Judges 18

Mikà ŋêyn ghelɨ Dân

¹À n-læ nà ghɨ ɨtuʼ nâ ghè, ghelɨ Isìlæ̀ ɨ kelɨ wi fòyn. A nà ghɨ kɨmɨ ɨtuʼ nâ ghè, ghelɨ Dân ɨ nà jelɨ̀ kɨŋ àlêʼ sɨ nà chi ateyn bòm ta àŋena nà n-bu duʼ tɨ̀ kèli alêʼ antêynɨ̀ nɨ̀ ghelɨ Isìlæ̀, ²ɨ kæ tum sugèyʼ sɨ̀ tâyn ma sɨ fvɨ̀ a Zolà ɨ̀ fvɨ̀ a Eshtòl na sɨ ndu nyàʼtɨ ki ɨ̀ yeyn na sɨ n-yeyn àlêʼ kɨ jofɨ̀ kfeynɨ̂ ta ka àŋena ndu nà chî ateyn a. Sugèyʼsɨ ateynsɨ nà n-ghɨ ma ghɨ chòʼtɨ kɨ̀ asas a ndosɨ à jɨ̀m a Dân.

Àŋena ndu chem ilaʼ i kfɨynsɨ a Eflèm ɨ zɨ sɨ chi a ndo nɨ̀ Mikà. ³À nà sɨ ghɨ ta àŋena nɨn ghɨ a ndo nɨ̀ Mikà, ɨ yvɨ keli gyâ waynda ɨkùŋ ɨ wul ɨ̀ ndo nɨ̀ Levì vzɨ̀ ɨ bɨf sɨ̂ ŋweyn na, “Wà lù wo afêyn a? Wa n-nî ghà afêyn a? Wà gvì afêyn bòm ghà?”

⁴Wu fèʼtɨ̀ àwo kì a Mikà nì sɨ̂ ŋweyn ɨ fi bè na, “Mikà ti meyn lì mà, ma na felɨ̀ ta ngàŋ ndô fɨyini nɨ̀ ŋweyn, wu lâʼ mà.”

⁵Àŋena bè sɨ̂ ŋweyn na, “Ghès nɨn chwotɨ̂ và. Bɨf ɨ yvɨ sɨ̂ Fɨyini fɨ na ijêl ì yesi na ghɨ a juŋa.”

⁶Ngàŋ ndô fɨyini nâ zɨ̀ ɨ bè sɨ̂ àŋena na, “Yì jel kɨ nɨ̀ mbôynɨ̀. Bôbo Fɨyini bɨmi meyn ìjêl ì zɨ-i.”

⁷Ghelɨ nâ ghèyn ghɨ̀ tâyn ɨ jèl ɨ ndu chem a Layìsh ɨ yeyn ghelɨ ghɨ chi afu kɨ̀ nô nɨ̀ mbôynɨ̀ ta ghelɨ Sidòn, fâyn wì afo. Àŋena nà n-wo wi afo bòm ta àŋena nà n-lêm àwu nô mɨ a gha, kɨ ndû kɨ nɨ̀ àsɨ-a. Àŋena nà n-chî kɨmɨ alèʼ ndyèyn ɨ dyêf sɨ lù afu sɨ ndù a Sidòn, yi boynɨ̂ wì ta ka àŋena na fì yɨnɨ̂ ŋêyn ghelɨ ghɨ li.

⁸A nà ghɨ ta àŋena jèl ɨ̀ kàsi kfa a Zolà nɨ̀ Eshtòl, woynà àŋena ɨ bɨf sɨ̂ àŋena nâ, “Ijêl ì zɨ-i tî nà ghɨ ti a?”

⁹Àŋena bè na, “Yì gvi kɨ̀ gvi ghesɨ̀nà ndu nù ghelɨ Layìsh nâ ghì. Ghèsɨ yeyn meyn nse àŋena, yi jôf nô a jûŋ. Ghesɨ̀nà nɨn fî duʼ chîtɨ̀ ghà? Ghɨ ndu tɨm yɨ ɨ̀ lì nse àteyn. ¹⁰Yi ndù chem afu ɨ̀ yeyn na ghelɨ nâ ghì nɨn chi-à, fâyn wì afo, ɨ̀ fì yeyn ilaʼ ighaʼnɨ-i zɨ̀ a Fɨyini fɨ fù sɨ̂ zɨ̀, yi wutɨ̂ wì afo nô sakos.”

¹¹Àŋena taŋi tì, sugèyʼsɨ̀ ɨ lù isas i ndo nɨ̀ Dân ighɨ ntufa nɨ̀ ɨ̀fwo iwoŋ, ma sɨ fvɨ̀ a Zolà ɨ̀ fì fvɨ̀ a Eshtòl ɨ̀ seʼ inû. ¹²Àŋena se sɨ ndù ɨ bɨ̀ a ngùŋ Kiliyat Jelìm a Judà. À ti iwo zɨ̀ a ghɨ lum bu toŋtɨ kɨ alêʼ nâ kèyna injɨyn i Kiliyat Jelìm na Màhane Dân sɨ koʼ sɨ chem layn. ¹³Àŋena nɨ̂n lu meyn afu ɨ koʼ ilaʼ i kfɨynsɨ a Eflèm ɨ ndu zɨ a ndo nɨ̀ Mikà. ¹⁴Ghelɨ ghì ghɨ̀ tâyn a ghɨ n-læ ndu nyaʼtɨ ki ilaʼ i Layìsh tì ɨ bɨf sɨ̂ woynà àŋena na, “A yì ti n-kya na ndo ì lì nɨn ghɨ antêynɨ̀ ndosɨ afêyn, ndzɨsɨ ngàŋ ndô Fɨyinisɨ̀ ɨ ghɨ ateyn nɨ̀ mɨyini ɨ̂n lì baʼsɨ̂ nɨ̀ ànfèʼsɨ̀-à ma ghɨ chuf ɨ̀ tsɨ̀sɨ nɨ̀ àso ɨkwo a fɨfâ a? Yi n-kya ìwo zɨ̀ a ka yì ni.” ¹⁵Àŋena taŋi tì ɨ kæ fyeʼtɨ sɨ zɨ a ndo afî a waynda ɨ̀kuŋ vzɨ̂ a à nà n-ghɨ wul ɨ̀ ndo nɨ̀ Levì tì nà n-chi ateyn abe nɨ̀ Mikà ɨ toŋtɨ ŋweyn. ¹⁶Sugèyʼ sɨ Dân sìsɨ ighɨ ntufa ɨ timi kɨ ɨchfɨ mbàyn nɨ̀ ɨ̀fwo iwòŋ nɨ̀ àŋena, gvɨ̂tɨ̀ sɨ nù. ¹⁷Ghelɨ ghì ghɨ̀ tâyn a ghɨ n-læ ndù ɨ nyaʼtɨ ki ilaʼ nâ zɨ̀ ɨ chwo zɨ a ndo nâ ghè ɨ lì ànfèʼsɨ̀ kì nɨ̀ ndzɨsɨ ngàŋ ndô Fɨyini sîsɨ̀ nɨ̀ mɨyini ɨ̂n lì mzɨ̂ baʼsɨ̂ nɨ̀ ànfèʼsɨ̀ kì a ghɨ chuf ɨ̀ tsɨ̀sɨ nɨ̀ àso ɨkwo a fɨfâ tî. Ghɨ nà n-kumtɨ̂ ɨ̀fwo nâ wèyn ngàŋ ndô Fɨyini nɨ̀ Mikà zɨ̀ ŋêyn sugèyʼ sîsɨ̀ ighɨ ntufa ɨ ti kɨ ɨchfɨ mbàyn.

¹⁸A nà ghɨ ta ghelɨ ghì ghɨ̀ tâyn zɨ a ndo nɨ̀ Mikà ɨ̀ lì ànfèʼsɨ̀ kì nɨ̀ ndzɨsɨ ngàŋ ndô Fɨyini sìsɨ̀ nɨ̀ mɨyini ɨ̂n lì mzɨ̂ baʼsɨ̂ nɨ̀ ànfèʼsɨ̀ kì a ghɨ faytɨ nɨ̀ àso ɨkwo a fɨfâ tî, ngàŋ ndô fɨyini zɨ̀ ɨ yeyn ɨ bɨf sɨ̂ àŋena na, “A n-ghɨ ghà a yi nî tèyn a?”

¹⁹Àŋena bè sɨ̂ ŋweyn na, “Chimi kɨ têyn moŋ, ka wa n-fì tàŋi. Ghesɨ̀nà nɨn lù kɨ amoʼ a wà ndu nà ghɨ bò wes fî ghɨ ngàŋ ndô fɨyini sɨ̂ ghès. Yi n-jôf ta ka wà na fèlɨ̀ ta ngàŋ ndô fɨyini sɨ̂ ìsas i ndo ìmòʼ i nɨ̀ ìlaʼ ifɨ̂blɨ̀-ì a Isìlæ̀ chwò ta ka wà na fèlɨ̀ ta ngàŋ ndô fɨyini a ndo nɨ̀ wùl ɨ̀ mòʼ.” ²⁰Ngàŋ ndô Fɨyini àteyn ɨ yvɨ tî ɨ nà saŋlɨ-à, ɨ fsɨ ndzɨsɨ ngàŋ ndô fɨyini sîsɨ̀ nɨ̀ mɨyini ɨ̂n lì mzɨ̂ baʼsɨ̂ nɨ̀ ànfèʼsɨ̀ kì a ghɨ faytɨ ɨ̀ tsɨ̀sɨ nɨ̀ àso ɨkwo a fɨfâ tî, àŋena ɨ lù. ²¹Àŋena ɨ se sɨ lù ɨ chwòsɨ woynda asɨ nɨ̀ ɨ̀fwo àŋena baʼsɨ̂ nɨ̀ nyamsɨ.

²²Ghɨ jèlɨ̀ tèyn ɨ fu aghaf sɨ̂ ndô Mikà, wu jàŋtɨ̀ ghelɨ ghì a ghɨ n-chi baʼsɨ̂ sɨ̂ ŋweyn ŋêyn àŋena ɨ nyɨŋ ɨ teyn ghelɨ Dân nâ ghì, ²³ɨ nà sɨ byaytɨ-à. Ghelɨ Dân ɨ bɨf sɨ̂ Mikà nâ, “Ngeʼ zyâ nɨn ghɨ nô ghà? Wà lì ghelɨ̀ ghya na ghɨ gvi nù ghès bòm ghà?”

²⁴Mikà ɨ bè na, “Mà fàytɨ mɨyini mêm yi lî lù nɨ̀ ɨ̀mêyn baʼsɨ̂ nɨ̀ ngàŋ ndô Fɨyini nɨ̀ mà bòm ghà? Yi n-bɨfɨ bɨfɨ ngeʼ yem bòm ghà ma yi lî meyn ɨ̀fwo wom a? Mɨ n-fî kelɨ nô ghà?”

²⁵Ghelɨ Dân ɨ bè na, “Ka wa n-fì gùmnɨ̀ ìwo ghesɨ̀nà, a bu tì a ghelɨ ghes ghɨ li nyoʼsɨ ɨtoŋ ɨ̀ zuè vâ zɨ̂ ghelɨ ndo nɨ̀ và.” ²⁶Àŋena taŋi tì ɨ nà ndû kɨ ndu. Mikà ɨ yeyn na àŋena to meyn chwò ŋweyn, ŋêyn ghelɨ ŋweyn ɨ kasi ɨ nà kfâ.

²⁷Ghelɨ Dan ɨ lì ɨ̀fwo Mikà vzɨ̀ baʼsɨ̂ nɨ̀ ngàŋ ndô Fɨyini nɨ̀ ŋweyn zɨ̀ ɨ ndù sɨ nu ghelɨ Layìsh, a ghɨ ghelɨ chî nɨ̀ mbôynɨ̀, kya wi na iwo i nɨn gvi-à. Àŋena nɨ̀n zuetɨ meyn ghelɨ Layìsh ɨ fi nyòʼ ntèʼ àŋena. ²⁸Wùl nɨ̀n bû læ fvɨ̀ sɨ gàmtɨ àŋena bòm ta àŋena nà n-chî baʼsɨ wì a Sidòn, kelɨ wi ɨsuyn ŋêyn ghelɨ ghɨ li. Ntèʼ Layìsh na n-ghɨ afoŋlɨ, baʼsɨ̂ a ntèʼ Bet Lehòb.

Ghelɨ ndo nɨ̀ Dân ɨ nì tì ɨ kasi bàʼlɨ̀ ntèʼ àteyn ɨ nà chî ateyn. ²⁹Àŋena nɨ̂n bàʼlɨ tî, ɨ nà sɨ toŋtɨ̂ ntèʼ àteyn na Dân, izɨyn nɨ̀ bò bò àŋena. Dân nâ wèyn nɨ̀n læ nà ghɨ wâyn Jàkôb. Àŋena nà n-toŋtɨ̂ ntèʼ nâ zɨ̀ na Dân tì ma ghɨ n-læ nà toŋtɨ̂ sɨ asɨ na Layìsh. ³⁰Ghelɨ ndo nɨ̀ Dân ɨ gvi tom ànfèʼsɨ̀ ateyn. Jonatàn ɨ wâyn Geshòm ma à ti wâyn wâyn Mosìs ŋêyn woyn ŋweyn ɨ nà sɨ ghɨ ngàŋsɨ ndô Fɨyini sɨ̂ ghelɨ Dân sɨ chem ta ka ghɨ læ̂ tɨm yɨ ilaʼ ateyn iwòŋ ɨ̀ ghàytɨ lù nɨ̀ àŋena. ³¹Ghelɨ Dân nɨ̀n faŋ meyn ɨ nà sɨ koʼsɨ̂ kɨ mɨyini mɨ̀ Mikà nâ mzɨ̀ a mɨchi ghè a ndô Fɨyini nà n-ghɨ a Shilò.