1 Chronicles 14

Ɨfôyn Devìt, nɨ̀ ghelɨ ŋweyn, nɨ̀ àwo kì a wu n-læ nì a Jèlusalèm

¹Hilàm, ɨ fòyn Tayà, nɨn læ meyn tum iwoŋ i ntoʼ nɨ̀ ŋweyn sɨ̂ Devìt, àŋena gvì nɨ̀ ɨ̀fuŋ ɨ kàʼ mɨ̀ sedà, nɨ̀ ngòʼsɨ̀ sɨm baʼsɨ̂ nɨ̀ kamandàsɨ̀ na ghɨ gamtɨ bàʼlɨ ntoʼ sɨ̂ Devìt. ²Devìt nɨn læ meyn yeyn keli na Bôbo Fɨyini choʼ meyn ŋweyn sɨ a fòyn a Isìlæ̀, ɨ keli na Fɨyini fɨ ni meyn ɨfoyn ŋweyn na ghaʼa bòm ghelɨ Isìlæ̀, ɨ ghelɨ ŋweyn. ³A n-læ nà ghɨ ta Devìt nà chi a Jèlusalèm, wu ndu kfeynsɨ ghɨ̀kì ghɨli, ɨ bzɨ kfeynsɨ woyn ghɨ lûmnɨ̀, nɨ ghɨki. ⁴Akeynà nɨn ghɨ àzɨyn a woyn ghì a Devìt nɨn læ bzɨ kfeynsɨ a Jèlusalèm tèyn; ɨ Shamuwà nɨ̀ Shobàb nɨ̀ Natàn nɨ̀ Solomòn, ⁵nɨ̀ Ibà nɨ̀ Èlishuwà nɨ̀ Elbelèt, ⁶kɨ̀mɨ nɨ̀ Nogà nɨ̀ Nefèk ŋêyn Jafiyà, ⁷baʼsɨ̂ nɨ̀ Elishamà nɨ̀ Beliyadà ŋêyn Èlifelèt.

Devìt ɨ tɨm yɨ ghelɨ Fìlisiyà

⁸A n-læ nà ghɨ ta ghelɨ Fìlisiyà yvɨ na ghɨ lem meyn Devìt sa fòyn a Isìlæ̀, sugèyʼ sɨ àŋena sɨ koʼ a Jèlusalèm nô nɨ̀ àdyaʼa, ghɨ na ghɨ n-kɨŋ sɨ ghal sɨ zue ŋweyn. Mɨtì Devìt ɨ yvɨ na àŋena nɨn gvi-à, ɨ fvɨ ndù sɨ nu àŋena. ⁹A n-læ nà ghɨ tì ma ghelɨ Fìlisiyà gvi meyn ɨ zɨ a ibal i Eflèm. ¹⁰Devìt kæ bɨf sɨ̂ Bôbo na, “Mà ti kæ sɨ fvɨ sɨ ndù sɨ nù ghelɨ Fìlisiyà ghèyn a wà gamtɨ ma na mà tɨm yɨ àŋena a?”

Bôbo Fɨyini ɨ bè sɨ̂ Devìt na, “Ndu-a, mɨ n-gàmtɨ̀ và, a wà tɨm yɨ àŋenà.” ¹¹Devìt, ŋêyn sugèyʼsɨ ŋweynsɨ ɨ lu koʼ a Bal Belazìm, ɨ tɨm yɨ àŋena afu. Devìt ɨ kæ sɨ bè na, “Fɨyini fɨ ni meyn ma kalì nɨ̀ mbàynɨ̀ semsɨ têyn ta àkàlì ànkuŋ, sɨ kfɨtɨ.” Wu n-læ taŋi tî, ghɨ nà sɨ toŋtɨ kɨ àleʼ ateyn na, Bal Belazìm. ¹²Ghelɨ Fìlisiyà nɨn læ meyn leʼnɨ visi mɨyini mɨ̀ àŋena afu, Devìt ɨ chwòsɨ̀ sɨ a isaʼ na ghɨ nyoʼ ɨfwo ateyn. ¹³Àŋena nɨn læ ndu chitɨ kɨ têyn, ɨ kasi gvì, ɨ zɨ̀tɨ̀ sɨ nà nu ghelɨ ghì a ghɨ n-læ nà chi afu. ¹⁴Devìt ɨ fi ndu bɨfɨ kfeynsɨ sɨ̂ Fɨyin na yì fvɨ nù àŋena, Fɨyini fɨ bè sɨ̂ ŋweyn na, “Ka yî n-fvɨ̀ koʼ àti-ati sɨ nu àŋena, yì fvɨ ndù dzɨ a àŋena ibàm alèʼ ghe a ɨ̀nkàʼ mɨ̀ balsàm mzɨ nɨn ghɨ ateyn. ¹⁵Yi nî yvɨ afo kɨ kûm atû ɨ̀nkàʼ mɨ̀ balsàm nâ ghè tèyn ta tsɨynsɨ nô mɨ ɨlvɨ gha, yi nà kya na Fɨyini fɨ nɨn ndû a yi asɨ sɨ gàmtɨ zɨ, na yì zuetɨ sugèyʼsɨ Fìlisiyà.” ¹⁶Devìt nɨn læ meyn ni kɨ iwo zɨ̀ a Fɨyini fɨ bè, àŋena tɨm zuetɨ sugèyʼsɨ Fìlisiyà kɨ̀ sɨ zɨ̀tɨ̀ a Gibiyòn sɨ ndù sɨ chem a Gezèl. ¹⁷A n-læ nà ghɨ ta Devìt zuètɨ sugèyʼsɨ Fìlisiyà tì, ghɨ keli ŋweyn kɨ ɨlwêʼ ɨ̀n jɨ̀m, Fɨyini fɨ nì, ghɨ nà sɨ fâyn ŋweyn kɨ̀ tɨlaʼ tɨ̀ jɨ̀m.