Ruth 4

Bowàs ɨ lì Lût sɨ a wi

¹Bowàs nɨn fvɨ meyn koʼ dùʼì ɨchfɨ ayisi. Kɨ̀ têyn wùl ɨ̀ ndo nɨ̀ àŋena vzɨ̀ a wù tî kfa nà fêʼtɨ̀ sɨ̂ Lût tì ɨ gvì. Bowàs ɨ bè sɨ̂ ŋweyn na, “Chwo gvi dùʼi dzɨ afêyn a ba.” Wùl ɨ̀ àteyn ɨ chwò ɨ ndu dùʼì.

²Bowàs ɨ jàŋtɨ̀ chyeʼ sɨ lisɨ ìvɨm a ntèʼ afu ɨ bè na sɨ boŋ gvì dùʼi a nse. ³Wu kæ be sɨ̂ wùl ɨ̀ ndo nɨ̀ àŋena nâ vzɨ̀ na, “Nàwumì, ɨ wî nkfɨ Elimelèk kasi meyn gvì sɨ ilaʼ i Mowàb, nà sɨ kɨŋ sɨ tisɨ ibal i waynà ghesɨ̀nà Elimelèk. ⁴Ma yeyn na yi n-jofɨ̀ na mà feʼtɨ sɨ̂ và ta ka wà ghal ɨ̀ lèm ìbal ateyn ɨlvɨ ta wà n-kôŋ bòm ta à n-ghɨ àlêʼ à kya sɨ ghal. Yi n-jofɨ̀ na wà yuyn alêʼ ateyn. Wà kæ sɨ nà kôŋ sɨ ghal sɨ lèm alêʼ ateyn, wa bɨmi afêyn asɨ nɨ̀ ghelɨ ghèyn nɨ̀ chyeʼsɨ ilaʼ sèynsɨ̀, àŋena bôŋ ɨ̀ yvɨ. Wà na ghɨ wi sɨ ghal, wa fèʼtɨ̀ sɨ̂ mà kɨ̀ lvɨ̂yn mà na kya bòm ta à n-fî ghɨ kɨ mà a mɨ n-baʼsɨ sɨ̂ và sɨ ghal aleʼ ateyn.” Wùl ɨ̀ ndo nɨ̀ àŋena nâ vzɨ̀ ɨ bè na, “Mɨ n-ghal lêmà.”

⁵Bowàs ɨ kæ bè na, “Wa kya na wà n-ghɨ sɨ fu ɨkwo ɨ gvêyn nâ wèyn sɨ̂ Nàwumì nô mɨ achi à kà, a wà bôŋ lì Lût, ɨ wî nkfɨ wâyn Elimelèk wèyn a wù lù ilaʼ i Mowàb tèyn ta ka zɨ̂ ŋweyn bzɨ wayn a wù lema kàsi lì gvêyn bò ŋweyn.”

⁶Wùl ɨ̀ ndo nɨ̀ àŋena nâ vzɨ̀ ɨ bèynsɨ̀ na, “Yi na ghɨ tì, wa ghal lèm ìbal ateyn, bòm ta yi n-dyêyn na mà ghal mɨ ghal a nô ɨwôm ɨ wayn læ nà kelɨ wi iwo sɨ nì nɨ̀ ɨwom ɨfwo. Mà kàʼ ma bû ghal gveyn àteyn.”

⁷À nà n-ghɨ ɨtuʼ nâ ghè a Isìlæ̀, wùl ɨ̀ na ghɨ sɨ fu alêʼ a nse sɨ̂ wùl, wu choʼ ɨ fu gvɨ àvɨ nɨ̀ ŋweyn ìlì sɨ̂ wùl ɨ̀ nâ vzɨ̀ sɨ a nchwæ sɨ dyèyn na yi visi meyn alêʼ ateyn. À nà n-ghɨ dzɨ zɨ̀ a isaʼ ilaʼ nâ zɨ̀-ì ɨ nà n-dyêyn na ghɨ na fu ɨ̀fwo sɨ̂ ghelɨ ateyn.

⁸À tì iwo zɨ̀ a wùl ɨ̀ ndo nɨ̀ Bowàs nâ wèyn nɨn læ teyn na yi fsɨ wi alêʼ nâ kì-à ɨ choʼ fu gvɨ àvɨ̀ nɨ̀ ŋweyn sɨ̂ Bowàs. ⁹Bowàs ɨ kæ be sɨ̂ chyeʼ sìsɨ̀ nɨ̀ ghelɨ ghɨ li ghì a ghɨ nà n-ghɨ afu na, “Nàwumì fu meyn nô mɨ ghà vzɨ̀ a lum ŋweyn Elimelèk nɨ̀ woyn ŋweyn Kilìyòn nɨ̀ Malòn ti nà kelɨ-a na mà ghal lèm. ¹⁰Yi yeyn meyn kɨ̀mɨ ta mà lì Lût, ɨ wî nkfɨ Malòn sɨ a ma wi ta ka ghesɨ̀ ŋweyn bzɨ woyn a ghɨ lema koʼ ɨ̀ lì ɨ̀fwo ɨ bò àŋena, ka isas i ndo nâ yèynì le, ghelɨ ntèʼ afêyn fî lèysɨ̀ ŋweyn.” Yì ti n-ghɨ nchwò nsaʼ.

¹¹Ghelɨ ateyn ɨ bèynsɨ̀ kɨ ghɨ̀ jɨ̀m baʼsɨ̂ nɨ̀ chyeʼsɨ na, “Ghèsɨ yeyn meyn. Bô Fɨyini ni wul ɨ wi nâ wèyn a wà lì têyn na ghɨ kɨ ta Lashèl ŋêyn Liyà, ma à ti àŋena ghì a ghɨ n-læ bzɨ ngœ̀ ndo nɨ̀ Jàkôb. Fɨyini fɨ boysɨ vâ, wà na ghɨ kɨ nô wul ɨ ghaʼnɨ a ndô Efɨ̀là, izɨyn ì zæ fî ngàŋtɨ a Betɨ̀làhêm. ¹²Bô Fɨyini ni zɨ̂ waynda ngòyn nâ wèyn bzɨ woyn àŋena laysɨ ɨkœ isas i ndo wèyn iyvɨ, yi na ghɨ kɨ ta isas i ndo nɨ̀ Bèlêz, ɨ wayn vzɨ̀ a Tamà nɨn læ bzɨ sɨ̂ Judà.”

¹³Bowàs ɨ kæ li Lût sɨ a wi ɨ chi nɨ̀ ŋweyn, Bô Fɨyini ɨ boysɨ wu timi ɨlvâ ɨ læ bzɨ wayn lûmnɨ̀. ¹⁴Ghɨ̀kì ɨ Betɨ̀làhêm ghì ɨ bè sɨ̂ Nàwumì na, Ibemsɨ i nɨn ghɨ sɨ̂ Bô Fɨyini. Wù fu meyn ɨ̀nkâʼ mɨ̀ ɨ̀dvɨ̀yn sɨ̂ và. Ghès nɨn jêm kɨ na wàyn nâ wèyn lema kɨ̀ nô sɨ a nkàyntɨ̀ wùl a ilaʼ i Isìlæ̀. ¹⁵Wàyn àteyn læ̀ nà ghɨ kɨ nô ɨ̀nkâʼ mɨ̀ ɨ̀dvɨ̀yn nɨ̀ và bòm ta wù n-ghɨ ma à bzɨ kɨ̀ nô wî wayn vâ, kôŋ và, ghɨ sɨ̂ và chwô woyn woyn ghɨ lûmnɨ̀ nsòmbo.

¹⁶Nàwumì ɨ fsɨ wayn àteyn ɨ nà sɨ kelɨ-a, tôʼnɨ̀ nɨ̀ ŋweyn. ¹⁷Ghɨ̀kì ɨ ntèʼ afu ɨ chfɨ̀ ìzɨyn i wayn àteyn na Obèt ɨ nà fî jâŋ kɨmɨ ŋweyn na “Wâyn Nàwumì.” Obèt ɨ lema koʼ ɨ bzɨ wayn ɨ lûmnɨ̀ izɨyn i ŋweyni ghɨ Jesì. Jesì nâ vzɨ̀ nɨn læ nà ghɨ bò fòyn Devìt. ¹⁸Akêynà nɨn ghɨ àzɨyn a ghɨ̂bo bò fòyn Devìt kɨ̀ sɨ zɨ̀tɨ̀ a Bèlêz:

Bèlêz nɨn læ nà ghɨ bò Hezlòn, ¹⁹Hezlòn ɨ ghɨ bò Lâm, Lâm ɨ ghɨ bò Àminadàb, ²⁰Àminadàb ɨ ghɨ bò Nashòn, Nashòn ɨ ghɨ bò Salmùyn, ²¹Salmùyn ɨ ghɨ bò Bowàs, Bowàs ɨ ghɨ bò Obèt nâ wèyn, ²²Obèt ɨ ghɨ bò Jesì, Jesì ɨ ghɨ bò fòyn Devìt.