Leviticus 3

Ifu sɨ nà chi nɨ̀ mbôynɨ̀

¹“Wùl na gvî nɨ̀ ìfu i asɨ nɨ̀ Bôbo Fɨyini, a ghɨ ìfu sɨ nà chi nɨ̀ mbôynɨ̀, wu gvì nɨ̀ nyàm i lûmnɨ̀ kèsa i ki ma wù fvɨ̀sɨ̀ anòyn a nyâmsɨ̀ nɨ̀ ŋweyn, yi kelɨ wi nseʼi. ²Wù gvî nɨ̀ nyàm àteyn, wu lèm àwu a ŋweyn atû àteyn ɨ sɨ ɨchfɨ fɨndo nɨ̀ Bôbo Fɨyini, ngàŋsɨ ndô Fɨyinisɨ̀ ma à ti woyn Alòyn li mɨluŋ mɨ̀ àteyn ɨ̀ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ³Wù sɨ nyam nâ yèyn sɨ nyoʼ sɨ a ifu sɨ̂ Bôbo Fɨyini sɨ nà chi nɨ̀ mbôynɨ̀, wu lì ìso zɨ̀ a yi n-ghɨ ɨfwo ɨlvà nô ì jɨ̀m kèsa izɨ-ì a yi n-baʼsɨ ɨfwo ɨlvà, ⁴nɨ̀ fyeŋsɨ akɨŋsɨ baʼsɨ̂ nɨ̀ ìso zɨ̀ a yi n-ghɨ a ngùŋ àkùʼtɨ nɨ̀ àlêʼ a jûŋ kì a kɨ n-ghɨ ɨtwem ikuè, wu ghɨ sɨ fvɨ̀sɨ̀ sɨ baʼsɨ nɨ̀ fyeŋsɨ akɨŋsɨ. ⁵Wù fu, woyn Alòyn ɨ nyòʼ atû ìfu i nyoʼnɨ-i, atû ɨ̀nkàʼ afî a mɨ̀ n-bali atû àbaŋ ifu, a ghɨ ìfu i nyoʼnɨ-i, lɨ̂mtɨ̀ fom sɨ̂ Bôbo Fɨyini.

⁶“Wùl na gvî nɨ̀ nyàm sɨ fu sɨ a ifu sɨ̂ Bôbo Fɨyini sɨ nà chi nɨ̀ mbôynɨ̀, wu gvì nɨ̀ njɨ̀ kèsa ayaʼ. À kæ nà ghɨ bzɨ ndoŋ, a nà ghɨ ìfef kèsa ikfɨ i bzɨ ma wù fvɨ̀sɨ̀ anòyn a bzɨsɨ nɨ̀ ŋweyn, yi kelɨ wi nseʼi. ⁷Wù kæ fu wâyn njɨ̀, wu lì ɨ ndù nɨ̀ nyeyn asɨ nɨ̀ Bôbo Fɨyini, ⁸ɨ lèm awu a ŋweyn atû àteyn, ɨ sɨ ɨchfɨ fɨndo nɨ̀ Bôbo Fɨyini. Wù sɨ, woyn Alòyn ɨ li mɨ̀luŋ mɨ̀ àteyn ɨ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ⁹Wù sɨ nyam ìfu nâ yèyn sɨ nà chi nɨ̀ mbôynɨ̀, wu lì ìlì ateyn ɨ fu sɨ a ifu i nyoʼnɨ-i sɨ̂ Bôbo Fɨyini, a ghɨ ìso ateyn, nɨ̀ ɨ̀nkùyn nɨ̀ ìso zɨ̀ a yi n-ghɨ ateyn ma ghɨ tèyn bàʼsɨ ɨghòŋlɨ̀, nɨ̀ ìso zɨ̀ a yi n-ghɨ ɨfwo ɨlvà nô ì jɨ̀m kèsa izɨ-i a yi n-baʼsɨ ɨfwo ɨlvà nâ ghè. ¹⁰Wù nî wu fu kɨmɨ nfyeŋsɨ akɨŋ baʼsɨ̂ nɨ̀ ìso zɨ̀ a yi n-ghɨ a ngùŋ àkuʼtɨ nɨ̀ àlêʼ a jûŋ kì a kɨ n-ghɨ ɨtwem ikuè, wu ghɨ sɨ fvɨ̀sɨ̀ sɨ baʼsɨ nɨ̀ fyeŋsɨ akɨŋsɨ. ¹¹Wù fu, ngàŋ ndô Fɨyini ɨ chɨ̀yntɨ nyòʼ atû àbaŋ ifu sɨ a ifu ɨfwo ɨ yɨnɨ, a ghɨ ìfu ta ghɨ nyòʼ sɨ̂ Bôbo Fɨyini.

¹²“Ifu i ŋweyni kæ nà ghɨ bzɨ ndoŋ, wu lì ɨ ndù nɨ̀ nyeyn asɨ nɨ̀ Bôbo Fɨyini, ¹³ɨ lèm awu a ŋweyn atû àteyn ɨ sɨ ɨchfɨ fɨndo nɨ̀ Bôbo, woyn Alòyn li mɨluŋ mɨ̀ àteyn ɨ̀ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ¹⁴Wù sɨ nyam ìfu nâ zɨ̀, wu lì ìlì ateyn, ɨ fu ifu i nyoʼnɨ-i sɨ̂ Bôbo Fɨyini, a ghɨ ìso zɨ̀ a yi n-ghɨ ɨfwo ɨlvà nô ì jɨ̀m kèsa izɨ-i a yi n-baʼsɨ ɨfwo ɨlvà nâ ghè. ¹⁵Wù nî wu fu kɨmɨ nfyeŋsɨ akɨŋ nɨ̀ ìso zɨ̀ a yi n-ghɨ a ngùŋ àteyn baʼsɨ̂ ndû akuʼtɨ nɨ̀ àlêʼ a jûŋ kì a kɨ n-ghɨ ɨtwem ikuè, wu ghɨ sɨ fvɨ̀sɨ̀ sɨ baʼsɨ nɨ̀ fyeŋsɨ akɨŋsɨ. ¹⁶Wù fu, ngàŋ ndô Fɨyini ɨ chɨ̀yntɨ nyòʼ atû àbaŋ ifu sɨ a ifu ɨfwo ɨ yɨnɨ sɨ̂ Bôbo Fɨyini, a ghɨ ìfu i nyoʼnɨ-i jofà, lɨ̂mtɨ̀ fom sɨ̂ ŋweyn. Iso ateyn i nô ì jɨ̀m nɨn kelɨ Bôbo Fɨyini.

¹⁷“Ka wùl sɨ̂ zɨ̀ nɨ̂n læ̀ kfɨl iso kèsa mɨluŋ mɨ̀ nyàm nô mɨ wo ta yi n-chi. Iyeyn nâ yèynì nɨn ghɨ ìsaʼ ma yi faŋ meyn kɨ̀ samoʼ sɨ̂ ghelɨ Isìlæ̀ nô ghɨ̀ jɨ̀m baʼsɨ̂ nɨ̀ ɨ̀jwâŋ vzɨ̀ a wu læ̀ koʼ ibàm.”