Psalms 71
This book is a draft. It has been translated but has not yet finished checking, and is published here so the community can read and respond to it.
Ka wa n-lèsɨ̀ mà nô mɨ ɨlwema nɨ̀ mà a Bôbo
1Mɨ n-ghɨ kɨ isas i tɨ̂wò nɨ̀ và a BÔBO
Ka wa n-vìsi iwumi gvi sɨ̂ mà ɨ̀ faŋ.
2Wà n-ghɨ Fɨyini fɨ àtì-ati
Gàmtɨ ma ɨ fvɨ̀sɨ̀ mà sɨ a ngeʼ Yvɨ idzɨ̂ ì yemi ɨ bœ̀sɨ̀ mà.
3Visi mà na gvî lêytɨ̀ kɨ isas i tɨ̂wò nɨ̀ và
mɨlvɨ ɨ̀n jɨ̀m.
Wà taŋi meyn ma bœ̂
Wà n-ghɨ mbàyn sɨ̂ mà, ghaʼ kɨ tèyn
Wà n-ghɨ àlêʼ a leytɨnɨ-a nɨ̀ mà.
4O Fɨyini femfɨ Fvɨ̀sɨ ma sɨ a ɨwu nɨ̀ mbàynɨ̀ semsɨ.
Sòysɨ ma sɨ asùm nɨ̀ ghelɨ ghɨ bɨ.
5Mɨ n-nyeʼtɨ̂ kɨ a vâ a BÔBO, nsaʼ à nchɨl
Mɨ n-samsɨ̂ và kɨ̀ sɨ ɨtuʼ ɨ wayndà nɨ̀ mà.
6Mɨ n-yeʼtɨ̂ a vâ kɨ̀ sɨ achi ibzɨ nɨ̀ mà
À n-læ fvɨ̀sɨ va ma sɨ ɨlvà nɨ̀ nà wom
Mà na koʼsɨ̂ và kɨ̀ mɨlvɨ ɨ̀n jɨ̀m.
7Ghelɨ nɨn yeyn mà nô mɨ ɨlvɨ gha ghɨ chɨl ɨ gvɨ̀tɨ̀
Bòm ta mà lum ghɨ kɨ isas i tɨ̂wò nɨ̀ và.
8Mɨ n-duʼ mɨlvɨ ɨ̀n jɨ̀m koʼsɨ̂ kɨ và
Fêʼtɨ̀ kɨ ta wà n-duʼ antêynɨ̀ ìbayn i ghaʼnɨ-i nɨ̀ và.
9Ka wa n-læ̀ vìsi mà ɨlwema nɨ̀ mà
Adyaʼ à kema læ̂ mæ̀ ka wa n-bèyn jɨm sɨ̂ mà.
10Mbàynɨ̀ semsɨ nɨn bê àwo a bɨ-a kûm mà.
Àŋena nɨn nyaʼ ki mà, gvɨ̂tɨ̀ sɨ zue ma.
11Àŋena nɨn bê na, “Fɨyini fɨ beyn meyn jɨm sɨ̂ ŋweyn.
Ghesɨ̀nà nyɨŋ ghàlɨ̀ ŋweyn
Wùl nɨ̀n ghɨ wi sɨ gàmtɨ ŋweyn.”
12Gvi baʼsɨ sɨ̂ mà a Fɨyini femfɨ
Nyàŋsɨ gvi ɨ gàmtɨ̀ mà.
13Tɨm yɨ ghelɨ ghì a ghɨ n-ghâm ma ɨ wumsɨ àŋena
Bebsɨ ghelɨ ghì a ghɨ n-fu ngeʼ sɨ̂ mà ɨ wumsɨ àŋena.
14Mɨ n-faŋa nà yeʼtɨ̂ kɨ a vâ.
Mɨ n-faŋa nà koʼsɨ̂ kɨ và.
15Mà na lum fèʼtɨ̀ kɨ njùŋ zyâ.
Fêʼtɨ̀ kûm dzɨ sìsɨ̀ a wà bœ̀sɨ̀ ma ateyn
Nô mɨ ta mà kàʼ ma bû taŋ mèsì.
16Mà na fèʼtɨ̀ àwo a kaynɨ-a nɨ̀ Fɨyini fɨ̀, nsaʼ à nchɨl
Mà na fèʼtɨ̀ àwo a juŋà nɨ̀ và Mà na koʼsɨ̂ kɨ và.
17Sɨ zɨ̀tɨ̀ ɨtuʼ ɨ wayndà nɨ̀ mà a Fɨyini fɨ̀, wà yeʼi meyn mà nɨ̀ dzɨ shya sɨ kaynɨsɨ
Mà na fèʼtɨ̀ ndû kɨ ndu nɨ̀ ɨ̀nseynsɨ.
18Ma lema nô mɨ lema, atu à kema fɨf a Fɨyini femfɨ,
Ka wa n-bèyn jɨm sɨ̂ mà
Sɨ chem ta ka mà feʼtɨ adyaʼ à kya sɨ̂ ɨghî a ghɨ læ̀ koʼ ibàm
Sɨ chem ta ka mà taŋi kùm àdyaʼ a kaynɨ-a nɨ̀ và sɨ̂ ɨghɨ̂ a ghɨ læ̀ koʼ a ma ibàm.
19Nchînɨ̀ àtì-ati nɨ̀ và nɨ̀n koʼ chem nô iyvɨ
Wà ni meyn àwo a kaynɨ-a a Fɨyini fɨ
À n-ghɨ nô ndà ta vâ a Fɨyini fɨ̀?
20Nô mɨ ta wà vìsi ma yeyn ngeʼ nô sɨ a ŋaŋ
Kasi fu ichi i juŋì sɨ̂ mà.
21Ɨfvɨ̀sɨ̀ ma sɨ ibɨ afêyn a mɨ n-ghɨ ateyn tèyn.
22Kasi lèm ma alèʼ a juŋà, kɨ koʼnɨ-à, ɨ fi kfɨmtɨ mà
Samoʼ mà na buʼ ìluŋ koʼsɨ̂ và
Mà na koʼsɨ̂ và a Fɨyini fɨ̀ bòm njùŋ zyâ Mà na yem njàŋsɨ̀ koʼsɨ̂ và
Wà n-ghɨ Fɨyini fɨ laynɨ fìfɨ̀ a ghelɨ Isìlæ̀ nɨn koʼsɨ.
23Mà na yem njàŋsɨ̀ saŋlɨ-à fî luʼa,
Mà na koʼsɨ̂ và nɨ̀ àtem à kema à jɨ̀mà
Bòm ta wà bœsɨ meyn mà.
24Mà na fèʼtɨ̀ njùŋ zyâ kɨ̀ mɨlvɨ ɨ̀n jɨ̀m.
Wà tɨm meyn yɨ̀ ghelɨ ghì a ghɨ n-fu ngeʼ sɨ̂ mà ɨ̀ wùmsɨ àŋena.