Leviticus 21

Tɨsaʼ sɨ̂ Ngàŋsɨ Ndô Fɨyinisɨ̀

¹Bôbo Fɨyini nɨ̀n bê meyn sɨ̂ Mosìs na, “Taŋi sɨ̂ woyn Alòyn ɨ ngàŋsɨ ndô Fɨyini ɨ bè sɨ̂ àŋena na, ka ngàŋ ndô Fɨyini na kùm ìgvɨyn i wûl bu tì a yi ni a wù na bu layn wi ta isaʼi nɨn dyêyn. ²Ngàŋ ndô Fɨyini kàʼ a yì kum kɨ igvɨyn i wûl ɨlvɨ ta à n-ghɨ wul ɨ̀ ŋweyn, ɨ wul ta bò ŋweyn nɨ̀ nà ŋweyn, nɨ̀ wâyn ŋweyn ɨ lûmnɨ̀ nɨ̀ ɨwi, kɨmɨ nɨ̀ wâynà ŋweyn ɨ lûmnɨ̀. ³Wù kàʼ a wù kum kɨ̀mɨ ìgvɨyn i jêmtɨ̀ ŋweyn ta wù tî nà tôʼnɨ̀ nɨ̀ ŋweyn wù kfɨ bula wù mala. Wù kàʼ a wù na layn wi kɨ̀ nô bòm jêmtɨ̀ ŋweyn nâ yèyn. ⁴Ka ngàŋ ndô Fɨyini nɨn læ̀ kùm ìgvɨyn i wûl ma wù màla wul ìsas i ndo nɨ̀ wî ŋweyn kèsa ma wù màla isas i ndo nɨ̀ àŋena ɨ̀ bèbsɨ ngêŋ ŋweyn nà layn wi ta isaʼi nɨn dyêyn.”

⁵“Ka ngàŋsɨ ndô Fɨyini sɨ̀ na lotɨ̂ ɨ̀tu àŋena kèsa fâf teyntɨ̂ nyuŋsɨ idyèl, kèsa chwayn ɨ̀wuyn àŋena sɨ dyèyn na àŋena nɨn dzɨ̂ ìkfɨ. ⁶Àŋena nɨn kelɨ sɨ nà layna asɨ nɨ̀ Fɨyini fɨ̀, kelɨ wi sɨ nà wumsɨ̂ izɨyn i Fɨyini fɨ àŋena. À n-fu àŋena tɨfu tɨ ɨfwo ɨ yɨnɨ tìtɨ̀ a ghɨ n-nyôʼ nyoʼ sɨ̂ Bôbo Fɨyini, kelɨ sɨ nà layna.”

⁷“Ka ngàŋ ndô Fɨyini nɨn læ̀ màla wul ɨ wi ɨ̀ jelɨnɨ, kèsa wul ɨ wi ma wù lèʼ lum, bom ta ngàŋ ndô Fɨyini nɨn kelɨ sɨ nà layna asɨ nɨ̀ Fɨyini fɨ. ⁸Yì na kya na ngàŋsɨ ndô Fɨyini sɨ̀ nɨn layna bòm ta à n-fu àŋena tɨfu tɨ ɨfwo ɨ yɨnɨ sɨ̂ Fɨyini fifɨ. Àŋena nɨn layna bòm ta mɨ n-layna, a nî mà Bôbo Fɨyini na yì na layna.”

⁹“Wâyn ngàŋ ndô Fɨyini kæ bebsɨ ngêŋ ŋweyn, ɨ̀ kasi sɨ a àkfàlà a ndo fɨyini a ghɨ ìkoʼsɨ sɨ̂ mɨyini, a à na ghɨ ìwumi sɨ̂ bò ŋweyn, ghɨ kelɨ sɨ nyoʼ wayn àteyn.”

¹⁰“Ngàŋ ndô Fɨyini ì ngaŋtɨnɨ zɨ̀ a ghɨ choʼ antêynɨ̀ nɨ̀ woynà ŋweyn ɨ̀ sfɨ̀s mɨ̀vɨl mzɨ̀ a ghɨ n-yisi ngàŋsɨ ndô Fɨyini ateyn a ŋweyn atu ɨ̀ lèm ŋweyn sɨ a nyɨŋ na wù na mâʼ ndzɨsɨ ngàŋ ndô Fɨyini ì ngaŋtɨnɨ, nɨn kelɨ wi sɨ nà visi atu a ŋweyn nɨ̀ ì lɨŋi kèsa sɨ bàytɨ ndzɨsɨ ŋweyn sɨ dyèyn na wù n-dzɨ̂ ìkfɨ. ¹¹Wù n-kelɨ wi sɨ zɨ alèʼ wul ɨ̀ kfɨnɨ ɨ nyɨŋ ateyn, kelɨ wi sɨ kùm igvɨyn i wûl kèsa à n-ghɨ ìgvɨyn i nà ŋweyn ma i yi bò ŋweyn a. Wù kæ kùm a wù na bu layn wi ta isaʼi nɨn dyêyn. ¹²Wù n-kelɨ wi sɨ fvɨ̀ sɨ visi alêʼ a layna nɨ̀ Fɨyini fɨ ŋweynfɨ sɨ ndù alèʼ ikfɨ, kelɨ wi sɨ bebsɨ alêʼ ateyn na kɨ na bu layn wi bòm ta ghɨ yìsi meyn ŋweyn nɨ̀ mɨ̀vɨ̂l mzɨ̀ a ghɨ n-yisi ngàŋsɨ ndô Fɨyini ateyn lêm sɨ a nyɨŋ. À n-ghɨ mà Bôbo Fɨyini.”

¹³“Ngàŋ ndô Fɨyini ì ngaŋtɨnɨ nɨn kelɨ sɨ mala kɨ wul ɨ wi wu bu duʼ tɨ nà kya wul ɨ̀ lûmnɨ̀. ¹⁴Wù n-kelɨ wi sɨ mala wî nkfɨ, kelɨ wi sɨ mala wul ɨ wi ma wù lèʼ lum, kèsa wul ɨ wi wu jêl àkfàlà sɨ a ikoʼsɨ sɨ̂ mɨyini. Ngàŋ ndô Fɨyini ì ngaŋtɨnɨ nɨn kelɨ kɨ sɨ mala wul ɨ wi ilaʼ nɨ̀ ŋweyn wu bu duʼ tɨ̀ nà kya wul ɨ̀ lûmnɨ̀. ¹⁵Wù kæ mala, a woyn ŋweyn læ̂ nà layn kfeynɨ̂ wì antêynɨ̀ nɨ̀ ghelɨ Isìlæ̀. À n-ghɨ mà Bôbo Fɨyini a nî mà na wù na layna.”

¹⁶Bôbo Fɨyini nɨn bê meyn kɨmɨ sɨ̂ Mosìs na, ¹⁷“Bè sɨ̂ Alòyn na, ‘Ka wùl wayn nɨ̀ ŋweyn nô mɨ ajàŋ à kà nɨ̂n læ̀ fu ifu ɨfwo ɨ yɨnɨ sɨ̂ mà ma wu lvɨŋ meyn. ¹⁸Ka wùl nɨn læ̀ gvì bàʼsɨ sɨ fu ifu sɨ̂ mà kelɨ nseʼi a ŋweyn ɨwùyn, kèsa à n-ghɨ ànfèf a kèsa à n-ghɨ fɨ̀ngês a, kèsa wù lvɨŋ nô mɨ a dzɨ ì kà a. ¹⁹Ka wùl nɨn læ̀ gvì bàʼsɨ alèʼ ifu kelɨ àkfɨ̂m ɨkœ kèsa akfɨ̂m avɨ̀, ²⁰kèsa wù n-kelɨ àtuŋ a jɨm kèsa à n-ghɨ wul ta wù tɨ̀msɨ chwòsɨ̀ a, kèsa wù n-kelɨ ngeʼ isɨ a, kèsa wù n-kelɨ nkàysɨ̀ ɨwùyn a, kèsa a n-ghɨ àdzɨ̀, kèsa fyeŋsɨ ajì nɨ̀ ŋweynsɨ nɨn kelɨ ngeʼ a. ²¹Ka wâyn Alòyn ɨ ngàŋ ndô Fɨyini i ngaŋtɨnɨ nô ɨ̀mòʼ nɨn læ̀ gvì bàʼsɨ sɨ fu ifu zɨ̀ a ghɨ nyôʼ nyoʼ sɨ̂ Bôbo Fɨyini kelɨ nseʼi a ŋweyn ɨwùyn. Wù na kelɨ nseʼi, ka wu n-læ̀ mòm sɨ fu ifu ɨfwo ɨ yɨnɨ sɨ̂ Fɨyini fɨ ŋweyn fɨ. ²²Wù kàʼ a wù yɨ ɨfwo ɨ yɨnɨ ɨ laynɨ nɨ̀ Fɨyini fɨ ŋweyn fɨ, ɨ̀ yɨ kɨ̀mɨ ɨvzɨ̂ a wu layn gòʼsɨ̀. ²³Mɨtì ma wù kàʼ wu bû ndù bàʼsɨ a ngùŋ àbàs a ndzɨsɨ ghè a kɨ n-gwôsɨ̀ alêʼ a laynɨ-a nɨ̀ alêʼ kì a kɨ layn kfèynɨ, kèsa sɨ baʼsɨ a ngùŋ àbaŋ ifu nɨ̀ mà bòm nseʼi zɨ̀ a wù n-kelɨ a ŋweyn ɨwùyn. Wù gvì baʼsɨ̂ a wù bebsɨ alêʼ a laynɨ-a nɨ̀ mà. À n-ghɨ mà Bôbo Fɨyini vzɨ̀ a mɨ nî na ɨlwêʼ nâ vzɨ̀ na layna.’”

²⁴Bôbo Fɨyini nɨn taŋi tî, Mosìs ɨ fèʼtɨ̀ àwo ateyn sɨ̂ Alòyn ŋêyn woyn ŋweyn baʼsɨ̂ nɨ̀ ghelɨ Isìlæ̀ nô ghɨ̀ jɨ̀m.