Psalms 139
This book is a draft. It has been translated but has not yet finished checking, and is published here so the community can read and respond to it.
Fɨyini fɨ̀ nɨn kya nô mɨ ghà kûm mà
Njàŋ ta Devìt nɨ̀n læ betɨ na nchfɨ̀ njàŋ na fu-a ghɨ yema
1Wà faytɨ meyn kì ma a BÔBO Wà n-kya mà.
2Mɨ n-duʼì a nse wa nà kya Ɨ̀ tìmi mɨ iyvɨ wa nà kya Mɨ n-se sɨ kfàʼtɨ̀ iwo duʼ afêyn, Wa nà sɨ kya duʼ nô mɨ iyvɨ.
3Mɨ n-ni-à jelɨ̀ ndû abe, wa kya Ɨ̀ nì kfa nyìŋì ɨkuyn, wa nà kya Wà n-kya nô mɨ ghà kûm mà.
4Iwo i nɨn se sɨ fvɨ̀ a mɨ ɨchfɨ̀ a BÔBO, A nà ghɨ ma wà sɨ kya kɨ ì jɨ̀m.
5Wà ndû a ma asɨ, gvî a ma ibàm Wà lem meyn àwu a mbôynɨ̀ nɨ̀ và a ma atu.
6Itof ì zæ nɨn bem ghaʼ mà. Itof ì zæ dvɨ meyn chèm aleŋ a li-a ma kya wi.
7Mà ti leʼ Ayvɨs à kya, a mà ndu lèytɨ̀ wo? Mà ti lèʼ vâ ma ndu lèytɨ̀ nô wo?
8Mà kæ leʼ koʼ sɨ lèytɨ̀ iyvɨ, A mà se sɨ koʼ, wa ghɨ afu Mà kæ ndù sɨ faytɨ ɨkûyn wom ilaʼ i nse A mà se sɨ ndù, wa ghɨ afu
9Mà kæ tàyn ndù nô abàs ghè a ɨchfɨ-iyvɨ i nɨn sal ateyn Kèsa mà leʼ ndù fàytɨ àlêʼ à kema abàs ghè a ɨchfɨ̀ iyvɨ i nɨn soe ateyn.
10A wà na bu tisɨ̂ kɨ tisɨ ma nɨ̀ àdyaʼ à kya Gâmtɨ̀ kɨ gamtɨ ma nɨ̀ àwu ɨkœ ɨ two nɨ̀ và.
11Mà kàʼ ma bû bè na abe a fɨmnɨ-a leytɨ ma Mà kàʼ ma bû bè na ɨtuʼ jɨ chɨ̀ytɨ mà.
12Nô mɨ àbe a fɨmnɨ-a nɨn fɨ̂m wì sɨ̂ và Ɨtuʼ ɨ jɨnɨ nɨn ghɨ kɨmɨ sɨ̂ và ta à n-bayn chue Abe a nɨn se sɨ fɨ̀m, Ɨlweʼ ɨ nà bayn kɨmɨ sɨ̂ và ta à n-ghɨ nɨ̀nchuè.
13Samoʼ a BÔBO, à n-læ bom vâ ɨ bom ma ɨlvà nɨ̀ nà wom Nô mɨ fɨ̀lêʼnɨ̀ fɨ̀kà a ma ɨwùyn nɨ̂n læ faytɨ kɨ va.
14Mɨ n-koʼsɨ̂ và, alɨmalɨm a ɨ bâytɨ̀ mà Bòm dzɨ i kaynɨ zɨ̀ a wà n-læ bom ma ateyn Wà n-nî àwo a kaynɨ-a, ma faytɨ̂ kya kɨ nô tèyn.
15Wà n-læ faytɨ ɨ̀vɨf ɨ̀ wom ɨlvà nɨ̀ nà wom Ma nà lemâ koʼ a nlèytɨ, Wa kya na mɨ n-ghɨ afu.
16Wà n-læ meyn yeyn ma jæ na ghɨ bzɨ ma Mɨ̀chi mêm a mbzɨ nɨ̀n læ se sɨ zɨ̀tɨ, Ma wà taŋ meyn ɨ̀ nyàʼ a wa ŋwàʼlɨ̀.
17Dzɨ shyasɨ chwo meyn ìtof ì yemi a Fɨyini fɨ̀, Wùl kàʼ wu bû taŋ dzɨ sìsɨ̀ a wà n-kfâtɨ̀ ateyn.
18Wùl kæ nà ghɨ sɨ taŋ dzɨsɨ ateyn A sɨ na dvɨ̂ chwô àsese a mbæ̀ jvà, Mɨ nyiŋì kɨ ghesɨ̀và, lalì kɨ ghesɨ̀và.
19Mɨ n-dzɨ̂ kɨ nô dzɨ a Fɨyini fɨ̀ Zuetɨ ghelɨ awo a bɨ-a ghèyn Yì kasi sɨ a ma ibàm Zɨ̀ ghêyn a yi n-zuetɨ ghelɨ têyn.
20Àŋena nɨn taŋî àwo a bɨ-a kûm và a BÔBO Àŋena nɨn bebsɨ̂ ìzɨyn ì zæ.
21Mɨ n-bâyn mbàynɨ̀ shyasɨ a BÔBO Ba mɨ n-faytɨ̂ bâyn kɨ nô bayn ghelɨ ghì a ghɨ n-nû vâ?
22Mɨ n-bâyn àŋena fu kɨ sɨ̂ ìkfɨ-i Mɨ n-lî kɨ na àŋena nɨn ghɨ kɨmɨ mbàynɨ̀ semsɨ O Fɨyini fɨ̀, faytɨ ki iwo zɨ̀ a yi n-ghɨ a ma ikfàʼtɨ̀ Mòmsɨ ma a ka wà keli ikfàʼtɨ̀ ì yemi.
23Ki læ̂ ɨ yeyn na a iwo i bzɨ-i i li nɨn ghɨ a ma ikfàʼtɨ̀ a Ɨ tisɨ mà mà na jelɨ̀ a dzɨ ghê a yì fàŋ meyn samoʼ