Psalms 9
This book is a draft. It has been translated but has not yet finished checking, and is published here so the community can read and respond to it.
Ghɨ na fu àyòŋnɨ̀ sɨ̂ Fɨyini fɨ̀ bòm ta wù n-saʼ kɨ àtì-ati
Njàŋ ta Devìt nɨn læ betɨ na nchfɨ̀ njàŋ na fu-a, ghɨ yem a gyâ “Njàŋ ìkfɨ nɨ̀ wayn ɨ lûmnɨ̀.”
1Mà na koʼsɨ̂ và a BÔBO kɨ nɨ̀ àtem à kema à jɨ̀mà,
Mà na fêʼtɨ̀ àwo a kaynɨ-a kì a wà nì nô à jɨ̀m.
2Mà na saŋlɨ̂ nô sɨ a ŋaŋ bòm àwo kì a wà nì
Mà na yem njàŋsɨ̀ koʼsɨ̂ và vzɨ̀ a wà ngàŋtɨ chwò.
3Wà n-kêʼ mbàynɨ̀ semsɨ mɨ ɨlvɨ gha sɨ leʼ kasi sɨ a ma ibàm;
Wà n-kêʼ àŋena mɨ ɨlvɨ gha, ghɨ nà felɨ̂ kfɨtɨ à.
4Wà saʼ meyn nsaʼ yem ta fòyn ma layn nsaʼ.
Wà n-duʼ achɨ a tɨ̂fòyn nɨ̀ và, saʼ kɨ àtì-ati.
5Wà kayntɨ meyn àwo sɨ̂ ghelɨ mbzɨ, ɨ̀ bebsɨ ghelɨ awo a bɨ-a;
Wà chyèʼsɨ meyn àzɨyn a àŋena sɨ a wa ŋwàʼlɨ̀ kɨ̀ samoʼ.
6Wà bebsɨ meyn mbàynɨ̀ semsɨ kɨ̀ samoʼ,
Ntèʼ bu fì ti wi antêynɨ̀ ntèʼsɨ nɨ̀ àŋena;
Ghɨ bu kelɨ wi ikfâʼtɨ̀ i li kûm àŋena.
7BÔBO na saʼ kɨ saʼ sɨ a mɨlvɨ ɨ̀n jɨ̀m;
Wù faŋ meyn kɨ̀ faŋ achɨ a tɨ̂fòyn nɨ̀ ŋweyn.
8Wù n-saʼ mbzɨ ì jɨ̀m kɨ nô àti-ati,
Wù n-saʼ ghelɨ mbzɨ ki wi wul ikèʼ.
9Ghɨ na yeʼtɨ̂ mɨ ndà wu leʼ ndù sɨ̂ BÔBO,
Wù n-lêytɨ̀ ghelɨ ghì a ngeʼ kòli àŋena.
10À n-kya mɨ ndà vâ a BÔBO wu nà samsɨ̂ và,
Wà bû tìmi mò wul wu yeʼtɨ̂ a vâ.
11BÔBO nɨn nduʼ achɨ a tɨ̂fòyn nɨ̀ ŋweyn a Zayòn; yì na yema koʼsɨ̂ ŋweyn,
Laʼì ndû nɨ àwo kì a wù nì sɨ̂ ghelɨ mbzɨ.
12Wùl nɨ̀n zue wul a sɨ̂sɨ̀ kɨ BÔBO;
BÔBO nɨn buʼsɨ̂ wì wul wu dzɨ̂ ngeʼ sɨ̂ ŋweyn.
13Yeyn læ̂ ta ghɨ nchoʼ avɨ à kema a BÔBO!
Koynsɨ isuyn sɨ̂ mà a BÔBO ka ghɨ zue ma.
14Bœ̀sɨ ma mà na koʼsɨ̂ và a Jèlusalèm ghelɨ yeyna.
Mà na saŋlɨ̂ ta wà fvɨ̀sɨ̀ ma sɨ a ngèʼ.
15Ghelɨ mbzɨ tɨm meyn ìbɨ sɨ̂ mà kàsi fèlɨ ateyn,
Àŋena beyna meyn àtam kàsî lì ateyn.
16Wùl nɨ̀n mo wi na Bobo nɨn saʼ kɨ àtì-ati.
Ku ghelɨ awo a bɨ-a kɨ̀ ɨtwam ghê a àŋena bèyntɨ̀.
Yì toʼ yvɨ̀tɨ
17Ghelɨ awo a bɨ-a læ̀ jelɨ̀ ndû zɨ̂ kɨ isè.
À ti ngòʼsɨ ghelɨ ghì a ghɨ n-mo Fiyini.
18Fɨyini fɨ læ̀ lêsɨ̀ wì ghelɨ ghɨ jɨŋnɨ,
Ghɨ n-yeʼtɨ̂ mɨ àŋena, àŋena kya na achi a læ̀ gvi-à.
19Gvi saʼ ghelɨ mbzɨ a BÔBO.
Wùl læ̀ tomnɨ̂ wì iwo zɨ̂ ŋweyn.
20Ni iwo ghelɨ mbzɨ na fàyn và a BÔBO.
Ni àŋena na kya na à n-ghɨ kɨ va Fɨyini, wùl ɨ ghɨ kɨ wul.
Yì toʼ yvɨ̀tɨ