Nehemiah 5

Nehemayà ɨ gàmtɨ̀ ghelɨ ànfɨf

¹À n-læ meyn nà ghɨ achi a li-a, ghɨ̀lûmnɨ̀ ghɨ li ŋêyn ghɨ̀ki àŋena nà yôl nô sɨ a ŋaŋ kûm àwo kì a ghelɨ Jûsɨ̀ ghɨ li nɨn nî. ²Ghelɨ ghɨ li nà n-yolà bê na, “Ghès nɨn kelɨ woyn ghɨ lûmnɨ̀ nɨ̀ ghɨki ghɨ dvɨ̂ kɨ tèyn yi jofɨ̀ na ghèsɨ̀ na kelɨ ɨ̀fwo ɨ yɨnɨ wu dvɨ̂ kfeynɨ-à ta ka ghèsɨ̀ faŋ tɨ̀ kfɨ jeŋ.”

³Ghɨli bê na, “Ghès nɨn tisɨ̂ gvêyn seysɨ tisɨ̂ ɨsɨ mɨtam mɨ̀ gɨ̀lebsɨ̀, tisɨ̂ ndo seysɨ kɨ̀ sɨ keli asaŋ ta ka ghès faŋ tɨ̀ kfɨ jeŋ.”

⁴Ghɨli fî bê na, “Ghès nɨn sam sam ɨkwo sɨ laʼ tâks sɨ̂ fòyn kûm gvêyn seysɨ nɨ̀ gveynsɨ mɨtam mɨ̀ gɨ̀lebsɨ̀ nɨ̀ ghès.” ⁵Ghèsɨ beʼlɨ meyn woyn ghɨki nɨ̀ ghès ghɨ li sɨ ɨkòs, nô mɨ ta ghesɨ̀ woynà ghesɨ nɨn kelɨ kɨ mɨ̀luŋ ɨ̀mòʼ. Woyn ghesɨ ɨ ghɨ kɨmɨ ta woyn àŋena. Ghɨ fsɨtɨ meyn gvêyn seysɨ ɨ̀ fsɨ̀tɨ gveynsɨ mɨ̂tàm mɨ̀ gɨ̀lebsɨ̀ nɨ̀ ghès, ghesɨ na bu kelɨ wi dzɨ ì lì sɨ gàmtɨ ngeŋ seysɨ.” ⁶A nà ghɨ ta mà yvɨ idzɨ̂ nâ yèynì a àŋena nɨn dzɨ têyn, ɨtoŋ wom yaf nô sɨ a ŋaŋ. ⁷A nà ghɨ ta mà fàytɨ kfàʼtɨ̀ iwo ateyn, ma taŋi sɨ̂ chyeʼsɨ nɨ̀ ghelɨ ghɨ tisɨnɨ. Mɨ n-bè sɨ̂ àŋena na, “Yi ni-à mɨ̀toŋ mɨ̀ woynà ghi ɨ yafa bòm ta yi n-samsɨ mɨkwo sɨ̂ woynà ghi bɨfɨ sæsɨ.” Mɨ n-tàŋi tî ɨ jàŋtɨ̀ ghelɨ nô sɨ idvɨ̀ na ghɨ gvì ghesɨ̀ àŋena faytɨ iwo ateyn. ⁸Àŋena gvì ma bè sɨ̂ àŋena na, “Ghesɨ̀na momsɨ meyn nô nɨ̀ àdyaʼa sɨ kasi sɨ yuyn ghelɨ ghesɨ̀nà ghì a ghɨ tî bèʼlɨ sɨ̂ ghelɨ ɨtum. Mɨtì yi kwo nì na woynà ghi kasi nà beʼlɨ̂ ngeŋsɨ àŋena sɨ̂ zɨ̀ sɨ ɨkòs. Ta mà tàŋi tî, àŋena chimi kɨ têyn moŋ bòm ta àŋena nà n-kelɨ wi nô ìwo sɨ bè.

⁹Ma fi kæ bè na, “Iwo zɨ̀ a yi n-nî nɨn jofɨ̀ wì. Yi n-kwo kelɨ sɨ nà fayn Fɨyini fɨ ghesɨ̀nà ta ka ghelɨ ɨtum ghèyn na wèsɨ̀ wì ghesɨ̀nà. ¹⁰Ghesɨ̀ woynà ghem nɨ̀ ghelɨ ghɨ felɨnɨ nɨ̀ ma nɨn samsɨ̂ ɨ̀kwo nɨ̀ àsaŋ a bɨfɨ wi sæsɨ. Ka yì fi læ̂ sàmsɨ ɨ̀fwo sɨ̂ ghelɨ bɨ̀fɨ̀ sæsɨ. ¹¹Yì kasi fù gveynsɨ ɨfwo ɨ yɨnɨ nɨ̀ àŋena ɨ̀ fu kɨ̀mɨ gveynsɨ mɨtam mɨ̀ gɨ̀lebsɨ̀ nɨ̀ gveynsɨ ɨnkàʼ mɨ̀ olìfsɨ̀ nɨ̀ ndosɨ àŋenasɨ kɨ̀ lvɨ̂yn. Yì kasi fù kɨ̀mɨ sæ sìsɨ̀ a yì fsɨ̀ sɨ̂ àŋena atû ɨ̀kwo ghè nɨ̀ àsaŋ kì nɨ̀ mɨ̀lùʼ mzɨ̀ baʼsɨ̂ nɨ̀ mɨ̀vɨ̂l mzɨ̀ a yì sàmsɨ sɨ̂ àŋena.”

¹²Àŋena bèynsɨ̀ ɨ bè na, “Ghès nɨn kasî fu ɨ̀fwo ateyn. Ghèsɨ̀ læ̀ bu fì bɨfɨ wi sæ sɨ̂ àŋena, ghès nɨn nì kɨ ta wà bè.”

Ma kæ jàŋtɨ ngàŋsɨ ndô Fɨyini ɨ bè chyeʼsɨ nɨ̀ ghelɨ ghɨ tisɨnɨ nɨ̀ àŋena ɨ yɨ mɨkâyn na àŋena nɨn nî kɨ ta ghɨ chfɨ̀nɨ̀, ¹³ma fvɨ̀sɨ̀ ɨ yàysɨ̀ bòsɨ ndzɨsɨ nɨ̀ mà ɨ bè na, “À fàŋ mɨ ndà tɨ̀ lèm ichfɨ̂nɨ̀ i ŋweyn, a Fɨyini fɨ ɨ yàysɨ̀ ŋweyn kɨ̀ ta mà yàysɨ bò sem sèynsɨ. Fɨyini fɨ nɨn fvɨ̀sɨ ŋweyn sɨ a ŋweyn a ndo a wù le nô mɨ ghà ta wù n-kelɨ.”

Mɨ n-bè tî, àŋena bèynsɨ kɨ ghɨ̀ jɨ̀m na, “Yi na ghɨ kɨ tì,” ɨ koʼsɨ Fɨyini ɨ nà sɨ nì kɨ ta àŋena chfɨ̀nɨ̀.

¹⁴À nà n-ghɨ aleŋ ɨlvɨ ghê a mɨ n-saʼ Judà, ghesɨ̀ ghelɨ ndo nɨ̀ mà nɨn bu læ yɨ ɨfwo ɨ yɨnɨ vzɨ̀ a ghelɨ ghɨ saʼnɨ nɨn kelɨ sɨ nà yɨ-a. Ghɨ n-læ se sɨ lèm ma sɨ a wûl ɨ saʼnɨ, ma fòyn Atazezès saʼ meyn sɨ a bèŋsɨ̀ mɨ̀vɨm ɨ̀m bò. Ma saʼ sɨ a bèŋsɨ̀ njvàsɨ̀ bò, wu nà sɨ ghɨ bèŋsɨ̀ mɨ̀vɨm ɨ̀n tal njvàsɨ̀ bò achɨ. À nà n-ghɨ a bèŋsɨ̀ nâ ghàyn njvàsɨ̀ bò mɨ n-bu læ yɨ ɨfwo nâ wèyn, wul ɨ̀ wom ɨ faŋ tɨ̀ yɨ̀. ¹⁵Mɨtì ghelɨ ghì a ghɨ n-læ saʼ Judà jæ ta ka ma nà n-lêm àdɨli atu nɨ̀ ghelɨ nô sɨ a ŋaŋ. Àŋena nà fsɨ ɨ̀fwo ɨ yɨnɨ sɨ̂ ghelɨ, fsɨ mɨ̀lûʼ, fsɨ kɨmɨ àso ɨkwo a fɨfâ kɨ dɨlɨ̀ chem àbeʼ a kilù. Nô mɨ ghelɨ ghɨ felɨnɨ nɨ̀ àŋena nà n-yeʼtɨ̂ kɨ yeʼtɨ ghelɨ. Mɨtì ma nà nî wì awo nâ kèynà bòm ta mɨ nà n-fâyn Fɨyini. ¹⁶Mɨ n-læ kwo fu ngêŋ yem sɨ kasi sɨ bàʼlɨ mbàyn Jèlusalèm. Ghesɨ̀ ghelɨ ghɨ felɨnɨ nɨ̀ mà nɨn chɨ̀yntɨ ghal ifêl nâ yèynì kɨ ghɨ̀ jɨ̀m. Ghès nɨn bu læ yuyn alêʼ a nse.

¹⁷Mɨ nà n-yɨsɨ̂ ghelɨ Jûsɨ̀ nɨ̀ ghelɨ ghɨ tisɨnɨ ɨvɨ nɨ̀ ghelɨ mɨ̀vɨm ɨ̀n tâyn baʼsɨ̂ nɨ̀ ghelɨ ghɨ li ghì a ghɨ lù a tɨ̂làʼ ghè a tɨ n-ghɨ a ghès a mbæ̀sɨ̀. ¹⁸A nà n-ghɨ nô mɨ achi à kà, ma sɨ mbòŋ, nɨ̀ njɨ̀sɨ jûŋsɨ̀ ntufa, nɨ̀ ngvɨsɨ nô sɨ idvɨ̀. Mɨ̀chi nà n-chwô kɨ ìvɨm ma fu mɨ̀lûʼ kɨ tɨ̀nki tɨ̀ jɨ̀m. Mɨ n-nà nî nô mɨ àwo nâ kèynà bɨf wi ɨfwo ɨ yɨnɨ vzɨ̀ a ghɨ nà n-kelɨ sɨ nà fu sɨ̂ wùl ɨ̀ saʼnɨʼ bòm ta ifêl ateyn i nà n-dɨlɨ̀ sɨ̂ ghelɨ nâ ghèyn.

¹⁹Mɨ n-jem a Fɨyini femfɨ bê na, “Dyèyn atem a juŋà sɨ̂ mà bòm àwo kèynà a mà nì sɨ̂ ghelɨ ghèyn.”