1 Chronicles 10

Sôl ɨ Zue ngêŋ ŋweyn

¹Ghelɨ Fìlisiyà nɨn læ meyn gvi nù ghelɨ Isìlæ, ɨ zuetɨ ghelɨ Isìlæ kɨ̀ sɨ a idvɨ̀ a kfɨ̂yn Gilbowà, Sôl ŋêyn woyn ŋweyn ɨ nyɨŋ leʼnɨ. ²Ghelɨ Fìlisiyà nɨn læ meyn nyɨŋ a ibàm nɨ̀ Sôl ŋêyn woyn ŋweyn nô nɨ̀ àdyaʼa, ɨ koli àŋena, ɨ zuetɨ woyn Sôl. Àŋena nɨn læ meyn zue Jònatàn nɨ̀ Àbinadàb ŋêyn Malki-Shuwà. ³Iwoŋ ateyn i n-læ meyn to ghaʼ Sôl, ghɨ tɨm lemsɨ ŋweyn. ⁴Wu kæ sɨ bè sɨ̂ wùl vzɨ̀ a wu nà n-beʼì ɨfwo iwòŋ nɨ̀ ŋweyn na, “Choʼ ifô ì zæ, ɨ chuʼ zue ma ateyn, bu tì a ɨfwo wèyn a wu n-jelɨ nɨ̀ àkela bula ghɨ sɨ tèyn, ghalɨ ma, nà nyâblɨ̀ nɨ̀ mà, lûʼsɨ̀ mà.” Wu n-læ bè nô mɨ tì, wùl nâ vzɨ̀ a wu nà n-beʼì ɨfwo iwòŋ nɨ̀ ŋweyn tì ɨ nà sɨ fàyn ghaʼa. Sôl ɨ kæ li ɨfô iŋweyn sɨ chu sɨ zue ngeŋ ŋweyn ateyn. ⁵Wùl vzɨ̀ a wù n-beʼì ɨfwo iwòŋ nɨ̀ Sôl nɨn læ yeyn tî ta Sôl chuʼ zue ngeŋ ŋweyn, wu boŋ lì iyi ŋweyn ifo-ì, ɨ chu zue ngeŋ ŋweyn. ⁶À ti ta Sôl ŋêyn woyn ŋweyn, baʼsɨ̂ nɨ̀ ghelɨ ndo nɨ̀ ŋweyn nɨn læ chɨ̀yntɨ kfɨtɨ. ⁷A n-læ nà ghɨ ta ghelɨ Isìlæ yeyn na sugèyʼsɨ àŋena sɨ nyɨŋ meyn lèʼnɨ, ghɨ zue Sôl bàʼsɨ nɨ̀ woyn ŋweyn, àŋena nyɨŋ leʼnɨ ɨ visi ntèʼsɨ àŋena, ghelɨ Fìlisiyà ɨ gvi zɨ nà sɨ chî ateyn. ⁸Ɨtuʼ layn ghelɨ Fìlisiyà ɨ ndu sɨ kumtɨ ɨfwo iwòŋ nɨ̀ sugèyʼsɨ ɨsilæ, ɨ kæ sɨ yeyn na Sôl ŋêyn woyn ŋweyn ti meyn kfɨ̀tɨ a kfɨ̀yn Gilbowà. ⁹Àŋena nɨn læ meyn choʼtɨ ɨ̀fwo sɨ a ŋweyn ɨwùyn nô ɨ̀ jɨ̀m, ɨ teyn atu a ŋweyn, ɨ lù nɨ̀ ànkeyna, baʼsɨ̂ nɨ̀ ɨ̀fwo iwòŋ nɨ̀ ŋweyn, ɨ tum fèʼtɨ̀ a ilaʼi Fìlisiyà na à ti iwo zɨ̀ a yi gàyn. Àŋena n-læ meyn feʼtɨ kɨmɨ ɨlwèʼ ghè a àŋena na n-koʼsɨ mɨyini mɨ̀ àŋena ateyn. ¹⁰Àŋena nɨn læ ndu lem ɨfwo iwòŋ nɨ̀ Sôl a ndo mɨyini nɨ̀ àŋena, ɨ ghaŋsɨ àtu a ŋweyn a ndô fiyini nɨ̀ àŋena fɨ lifɨ ghɨ toŋtɨ̂ na Dagòn. ¹¹A n-læ nà ghɨ ta ghelɨ Jabèsh Gilèd yvɨ iwo zɨ̀ a ghelɨ Filisiyà nì sɨ̂ Sôl, ¹²ɨ tum ghelɨ ghɨtonɨ nɨ̀ àŋena nô ghɨ̀ jɨ̀m, àŋena ndu bèʼì ìgvɨyn i Sôl, baʼsɨ̂ nɨ yi woyn ŋweyni, ɨ gvi nɨ̀ ìnyeni a Jabèsh. Àŋena nɨn læ gvɨ̀mi ɨvɨf Sôl ŋêyn woyn ŋweyn a isas i fɨ̂kàʼ a Jabèsh, ɨ bam ɨchfɨ̂ sɨ mɨchi nsòmbo. ¹³Sôl nɨn læ kfɨ bòm àtu a tonɨ-a nɨ̀ ŋweyn sɨ̂ Bôbo Fɨyini. Sôl n-bu læ nà yvɨnɨ̂ Bôbo Fɨyini, fî seʼ fyeŋ nô mɨ̀nyaʼ. ¹⁴Sôl nɨn læ nà sesɨ ni iwo, bɨfɨ wi nô mɨ sɨ̂ Bôbo Fɨyini. Bôbo Fɨyini ɨ kæ sɨ mesi ŋweyn, sɨ fsɨ ilaʼ i ŋweyn sɨ fu sɨ̂ Devìt, ɨ wâyn Jesì.