Psalms 147
This book is a draft. It has been translated but has not yet finished checking, and is published here so the community can read and respond to it.
Ghelɨ ghɨ bɨminɨ na yeʼtɨ̂ kɨ ɨwuyn nɨ̀ Bôbo Fɨyini
1Hàlìluyà Yi n-jôf sɨ nà yema, koʼsɨ̂ Fɨyini fɨ ghesɨ̀nà Ghɨ n-fu ìkòʼsɨ sɨ̂ ŋweyn yi kfeynɨ-à, yi nà fom sɨ̂ ŋweyn.
2Bôbo Fɨyini nɨ̀n bâʼlɨ̀ Jèlusalèm Wù n-kasî kfâ nɨ̀ ghelɨ Isìlæ̀ ghì a ghɨ n-læ ghaytɨ iwòŋ.
3Wù n-kfɨmtɨ̂ ghelɨ ghì a ghɨ n-kelɨ afɨm Wù n-tôʼnɨ̀ nɨ̀ ghelɨ ghì a ghɨ n-ghɨ a ngeʼ.
4Wù n-kya àkôyn a mɨ̂njèyn Wù n-fu àzɨyn sɨ̂ mɨ̀njèyn nô ɨ̀n jɨ̀m.
5Bôbo ghesɨ̀nà nɨn ngaŋtɨ-à, Wù n-kelɨ àdyaʼ a bemnɨ-a Itof i ŋweyni nɨn kelɨ wi ɨfyêʼ.
6Bôbo Fɨyini nɨn lâysɨ̀ ghelɨ ghɨ bolɨ iyvɨ Mɨtì suʼsɨ̂ ghelɨ awo a bɨ-a a nse.
7Yì na yem njàŋsɨ̀ fu àyòŋnɨ̀ sɨ̂ Bôbo Fɨyini Yì na buʼ ìluŋ yem koʼsɨ̂ Fɨyini fɨ ghesɨ̀nà.
8Wù n-chɨytɨ̂ ìyvɨ nɨ̀ mbàʼsɨ̀ Baʼtɨ̂ sɨ suʼsɨ ivɨ atû nse Na ɨ̀nfùʼ na koʼ atû kfɨ̀ynsɨ̀.
9Wù n-yɨsɨ̂ nyamsɨ ɨtwaʼ Yɨsɨ̂ woyn mɨ̂nyùyn ɨlvɨ ta mɨ̀ n-dzɨ̂nɨ̀.
10Wù n-lî wì adyaʼ a nyâm kfaŋ sɨ afo Adyaʼ a wul àdyaʼ ɨ bem wi sɨ̂ ŋweyn.
11Bôbo Fɨyini nɨn kwo saŋlɨ̂ kûm kɨ ghelɨ ghì a ghɨ n-fâyn ŋweyn Wù n-saŋlɨ̂ kûm ghelɨ ghì a ghɨ n-yeʼtɨ ikòŋ i mɨ̂kàyn nɨ̀ ŋweyn.
12Ghelɨ Jèlusalèm, yì na koʼsɨ̂ Bôbo Fɨyini Zɨ̀ ghî a yi n-ghɨ a Zayòn yì na koʼsɨ̂ Fɨyini fifɨ.
13Bòm ta wù faytɨ meyn kul achfɨ̂ a mbàyn nɨ̀ zɨ̀ kɨ to Wù boysɨ meyn wôyn ghi antêynɨ̀ mbàyn nâ ghè.
14Wù n-nî na ilaʼ ì zɨ-i na ghɨ nɨ̀ mbôynɨ̀ Wù n-fu ɨ̀fwo ɨ yɨnɨ ɨ jûŋ, yi yɨ kula.
15Wù n-fu ìsaʼ i ŋweyn a mbzɨ Isaʼ i ŋweyni nɨn nyâŋsɨ̀ yam a mbzɨ.
16Wù n-suʼsɨ̂ àjwô kɨ fɨfɨ kɨ tèyn mbvɨ Wù n-waŋ àjwô ta wù wàŋ abvɨ.
17Wù n-sfɨ̂s àwœ têyn ta wù sfɨ̀s mɨ̀ngôʼàngòʼ Kɨ kàʼ kɨ bû kùm wul wù faŋ tɨ̀ gvɨ̀l.
18Wù n-chwôsɨ̀ ìsaʼ, kɨ saŋî kɨ saŋi Wù n-tum àfyef a ŋweyn, jvasɨ nà kalì-à.
19Wù be meyn bàynsɨ ìwo i ŋweyn sɨ̂ Jàkôb Wù fu meyn tɨ̀saʼtɨ ŋweyn sɨ̂ Isìlæ̀ nô tɨ̀ jɨm.
20Ilaʼ i li bu ghɨ wi a yi n-kya tɨsaʼ tɨ ŋweyn Iwo zɨ̀ a wù nì sɨ̂ ghesɨ̀nà, wù bû nì sɨ̂ ghelɨ ghɨ li. Hàlìluyà.