Galàl ŋêyn Màtaniyà, ɨ wâyn Mikà, Mikà nà n-ghɨ wâyn Ziklì, bò ŋweyn Ziklì ɨ ghɨ Asàf. ¹⁶Obàdayà nɨn læ meyn boŋ kasi gvì kɨmɨ a Jèlusalèm. Obàdayà nà n-ghɨ wayn Shemayà, Shemayà ɨ ghɨ wâyn Galàl, Galàl ɨ ghɨ wâyn Jedutùn. Belekiyà nɨn boŋ meyn gvi a Jèlusalèm. Belekiyà nà n-ghɨ wâyn Asà, Asà ɨ ghɨ wâyn Elkanà ta wù nà n-chi a ntèʼ Netofà. ¹⁷Ghelɨ ghì a ghɨ nà fêl a ɨchfɨ mbàyn nà ghɨ Shalùm nɨ̀ Akùb nɨ̀ Talòn nɨ̀ Ahimàn, baʼsɨ̂ nɨ̀ woynà ŋweyn. A n-læ nà ghɨ Shalùm atu a àŋena. ¹⁸Woyn Levì nɨn læ nà lum ti kɨ a ɨchfɨ mbàyn ghè a wu nà n-zɨ a ndo Fɨyini dzɨ abàs ghè a ɨchfɨ iyvɨ i nɨn sal ateyn, a lum chwo kɨ fôyn ateyn. ¹⁹Bò Shalùm nɨn læ nà ghɨ Kolè,bò Kolè ɨ ghɨ Ebiyasàf, bò Ebiyasàf ɨ ghɨ Kolà. Shalùm ŋêyn ghelɨ ŋweyn læ nà ghɨ nchìsɨ ndô Fɨyini. Àŋena læ nà nchìsɨ ndô Fɨ̀yini kɨ̀ ta ghɨ̀bo àŋena n-læ nà ghɨ. ²⁰A nà n-ghɨ a ɨtuʼ ɨmu, a ghɨ Fineghàs, ɨ wâyn Èleza ghɨ nchì ndô Fɨyini, Bôbo Fɨyini ɨ tisɨ̂ ŋweyn. ²¹A n-læ nà ghɨ ɨtuʼ nâ ghè Zàkàliyà, ɨ wâyn Meshelèmayà ɨ ghɨ nchì ndô Fɨyini, lum ti kɨ ɨchfɨ fɨndo nɨ̀ Bôbo. ²²Ghelɨ ghì a fòyn Devìt ŋêyn ngàŋ ndô Fɨyini, ɨ Samwèl nɨn læ choʼtɨ sɨ a nchìsɨ̀ a ndô Fɨyini nɨn læ nà chɨ̂yntɨ̀ ghɨ ighɨ ì bò nɨ̀ ghelɨ njvàsɨ̀ bò. Ghɨ n-læ choʼtɨ̂ àŋena a ntèʼsɨ, kɨ̀ isas i ndo isas i ndo. ²³Ghɨ nà n-choʼ nô mɨ ndà sɨ a nchì ndô Fɨyini, wù læ̂ kfɨ, wayn ŋweyn nà kelɨ sɨ lì alêʼ a ŋweyn. ²⁴Achfɨ̂ a mbàyn ndô Fɨyini-à nɨn læ nà ghɨ à kæ̀; ɨchfɨ mbayn nà n-ghɨ abàs ikuè, ghɨ abàs ichɨyn, ghɨ abàs ghè a ɨchfɨ̂ iyvɨ i nɨn salɨ ateyn, ghɨ abàs ghè a yi n-sœ ateyn; nô mɨ ɨ̀chfɨ ɨ̀kfa kelɨ nchì. ²⁵Nô mɨ nchì ìka nà n-chî ndô Fɨyini sɨ a mɨchi nsòmbo, waynà ŋweyn nà kelɨ sɨ gvì sɨ gamtɨ ŋweyn. ²⁶Woyn Levì nà n-ghɨ ɨtu nchìsɨ ndô Fɨyini nâ vzɨ̀, kelɨ kɨmɨ sɨ nà chi ɨlwêʼ vzɨ̀ a ghɨ nà n-lêm ɨfwo ɨtwo ateyn, a ndô Fɨyini. ²⁷Àŋena nà n-kfâ chî kɨ ndô Fɨyini tèyn ɨtuʼ ni layn, àŋena choʼ ɨchfɨ mbàyn, bòm ta a nà n-lêm àŋena lêm ànchoʼ ndô Fɨyini. ²⁸Nchisɨ lisɨ nà n-kelɨ sɨ nà toʼnɨ nɨ̀ ɨ̀kfaŋ vzɨ̀ a ghɨ nà n-we ɨfwo ikoʼsɨ ateyn; ghɨ gvî nɨ̀ ɨ̀ŋweyn nô mɨ ɨlvɨ gha, àŋena taŋtɨ, nì mèsì, ɨ̀ sesɨ lu nɨ̀ ɨ̀ŋweyn, àŋena fi taŋtɨ. ²⁹Nchì sɨ lisɨ nà n-kelɨ sɨ na toʼnɨ nɨ̀ ɨ̀fwo vzɨ̀ a ngàŋ ndô Fɨyini nɨn felɨ nɨ̀ ɨ̀ŋweyn a ndô Fɨyini; ɨ mɨlûʼ, nɨ̀ àbayn a, nɨ̀ mɨ̀vɨ̂l, baʼsɨ̂ nɨ̀ ìleŋ i. ³⁰Ngàŋsɨ ndo Fɨyini sɨ lisɨ nà n-kelɨ kɨ sɨ nà fyes ɨ̀fwo vzɨ̀ a ghɨ n-kelɨ sɨ nyoʼ a ndo Fɨyini a ɨlvɨ ifu. ³¹A n-læ nà nyôʼ Màtìtayà, nyôʼ àbayn ifu, a ghɨ wul ìsas i ndo nɨ̀ Levì, ɨ wayn ɨwû àsɨ nɨ̀ Shalùm vzɨ̀ a ghɨ nà n-jaŋ bò ŋweyn nà Kolà tì. ³²Ghelɨ isas i ndo nɨ̀ Levì ghɨli; ɨ woyn Kohàt, nà n-kelɨ sɨ nà nyoʼ abayn ifu a achi a ikoʼsɨ. ³³Ghɨli nà n-chî kɨ a ndô Fɨyini, yem kɨ njàŋsɨ, bu fì felɨ̀ wì iwo ili bòm ta àŋena nà n-kelɨ sɨ nà chî yem kɨ njàŋsɨ̀ a ndô Fɨyini tèyn ɨtu layna. ³⁴Ghelɨ nâ ghèyn a ghɨ taŋtɨ têyn nô ghɨ̀ jɨ̀m nɨn læ nà chi kɨ a Jèlusalèm. ghɨ ɨ̀tu asas a ndosɨ ǹì àŋena

Ajâŋ a Sôl

³⁵Jeyèl nɨn læ nà chi a Gibìyòn, ghɨ bò ntèʼ, ma à n-læ ku ŋweyn ntèʼ ateyn. Wi ŋweyn nà n-ghɨ izɨyn i ŋweyni ghɨ Makà. ³⁶Wayn ɨwû àsɨ nɨ̀ ŋweyn nà n-ghɨ Abdòn, ànkùmtɨ̀ a ghɨ Zûl, ɨlvì ghɨ Kîsh, nɨ̀ Bâl nɨ̀ Nêl nɨ̀ Nadàb. ³⁷Gedò nɨn læ nà ghɨ kɨmɨ wâyn ŋweyn, nɨ̀ Àhiyò, baʼsɨ̂ nɨ̀ Zàkàliyà ŋweyn Miklòt. ³⁸Miklòt nɨn læ nà ghɨ bò Shimèm. Àŋena n-læ nà chɨ̂ntɨ̀ chî a Jèlusalèm baʼsɨ̂ nɨ̀ ghelɨ isas i ndo nɨ̀ àŋena. ³⁹Nêl nɨn læ nà ghɨ bò Kîsh, kîsh ɨ ghɨ bò Sôl, Sôl ɨ kelɨ woyn ghɨ̀kæ̀, ɨ Jònatàn nɨ̀ Malki-Shuwà nɨ̀ Àbinadàb ŋêyn Esh-Bàl. ⁴⁰Jònatàn nɨn læ nà ghɨ bò Meli-Bàl, Meli-Bàl ɨ ghɨ bò Mikà. ⁴¹Woyn Mikà nɨn læ nà ghɨ Bithòn nɨ̀ Melèk nɨ̀ Taliyà ŋêyn Ahàz. ⁴²Ahàz nɨn læ nà ghɨ bò Jadà, Jadà ɨ ghɨ bò Alemèt ŋêyn Azmavèt ŋêyn Zimlì. Zimlì nà n-ghɨ bò Mozà. ⁴³Mozà nɨn læ nà ghɨ bò Bineyà, Bineyà ɨ ghɨ bò Lefayà, Lefayà ɨ ghɨ bò Elesà, Elesà ɨ ghɨ bò Azèl. ⁴⁴Azèl nɨn læ nà kelɨ woyn ntufa; ɨ Azlikàm nɨ̀ Bokelù nɨ̀ Ishmæ̀l nɨ̀ Sheliyà nɨ̀ Obàdayà ŋêyn Hanàn.