Nehemiah 13

Ghɨ fvɨ̀sɨ̀ ghelɨ ɨtum

¹À n-læ meyn nà ghɨ achi nâ ghè ghɨ nà jâŋ ŋwàʼlɨ̀ ìsaʼ nɨ̀ Mosìs, ghelɨ ɨ yvɨ kɨ ghɨ̀ jɨ̀m. Ghɨ n-jàŋ ɨ yeyn ma ghɨ nyaʼ meyn ateyn na, “Ka ghɨ n-læ̀ vìsi wùl ɨ̀ Amòn kèsa wul ɨ̀ Mowàb chɨyntɨ ànôyn a ghelɨ Fɨyini. ²Ghɨ n-nyàʼ têyn bòm ta ghelɨ Amòn nɨ̀ ghelɨ Mowàb nɨn bu læ fu afo a yɨnɨ-a kèsa mu sɨ̂ ghelɨ Isìlæ̀ ta àŋena nɨn fvɨ̀ a Ijìb ɨ nà chwô a nse iyum. Àŋena nɨn kwo yuyntɨ Balàm na wù te ghelɨ Isìlæ̀, mɨtì Fɨyini feyfɨ ɨ bèynsɨ̀ sɨ a njùŋ. ³A nà ghɨ ta ghelɨ Isìlæ̀ yvɨ isaʼ nâ yèynì, àŋena saŋ fvɨ̀sɨ̀ ɨ̀tum sɨ antêynɨ̀ nɨ̀ àŋena.

Nèhèmayà ɨ kfɨnɨ àwo

⁴Ngàŋ ndô Fɨyini ɨ Elìyashìb ɨ wâynà Tòbayà nà n-sɨ ghɨ ma ghɨ n-læ meyn lèm ŋweyn wu nà chî ɨ̀lwêʼ vzɨ̀ a ghɨ n-lêm ɨfwo ateyn a ndô Fɨyini jæ ta ka achi nâ kèynà. ⁵Elìyashìb nà n-ghɨ ma wù fu meyn àlêʼ a ghaʼnɨ-a a li-a a ndô Fɨyini ghɨ lêm ìfu ɨfwo ɨ yɨnɨ ateyn nɨ̀ ìleŋ i nɨ̀ ɨ̀fwo vzɨ̀ a ghɨ n-felɨ̀ ateyn a ndô Fɨyini sɨ̂ Tòbayà. Ghɨ nà n-lêm kɨmɨ àfo à moʼ àmòʼ antêynɨ̀ ɨ̀fwo ìvɨm ifu ɨfwo ɨ yɨnɨ nɨ̀ mɨ̀lûʼ baʼsɨ̂ nɨ̀ mɨ̀vɨ̂l mɨ̀ olìfsɨ̀. Ɨfwo nâ wèyn nà n-kelɨ ghelɨ ndo nɨ̀ Levì, nɨ̀ ghelɨ ghɨ yemnɨ kɨ̀mɨ̀ nɨ̀ ghelɨ ghì a ghɨ n-chî achfɨ a mbàyn baʼsɨ̂ nɨ̀ ngàŋsɨ ndô Fɨyini.

⁶Awo nâ kèyna nà n-gâyn tì, ma ghɨ wi a Jèlusalèm. À nà n-ghɨ tì ma ma ndu meyn sɨ yeyn Atazezès ɨ fòyn Babilòyn a ghɨ tì ma wù sɨ ghɨ ma wù saʼ meyn sɨ a bèŋsɨ mɨ̀vɨm ɨ̀n tal njvàsɨ̀ bò. Ma chitɨ koʼ afu ɨ loyn ɨlvɨ sɨ̂ ŋweyn, ⁷ɨ kasi gvì a Jèlusalèm, ɨ kæ yvɨ iwo i bzɨ-i zɨ̀ Elìyashìb tî mòm sɨ fu ndo zɨ̀ a ghɨ n-lêm ɨfwo ateyn a ndô Fɨyini sɨ̂ Tòbayà. ⁸Iwo ateyn i yaf ma nô sɨ a ŋaŋ, ma kumtɨ ɨ̀fwo Tòbayà nâ vzɨ̀ ɨ laŋ fvɨ̀sɨ̀ abe nô ɨ̀ jɨ̀m. ⁹Mɨ n-bê meyn ghɨ nì ndo àteyn yi nà layna ta isaʼi nɨn dyêyn, ma kasi ɨ lèm ɨ̀fwo vzɨ̀ a ghɨ n-nî ifêl ateyn a ndô Fɨyini nɨ̀ tɨ̀futɨ ɨfwo ɨ yɨnɨ tɨ baʼsɨ̂ nɨ̀ ìleŋ i a ndo afu.

¹⁰Mɨ n-fi meyn yvɨ kɨmɨ na ghɨ n-bû fu ɨfwo vzɨ̀ a ghɨ nà n-kelɨ sɨ fu sɨ̂ ghelɨ ndo nɨ̀ Levì, ɨ fi yvɨ na ghelɨ ndo nɨ̀ Levì nɨ̀ ghelɨ ghɨ yemnɨ ghì a ghɨ nà n-felɨ a ndô Fɨyini kasi meyn ndù a àŋena gveynsɨ. ¹¹Ma yòl sɨ̂ ghelɨ ghɨ tisɨnɨ ɨ bɨf na, “À gàyn ghà ghɨlû kɨ ghɨ̀ jɨ̀m ɨ̀ vìsi ìfêl i ndô Fɨyini a?” Mɨ n-bɨf tî ɨ bè na ghelɨ ndo nɨ̀ Levì nɨ̀ ghelɨ ghɨ yemnɨ kasi gvì nà felɨ̀ ɨlwèʼ nɨ̀ àŋena a ndô Fɨyini.

¹²Ghelɨ Judà ɨ zɨ̀tɨ̀ sɨ nà kasi gvî nɨ̀ àfo à moʼ àmòʼ antêynɨ̀ ɨ̀fwo ìvɨm ifu ɨfwo ɨ yɨnɨ nɨ̀ àŋena nɨ̀ mɨ̀lûʼ ɨ̀n jùŋ baʼsɨ̂ nɨ̀ mɨ̀vɨ̂l mɨ̀ olìfsɨ̀, lêm a ndo ghè a ghɨ n-lêm ɨfwo ateyn a ndô Fɨyini. ¹³Ma lèm Shèlèmayà ɨ ngàŋ ndô Fɨyini nɨ̀ Zadòk ɨ wul ɨ̀ nyaʼnɨ nɨ̀ Bèdayà ɨ wul ɨ̀ ndo nɨ̀ Levì na àŋena na tôʼnɨ̀ nɨ̀ ɨ̀lwê vzɨ̀ a ghɨ n-lêm ɨfwo ateyn a ndô Fɨyini. Mɨ n-lem meyn Hanàn ɨ wâyn Zakùl ma à ti wâyn wâyn Màtànayà na wù na gàmtɨ̀ àŋena bòm ta ghɨ yèyn na ghelɨ nâ ghèyn nɨn ghɨ ghelɨ àtì-ati ɨ kæ bè na àŋena nà gwôtɨ̀ ɨ̀fwo sɨ̂ woynà àŋena.

¹⁴Mɨ n-jêm a Fɨyini femfɨ na wà kfaʼtɨ ifêl i jûŋ zɨ̀ a mà nì. Ka wa n-lèsɨ̀ ìfêl i àtì-ati zɨ̀ a mà nì a wa ndo.

¹⁵À nà n-ghɨ a mɨchi nâ ghè a Judà ma yeyn ta ghelɨ nɨn kam mɨlûʼ achi ɨtuʼ ilaʼ, kfâ nɨ̀ ɨ̀fwo ɨ yɨnɨ atû njàkâysɨ̀. Àŋena nà n-gvî nɨ̀ àsaŋ a nɨ̀ mɨ̀lûʼ nɨ̀ mɨ̀tam mɨ̀ gɨ̀lêbsɨ̀ nɨ̀ ɨmzɨ fîksɨ̀ nɨ̀ tɨ̀nkì tɨ ɨfwo nô tɨ̀ jɨ̀m sɨ beyʼlɨ a Jèlusalèm achi ɨtuʼ ilaʼ. Ma yòl sɨ̂ àŋena ɨ kàyn na ka àŋena na beyʼlɨ̂ àfo achi ɨtuʼ ilaʼ. ¹⁶Ghelɨ Tayà ghì a ghɨ nà n-chi a Jèlusalèm nà n-gvî nɨ̀ sfɨsɨ, nɨ̀ ɨ̀fwo ɨ beyʼlɨnɨ kɨ tɨ̀nki tɨ̀ jɨ̀m beʼlɨ̂ sɨ̂ ghelɨ Judà a Jèlusalèm achi ɨtuʼ ilaʼ. ¹⁷Ma yòl sɨ̂ ghelɨ ghɨ tisɨnɨ a Judà ɨ bè sɨ̂ àŋena na, “Yi nî ìwo i bzɨ-i àchi ɨtuʼ ilaʼ. Yi bebsɨ meyn ɨ̀tuʼ ilaʼ wu na layn wi ta isaʼi nɨn dyêyn.” ¹⁸Yi nî kɨmɨ àwo kì a ghɨ̀bo ghi nɨn læ nì Fɨyini fɨ ghesɨ̀nàfɨ fu ngeʼ sɨ̂ ghesɨ̀nà ɨ fi fu sɨ̂ ntèʼ yêyn. Yi na fì nî na ɨtoŋ Fɨyini fî yàf nô sɨ a ŋaŋ wù maʼ ngeʼ i ghaʼnɨ atu nɨ̀ ghelɨ Isìlæ̀ bòm ta yi n-bebsɨ achi ɨtuʼ ilaʼ.

¹⁹Ma kæ chwòsɨ sɨ isaʼ na à na ghɨ nɨ̀ntuʼ sɨ laynsɨ nô mɨ achi ɨtuʼ ilaʼ à kà, ghɨ kɨ̀ŋ ɨ fòtɨ̀ àchfɨ̂ a mbàyn ɨ læ choʼ kɨ ma ɨtuʼ ilaʼ chwo meyn. Mɨ n-bè tî ɨ lèm ghelɨ ghɨ felɨnɨ nɨ̀ mà ghɨ li na ghɨ na chî àchfɨ̂ a mbàyn achi ɨtuʼ ilaʼ visî wì na ghɨ zɨ nɨ̀ àfo a. ²⁰Ghɨ nà n-kɨ̂ŋ achfɨ̂ a mbàyn Jèlusalèm nɨ̀ntuʼ sɨ laynsɨ nô mɨ achi ɨtuʼ ilaʼ à kà, ghelɨ ghɨ beyʼlɨnɨ ɨ chi kɨ abe. ²¹Ma kàyntɨ̀ àwo sɨ̂ àŋena ɨ bɨf na, “Yi n-gvî chî ibàm i mbàyn bòm ghà? À fì chi nô mɨ ndà ibàm i mbàyn afu, a mà dyeyn iwo sɨ̂ ŋweyn. Sɨ zɨ̀tɨ̀ achi nâ ghè àŋena nà bu gvì wì achi ɨtuʼ ilaʼ. ²²Mɨ n-kàyntɨ tî ɨ bè sɨ̂ ghelɨ ndo nɨ̀ Levì na àŋena lem ngeŋsɨ àŋena nà layn ta isaʼi nɨn ndyêyn ɨ̀ gvì nà chî àchfɨ̂ a mbàyn ta ka achi ɨtuʼ ilaʼ na layna.

Ka wa n-lèsɨ̀ àwo a juŋà nɨ̀ mà a Fɨyini femfɨ. Koynsɨ isuyn sɨ̂ mà bòm ìkôŋ i mɨ̂kàyn nɨ̀ và.

²³À nà n-ghɨ kɨmɨ a mɨchi nâ ghè ma yeyn ta ghelɨ Jûsɨ̀ ndu ghɨ̀kì a Ashdòd nɨ̀ Amòn kɨ̀mɨ nɨ̀ Mowàb. ²⁴À nà n-ghɨ tì ma woyn àŋena ghɨ li sɨ taŋî kɨ ìtaŋi i Ashdòd, fî taŋî kɨ ìtaŋi i ghelɨ ghɨ li, bu kya wi sɨ taŋi itaŋi i Judà. ²⁵Ma yòl sɨ̂ àŋena ɨ jèm na Fɨyini fɨ fu ngeʼ sɨ̂ àŋena ɨ leŋ ghɨli ɨ choʼtɨ/gùf ɨ choʼi nyuŋsɨ àŋena. Mɨ n-nì tî, ɨ bè àŋena chfɨ̀nɨ̀ sɨ izɨyn nɨ̀ Fɨyini fɨ na àŋena læ̀ bu lì wi ghɨ̀ki ɨtum ɨ̀ læ̀ faŋ tɨ̀ fu woyn sɨ̂ ɨ̀tum. ²⁶Sòlomùn nà n-ghɨ fòyn Isìlæ̀ n-gaŋtɨ chwô tɨfôyn tɨ ɨtum nô tɨ̀ jɨ̀m, Fɨyini fɨ ɨ kôŋ ŋweyn nô a jûŋ. Mɨtì wu mala ghɨ̀kì ɨtum ɨ nì mbɨ bòm àŋena. ²⁷A yi ti n-kfâʼ nà ghèsɨ̀ yvɨ iwo nâ yèynì faŋ tɨ̀ nà yvɨnɨ Fɨyini feyfɨ, nà malâ ghɨ̀kì ɨtum a?”

²⁸Jòyadà nà n-ghɨ wâyn Elìyashìb ɨ ngàŋ ndô Fɨyini i ngaŋtɨnɨ. Wâyn Jòyadà ɨlvɨ̀ ɨ mala wâyn Sànbalàt ɨ wul ɨ̀ Holòn, ma saŋ fvɨ̀sɨ̀ ŋweyn sɨ a Jèlusalèm.

²⁹Ka wa n-lèsɨ̀ ìwo zɨ̀ a àŋena mòm a Fɨyini fɨ bòm ta àŋena bebsɨ meyn ìfêl i ngàŋsɨ ndô Fɨyini ɨ̀ bèbsɨ mɨ̀kâyn mzɨ̀ a ngàŋsɨ ndô Fɨyinisɨ̀ nɨ̀ ghelɨ ndo nɨ̀ Levì nɨn læ yɨ.

³⁰Ma kæ sàŋ sɨ fvɨ̀sɨ ɨtum sɨ antêynɨ̀ nɨ̀ ngàŋsɨ ndô Fɨyini nɨ̀ ghelɨ ndo nɨ̀ Levì sɨ fu ifêl zɨ̀ a nô mɨ ndà nɨn kelɨ sɨ nà felà. ³¹Mɨ n-baʼtɨ meyn na ghɨ na gvì nɨ̀ ɨ̀nkàʼ mzɨ̀ a ghɨ n-nyôʼ ifu ateyn atû àbaŋ, nɨ̀ ìfu i mɨtam mɨ̀ àsɨ kɨ̀ ɨlvɨ.

Ka wa n-lèsɨ̀ mà a Fɨyini femfɨ dyèyn atem a juŋà sɨ̂ mà.