Judges 8

Gidìyòn ɨ zue Zebà ŋêyn Zalmunà

¹Ghelɨ Eflèm ɨ gvi yeyn Gidìyòn ɨ bɨf sɨ̂ ŋweyn na, “Wà mòm ghà sɨ̂ ghès têyn a? Bòm ghà ta wà tî faŋ tɨ̀ jaŋ ghes na ghesɨ̀na ndu nù ghelɨ Midìyàn amoʼ a?” Àŋena nɨ̀n yolɨ meyn sɨ̂ ŋweyn nô sɨ a ŋaŋ.

²Mɨtì Gidìyòn ɨ bè sɨ̂ àŋena na, “Iwo zɨ̀ a mà nì nɨn koʼ kfeyn wi izɨ-ì a yì nì nô sakos. Zɨ̀ ghelɨ Eflèm tî sàyntɨ mɨ sayntɨ mɨtì ɨ̀ kfa nɨ̀ ɨ̀fwo ɨ yɨnɨ wu chwô ɨvzɨ̂ a ghèsɨ̀ ghelɨ Abìyezà tî kfì kfi. ³Fɨyini fɨ ti meyn fu tɨfôyn tɨ Midìyàn tèyntɨ̀ sɨ̂ zɨ̀, ma à ti Olèb ŋêyn Zîb. Iwo zɨ̀ a mà tî nì nɨn koʼ kfeyn wi izɨ-ì a yì nì.” Wu n-tàŋi tî, àŋena nà bù nyòʼsɨ̀ wì ɨtoŋ sɨ̂ ŋweyn sɨ a ŋaŋ.

⁴Gidìyòn ŋêyn sugèyʼsɨ ŋweyn sìsɨ̀ ighɨ ì tal ɨ dyàŋ jvâ Jodàn ma ghɨ bolɨ meyn, mɨtì nà bu nyɨŋ kɨ nyɨŋ ibàm nɨ̀ ghelɨ Midìyàn. ⁵Àŋena ndu chem a ntèʼ Sukòt, Gidìyòn ɨ bè sɨ̂ ghelɨ Sukòt na, “Yì fu afo sugèyʼ semsɨ yɨ. Àŋena bol meyn nô sɨ a ŋaŋ, mɨtì ma bu nyɨŋ kɨ ibàm nɨ̀ tɨ̀fôyntɨ Midìyàn tèyntɨ̀ tɨ̀ bò, ɨ Zebà ŋêyn Zalmunà.”

⁶Mɨtì ghelɨ ghɨ tisɨnɨ a Sukòt ɨ bè sɨ̂ Gidìyòn na, “Yì bu duʼ tɨ̀ tɨm tɨ̀ yɨ Zebà ŋêyn Zalmunà nà bɨf ɨ̀fwo ɨ yɨnɨ sɨ̂ ghès bòm ghà?”

⁷Gidìyòn ɨ bè sɨ̂ àŋena na, “Yi be meyn nô ìwo i bzɨ-i. Visi kɨ visi, Bôbo nì gâmtɨ̀ mà, a mà tɨm yɨ̀ Zebà ŋêyn Zalmunà ɨ̀ kæ kɨŋ sùnjoŋ-njoŋsɨ nse ìyum nɨ̀ àlàmse-a sɨ leŋ sɨ sàytɨ zɨ ateyn.”

⁸Gidìyòn nɨ̀n læ meyn lù sɨ afu ɨ koʼ ndù a ntèʼ Benèl ɨ fi bɨf kɨmɨ ɨ̀fwo ɨ yɨnɨ sɨ̂ àŋena. Àŋena fi be kɨ iwo zɨ̀ a ghelɨ Sukòt nì bè tî. ⁹Wu boŋ bè sɨ̂ ghelɨ Benèl na, “Yì visi kɨ̀ visi, mɨ n-seʼ tɨm yɨ ìwoŋ ɨ̀ se sɨ kfa ɨ̀ bèbsɨ àbaŋ a nchì nɨ̀ zɨ̀ kêyn.”

¹⁰À nà n-ghɨ tì, Zebà ŋêyn Zalmunà ɨ ghɨ a ntèʼ Kalkò kelɨ sugèyʼsɨ̀ nkam njvasɨ̀ tâyn ma à mæ̀ kɨ ɨ̀nseynsɨ tî antêynɨ̀ nɨ̀ sugèyʼsɨ̀ ghê a sɨ n-læ lù abàs ghè a ɨchfɨ̂-iyvɨ nɨn sal ateyn. À nà n-ghɨ tì, ma ghɨ zuetɨ meyn sugèyʼsɨ àŋena nkam ɨvɨ nɨ̀ sugèyʼsɨ̀ nkamsɨ mɨ̀vɨm ɨ̀m bò. ¹¹Gidìyòn ɨ jel kɨ a dzɨ ghè a nchìsɨ nyâmsɨ nà n-chwô ateyn ɨ koʼ a ntèʼ Nobà nɨ̀ ntèʼ Jogbehà dzɨ abàs ghè a ɨchfɨ-iyvɨ nɨn sal ateyn, ɨ gvɨ̀tɨ fe kɨ fe a àŋena atu. ¹²Tɨfôyn tɨ Midìyàn tìtɨ̀ tɨ̀ bò, ɨ Zebà ŋêyn Zalmunà ɨ leʼ. Mɨtì Gidìyòn ɨ nyɨŋ ɨ ghaytɨ àŋena. Nô sugèyʼ àŋena ìmòʼ ɨ faŋ tɨ̀ leʼ.

¹³Iwoŋ i mæ̀, Gidìyòn ɨ wâyn Jòwâsh ɨ se sɨ kasi sɨ kfa ɨ chwò dzɨ a kfɨ̂yn Helès, ¹⁴ɨ ghal wayndà ɨ̀kùŋ ɨ̂lvì alèʼ nâ ghè ma wù lù a ntèʼ Sukòt ɨ be wu nyàʼ àzɨyn a chyeʼ sìsɨ a sɨ nà n-saʼ Sukòt. Wù n-læ nyàʼ azɨyn mɨ̀vɨ̂m nsòmbo njvàsɨ̀ nsòmbo ɨ fu sɨ̂ Gidìyòn. ¹⁵Gidìyòn ɨ ndù a Sukòt ɨ bè sɨ̂ chyeʼ nâ sìsɨ̀ na, “Mà tî gvì afêyn nɨ̀ sugèyʼ semsɨ ma sɨ bolɨ meyn, yi telɨ mà ɨ̀ bè na yi n-fu wi ɨfwo ɨ yɨnɨ sɨ̂ àŋena bòm ta mà bu duʼ tɨ̀ tɨm tɨ̀ yɨ Zebà ŋêyn Zalmunà. À n-ghɨ àŋena têyn.” ¹⁶Wu taŋi tì ɨ ghaytɨ ghelɨ ghɨ tisɨnɨ nâ ghì a ntèʼ Sukòt ɨ dyèyn ìwo sɨ̂ àŋena nɨ̀ sùnjoŋ-njoŋsɨ nse ìyumsɨ baʼsɨ̂ nɨ̀ àlàm nse-a. ¹⁷Wu n-læ meyn bebsɨ kɨmɨ àbaŋ a nchì kì a kɨ nà n-ghɨ a Benèl, ɨ zuetɨ ghɨ̀lûmnɨ̀ ghì a ghɨ nà n-ghɨ a ntèʼ afu.

¹⁸Wu n-zuètɨ tî ɨ kasi bɨf sɨ̂ Zebà ŋêyn Zalmunà na, “Yì tî zuètɨ ìnkì i ghêl ì kà a Tabò a?”

Àŋena bè na, “Ghelɨ ateyn tî nà kêʼ kɨ ta vâ. Nô mɨ ɨ̀kfà tî nà kêʼ kɨ ta wayn ntoʼ.”

¹⁹Gidìyòn ɨ bè na, “Ghelɨ nâ ghì tî nà ghɨ woynà ghem kɨ̀ nô ɨlvâ ɨ̀mòʼ. Bôbo nɨn kya samoʼ na yi nà n-faŋ tɨ̀ zuètɨ ghelɨ nâ ghì, mɨ n-bû zuètɨ zɨ̀.” ²⁰Wu n-bè tî, ɨ kasi be kɨ sɨ̂ Jetà ɨ wayn ɨlwema nɨ̀ ŋweyn na, “Zuetɨ àŋena!” Mɨtì Jetà ɨ faŋ tɨ̀ choʼ ifô i ŋweyn sɨ zuetɨ àŋena bòm ta wu nà n-bu ghɨ kɨ wayndà faynà.

²¹Zebà ŋêyn Zalmunà ɨ bè sɨ̂ Gidìyòn na wù zuetɨ àŋena kɨ̀ sɨ a ŋweyn a ngeŋ, na wù dyeyn ɨ lûmnɨ̀ ɨ ŋweyn, ɨ fi kùmtɨ̀ sɨ̂ ŋweyn na, “À kàʼ a ni kɨ̀ wul ɨ̀ lûmnɨ̀ nì ifêl i wùl ɨ lûmnɨ̀.” Gidìyòn ɨ làlì ɨ zue Zebà ŋêyn Zalmunà ɨ choʼtɨ ɨ̀fwo vzɨ̀ a ghɨ làbsɨ kàmêlsɨ àŋena nɨ̀ ɨ̀ŋweyn.

Gidìyòn ɨ faytɨ ànfèʼsɨ̀

²²À nà n-ghɨ ta Gidìyòn tɨm yɨ̀ ghelɨ Midìyàn, ghelɨ Isìlæ̀ ɨ bè sɨ̂ ŋweyn na, “Ghès nɨn kɨŋ na wà na tisɨ̂ ghès lvɨ̂yn, læ̀ kfɨ, wâyn vâ nɨ̀ wâyn wayn vâ na tisɨ̂ ghès bòm ìfsɨ yèynì a wà fsɨ̀ ghes sɨ awu nɨ̀ ghelɨ Midìyàn têyn.”

²³Mɨtì Gidìyòn ɨ bè sɨ̂ àŋena na, “Mɨ n-tisɨ̂ wì zɨ a wâyn wom læ̂ faŋ tɨ̀ tìsɨ zɨ̀. À na tisɨ̂ kɨ Bôbo Fɨyini tisɨ̂ zɨ̀.” ²⁴Wù n-fi meyn bè ɨ kfeynsɨ na, “Mɨ n-bɨf kɨ àfo àmòʼ sɨ̂ zɨ̀. Yì ndu antêynɨ̀ ɨ̀fwo ghè a yì tî ghàytɨ fsɨ ɨtwaʼ iwòŋ ɨ̀ kfa nɨ̀ ɨ̀ŋweyn. Nô mɨ ndà nɨn fu kɨ fɨ̀yèli fɨ̀ mòʼ sɨ̂ mà.” (Wu nà n-bê tì bòm ta ghelɨ Ishmèl ghì a àŋena nɨ̀n tɨm yɨ nà n-lum wê mɨ̀yèli mɨ̀ àso ɨkwo a baŋnɨ-a.)

²⁵Àŋena bè na, “Ngeʼ nɨn ghɨ wi.” Ghès nɨn fu mɨ̀yèli mɨ̀ àteyn sɨ̂ và. Ta àŋena bè tî, ɨ zɨ̀sɨ̀ ndzɨsɨ a nse nô mɨ ndà ɨ nà sɨ gvî nɨ̀ fɨ̀yèli fɨ̀ mòʼ antêynɨ̀ ɨ̀fwo ghè a wù tî kfa nɨ̀ ɨ̀ŋweyn ɨtwaʼ iwòŋ mâʼ ateyn. ²⁶Mɨ̀yèli mɨ̀ àso ɨkwo mzɨ̀ a àŋena nɨn læ chɨ̀yntɨ fu sɨ̂ Gidìyòn nà n-dɨlɨ̀ chem ndû kilùsɨ̀ mɨ̀vɨm ɨ̀m bò. Àŋena nɨn læ meyn fu kɨmɨ ɨfwo ɨlvi vzɨ̀ a ghɨ n-laf ateyn ɨ fi fu tɨfwo nɨ̀ ndzɨ sìsɨ̀ a tɨfôyn tɨ Midìyàntɨ̀ nà n-mâʼ sɨ bâŋ nyêm ndû ndu, baʼsɨ̂ nɨ̀ nchaʼ sìsɨ̀ a ghɨ nà n-we amzɨ̀ nɨ̀ kàmêlsɨ àŋena. ²⁷Gidìyòn ɨ lì mɨ̀yèli nâ mzɨ̀ ɨ faytɨ ànfèʼsɨ̀ ateyn ɨ tom a ntèʼ nɨ̀ àŋena ma à ti a Oflà. Wu n-tom tî, ghelɨ Isìlæ̀ nô ghɨ̀ jɨ̀m ɨ visi Fɨyini ɨ nà sɨ koʼsɨ̂ kɨ ànfèʼsɨ̀ nâ kì. Ànfèʼsɨ̀ ateyn a ɨ kasi sɨ atam. Gidìyòn ŋêyn ghelɨ ndo nɨ̀ ŋweyn ɨ nà sɨ koʼsɨ̂ kɨ ànkeyna.

Gidìyòn ɨ kfɨ.

²⁸Ghelɨ Isìlæ̀ nɨn læ tɨm yɨ ghelɨ Midìyàn tì, iwo i nà bu ghɨ wi a àŋena ɨchfɨ̀. Ghelɨ Isìlæ̀ nɨn læ keli mbôynɨ̀ ɨtuʼ nɨ̀ Gidìyòn sɨ a bèŋ mɨ̀vɨm ɨ̀n kæ̀.

²⁹Jelub-Bâl ɨ wâyn Jòwâsh nɨ̀n læ meyn kasi kfa ɨ nà sɨ chi a ŋweyn abe. ³⁰Wu nà n-kelɨ ghɨ̀ kì ghɨ dvɨ̂ kɨ tèyn ɨ chɨ̀yntɨ bzɨ woyn ghɨ lûmnɨ̀ mɨ̀vɨ̂m nsòmbo. ³¹Gidìyòn nà n-lêm wul ɨ wi a Shekèm ɨ bzɨ kɨmɨ wayn ɨ lûmnɨ̀ ŋêyn ŋweyn ɨ chfɨ̀ ìzɨyn i ŋweyn na Abimelèk. ³²Gidìyòn ɨ wâyn Jòwâsh nɨn læ meyn lema nô a jûŋ ɨ jæ kfɨ. Wù n-læ kfɨ, ghɨ gvɨ̀mì ŋweyn kɨ̀mɨ alèʼ ghè a ghɨ n-læ gvɨ̀mi bò ŋweyn Jòwâsh ateyn a ntèʼ Oflà, ma à ti ntèʼ ghelɨ Abìyezà.

³³Gidìyòn nɨn læ kfɨ ɨ nà bu duʼ tɨ̀ chìtɨ, ghelɨ Isìlæ̀ ɨ visi Fɨyini ɨ kasi nà koʼsɨ̂ mɨyini mɨ̀ Bâl. Àŋena nɨn faytɨ meyn ànfèʼsɨ̀ ɨ chfɨ̀ na Bal-Belìt ɨ tom alèʼ ɨ nà koʼsɨ-à, ³⁴ɨ lesɨ ndù nɨ̀ Bôbo Fɨyini fɨ àŋena fìfɨ̀ a fɨ n-læ fsɨ àŋena sɨ awu nɨ̀ mbàynɨ̀ sìsɨ̀ a sɨ n-jɨŋ kali àŋena. ³⁵Àŋena nɨn leʼ meyn kɨmɨ sɨ dyèyn atem a juŋà sɨ̂ Jelub-Bâl ma à ti Gidìyòn, nô mɨ ta wu nà n-ghɨ ma wù ni meyn àwo a juŋà sɨ̂ ghelɨ Isìlæ̀ kɨ̀ sɨ idvɨ̀.