1 Chronicles 13

Devìt ɨ kasi gvì nɨ̀ Àntayntayn a mɨ̂kàyn a Jèlusalèm

¹Fòyn Devìt nɨn læ meyn taŋi ŋêyn ɨ̀tu sugèyʼsɨ nɨ̀ ŋweyn vzì a wu nà n-tɨsɨ inôyn i sugèyʼsɨ̀ nkam, nɨ ɨvzî a wu n-tisɨ inôyni sugèyʼsɨ̀ ɨvɨ, baʼsɨ̂ nɨ̀ ɨ̀tu sugèyʼsɨ nɨ̀ ŋweyn kɨ ɨ̀ jɨ̀m. ²A nà n-ghɨ ta wù tàŋi mèsì sɨ àŋena, wu jàŋtɨ̀ ghelɨ ghɨ tisɨnɨ a Isìlæ̀ nô ghɨ̀ jɨ̀m, ɨ kæ be sɨ̂ àŋena na, “Yì kæ sɨ yvɨtɨ iwo yèynì a mɨ n-bê, ɨ̀ yeyn yi jôf sɨ̂ zɨ̀, Bôbo Fɨyini kæ sɨ bɨmi, a ghesɨ̀nà tum fèʼtɨ̀ ndù sɨ ghelɨ Isìlæ̀ nô ghɨ̀ jɨ̀m, ɨ̀ fèʼtɨ̀ sɨ̂ ngàŋ sɨ ndô Fɨyini, nɨ̀ ghelɨ Levì ghì a ghɨ n-chi ŋêyn àŋena a ntèʼsɨ, baʼsɨ̂ nɨ ɨghî a ghɨ n-chi a ɨtwaʼ nyâmsɨ̀, ta ka àŋena chɨyntɨ gvì bàʼsɨ sɨ̂ ghesɨ̀nà. ³Mɨ n-kɨŋ na ghesɨ̀nà kasî lì kfa nɨ̀ Àntayntayn a mɨ̂kàyn nɨ̀ Bôbo kì a Jèlusalèm. Ghesɨ̀nà ti meyn màʼì, nà kolî mɨ ghà, ghɨ ni kɨ ni bula ghɨ fî bɨf sɨ̂ Bôbo Fɨyini.” ⁴Wu n-læ bè tî, àŋena bɨmi kɨ bɨmi bòm ta nô mɨ ndà nɨn læ meyn yeyn na ɨwo zɨ̀ a wù bè nɨn ghɨ samoʼ. ⁵A nà ghɨ ta àŋena bɨ̀mi nô mɨ ɨlvɨ gha, Devìt ɨ jàŋtɨ̀ ghelɨ Isìlæ̀ nô ghɨ̀ jɨ̀m; kɨ̀ sɨ zɨ̀tɨ̀ a jvâ Shihò a Ijìb, sɨ ndù sɨ chem a ɨchfɨ ntèʼ Hamàt, ɨ bè na àŋena ndu bèʼì Àntayntayn a mɨ̂kàyn nɨ̀ Bôbo nâ kì a Kiliyat Jelìm, ɨ gvì nɨ̀ ànkeyna. ⁶Devìt nɨn læ meyn ndù kɨ ŋêyn ghelɨ Isìlæ̀ ghɨjɨ̀m a Balà, ma à ti a Kiliyat Jelìm, sɨ bèʼì sɨ gvi nɨ̀ àntayntayn a mɨ̂kàyn nɨ̀ Bôbo Fɨyini nâ kì. Ghelɨ Isìlæ̀ nɨn læ nà jâŋ àntayntayn ateyn na àntayntayn a Bôbo Fɨyini. ⁷Àŋena nɨn læ ndu bèʼi àntayntayn ateyn a ndo nɨ̀ Àbinadàb, atû fɨ̀nchaʼ fɨ fɨfɨ, Uzà ŋêyn Ahiyò ɨ dùʼì a ngùŋ àteyn nà ki-a. ⁸Devìt ŋêyn ghelɨ Isìlæ̀ nɨn læ meyn nà saŋlɨ̂ nô sa ŋaŋ, yem njàŋsɨ̀, buʼ tɨ̀luŋ, chwaʼ tɨ̀chaʼ achaʼ, fî toŋ ndoŋsɨ, toŋ tɨ̀soŋ, asɨ nɨ̀ Fɨyini fɨ̀. ⁹A n-læ nà ghɨ ta àŋena gvì chem alèʼ a li-a a Kidòn nɨn læ nà chyeʼ asaŋ a ŋweyn ateyn, nyàm zɨ̀ a yì n-gufɨ fɨ̀nchaʼ fìfɨ̀ a fɨ beʼi àntayntayn a mɨ̂kàyn ɨ leyn fe, Uzà ɨ kæ sɨ nàysɨ̀ àwu, sɨ ghal àntayntayn a mɨ̂kàyn ka kɨ fe a nse. ¹⁰Uzà nɨn læ ghalɨ àntayntayn a mɨ̀kàyn tì nô mɨ ɨlvɨ gha, ɨtoŋ Bôbo Fɨyini ɨ bàŋ kɨ baŋ, wu leŋ zue Uzà kɨ̀ afu bòm ta wù kùm àntayntayn a mɨ̂kàyn nɨ̀ Bôbo. ¹¹Ɨtoŋ Devìt nɨn læ meyn yaf bòm ta Bôbo Fɨyini leŋ zue Uzà alèʼ nâ ghè. Sɨ koʼ sɨ chem layn, ghɨ lum toŋtɨ̂ kɨ àlêʼ nâ kì na Belez Uzà, bòm ìwo nâ zɨ̀ a yi n-læ gàyn afu. ¹²Devìt nɨn læ meyn nà sɨ fàyn Fɨyini, ɨ nà sɨ kayn nâ yì ti læ̀ jelɨ̀ ti sɨ bèʼì sɨ gvi nɨ̀ àntayntayn a mɨ̂kàyn nɨ̀ Bôbo a Jèlusalèm a. ¹³Wu n-bu læ li zɨ nɨ̀ àntayntayn a mɨ̂kàyn nɨ̀ Bôbo nâ kì a Jèlusalèm bòm ta wu nà n-fâyn. Wu n-læ kwo li ndu nɨ̀ ànkeyna dzɨ a ndo nɨ̀ Obed-Edòm, ɨ wul ɨ̀ Gât, na wù na kinî-à. ¹⁴Àntayntayn a mɨ̂kàyn nɨ̀ Bôbo Fɨyini nâ kì nɨn læ meyn chi a ndo nɨ̀ Obed-Edòm sɨ a njoŋ sɨ̀ tal, Bôbo Fɨyini ɨ boysɨ ŋweyn, nɨ̀ ghelɨ ndo nɨ̀ ŋweyn, baʼsɨ̂ nô mɨ nɨ̀ ghà ta wu nà n-kelɨ.