Nehemiah 1

Ijêm i Nèhèmayà

¹Akeynà nɨn ghɨ àwo kì a Nèhèmayà ɨ wâyn Hàkalìyà nɨn læ nì.

À n-læ nà ghɨ a njoŋ Kislèv ma Fòyn Atazezès sɨ ghɨ achɨ sɨ a bèŋ mɨ̀vɨm ɨ̀m bò, ma ghɨ a ntèʼ i ghaʼnɨ a Suzà a ghɨ ntèʼ zɨ̀ a fòyn nà n-chi ateyn. ²Wâynà wom Hànanì ɨ gvì ŋêyn ghelɨ ghɨ li ma ghɨ lù a Judà, ma bɨf saʼgha kûm ghelɨ Jûsɨ̀ ghì a ghɨ tî faŋ nɨ ɨghî a ghɨ tî kàsi kfa sɨ a Babilòyn. Mɨ n-bɨfɨ meyn kɨmɨ saʼgha kûm Jèlusalèm.

³Àŋena bè sɨ̂ mà na ghelɨ nâ ghì a ghɨ tî kàsi kfa sɨ a Jèlusalèm nɨn ghɨ a ngeʼ i bemnɨ, iwumi-i ɨ ghɨ sɨ̂ àŋena. Àŋena nɨn be meyn kɨmɨ sɨ̂ mà na mbàyn Jèlusalèm bɨytɨ meyn achfɨ̂ ateyn a fɨ.”

⁴A nà ghɨ ta mà yvɨ awo nâ kèyna, ma dùʼì a nse ɨ dzɨ̀ sɨ a mɨchi, bam ɨ̀chfɨ̂, jêm sɨ̂ Fɨyini fìfɨ̀ a fɨ n-ghɨ iyvɨ. ⁵Mɨ nà n-jemà bê na,

“Bôbo Fɨyini ɨ Fɨyini fìfɨ̀ a fɨ n-ghɨ iyvɨ, ɨvzɨ̂ a wù n-gaŋtɨ, kelɨ àdyaʼ a kaynɨ-a. Ikôŋ i mɨ̂kàyn nɨ̀ ŋweyni faŋ meyn kɨ̀ samoʼ sɨ̂ ghelɨ ghì a ghɨ n-kôŋ ŋweyn, yvɨnɨ̂ ŋweyn. ⁶Ki ma ɨ yvɨ ijêm ì yemi a Bôbo. Mɨ n-jêm sɨ̂ ghelɨ Isìlæ, ɨ ghelɨ ghɨ felɨnɨ nɨ̀ và nɨ̀nchuè nɨ̀ntuʼ. Mɨ n-bɨmî na ghès ɨ ghelɨ Isìlæ ni meyn mbɨ asɨ nɨ̀ và a Bôbo. Mɨ n-jêm na wà lesɨ fù mbɨ sìsɨ̀ a ghèsɨ̀ nì a wa asɨ nɨ̀ ghelɨ ndo nɨ̀ ghɨ̀bo ghesɨ. ⁷Ghèsɨ to meyn nɨ̀ àtu a sɨ̂ và nô sɨ a ŋaŋ. Ghesɨ bû yvɨ̀nɨ tɨ̀saʼ tyatɨ nɨ̀ ìyeʼi ì zæ, ɨ̀ faŋ tɨ̀ nì awo kì a wà n-læ fu sɨ̂ Mosìs ɨ wul ɨ̀ felɨnɨ nɨ̀ và.

⁸“Mɨ n-chwotɨ̂ a Bôbo na wà kfaʼtɨ iwo zɨ̀ a wà n-læ bè sɨ̂ Mosìs ɨ wul ɨ felɨnɨ nɨ̀ và. Wà n-læ bè na, ‘Zɨ̂ ghelɨ Isìlæ̀ kæ nà yvɨnɨ̂ wì ma, a mà gwosɨ zɨ a yì ndu a tɨ̂laʼtɨ ɨtum. ⁹Mɨtì ma yì kæ bèynlɨ sɨ a mbɨsɨ nɨ̀ zɨ̀, nà yvɨnɨ̂ mà nî àwo kì a mà bè, nô mɨ ɨlvɨ ta yì gwòsɨ̀ ɨ̀ ndù a tɨ̂laʼtɨ ɨtum, a mà kasi lì kfa nɨ̀ zɨ̀ alèʼ ghè a mà choʼ lèm na yì na koʼsɨ̂ mà ateyn.’

¹⁰Ghelɨ ghèyn nɨn ghɨ ghelɨ ghɨ felɨnɨ nɨ̀ và a Bôbo, a ghɨ ghelɨ̀ ghya ma wà yuyn atu a àŋena nɨ̀ àdyaʼ a bemnɨ-a nɨ̀ và. ¹¹Yvɨ ijêm ì yemi a Bôbo, ɨ yvɨ ijêm i ghelɨ ghɨ felɨnɨ nɨ̀ và ghî a ghɨ n-kôŋ sɨ nà ngvɨmlɨ vâ. Ni fòyn keli atem a juŋà sɨ̂ wùl ɨ̀ felɨnɨ nɨ̀ và, ɨ̀ nì ìwo zɨ̀ a wù n-kɨŋ layn.”

A nà n-ghɨ ɨtuʼ nâ ghè, a wetɨ̂ mà mɨlûʼ a bom nɨ̀ fòyn.