Judges 20

Ghelɨ Isìlæ̀ ɨ tas iwoŋ

¹Ghelɨ Isìlæ̀ nô ghɨ̀ jɨ̀m kɨ̀ sɨ zɨ̀tɨ̀ a Dân sɨ ndù sɨ chem a Beshebà sɨ fì sɨ ndù sɨ chem a Gilèd nɨ̀n gvi meyn chɨ̀yntɨ kɨ sɨ afo àmòʼ asɨ nɨ̀ Bôbo Fiyini a Mizbà. ²Chyeʼsɨ asas a ndosɨ nɨ̀ ghelɨ Isìlæ̀ nô à jɨ̀m ɨ fvɨ̀ ɨ timi asɨ a nchɨ̀yntɨ nɨ̀ ghelɨ Fɨyini. Sugèyʼ sisɨ̀ a sɨ nà n-jelɨ̀ a nse nɨ̀n boŋ meyn fvɨ gvì chem nkam ighɨ ì kæ̀ kelɨ mɨ̀nyuè. ³Àŋena nɨn chɨ̀yntɨ tî ɨ nà sɨ kayntɨ̂ na, “Iwo i bemnɨ-i nâ yèynì tî gàyn nô ti a?” Ghelɨ Benjamìn ɨ yvɨ na ghelɨ Isìlæ̀ koʼ meyn yvɨ̀ŋtɨ̀ a ntèʼ Mizbà.

⁴Wùl ɨ̀ ndo nɨ̀ Levì vzɨ̀ a ghɨ n-zuè wi ŋweyn tì ɨ bè na, “Mà tî gvì ghesɨ̀ wul ɨ wi nɨ̀ mà sɨ chi a Gibìyà a Benjamìn. ⁵Ghelɨ Gibìyà nî gvì ɨ̀ jɨ̀ŋ kàli ndo nɨ̀ntuʼ kɨŋ sɨ zue ma. Ta àŋena gvì tî ɨ lì wî wom ɨ̀ chi nɨ̀ ŋweyn sɨ adyaʼ, wù kfɨ. ⁶Ma lî ìgvɨyn i ŋweyn ɨ̀ tèyntɨ kɨ̀ ɨbyàs ɨbyàs ɨ̀ tum ɨbyâs ateyn kɨ̀ ɨlwêʼ ɨ̀ jɨ̀m a Isìlæ̀ bòm ìwo nâ zɨ̀ a ghelɨ Gibìyà mòm. Iwo ateyn i ti meyn wumsɨ Isìlæ̀ nô sɨ a ŋaŋ. Yi n-bema! ⁷Yi n-ghɨ ghelɨ Isìlæ̀ nô ghɨ̀ jɨ̀m. A n-kelî kɨ zɨ̀ na ghesɨ̀nà nɨn jèlɨ̀ ti a.”

⁸Ghelɨ ateyn ɨ chɨ̀yntɨ làlì nô ghɨ̀ jɨ̀m ɨ timi kɨ ɨchfɨ̂ ɨ̀mòʼ ɨ be na, “Wùl sɨ̂ ghesɨ̀nà nɨn bu kasî kfâ wì. Wùl nɨn bu fì kfâ wì a ŋweyn a ndo nô sakos. ⁹À ti iwo zɨ a ka ghesɨ̀nà ni nɨ̀ ghelɨ Gibìyà nâ ghì. Ghesɨ̀nà nɨn tɨm bèyʼ ɨ̀ yeyn na ghesɨ̀nà nɨn se sɨ koʼ sɨ nu àŋena, a à na ndù ndà asɨ, a kûmtɨ̀ ndà a. ¹⁰Ghesɨ̀nà na choʼ ghelɨ ìvɨm antêynɨ̀ nɨ̀ ghelɨ ɨvɨ, choʼ ghelɨ ɨvɨ antêynɨ̀ nɨ̀ ghelɨ nkam fî choʼ ghelɨ nkam antêynɨ̀ nɨ̀ ghelɨ nkamsɨ ìvɨm, ta ka àŋena na fu ɨ̀fwo ɨ yɨnɨ sɨ̂ sugèyʼsɨ̀. Sugèyʼ nâ sèynsɨ̀ nɨn ndù chem a ntèʼ Gibìyà a Benjamìn ɨ̀ dyèyn ìwo i kaynɨ-i sɨ̂ ghelɨ Benjamìn bòm nkfɨm yèyn a àŋena kwò a Isìlæ̀ tèyn.” ¹¹À ti ta ghelɨ Isìlæ̀ nɨ̀n læ timi ateyn kɨ ɨchfɨ̂ ɨ̀mòʼ sɨ nù ghelɨ Gibìyà.

¹²Asas a ndosɨ nɨ̀ ghelɨ Isìlæ̀ ɨ tum ghelɨ kɨ ilaʼ i Benjamìn ì jɨ̀m ghɨ ndu bɨfɨ na, “Yì bè na gha kûm nkfɨm yèyn a ghelɨ̀ ghi tî kwò tèyn a? ¹³Yì fvɨsɨ fù ghelɨ nâ ghì sɨ̂ ghès lvɨ̂yn ghès zuetɨ ɨ̀ sù lìsì mbɨ nâ yèyn sɨ atu nɨ̀ Isìlæ̀.”

Mɨtì ghelɨ Benjamìn ɨ faŋ tɨ̀ yvɨ̀tɨ iwo zɨ̀ a woynà àŋena ɨ ghelɨ Isìlæ̀ bè, ¹⁴ɨ fvɨ̀ kɨ ntèʼsɨ àŋena sɨ̀ jɨ̀m ɨ gvi yvɨ̀ŋtɨ̀ a Gibìyà sɨ nu ghelɨ Isìlæ̀. ¹⁵Sugèyʼsɨ Benjamìnsɨ̀ nɨn chɨ̀yntɨ fvɨ̀ achi nâ ghè nkam mɨ̀vɨm ɨ̀m bò njvàsɨ̀ ntufa, kelɨ mɨ̀nyuè. Sugèyʼ nâ sèynsɨ nà n-ghɨ sɨ baʼsɨ kɨmɨ sɨ̂ sugèyʼsɨ lisɨ ighɨ nsòmbo ta ghɨ tètɨ a Gibìyà. ¹⁶Sugèyʼsɨ lisɨ nà n-ghɨ kɨmɨ antêynɨ̀ sugèyʼsɨ Benjamìn nâ ghè ighɨ nsòmbo, ghɨ nɨ̀nkœ̀, ma ghɨ ghàŋsɨ nô mɨ nyuŋ àtu alèʼ, wùl sɨ ateyn bû læ̀ tɨm nɨ̀ ngòʼ nì sœ̀.

¹⁷Sugèyʼsɨ̀ nɨn læ fvɨ̀ a Isìlæ̀ nkamsɨ ighɨ ì kæ̀ ɨ seʼ sɨ nu nɨ̀ mɨ̀nyuè, ghelɨ ndo nɨ̀ Benjamìn ɨ ghɨ wi a àŋena antêynɨ̀.

Ghelɨ Isìlæ̀ ɨ nù ghelɨ Benjamìn

¹⁸À nà n-ghɨ ta ghelɨ Isìlæ̀ nɨn tas iwoŋ sɨ ndù sɨ nu ghelɨ Benjamìn, àŋena koʼ a Betèl ɨ ndu bɨf sɨ̂ Fɨyini fɨ nâ, “A ndù ndà sɨ asɨ a ghès antêynɨ̀ sɨ nù ghelɨ Benjamìn a?”

Bôbo Fɨyini ɨ bèynsɨ ɨ bè na, “A ndù ghelɨ Judà sɨ asɨ.”

¹⁹A nà ghɨ ta àŋena yvɨ̀ meyn ɨ bɨsɨ làlì ɨ ndu bɨ̀ a ngùŋ Gibìyà, ²⁰ɨ kæ fvɨ̀ sɨ ndù sɨ nu ghelɨ Benjamìn, ɨ timi ɨ nà gvɨ̂ àŋena a Gibìyà. ²¹Ghelɨ Benjamìn ɨ ni fvɨ̀ gvì asɨ iwòŋ achi nâ ghè a Gibìyà ɨ zuetɨ ghelɨ Isìlæ̀ nkamsɨ mɨ̀vɨm ɨ̀m bò njvàsɨ̀ bò. ²²Ghelɨ Isìlæ̀ ɨ tosɨ mɨ̀tem ɨ timi kɨ alèʼ ghè a àŋena tî gvì tìmi ateyn achi a kɨ asɨ a sɨ nù. ²³À nà n-ghɨ tì ma ghelɨ Isìlæ̀ koʼ meyn ɨ̀ nì yìsi dzɨ̀ kɨ̀ asɨ nɨ̀ Bôbo Fɨyini tèyn ɨ̀ chèm aleŋ ɨlvɨ ikfa, chwotɨ̂ na Bôbo Fɨyini gamtɨ àŋena. Àŋena nà n-bɨfɨ sɨ̂ Bôbo Fɨyini nâ, “Ghèsɨ̀ fî ndù nù woynà ghesɨ ɨ ghelɨ Benjamìn ghèyn a?”

Bôbo ɨ bè na, “Yì ndu nù àŋena.”

²⁴Ɨtuʼ layn a ànkùmtɨ̀ achi, ghelɨ Isìlæ̀ ɨ fi fvɨ̀ ndù sɨ nù ghelɨ Benjamìn. ²⁵Ghelɨ Benjamìn ɨ fi fvɨ gvì a Gibìyà ɨ nù ɨ zuetɨ sugèyʼsɨ Isìlæ̀ sɨ lisɨ nkam njvàsɨ̀ nfama, sugèyʼsɨ ateynsɨ ɨ nû nɨ̀ mɨ̀nyuè nô sɨ̀ jɨ̀m.

²⁶Ghelɨ Isìlæ̀ ɨ fvɨ̀ nô ghɨ̀ jɨ̀m ɨ fi koʼ a Betèl ɨ ndu dùʼi asɨ nɨ̀ Bôbo Fɨyini ɨ dzɨ̀ ɨ bam ɨchfɨ sɨ chem aleŋ ɨlvɨ ikfa achi nâ ghè. Àŋena nɨ̀n fu meyn kɨmɨ tɨ̀fu sɨ̂ Bôbo Fɨyini, a ghɨ tɨ̀futɨ nyoʼnɨtɨ nɨ̀ tɨ̀fu tɨ litɨ sɨ nà chi nɨ̀ mbôynɨ̀. ^27-28À nà n-ghɨ a mɨchi nâ ghè, àntayntayn a mɨ̂kàyn nɨ̀ Bôbo ɨ ghɨ a Betèl. À nà n-felɨ̀ Finehàs ta ngàŋ ndô Fɨyini ɨtuʼ nâ ghè a àntayntayn nâ kì nà n-ghɨ a Betèl. Finehàs nà n-ghɨ wâyn wâyn Alòyn, bò ŋweyn ɨ ghɨ Elezà. Ta ghelɨ Isìlæ̀ kòʼ a Betèl tì ɨ bɨf sɨ̂ Bôbo Fɨyini na, “Ghès fî ndù nù woynà ghes ɨ ghelɨ Benjamìn ghèyn ma ka ghèsɨ̀ ndu a?”

Bôbo Fɨyini ɨ bèynsɨ̀ na, “Yì ndu bom ta a læ̀ na ghɨ a libɨs a mà ni a yì tɨm yɨ àŋena.”

²⁹Sugèyʼsɨ Isìlæ̀sɨ̀ ɨ lèytɨ kal a Gibìyà ɨ nà gvɨ̂ ghelɨ Benjamìn. ³⁰A nà ghɨ a mɨchi ɨ̀n tal, sugèyʼsɨ ateynsɨ ɨ kasi ndu timi kɨ ɨlwèʼ ghè a àŋena nɨ̀n læ ndu timi ateyn sɨ asɨ sɨ nu ghelɨ Benjamìn a Gibìyà. ³¹Ghelɨ Benjamìn ɨ ni fvɨ̀ sɨ nu ghelɨ Isìlæ̀, ghelɨ Isìlæ̀ ɨ lyàtɨ̀ ɨ nì àŋena visi ntèʼ nô sɨ aghaf, nyɨŋ ibàm nɨ̀ ghelɨ Isìlæ̀, ɨ zɨ̀tɨ̀ sɨ zuetɨ àŋena kɨ̀ ta àŋena nɨ̀n zuètɨ sɨ asɨ. Àŋena nɨ̀n zuetɨ meyn ghelɨ Isìlæ̀ ghɨ li ɨtwaʼ ɨ zuetɨ ghɨli a dzɨsɨ ghê a sɨ nà n-ndû a Betèl nɨ̀ Gibìyà. Ghɨ n-chɨ̀yntɨ zue ghelɨ Isìlæ̀ mɨ̀vɨm ɨ̀n tal.

³²À nà n-ghɨ tì ma ghelɨ Benjamìn sɨ bê kɨ na, “Ghesɨ̀nà nɨn tɨm yɨ àŋena kɨ̀ ta ghesɨ̀nà tî yɨ̀ sɨ asɨ,” ghelɨ Isìlæ̀ ɨ bê kɨ na, “Ghesɨ̀nà na ndûtɨ̀ kɨ nɨ̀ ìbam i nɨ̀ ìbam i ta ka àŋena fvɨ sɨ a ntèʼ ɨ̀ gvì a dzɨ.”

³³Inôyn i sugèyʼsɨ Isìlæ̀ nô ì jɨ̀m ɨ lù sɨ ɨlwèʼ ghè a yi nì nà ti ateyn ɨ ndù ɨ timi a Bal Tamà. Nô mɨ ɨlvɨ gha, sugèyʼ sìsɨ̀ a sɨ nì lèytɨ̀ ɨ tum fvɨ̀ sɨ ɨlwèʼ ghè a sɨ nì lèytɨ̀ ateyn a Gibìyà dzɨ abàs a kɨ lu à. ³⁴Sugèyʼsɨ Isìlæ̀ sìsɨ̀ a ghɨ n-tètɨ tetɨ tî nkamsɨ ìvɨm ɨ fvɨ̀ asɨ iwòŋ ɨ kèʼ ghelɨ Benjamìn ghì a Gibìyà. Inû ateyn i nà n-to nô sɨ a ŋaŋ, ghelɨ Benjamìn ɨ kya wi na iwo i nɨn kolî àŋena. ³⁵Bôbo Fɨyini nɨ̀n gamtɨ meyn ghelɨ Isìlæ̀ àŋena tɨm yɨ ghelɨ Benjamìn. Sugèyʼsɨ Benjamìn nɨ̀n kfɨtɨ meyn achi nâ ghè nkamsɨ mɨ̀vɨm ɨ̀m bò njvàsɨ̀ tâyn nɨ̀ sugèyʼsɨ̀ ɨvɨ. Àŋena nà n-nû kɨ ghɨ̀ jɨ̀m nɨ̀ mɨ̀nyuè. ³⁶Ghelɨ Benjamìn ɨ yeyn na ghɨ tɨm meyn yɨ àŋena.

À nà n-ghɨ tì ma ghelɨ Isìlæ̀ ni meyn kòytɨ̀ ndù nɨ̀ ìbàm i bòm ta àŋena nà n-kya na ghelɨ àŋena leytɨ meyn a ngùŋ Gibìyà. ³⁷Ghelɨ nâ ghì a ghɨ nì lèytɨ̀ a ngùŋ Gibìyà tì ɨ tum fvɨ̀ nɨ̀ mɨ̀nyuè ɨ zuetɨ ghelɨ a Gibìyà nô ghɨ̀ jɨ̀m. ³⁸À nà n-ghɨ tì ma ghelɨ Isìlæ̀ ni meyn bè sɨ̂ ɨghî a ghɨ nì lèytɨ̀ tî na àŋena nî zɨ a Gibìyà ghɨ kwò ɨ̀vɨs ta ka fɨleʼ fɨ koʼ nô sɨ a ŋaŋ. ³⁹Nô mɨ ɨlvɨ gha, a àŋena keli na ɨlvɨ kfeyn meyn, ɨ̀ zɨ̀tɨ̀ ìnû. Ɨlvɨ nâ wèyn nɨ̀n læ se sɨ kfeyn ma ghelɨ Benjamìn sɨ ghɨ ma ghɨ zuetɨ meyn ghelɨ Isìlæ̀ sɨ chem mɨ̀vɨm ɨ̀n tal ɨ̀ nà sɨ bê kɨ na, “Ghesɨ̀nà nɨn tɨm yɨ àŋena kɨ̀ ta ghesɨ̀nà tî yɨ̀ sɨ asɨ.” ⁴⁰À nà n-ghɨ ta fɨleʼ fìfɨ̀ zɨ̀tɨ̀ sɨ koʼ a Gibìyà, ghelɨ Benjamìn ɨ fyeʼtɨ yeyn ma ntèʼ ì jɨ̀m sɨ koʼ kɨ fɨ̀leʼ. ⁴¹Sugèyʼsɨ Isìlæ̀sɨ̀ nɨ̀n læ meyn kasi kèʼ sugèyʼsɨ Benjamìn. Nô mɨ ɨlvɨ gha sugèyʼsɨ Benjamìnsɨ̀ ɨ kfɨ sayn bòm ta àŋena yèyn na iwo i koli meyn àŋena. ⁴²Àŋena nà sɨ leʼ ndù kɨ dzɨ abàs a nse ìyum, mɨtì bœ̂ wì mɨ bœ. Sugèyʼsɨ Isìlæ̀sɨ̀ nà n-fvɨ̂ a ntèʼ ghal zuetɨ kɨ zuetɨ àŋena. ⁴³Ghelɨ Isìlæ̀ nà n-ghɨ ma ghɨ gemtɨ meyn jɨ̀ŋ kàli sugèyʼsɨ Benjamìn kɨ̀ ɨbyâs ɨ̀ jɨ̀m. Àŋena nà sɨ fvɨ̂ nô mɨ wo ghɨ nyɨŋ teyn kɨ teyn àŋena, ghalɨ zuetɨ̂ àŋena ghɨ bu duʼ mɨ tɨ̀ chem tɨ̀ mèsì abàs ghè a ɨchfɨ-iyvɨ i nɨn sal ateyn a Gibìyà. ⁴⁴Ghɨ n-zuètɨ meyn sugèyʼsɨ Benjamìn nkamsɨ njvàsɨ̀ nfama a ghɨ sugèyʼsɨ̀ faytɨ̂ kya kɨ nô kya sɨ nù. ⁴⁵Sugèyʼsɨ Benjamìn sìsɨ̀ a sɨ nì faŋ ɨ bèynlɨ̀ ɨ nà sɨ leʼ ndù dzɨ a nse ìyum, abàs iwu i Limòn. Ghelɨ Isìlæ̀ ɨ nyɨŋ teyn àŋena a dzɨ ɨ zuetɨ sugèyʼsɨ̀ nkamsɨ̀ tâyn ɨ fi faŋ ɨ nà nyɨŋ kɨ nyɨŋ ibàm nɨ̀ sugèyʼsɨ Benjamìn nâ sìsɨ̀ ɨ ni ndu koli àŋena a Gidòm ɨ zuetɨ kfeynsɨ sugèyʼsɨ̀ nkamsɨ̀ bò.

⁴⁶Sugèyʼsɨ Benjamìnsɨ̀ nɨ̂n chɨ̀yntɨ kfɨ achi nâ ghè nkamsɨ mɨ̀vɨm ɨ̀m bò njvàsɨ̀ tâyn, a ghɨ sugèyʼsɨ̀ nû nɨ̀ mɨ̀nyuè, faytɨ̂ kya kɨ nô kya sɨ nù, ⁴⁷nô mɨ ta sugèyʼsɨ lisɨ ighɨ ntufa nɨ̀n læ meyn leʼ ɨ ndu lèytɨ̀ iwu i Limòn a nse ìyum ɨ chi afu sɨ a njoŋ sɨ̀ kæ̀. ⁴⁸Sugèyʼsɨ Isìlæ̀sɨ̀ nɨ̀n kasi meyn ndù a Benjamìn ɨ zuetɨ nô ghelɨ ghɨ̀ jɨ̀m baʼsɨ̂ nɨ̀ nyamsɨ nô mɨ nɨ̀ gha ɨlvɨ̀ ta àŋena yeyn. Àŋena nà n-zɨ̂ nô mɨ a ntèʼ ì kà nyôʼ kɨ nyoʼ.