Leviticus 1

Ifu i nyoʼnɨ-i

¹Bôbo Fɨyini nɨ̀n læ meyn taŋi fvɨ̀sɨ sɨ̂ Mosìs a fɨndo ghè a wù nà n-ghɨ ateyn, ɨ bè na, ²“Bè sɨ̂ ghelɨ Isìlæ̀ na wùl na se sɨ gvi nɨ̀ nyàm sɨ fu ifu ateyn sɨ̂ Bôbo Fɨyini, wu gvì nɨ̀ nyàm mbòloʼ, kèsa bzɨ ma wù fvɨ̀sɨ̀ anòyn a nyâmsɨ̀ nɨ̀ ŋweyn. ³Ifu i kæ nà ghɨ ìfu i nyoʼnɨ-i, ma wù chòʼ antêynɨ̀ nyamsɨ mbòloʼ, a nà ghɨ nyâm mbòloʼ i lûmnɨ̀ yi kelɨ wi nseʼi. Wù choʼ, wu lì ɨ ndù nɨ̀ nyeyn ɨchfɨ fɨndo nɨ̀ Bôbo Fɨyini ta ka Bôbo fsɨ ŋweyn. ⁴Wùl vzɨ̀ a wù n-fu ifu ateyn nɨn kelɨ sɨ lem awu a ŋweyn atû nyàm nâ ghè ta ka Bôbo Fɨyini bɨmi ifu ateyn ɨ̀ lèsɨ̀ fù mbɨsɨ ŋweyn. ⁵Wù lêm tì, wu sɨ nyam àteyn asɨ nɨ̀ Bôbo Fɨyini, ngàŋsɨ ndô Fɨyinisɨ̀ ma à ti woyn Alòyn li mɨluŋ mɨ̀ àteyn ɨ̀ mɨ̀sì ɨwùyn abaŋ ifu ghè a kɨ n-ghɨ ɨchfɨ fɨndo nɨ̀ Bôbo kɨ̀ ɨbyâs ɨ̀ jɨ̀m. ⁶Ngàŋsɨ ndô Fɨyinisɨ nî mèsì, wùl ɨ̀ vzɨ̀ a wù n-fu ifu ateyn i ɨ yvɨ̀ nyam àteyn, ɨ kaʼtɨ kɨ a tɨ̂kàʼ a tɨ̂kàʼ. ⁷Wù kaʼtɨ, woyn Alòyn ma à ti ngàŋsɨ ndô Fɨyini ɨ lèm ɨ̀nkâʼ atû àbaŋ ifu, ɨ kwò ɨ̀vɨs. ⁸Àŋena kwô ɨ̀nkâʼ mɨ̀ àteyn abaŋ nâ ghè, mɨ̀ se sɨ bali, ghɨ lì tɨ̀kaʼ tɨ nyâm nâ tìtɨ̀ baʼsɨ̂ nɨ̀ àtu ateyn a nɨ̀ ìso ateyn i ɨ baʼtɨ atû àteyn. ⁹Ghɨ nî, wùl àteyn sù mɨ̀tu mɨ̀ àteyn baʼsɨ̂ nɨ̀ àfyeyn a, ngàŋ ndô Fɨyini chɨyntɨ nyòʼ atû àbaŋ ifu bòm ta à n-ghɨ ìfu i nyoʼnɨ-i, lɨ̂mtɨ̀ fom sɨ̂ Bôbo Fɨyini.

¹⁰“Ifu i kæ nà ghɨ ìfu i nyoʼnɨ-i, ma wùl chòʼ anòyn a bzɨsɨ nɨ̀ ŋweyn kèsa à n-ghɨ bzɨ njɨ̀ ma bzɨ ndoŋ a, a nà ghɨ ìfef kèsa ayaʼ, kelɨ wi nseʼi. ¹¹Wù gvî nɨ̀ nyeyn, wu sɨ asɨ nɨ̀ Bôbo Fɨyini atû àbaŋ ifu dzɨ abàs ikuè. Wù sɨ, ngàŋsɨ ndô Fɨyini ma à ti woyn Alòyn ɨ lì mɨ̀luŋ mɨ̀ àteyn ɨ mɨ̀sì ɨwùyn abaŋ ifu kɨ̀ ɨbyâs ɨ̀ jɨ̀m. ¹²Ngàŋsɨ ndô Fɨyinisɨ nî mèsì, wùl ɨ̀ vzɨ̀ a wù n-fu ifu ateyn i ɨ kaʼtɨ nyam àteyn kɨ̀ a tɨ̂kàʼ a tɨ̂kàʼ, ngàŋ ndô Fɨyini baʼtɨ tɨ̀kaʼ tɨ ateyn nɨ̀ àtu ateyn a, baʼsɨ̂ nɨ̀ ìso ateyn i atû ɨ̀nkàʼ ghê a mɨ̀ n-bali atû àbaŋ ifu nâ ghè. ¹³Ghɨ baʼtɨ, wu sù ɨ̀fwo ɨlvà, baʼsɨ̂ nɨ̀ àfyeyn ateyn a, ngàŋ ndô Fɨyini chɨyntɨ nyòʼ atû àbaŋ ifu bòm ta à n-ghɨ ìfu i nyoʼnɨ-i, lɨ̂mtɨ̀ fom sɨ̂ Bôbo Fɨyini.

¹⁴“Wùl ɨ̀ kæ nà fu ìfu i nyoʼnɨ-i sɨ̂ Bôbo Fɨyini a ghɨ fɨ̀nyuyn, a nà ghɨ àlàlàtoto kèsa fɨ̀nlàynɨ̀. ¹⁵Wù gvî nɨ̀ ɨ̀nfeynfɨ, ngàŋ ndô Fɨyini ɨ li ndù nɨ̀ ɨ̀nfeynfɨ atû àbaŋ ifu, ɨ fyeʼ teyn ɨtoŋ ateyn ɨ nyòʼ, ɨ chemsɨ mɨ̀luŋ mɨ̀ àteyn ɨwùyn abaŋ ifu nâ ghè. ¹⁶Wù nyôʼ, wu choʼ isêʼ i fɨ̂nyùyn nâ fìfɨ̀ baʼsɨ̂ nɨ̀ tɨ̀vɨ̂ltɨ̀ ɨ ndu màʼ alèʼ ghè a ghɨ sfɨ̀s abvɨ ichɨ ateyn a ngùŋ àbaŋ ifu abàs ghè a ɨchfɨ-iyvɨ i nɨn sal ateyn. ¹⁷Wù choʼ ìsêʼ ateyn, wu ghal fɨnyuyn fɨ ateyn a tɨ̂wò ɨ bàs. Wù bâs, ka wu n-gwòsɨ̀, ɨ lèm atû ɨ̀nkàʼ ghè a mɨ̀ n-ghɨ atû àbaŋ ifu tì. À n-ghɨ ìfu i nyoʼnɨ-i, lɨ̂mtɨ̀ fom sɨ̂ Bôbo Fɨyini.”