Psalms 121
This book is a draft. It has been translated but has not yet finished checking, and is published here so the community can read and respond to it.
Bôbo Fɨyini nɨn nchî ghelɨ ŋweyn
Njàŋ ta ghɨ n-læ betɨ na ghɨ na yema ɨlvɨ ta ghɨ n-koʼ a ndô Fɨyini a Jèlusalèm
1Ma Laysɨ meyn àsɨ à kema nà ki koʼsɨ̂ kɨ nɨ̀ kfɨynsɨ Igâmtɨ̀ ì yemi ti n-lû nô wo a?
2Igâmtɨ̀ ì yemi nɨn lû sɨ̂ Bôbo Fɨyini Ɨvzɨ̂ a wù fàytɨ iyvɨ nɨ̀ nse.
3Wu nì visî wì na wà leyn fe Ɨvzɨ̂ a wù n-kini vâ nɨ̀n bɨytɨ̂ wì isɨ
4Samoʼ ɨvzɨ̂ a wù n-kini ghelɨ Isìlæ̀ nɨ̀n bɨytɨ̂ wì isɨ, Ɨvzɨ̂ a wù n-kini ghelɨ Isìlæ̀ nɨn bunî wì.
5Bôbo Fɨyini na kinî và Bôbo Fɨyini nɨ̀n ti kɨ a wa ngùŋ, kɨ̂ŋtɨ̀ và.
6Chuè ɨ nì nyôʼ wì vâ nɨ̀nchuè A njoŋ faŋ tɨ̀ fàynsɨ vâ nɨ̀ntuʼ.
7Bôbo Fɨyini na kɨ̂ŋtɨ̀ và sɨ awo a bɨ-a nô à jɨ̀m Bôbo Fɨyini na kinî và.
8Bôbo Fɨyini na kinî và ɨlvɨ ta wà n-seʼ, Kinî và ɨlvɨ ta wà n-kfa Lvɨ̂yn, sɨ a mɨlvɨ ɨ̀n jɨ̀m.