Leviticus 23

¹Bôbo Fɨyini nɨn be meyn sɨ̂ Mosìs na, ²“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Ɨmêyn nɨ̀n ghɨ mɨ̀chi mzɨ̀ a mà chòʼnɨ na àŋena na yvɨ̀ŋtɨ̀-à, yɨ àyɨ ateyn sɨ koʼsɨ ma ɨ Bôbo Fɨyini.’”

Achi ɨtuʼ ilaʼ

³“Yi n-kelɨ mɨ̀chi ntufa ɨwe sɨ nà felɨ̀-à, mɨtì à na ghɨ a mɨchi nsòmbo yi yvɨ̀tɨ̀ bòm ta à n-ghɨ àchi sɨ a nyɨŋ yi kelɨ sɨ yvɨ̀ŋtɨ̀ sɨ koʼsɨ Bôbo Fɨyini. Yi n-kelɨ wi sɨ nà fêl iwo achi nâ ghàyn nô mɨ wo ta yi n-ghɨ bòm ta à n-ghɨ àchi ɨtuʼ ilaʼ nɨ̀ Bôbo Fɨyini.”

Ayɨ Iyaʼsɨ

⁴“Ɨmêyn nɨn ghɨ mɨ̀chi mɨ̀ àyɨ iyaʼsɨ mzɨ̀ a Bôbo Fɨyini lèm, mɨ layna. Nô mɨ àchi ateyn à kà na gvî kfeyna, yi yvɨ̀ŋtɨ̀ ɨ yɨ ayɨ ɨ koʼsɨ ŋweyn. ⁵Achi ayɨ iyaʼsɨ nɨ̀n Bôbo Fɨyini nɨn zɨ̂tɨ̀ aleŋ ɨlvɨ ikfa a mɨchi njvàsɨ̀ kæ̀ a njoŋ ɨyî àsɨ a bêŋ. ⁶À na ghɨ a mɨchi njvàsɨ̀ tâyn, ghɨ zɨ̀tɨ̀ sɨ yɨ ayɨ kì a ghɨ n-yɨ abayn bula fɨ̀shɨ̀k ateyn, ɨ yɨ sɨ a mɨchi nsòmbo. ⁷À na ghɨ achi akɨ asɨ-a a mɨchi nâ ghàyn ka wùl nɨ̂n fèl ìwo antêynɨ̀ àwo ghè a wù lum fèlɨ̀, yi kwo yvɨ̀ŋtɨ̀ ɨ koʼsɨ mà achi nâ ghàyn. ⁸À na ghɨ antêynɨ̀ mɨ̀chi nâ ghàyn nsòmbo, yi fu ìfu ghɨ nyôʼ nyoʼ sɨ̂ Bôbo Fɨyini. À na ghɨ a mɨchi nsòmbo yi yvɨ̀ŋtɨ̀ ɨ koʼsɨ Bôbo. Ka wùl sɨ̂ zɨ̀ nɨ̂n fèl ìwo antêynɨ̀ àwo ghè a wù lum fêl.”

Mɨtam mɨ̀ àsɨ

⁹Bôbo nɨ̀n fɨ meyn bè sɨ̂ Mosìs na, ¹⁰“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Yi ndû zɨ ilaʼ ghè a mɨ n-fu sɨ̂ zɨ̀, ɨ̀ ghayn ɨ̀fwo sɨ a gvêynsɨ̀, yi gvì nɨ̀ mɨ̀tâm mɨ àsɨ sɨ̂ ngàŋ ndô Fɨyini. ¹¹Ghɨ gvî nɨ̀ ɨ̀mêyn, achi ɨtuʼ ilaʼ chwô, ɨtuʼ layn ngàŋ ndô Fɨyini ɨ làysɨ koʼsɨ nɨ̀ ɨ̀mêyn iyvɨ sɨ ifu sɨ̂ Bôbo Fɨyini ta ka Bôbo fsɨ ifu ateyn. ¹²À na ghɨ achi ghè a ghɨ n-fu ifu nâ yèynì ateyn, yi fu kɨmɨ wâyn àyaʼ wu ghɨ kɨ bèŋ ìmòʼ kelɨ wi nseʼi sɨ ifu i nyoʼnɨ-i sɨ̂ Bôbo Fɨyini. ¹³Yi se sɨ fu, yi baʼsɨ ìfûʼ i ɨnkfɨ̀ŋ ma ghɨ gva meyn mɨ̀ faytɨ kfɨ, ɨ̀ fyes mɨvɨl ateyn sɨ ifu ghɨ nyôʼ nyoʼ, yi lɨ̂mtɨ̀ fom sɨ̂ Bôbo Fɨyini, ɨ baʼsɨ nsàl mɨ̀lùʼ itelâ. ¹⁴Ka yi n-yɨ afo antêynɨ̀ ɨ̀fwo ɨ yɨnɨ nâ ghàyn kèsa abayn, kèsa isaŋ ikaŋnɨ i, kèsa isaŋ ifɨ-i nô sɨ chem ta ka yì fu ifu mɨtam mɨ̀ àsɨ sɨ̂ Fɨyini fɨ. Nô mɨ àjâŋ à kà læ̀ nà koʼa kɨ nà nî kɨ tèyn nô mɨ wo ta yi n-ghɨ.’”

Ayɨ ɨlvɨ ta ghɨ kfì ɨfwo ɨ yɨnɨ

¹⁵“Achi ɨtuʼ ilaʼ chwô, ɨtuʼ layn, ngàŋ ndô Fɨyini lâysɨ̀ kòʼsɨ mɨ̀tam mɨ̀ àsɨ mzɨ̀ a yì gvì nɨ̀ ɨ̀mêyn sɨ ifu, yi taŋ tɨwe nsòmbo zɨ̂tɨ̀ kɨ achi nâ ghè a wù làysɨ̀ ateyn. ¹⁶À na ghɨ ibàm i mɨchi mɨ̀vɨm ɨ̀n tâyn a yì fî gvì nɨ̀ ìfu i mɨ̂tam mɨ̀ àsɨ ɨ̀n lì sɨ̂ Bôbo Fɨyini. ¹⁷Nô mɨ ìsas i ndo ì kà nɨn kelɨ sɨ gvi nɨ̀ tɨ̀ghef tɨ abayn tɨ̀ bò ma ghɨ lì ìfûʼ i ɨnkfɨ̀ŋ ɨ̀ gwòtɨ̀ ɨlwêʼ ìvɨm ɨ̀ lì ɨlwêʼ ɨ̀ bwò lam ateyn ɨ̀ we fɨ̀shɨ̀k ɨ̀ làysɨ̀ kòʼsɨ iyvɨ sɨ̂ Bôbo Fɨyini sɨ ifu i mɨtam mɨ̀ àsɨ. ¹⁸Yi se sɨ fu mɨtam mɨ̀ àsɨ nâ mèyn, yi fu baʼsɨ nɨ̀ woyn njɨ̀sɨ̀ ghɨ lûmnɨ̀ nsòmbo nô mɨ wâyn njɨ̀ ɨ̀ kfà ɨ ghɨ kɨ bèŋ kelɨ wi nseʼi. Ghɨ n-gvi kɨmɨ nɨ̀ wâyn nyàm mbòloʼ ɨ lûmnɨ̀, baʼsɨ̂ nɨ̀ ɨ̀ywaʼ ɨ̀ bwò. Ɨfwo nâ wèyn baʼsɨ̂ nɨ̀ ìfu ɨfwo ɨ yɨnɨ, nɨ̀ ìfu ɨfwo ɨ nyvɨnɨ nɨ̀ ìfu i ta ghɨ nyòʼ nɨn ghɨ ìfu i nyoʼnɨ-i sɨ̂ Bôbo Fɨyini, lɨ̂mtɨ̀ fom sɨ̂ ŋweyn. ¹⁹Àŋena nɨn kelɨ kɨmɨ sɨ sɨ ayaʼ sɨ ifu ɨlvɨ ta wùl ɨ̀ nì mbɨ baʼsɨ̂ nɨ̀ woyn njɨ̀sɨ̀ ghɨ̀ bò nô mɨ ɨ̀ kfà ɨ ghɨ bèŋ ìmòʼ sɨ ifu sɨ nà chi nɨ̀ mbôynɨ̀. ²⁰Ghɨ gvî nɨ̀ woyn njɨ̀ nâ ghì, ngàŋ ndô Fɨyini ɨ làysɨ ɨ koʼsɨ nɨ̀ woyn ateyn iyvɨ sɨ ifu sɨ̂ Bôbo Fɨyini baʼsɨ̂ nɨ̀ àbayn a mɨtam mɨ̀ àsɨ a. Tɨfu nâ tèyntɨ̀ nɨn ghɨ tɨ̀fu sɨ a nyɨŋ sɨ̂ Bôbo Fɨyini, a kelɨ ngàŋ ndô Fɨyini. ²¹À na ghɨ achi nâ ghàyn a wà jaŋ ghelɨ a ghɨ yvɨŋtɨ ɨ̀ koʼsɨ mà, wùl ɨ ghɨ wi sɨ fèl iwo antêynɨ̀ àwo ghè a wù lum fèlɨ̀. À na koʼ nô mɨ àjâŋ à kà kɨ nà nî kɨ tèyn nô mɨ wo ta kɨ n-ghɨ.”

²²“Yì na se sɨ ghayn ɨfwo ɨ yɨnɨ a yi a gvêynsɨ̀, ka yì na ghayn ndû mesì a tɨ̂ghàmi, ka yi n-sàyntɨ ɨvzɨ̂ a ghɨ tî nà chwôsɨ̀-à. Yì na visî sɨ̂ ghelɨ ànfɨf baʼsɨ̂ nɨ̀ ghelɨ ɨtum. À n-ghɨ mà Bôbo Fɨyini ɨ Fɨyini fifɨ.”

Ayɨ ɨchfɨ bêŋ

²³Bôbo Fɨyini nɨn fi meyn bè sɨ̂ Mosìs na, ²⁴“Bè sɨ̂ ghelɨ Isìlæ̀ na à na ghɨ nô mɨ achi a kɨ asɨ-a à kà a njoŋsɨ nsòmbo a nà ghɨ àchi ɨtuʼ ilaʼ sɨ a nyɨŋ àŋena kelɨ sɨ yvɨ̀tɨ̀, wùl ɨ kelɨ wi sɨ fèl iwo. Ngàŋsɨ ndô Fɨyinisɨ toŋ ìsoŋ nô sɨ a ŋaŋ, nô zɨ ghɨ̀ jɨ̀m ɨ yvɨ̀ŋtɨ̀ ɨ koʼsɨ Bôbo Fɨyini. ²⁵Ka wùl nɨn fèl ìwo antêynɨ̀ àwo ghè a wù lum fèlɨ̀, mɨtì ghɨ gvi nɨ̀ ìfu i ɨfwo ɨ yɨnɨ sɨ̂ Bôbo Fɨyini ghɨ nyôʼ nyoʼ.”

Achi kì a ghɨ n-chyeʼsɨ mbɨsɨ ghêl ateyn

²⁶Bôbo Fɨyini nɨ̀n be meyn kɨmɨ sɨ̂ Mosìs na, ²⁷“Mɨ̀chi ìvɨm a njoŋsɨ nsòmbo nɨn ghɨ àchi kì a ghɨ n-fu ifu ateyn sɨ a nchwæ na Fɨyini fɨ chyeʼsɨ meyn mbɨsɨ ghêl. À na ghɨ achi nâ ghàyn àŋena yvɨ̀ŋtɨ̀-à, bam ɨchfɨ̂ koʼsɨ̂ Fɨyini, fu ìfu ghɨ nyôʼ nyoʼ sɨ̂ Bôbo Fɨyini. ²⁸Ka wùl sɨ̂ zɨ̀ nɨ̂n fèl ìwo achi nâ ghàyn bòm ta à n-ghɨ àchi kì a ghɨ n-fu ifu ateyn sɨ a nchwæ na Fɨyini fifɨ lesɨ meyn fù mbɨ sisɨ. ²⁹À kæ faŋ mɨ ndà a yi antêynɨ̀ tɨ̀ bam ɨchfɨ̂ achi nâ ghè, a ghɨ na kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Fɨyini. ³⁰Wùl a yi antêynɨ̀ kæ fèl iwo achi nâ ghàyn, a Bôbo Fɨyini fvɨsɨ ŋweyn sɨ antêynɨ̀ nɨ̀ ghelɨ ŋweyn. ³¹Ka wùl nɨn læ̀ fèl ìwo achi nâ ghàyn nô sakos. Isaʼ nâ yeyn i faŋ meyn kɨ̀ samoʼ sɨ̂ zɨ̀ nô mɨ nɨ̀ àjâŋ à kà kî a kɨ n-læ̀ koʼ ibàm nô mɨ wo ta yi n-ghɨ. ³²Achi nâ kèyna nɨn ghɨ àchi ɨtuʼ ilaʼ, yi kelɨ sɨ yvɨ̀tɨ̀, sɨ bam ɨchfɨ̂ nô ghɨ̀ jɨ̀m. Achi ateyn a na zɨ̂tɨ̀ aleŋ ɨlvɨ ikfa a mɨchi bulamòʼ a njoŋsɨ nsòmbo sɨ ndù sɨ chem kɨmɨ aleŋ ɨlvɨ ikfa a mɨchi ìvɨ̀m.”

Ayɨ ibàʼlɨ̀ i mɨ̂twò

³³Bôbo Fɨyini nɨn bê meyn sɨ̂ Mosìs na, ³⁴“Bè sɨ̂ ghelɨ Isìlæ̀ na, ‘À na ghɨ a mɨchi njvàsɨ̀ tâyn a njoŋsɨ nsòmbo, àŋena zɨ̀tɨ̀ sɨ yɨ ayɨ ibàʼlɨ̀ i mɨ̂twò sɨ koʼsɨ Bôbo sɨ a mɨchi nsòmbo. ³⁵Achi a kɨ asɨ-a a mɨchi nâ ghàyn nsòmbo nɨn ghɨ àchi sɨ a nyɨŋ yi kelɨ sɨ yvɨ̀ŋtɨ̀ sɨ koʼsɨ Bôbo. Ka wùl nɨ̂n fèl ìwo antêynɨ̀ àwo ghè a wù lum fèlɨ̀. ³⁶À na ghɨ nô mɨ achi à kà antêynɨ̀ mɨ̀chi nâ ghàyn nsòmbo, yi gvî nɨ̀ ìfu i ghɨ nyôʼ nyoʼ sɨ̂ Bôbo Fɨyini. À na ghɨ a mɨchi nfama yi fi yvɨ̀ŋtɨ̀ ɨ koʼsɨ̂ Bôbo Fɨyini ɨ fu ifu ghɨ nyôʼ nyoʼ sɨ̂ ŋweyn. Ka wùl nɨ̂n fèl ìwo antêynɨ̀ àwo ghè a wù lum fèl achi nâ ghàyn.’”

³⁷“À ti mɨchi mɨ̀ àyɨ nɨ̀ Bôbo Fɨyini mzɨ̀ a wù lèm, a ghɨ mɨ̀chi sɨ a nyɨŋ na yì na yɨ-a, yvɨ̂ŋtɨ̀-à, koʼsɨ̂ ŋweyn nɨ̀ tɨ̀fu tɨ ghɨ nyôʼ nyoʼ, ɨ tɨfu tɨ nyoʼnɨtɨ nɨ̀ tɨ̀fu tɨ ɨfwo ɨ yɨnɨtɨ nɨ̀ tɨ̀fu tɨ sɨ nà chi nɨ̀ mbôynɨ̀ baʼsɨ̂ nɨ̀ tɨ̀fu tɨ nyvɨnɨtɨ, kɨ̀ achi nɨ̀ àchi a kɨ̀ ta isaʼi nɨn dyêyn. ³⁸Tɨfu nâ tèyntɨ̀ nɨ̀ ɨ tîtɨ̀ a yì chòʼnɨ sɨ fu, kɨ̀mɨ nɨ ɨ tîtɨ̀ a yi n-fu sɨ luysɨ ichfɨ̂nɨ̀, baʼsɨ̂ nô mɨ nɨ̀ ìfu ì kà ta yi n-kôŋ sɨ fu sɨ̂ Bôbo Fɨyini nɨn baʼsɨ̂ bàʼsɨ sɨ̂ tɨ̀fu tìtì a yi n-fu achi ɨtuʼ ilaʼ nɨ̀ Bôbo.”

³⁹“Yi ti n-dyêyn na yì na ghayn mèsì ɨ̀fwo ɨ yɨnɨ sɨ a gvêynsɨ̀, yi zɨ̀tɨ̀ àyɨ sɨ koʼsɨ Bôbo Fɨyini a mɨchi njvàsɨ̀ tâyn a njoŋsɨ nsòmbo. Achi a kɨ asɨ-a nɨ̀ mɨ̀chi nfama antêynɨ̀ mɨ̀chi nâ ghàyn nɨn ghɨ mɨ̀chi ɨ̀n yvɨ̀tɨnɨ̂. ⁴⁰À na ghɨ achi a kɨ asɨ-a yi kœ̀ nô mɨ̀tam ɨ̀n jùŋ ɨtu ɨnkàʼ nɨ̀ zɨ̀, ɨ teyntɨ ɨ̀ywaŋ, ɨ kòytɨ̀ tɨ̀fyas tɨ ɨnkàʼ tîtɨ̀ a tɨ n-kelɨ tɨfvɨ nɨ̀ àfûʼ a li-a kɨ lemâ a mbæ̀ jvà ɨ nà dyala asɨ nɨ̀ Bôbo Fɨyini ɨ Fɨyini fifɨ sɨ a mɨchi nâ ghàyn nsòmbo. ⁴¹Yi na yɨ àyɨ nâ kèynà koʼsɨ̂ Bôbo Fɨyini sɨ a mɨchi nsòmbo kɨ bèŋ sɨ̀ jɨ̀m. Isaʼ nâ yèyn i faŋ meyn kɨ̀ samoʼ sɨ̂ zɨ̀ nô mɨ nɨ̀ àjâŋ à ka ta kɨ læ̀ koʼ ibàm. ⁴²À na ghɨ a mɨchi nâ ghàyn yi nà chî kɨ a mɨ̂twò. Ghelɨ Isìlæ̀ nô ghɨ̀ jɨ̀m nɨn kelɨ sɨ nà chi kɨ a mɨ̀two antêynɨ̀ mɨ̀chi nâ ghàyn nsòmbo. ⁴³Yì na nî tèyn ta ka wôyn ghi læ̂ kèli na mɨ n-læ meyn nì zɨ̀ ghelɨ Isìlæ̀ ɨ chi a mɨ̂twò ta mɨ n-læ fvɨ̀sɨ zɨ sɨ a Ijìb. À n-ghɨ mà Bôbo Fɨyini ɨ Fɨyini fifɨ.”

⁴⁴À ti ta Mosìs nɨn læ fèʼtɨ mɨchi mɨ̀ àyɨ mzɨ̀ a Bôbo lèm na ghelɨ Isìlæ̀ na yɨ-a koʼsɨ̂ ŋweyn ateyn kɨ bèŋ sɨ̀ jɨ̀m.