1 Chronicles 5

Woyn Lubèyn

¹Lubèyn nɨn læ nà ghɨ wayn ɨwû àsɨ nɨ̀ Jàkôb. (Ghɨ n-læ bzɨ ŋweyn sɨ asɨ mɨtì a nà ghɨ ta wù kwò kfɨm, ɨ̀ chi nɨ̀ wî bæ̀ nô mɨ ɨlvɨ gha, wu nà bu kfeynɨ̂ wì sɨ a wayn ɨwu asɨ. Bò ŋweyn, ɨ Jàkôb nɨn læ meyn lèm na Lubèyn na bu fì kelɨ wi adyaʼ ta wayn ɨwu asɨ nɨ̀ zɨ̀, bòm kfɨm nâ zɨ̀ a wu n-læ kwò. Wu n-læ lèm na à na sɨ kelɨ Josèf adyaʼ ta wayn ɨwu asɨ nɨ̀ zɨ̀. À ti iwo zɨ̀ a ghɨ n-læ sesɨ taŋ woyn Jàkôb ɨ faŋ tɨ̀ taŋ izɨyn i Lubèyn sɨ asɨ. ²Josèf nɨn læ nà ghɨ ta wayn ɨwu asɨ, nô mɨ ta fòyn nɨn læ fvɨ̀ dzɨ a woyn nɨ̀ Judà) ³Akeynà nɨn ghɨ àzɨyn a woyn nɨ̀ Lubèyn, ɨ wayn ɨwu asɨ nɨ̀ Jakôb tèyn; à nà n-ghɨ Hanòk nɨ̀ Palù nɨ̀ Hezlòn ŋêyn Kamì. ⁴Jowèl nɨn læ nà ghɨ kɨmɨ wayn Lubèyn ɨlvì, ɨ bzɨ Shèmayà, Shemayà ɨ bzɨ Gôk, Gôk ɨ bzɨ Shimèy. ⁵Shimèy nɨn læ nà ghɨ bò Mikà, Mikà ɨ ghɨ bò Lehayà, Lehayà ɨ ghɨ ghɨ bò Bâl. ⁶Bâl nɨn læ nà ghɨ bò Belà. Belà nɨn læ nà ghɨ wul ɨtisɨnɨ a Lubèyn, Tiglat-Bilesà, ɨ fòyn Àsiliyà ɨ læ gvi tɨm yɨ ŋweyn a iwòŋ, ɨ ghalɨ ndù nɨ̀ ŋweyn a Àsiliyà. ⁷Ghɨ n-læ nyaʼ lèm àzɨyn a isas i ndo nɨ̀ Belà, kɨ̀ a ɨchfɨ ndo a ɨchfɨ ndo; ghɨ n-læ nyàʼ ìzɨyn i Jêl sɨ asɨ, ɨkùmtɨ̀ nɨ Zèkàliyà, ⁸jæ ta ka ghɨ nyaʼ izɨyn i Belà. Belà nɨn læ nà ghɨ wâyn Azàz, Azàz ɨ ghɨ wâyn Shemà, Shema ɨ ghɨ wâyn Jowèl. Woyn Lubèyn nɨn læ bàʼlɨ alèʼ kɨ ghaʼa, kɨ̀ sɨ lù a Alowè sɨ koʼ sɨ chem a ntèʼ Nebò nɨ̀ Bal Meyòn. ⁹A nà n-ghɨ abàs ghè a ichfɨ̂ iyvɨ i nɨn sal ateyn, ma àŋena baʼlɨ meyn ndù chem a nse iyum bomta nyamsɨ àŋena sɨ na sɨ dvɨ kɨ tèyn. Nse iyum àteyn nà ndû kɨ tèyn chem a jvâ yuflèt. ¹⁰A n-læ nà ghɨ ɨtuʼ ta Sôl nɨ̀n ghɨ fòyn, ghelɨ Lubèyn ɨ ndu nù, ɨ zuetɨ ghelɨ Hâg ɨ lì ɨ̀lwêʼ ànena vzɨ̀ a wu n-læ nà ghɨ a injɨyni Gilèd nô ɨ̀ jɨ̀m, ɨ nà chi ateyn. ¹¹Ghelɨ Gâd nɨn læ nà lêm ìghami ŋêyn àŋena kɨ̀ sɨ lù a Bashàn, sɨ koʼ sɨ chem a Salekà. ¹²Jowèl nɨn læ nà ghɨ asɨ, Shafàm ɨ kûmtɨ sɨ̂ ŋweyn. Ghelɨ ghɨli ghì a ghɨ n-læ nà ghɨ asɨ nà n-ghɨ Janày ŋêyn Shafàt. ¹³Ghelɨ isas i ndo nɨ̀ àŋeyna ghɨli nɨn læ nà ghɨ Mikèl nɨ̀ Meshulàm nɨ̀ Shebà nɨ̀ Jolày nɨ̀ Jakàn nɨ̀ Ziyà ŋêyn Ebà. Àŋena nà n-chɨ̂yntɨ̀ ghɨ nsòmbo. ¹⁴Ghelɨ nâ ghèyn nô ghɨ̀ jɨ̀m tèyn nà n-chɨ̂yntɨ̀ ghɨ kɨ woyn Àbihàyl. Abihàyl nɨn læ nà ghɨ wâyn Hulì, Hulì ɨ ghɨ wâyn Jalowà, Jalòwà ɨ ghɨ wâyn Gilèd, Gilèd ɨ ghɨ wâyn Mikèl, Mikèl ɨ ghɨ wâyn Jèshishày, Jèshishày ɨ ghɨ wâyn Jadò, ta bò ŋweyn nà n-ghɨ Bûz. ¹⁵Ahì, ɨ wâyn Abdìyèl, Abdìyèl ɨ ghɨ wâyn Gunì, nɨn læ nà ghɨ wul ɨlwema a àŋena isas i ndo. ¹⁶Woyn Gâd nâ ghèyn nɨn læ bàʼlɨ a Gilèd nɨ̀ Bashàn, baʼsɨ̂ nɨ̀ ntèʼ sîsɨ̀ a sɨ nà ghɨ a mbæ̀sɨ̀. Àŋena nɨn læ meyn nà ghɨ kɨ mɨ alèʼ a li-a ghɨ toŋtɨ̂ na Shalòn. Shalòn nɨ læ nà kelɨ ɨ̀twaʼ ɨ nyâmsɨ̀ wu ghaʼa. ¹⁷Ghɨ n-læ nyàʼ azɨyn a ghêl isas i ndo nɨ̀ Gâd nâ kèyn nô àjɨ̀m, ɨtuʼ nɨ̀ fòyn Jotàm, a Judà nɨ̀ fòyn Jèlobwàm, a Isìlæ̀. ¹⁸Nteʼ Lubèyn, nɨ̀ Gâd, baʼsɨ̂ nɨ̀ abàs a Mànasè kì a kɨ nà n-ghɨ a injɨyni Jodàn, nà chɨ̂yntɨ̀ kelɨ ghɨ̀lûmnɨ̀ nkam mɨ̀vɨm kæ̀, njvàsɨ̀ kæ, nɨ̀ ghɨ̀lûmnɨ̀ ighɨ nsòmbo, nɨ̀ ghɨ̀lûmnɨ̀ mɨ̀vɨm ntufa, ma àŋena to meyn kfeyn sɨ seʼ a ɨtwaʼ ighòŋ. À nà n-ghɨ ifyaŋ-fyaŋ ighêl, ma ghɨ yeʼi meyn àŋena sɨ nà beʼì ɨfwo iwòŋ. Àŋena nà n-kya sɨ tɨm fɨ̀nchya, ma ghɨ fi meyn fàytɨ yeʼi sɨ nà tɨm ìwoŋ. ¹⁹Àŋena nɨn læ meyn nù ghelɨ Hagà nɨ̀ ghelɨ Jetù, baʼsɨ̂ nɨ̀ ghelɨ Nafìsh ŋêyn ghelɨ Nodàb. ²⁰Àŋena nɨn læ meyn dzɨ̀ sɨ̂ Fɨ̀yinfɨ, Fɨ bèynsɨ̀ ìjem i àŋena, ɨ gàmtɨ̀ àŋena, àŋena tɨm yɨ ghelɨ Hagà, baʼsɨ̂ nɨ̀ ntèʼ sîsɨ̀ a sɨ nà n-toʼ Hagà nô sɨ̀ jɨ̀m. Fɨ̀yinfɨ nɨn læ bèynsɨ ijêm i àŋena bòm ta àŋena nà samsɨ ŋweyn. ²¹Àŋena nɨn læ meyn ghalɨ fsɨtɨ nyamsɨ ghelɨ Hagà; ɨ kàmelsɨ̀ nkamsɨ̀ tâyn, nɨ̀ bzɨsɨ nkam ighɨ ì bò, baʼsɨ̂ nɨ̀ njàkâysɨ̀ nkamsɨ̀bò. Àŋena nɨn læ meyn ghaytɨ kɨmɨ ghelɨ nkam nɨ̀ ghelɨ ɨvɨ, ²²ɨ zuetɨ ghɨli kɨ̀ sɨ a idvɨ̀, ɨ ghalɨ fsɨ ilaʼ ateyn bòm ta Fɨyinifɨ gàmtɨ̀ àŋena. Àŋena nɨn læ ghalɨ fsɨ ilaʼ ateyn tì, ɨ faŋ kɨ afu nô sɨ chem ta ka ghɨ læ̂ gvì tɨm yɨ àŋena, ɨ̀ ghàytɨ ndù nɨ̀ àŋena a Babilòn.

Ghelɨ Mànasè a injɨyn i Jodàn

²³Ghelɨ Mànasè ghì a ghɨ n-læ nà chi a injɨyn i Jodàn nɨn læ nà jvɨ-à. Àŋena nà n-ghɨ ma ghɨ baʼlɨ meyn, kɨ sɨ zɨ̀tɨ̀ a Bashàn, sɨ ndù sɨ chem a Bal Hemòn. Ghɨ n-læ nà toŋtɨ̂ kɨmɨ Bal Hemòn na Kfɨ̂yn Hemòn. ²⁴Ghɨ̀bo ntèʼsɨ Mànasè nâ ghèyn nɨn læ nà ghɨ Efà nɨ̀ Ishì nɨ̀ Eliyèl nɨ̀ Aziyèl nɨ̀ Jèlìmayà nɨ̀ Hodàvayà ŋêyn Jadiyèl. Àŋena nà tisɨ̂ ghelɨ àŋena, ghɨ sugèysɨ̀, ghelɨ fî kôŋ àŋena nô a jûŋ. ²⁵Ghelɨ nà n-kôŋ mɨ àŋena tî, àŋena yvɨnɨ̂ wi Fɨyini fɨ ghɨ̀bo àŋena. Àŋena nɨn læ meyn nà koʼsɨ̂ mɨyini mɨ̀ ìlaʼ nâ mzɨ̀, ɨtoŋ Fɨyini ɨ yaf, wu bebsɨ mɨyini mɨ̀ àteyn ²⁶Fɨyini fɨ ghelɨ Isìlæ̀ fɨ nɨn læ bebsɨ mɨyini mɨ̀ ìlaʼ nâ mzɨ̀ tì, Bûl, ɨ fòyn Àsiliyà, ghɨ toŋtɨ kɨmɨ na Tiglat-Bilsà, ɨ gvi ghaytɨ ghelɨ Lubèyn nâ ghì, nɨ̀ ghelɨ Gâd, baʼsɨ̂ nɨ̀ ghelɨ Mànasè ghi a ghɨ nà n-chi a injɨyni Jodàn, ɨ li lù nɨ̀ àŋena. Wu n-læ ghaytɨ ɨ ndù nɨ̀ àŋena a Halà, ɨ ndù nɨ ghɨli a Habò, ɨ fi ndu nɨ ghɨli a Halà. Wu n-læ meyn ndù kɨmɨ nɨ ghɨli a mbæ̀ jvà Gozàn. Àŋena n-faŋ meyn kɨ a ɨlwèʼ nâ ghè sɨ koʼ sɨ chem layn.