Numbers 33
Ijêl i ghelɨ Isìlæ̀ sɨ lù a Ijìb sɨ chem a Mowàb
1À ti dzɨ zɨ̀ a ghelɨ Isìlæ̀ nɨn læ fvɨ̀ sɨ a Ijìb inòyn inòyn ɨ jèlɨ̀ ateyn. Àŋena nà n-jelɨ̀ à, a tisɨ̂ Mosìs ŋêyn Alòyn. 2Bôbo Fɨyini nɨ̂n bè na Mosìs nyaʼ nô mɨ ìzɨyn alèʼ à kà ta àŋena bɨ̀ ateyn. À ti ijêl i àŋena i nɨ̀ ɨ̀lwêʼ vzɨ̀ a àŋena nɨ̂n bɨ̀ ateyn:
3Ghelɨ Isìlæ̀ nɨn læ fvɨ̀ a Lamesès a mɨchi njvàsɨ̀ tâyn a njoŋ ɨ yî àsɨ a ànkùmtɨ̀ achi ta ghɨ yɨ ayɨ iyaʼsɨ. Ghelɨ Isìlæ̀ ɨ jèlɨ fvɨ sɨ a ntèʼ Lamesès nɨ̀ àdèŋà kɨ̀ nô asɨ nɨ̀ ghelɨ Ijìb. 4Àŋena nà n-fvɨ tì, ghelɨ Ijìb ɨ bu gvìmì kɨ woyn ghɨ lûmnɨ̀ ɨ ghɨ asɨ nɨ̀ àŋena ghì a Bôbo Fɨyini nɨ̂n zuetɨ. Wu n-zuetɨ tî ɨ dyèyn sɨ̂ ghelɨ Ijìb na wù n-to chwò mɨyini mɨ̀ àŋena.
5Ghelɨ Isìlæ̀ nɨ̂n lù a Lamesès ɨ ndu bɨ̀ a Sukòt, 6ɨ lù a Sukòt ɨ ndu bɨ̀ a Etàm ighami nse ìyum.
7Àŋena nɨn læ lù a Etàm ɨ bèynlɨ̀ ɨ kasi ndù dzɨ a Bi Halilòt injɨyn i Bâl Zefòn abàs ghè a ɨchfɨ̂-iyvɨ i nɨn sal ateyn ɨ bɨ̀ a ngùŋ Migdòl.
8Ghelɨ Isìlæ̀ nɨn lù a Bi Halilòt ɨ dyàŋ jvâ i ghaʼnɨ ɨ zɨ a nse ìyum. A nà ghɨ ta àŋena jèl sɨ a mɨchi ɨ̀n tal a nse ì yum a Etàm àŋena bɨ̀ a Malà.
9Àŋena nɨn lù a Malà ɨ ndù a Elìm alèʼ ghè a asɨ a lɨmà lɨ̀ma nà n-ghɨ afu njvàsɨ̀ bò nɨ̀ àsoma mɨ̀vɨ̂m nsòmbo ɨ bɨ̀ afu.
10Àŋena nɨn lù a Elìm ɨ ndu bɨ̀ a mbæ̀ jvà ì baŋnɨ.
11A nà ghɨ ta àŋena lù sɨ a mbæ̀ jvà nâ ghè, àŋena ndu bɨ̀ a nse ìyum a Sîn, 12ɨ lù a nse ì yum a Sîn ɨ ndu bɨ̀ a Dofkà, 13ɨ fi lù a Dofkà ɨ ndu bɨ̀ a Alùsh. 14Àŋena nɨ̂n lù a Alùsh ɨ ndu bɨ̀ a Lefidìm mu ɨ ghɨ wi afu sɨ nyvɨ.
15Ghelɨ Isìlæ̀ nɨn læ lù a Lefidìm ɨ ndu bɨ̀ a nse ìyum a Sinày, 16ɨ lù a nse ìyum a Sinày ɨ ndu bɨ̀ a Kiblot Hatavà.
17Àŋena nɨn lù a Kiblot Hatavà ɨ ndu bɨ̀ a Hazelòt, 18ɨ lù a Hazelòt ɨ ndu bɨ̀ a Litmà, 19ɨ fi lù a litmà ɨ ndu bɨ̀ a Limon Belèz.
20Àŋena nɨ̂n lù a Limon Belèz ɨ ndu bɨ̀ a Libnà, 21ɨ lù a Libnà ɨ ndu bɨ̀ a Lisà, 22ɨ fi lù a Lisà ɨ ndu bɨ̀ a Kèhèlatà, 23ɨ lù a Kèhèlatà ɨ ndu bɨ̀ a kfɨ̂yn Shefà.
24Ghelɨ Isìlæ̀ nɨ̂n lù a kfɨ̂yn Shefà ɨ ndu bɨ̀ a Haladà, 25ɨ lù a Haladà ɨ ndu bɨ̀ a Makelòt.
26Àŋena nɨn lù a Makelòt ɨ ndu bɨ̀ a Tahàt, 27ɨ lù a Tahàt ɨ ndu bɨ̀ a Telà.
28Àŋena nɨn lù a Telà ɨ ndu bɨ̀ a Mitkà, 29ɨ lù a Mitkà ɨ ndu bɨ̀ a Hasmonà.
30Ghelɨ Isìlæ̀ nɨn lù a Hasmonà ɨ ndu bɨ̀ a Moselòt, 31ɨ lù a Moselòt ɨ ndu bɨ̀ a Bene Jakàn.
32Àŋena nɨn lù a Bene Jakàn ɨ ndu bɨ̀ a Hol Hagidgàd, 33ɨ lù sɨ a Hol Hagidgàd ɨ ndu bɨ̀ a Jotbatà.
34Àŋena nɨn lù a Jotbatà ɨ ndu bɨ̀ a Ablonà, 35ɨ lù a Ablonà ɨ ndu bɨ̀ a Eziyon Gebà, 36ɨ fi lù a Eziyon Gebà ɨ ndu bɨ̀ a Kadèsh a nse ì yum a Zîn.
37Àŋena nɨn lù a Kadèsh ɨ ndu bɨ̀ a kfɨ̂yn Hôl ighami i Edòm. 38A nà ghɨ ta àŋena nɨn ghɨ afu, Bôbo Fɨyini ɨ bè sɨ̂ Alòyn ɨ ngàŋ ndô Fɨyini nà wù koʼ a kfɨ̂yn Hôl ɨ̀ kfɨ̀ afu. Wu n-kfɨ achi a kɨ asɨ-a a njoŋsɨ̀ tâyn ma à sɨ ghɨ bêŋsɨ̀ mɨ̀vɨm ɨ̀n kæ̀ ta àŋena fvɨ̀ sɨ a Ijìb. 39Alòyn nɨ̀n læ kfɨ a kfɨ̂yn Hôl ghɨ bèŋ ɨvɨ nɨ̀ bèŋsɨ̀ mɨ̀vɨm ɨ̀m bò njvàsɨ̀ tal.
40Fòyn ghelɨ Kenàn vzɨ̀ a wu nà n-saʼ a Alàd chî a Negèv a Kenàn ɨ yvɨ na ghelɨ Isìlæ̀ nɨn gvi-à.
41Ghelɨ Isìlæ̀ ɨ lù a kfɨ̂yn Hôl ɨ ndu bɨ̀ a Zalmonà, 42ɨ lù a Zalmonà ɨ ndu bɨ̀ a Bunòn.
43Àŋena nɨn lù a Bunòn ɨ ndu bɨ̀ a Obòt, 44ɨ lù a Obòt ɨ ndu bɨ̀ a Iye Abalìm ighami i Mowàb.
45Ghelɨ Isìlæ̀ nɨ̂n lù a Iye Abalìm ɨ ndu bɨ̀ a Dibòn Gâd.
46Àŋena nɨ̂n læ lù a Dibòn Gâd ɨ ndu bɨ̀ a Almon Dìbɨ̀latèm, 47ɨ lù sɨ a Almon Dìbɨ̀latèm ɨ ndu bɨ̀ a kfɨynsɨ Abalìm a ngùŋ Nebò, 48ɨ fi lù a kfɨynsɨ Abalìm ɨ ndu bɨ̀ ibal i Mowàb a mbæ̀ jvà Jodàn injɨyn i Jèlikò.
49A nà n-ghɨ ibal i Mowàb nâ ghè, àŋena bɨ̀ a mbæ̀ jvà Jodàn sɨ zɨ̀tɨ̀ a Bet Jeshimòt sɨ ndù sɨ chem a Abel Shitìm.
50Ghelɨ Isìlæ̀ nɨ̂n bɨ̀ ibal i Mowàb a mbæ̀ jvà Jodàn injɨyn i Jèlikò, Bôbo Fɨyini ɨ bè sɨ̂ Mosìs na, 51“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Yi nî dyàŋ jvâ Jodàn ɨ̀ zɨ ilaʼ i Kenàn, 52yi saŋ fvɨ̀sɨ̀ ghelɨ ghì a ghɨ n-chi ilaʼ nâ ghè. Yi sâŋ yi bebsɨ ɨ̀nfyèʼsɨ àŋena vzɨ̀ a ghɨ chùf chuf nɨ ɨvzɨ̂ a ghɨ fàytɨ nɨ̀ àkas a ɨ sàs ɨ̀lwêʼ vzɨ̀ a àŋena nɨn koʼsɨ mɨyini ateyn. 53Yi sâŋ, yi lì ìlaʼ ateyn ɨ nà chî ateyn. Ma fu meyn ìlaʼ ateyn na à na kelɨ kɨ nô zɨ̀. 54Yi n-kelɨ sɨ tɨm bèyʼ sɨ gwòtɨ ilaʼ nâ zɨ̀ kɨ̀ asas a ndosɨ asas a ndosɨ. Yì na fu alêʼ a lænɨ-a sɨ̂ ìsas i ndo i lænɨ-i fu àlêʼ a ghaʼnɨ-a sɨ̂ ìsas i ndo i ghaʼnɨ-i. Bèʼ dyêyn nô mɨ àlêʼ à kà sɨ̂ ìsas i ndo i, yi fu kɨ ànkeyna sɨ̂ ìnyeyni. Yi n-gwòtɨ̀ kɨ ta asas a ndosɨ nɨ̀ ghɨ̀bo ghi a nɨn ghɨ.’”
55“‘Mɨtì ma yì kæ faŋ tɨ̀ sàŋ sɨ fvɨ̀sɨ ghelɨ ilaʼ nâ ghèyn nô ghɨ̀ jɨ̀m, a ɨghî a ghɨ faŋ na ghɨ ta asese a yi asɨ, ghɨ ta sùnjoŋnjoŋsɨ a yi a tɨ̂chɨ̀tɨbɨ̀. Àŋena nì nà fu ngeʼ sɨ̂ zɨ̀ ilaʼ ghè a ka yì na chi ateyn. 56Yì kæ faŋ tɨ̀ sàŋ sɨ fvɨ̀sɨ àŋena a mà ni iwo zɨ̀ sɨ̂ zɨ̀ a mà tî bàʼtɨ sɨ ni sɨ̂ àŋena.’”