Judges 16

Samsòn ŋêyn Delilà

¹À n-læ meyn nà ghɨ achi a li-a, Samsòn ɨ ndù a ntèʼ Gazà a Fìlisìyà ɨ yeyn wul ɨ wi ɨ̀ jelɨnɨ ɨ̀ lvɨ̀ afu ɨ zɨ sɨ chi ŋêyn ŋweyn. ²Ghɨ fèʼtɨ̀ sɨ̂ ghelɨ Gazà na Samsòn gvi meyn. Àŋena ndu timi kal ɨ chi nà gvɨ ŋweyn ɨchfɨ mbàyn ntèʼ, bê na, “Ɨtuʼ nɨn se sɨ layn sɨ gvì a ghesɨ̀nà zue ŋweyn.”

³Mɨtì Samsòn ɨ nyɨ̀ŋì a ni nà ghɨ kɨ antêynɨ̀ nɨ̀ntuʼ, wu làlì ɨ ndu mùʼ àbâʼ ɨchfɨ mbàyn ntèʼ baʼsɨ̂ kɨ nɨ̀ tɨ̀wuwutɨ nɨ̀ mɨ̀mbêʼsɨ̀ ɨ bèʼì a ŋweyn a mbèʼsɨ̀ ɨ koʼ nɨ̀ ɨ̀fwo ateyn atû kfɨ̀yn ghê a yì n-ghɨ injɨyn i Heblòn.

⁴Ghɨ chitɨ kɨ têyn, Samsòn ɨ yeyn wul ɨ wi ɨfyàyn ɨ Solèk izɨyn i ŋweyn ɨ ghɨ Delilà ɨ nà kôŋ ŋweyn. ⁵Chyeʼsɨ Fìlisìyàsɨ̀ ɨ ndù ɨ bè sɨ̂ wùl ɨ wi àteyn na, “Kɨŋ dzɨ ɨ lɨsɨ Samsòn wù feʼtɨ àlêʼ kì a adyaʼ a ŋweyna nɨn lû ateyn, nɨ̀ dzɨ̀ zɨ̂ a ghɨ kàʼ a ghɨ to chwò ŋweyn ateyn ta ka ghès ɨ̀ ghal ɨ̀ kùl ŋweyn. Wà kæ ni têyn, a nô mɨ ndà a ghès antêynɨ̀ na fu kilùsɨ aso ɨkwo a fɨfâ sɨ̂ và sɨ chem njvàsɨ̀ tal.”

⁶Delilà ɨ yvɨ tî ɨ ndu bè sɨ̂ Samsòn na, “Fèʼtɨ sɨ̂ mà na adyaʼ a bemnɨ-a nɨ̀ và kèyn lù wo a? Fèʼtɨ kɨmɨ sɨ̂ mà na wùl ti kàʼ a wù nî gha sɨ kulɨ vâ ta ka iwo i na bu ghɨ wi a wa ɨchfɨ̀ a?”

⁷Samsòn ɨ bè sɨ̂ ŋweyn na, “Ghɨ kæ li nkfɨ̀sɨ gvɨ̂ nyàm nsòmbo bula sɨ yum ɨ̀ kùlɨ̀ ma ateyn, a mà bol nà ghɨ kɨ ta ghelɨ ghɨ̀ jɨ̀m nɨ̀n ghɨ.”

⁸Chyeʼsɨ Fìlisìyà nâ sìsɨ̀ ɨ gvì nɨ̀ nkfɨ̀sɨ gvɨ̂ nyâm nsòmbo, bula sɨ yum ɨ fu sɨ̂ ŋweyn, wu kul Samsòn nɨ̀ ɨ̀nseynsɨ. ⁹À nà n-ghɨ tì ma ghelɨ ni meyn gvì lèytɨ̀ a ndo. Delilà ɨ kul Samsòn tì ɨ byal bè na, “Samsòn, ghelɨ Fìlisìyà gvi meyn sɨ ghal vâ.” Wu saʼ làlì ɨ teyntɨ nkfɨ̀sɨ ateynsɨ yàla kɨ ta àmbyèyn ɨlvɨ ta ɨvɨsɨ kùm. Àŋena faŋ tɨ̀ kèli na adyaʼ a ŋweyn nâ kì lù wo a.

¹⁰Delilà ɨ bè sɨ̂ Samsòn na, “Wà ni meyn ma na kêʼ ta àngù. Wà bû tàŋi samoʼ sɨ̂ mà. Fèʼtɨ dzɨ zɨ̀ sɨ̂ mà a ghɨ kàʼ a ghɨ kul vâ ateyn.”

¹¹Samsòn ɨ bè na, “Ghɨ kæ kul ma nɨ̀ nkfɨ̀sɨ fɨsɨ bula wùl timi kùl afo ateyn, a mà bol nà ghɨ kɨ ta ghelɨ ghɨ̀ jɨ̀m nɨn ghɨ.”

¹²Wu ni se sɨ buni, Delilà ɨ lì nkfɨ̀sɨ fɨsɨ ɨ kul ŋweyn ateyn. A ghɨ tì ma ghelɨ Fìlisìyà ni meyn fì gvì lèytɨ̀ a ndo. Wu kul ŋweyn tì ɨ fi byal bè na, “Samsòn, ghelɨ Fìlisìyà gvi meyn sɨ ghal vâ.” Mɨtì Samsòn ɨ fi saʼ làlì ɨ teyntɨ nkfɨ̀sɨ ateyn sɨ a ŋweyn akœ kɨ̀ ta wù nì tèyntɨ ɨsîsɨ̀.

¹³Delilà ɨ bè sɨ̂ Samsòn na, “Wà bu wam kɨ wam sɨ̂ mà nî mà ma kêʼ ta àngù. Fèʼtɨ kɨ nô dzɨ zɨ̀ sɨ̂ mà a ghɨ kàʼ a ghɨ kul vâ ateyn.”

Wu bè na, “Wà kæ li nyuŋsɨ atu nɨ̀ mà sêynsɨ̀ nsòmbo ɨ̀ bo yùŋ ndù kɨ̀ a ndzɨsɨ afî a wà n-bo ɨkoʼ ɨ̀ fal nɨ̀ ìchɨ i fɨ̂nkfèlì, a mà bol nà ghɨ kɨ ta ghelɨ ghɨ̀ jɨ̀m nɨn ghɨ.” Wu ni se sɨ bunni, Delilà ɨ ghal nyuŋsɨ atu nɨ̀ ŋweyn nâ sìsɨ̀ nsòmbo ɨ bo yùŋ ndu kɨ a ndzɨsɨ ghê a wu nà n-bo ɨkoʼ tì, ɨ fal nɨ̀ ìchɨ i fɨ̂nkfèlì. ¹⁴Wu n-fal tî ɨ byal ɨ bè na, “Samsòn ghelɨ Fìlisìyà gvi meyn sɨ ghal vâ.” Wu saʼ làlì a mbunisɨ ɨ gùf ɨ choʼtɨ nyuŋsɨ atu nɨ̀ ŋweyn sɨ a ɨkoʼ ghè a Delilà nì bo yùŋ a ndzɨsɨ tî.

¹⁵Delilà ɨ bè sɨ̂ Samsòn na, “Wà kàʼ wa bû nà bê na, wà n-kôŋ mà, fêʼtɨ̀ wì iwo i leytɨnɨ-i nɨ̀ và sɨ̂ mà. Wà lɨsɨ meyn mà lvɨ̂yn ìngal ì tal ɨ̀ nì ma na ghɨ kɨ nô àngù. Wà bu duʼ tɨ̀ fèʼtɨ̀ alêʼ kì a adyaʼ à kya kèynà nɨn lû ateyn sɨ̂ mà.” ¹⁶Delilà ɨ faŋ nà sɨ fu kɨ ngeʼ sɨ̂ Samsòn mɨchi ɨ̀n jɨ̀m, ɨ fu chwòsɨ̀, Samsòn ɨ nà sɨ yeyn kɨ ìkfɨ.

¹⁷Samsòn ɨ laynsɨ ɨ fèʼtɨ nô mɨ ghà sɨ̂ Delilà ɨ bè na, “Ɨkfêm bû tìmi chwò a ma atu bòm ta mɨ n-ghɨ wul sɨ a nyɨŋ kelɨ ìchfɨ̂nɨ̀ ghesɨ̀ Fɨyini fɨ kɨ̀ sɨ ɨlvà nɨ̀ nà wom. Ghɨ kæ kom atu à kema, a mà bol ɨ̀ nà sɨ boŋ ghɨ kɨ ta ghelɨ ghɨ̀ jɨ̀m nɨn ghɨ.”

¹⁸A nà ghɨ ta Delilà yeyn na wù feʼtɨ meyn nô mɨ ghà sɨ̂ ŋweyn, wu tum jàŋ chyeʼsɨ Fìlisìyà sìsɨ̀ ɨ bè na, “Yì fî kàsi gvì. Wù feʼtɨ meyn nô mɨ ghà sɨ̂ mà.” Chyeʼsɨ ateynsɨ ɨ se sɨ kasi sɨ ndù a ndo nɨ̀ Delilà nô mɨ ndà ɨ ghal kɨ aso ɨkwo kì awu. ¹⁹Delilà ɨ ghal lèm àtu a Samsòn a ŋweyn ɨbzɨ̀ ɨ fyemtɨ wu buni. Wu jàŋ wul, wu gvì ɨ kom atu a Samsòn. Adyaʼ a ŋweyna ɨ mæ̀, ghɨ zɨ̀tɨ̀ sɨ fu ngeʼ sɨ̂ ŋweyn.

²⁰Nô mɨ ɨlvɨ gha Delilà ɨ jàŋ Samsòn ɨ bè na, “Samsòn, ghelɨ Fìlisìyà gvi meyn sɨ ghal vâ.”

Samsòn ɨ saʼ làlì sɨ a mbunisɨ ɨ nà sɨ kfâʼ kɨ na yi n-fì nî kɨ ta yì lum nî, a wùl na kelɨ wi iwo sɨ ni sɨ̂ zɨ̀. Wù nà n-nî tì kya wi na adyaʼ a Bôbo Fɨyini-à bu fì ghɨ wi sɨ̂ ŋweyn.

²¹Ghelɨ Fìlisìyà ɨ ghal Samsòn ɨ bòʼ ɨ fvɨ̀sɨ̀ àsɨ a ŋweyn ɨ li kàlì nɨ̀ ŋweyn a Gazà ɨ kul afyeyn a ŋweyn nɨ̀ nchaʼsɨ ma ghɨ faytɨ nɨ̀ ìdyayn i ɨ kàyn wu nà gvâ àsaŋ iti ghê a yi nà n-ghɨ a ndô nchaʼ. ²²Mɨtì atu a ŋweyn kì a ghɨ n-læ kom tî ɨ kasi nà sɨ koʼa.

Samsòn ɨ kfɨ

²³Chyeʼsɨ Fìlisìyàsɨ̀ ɨ læ yvɨ̀ŋtɨ̀ sɨ fu ifu sɨ̂ Dagòn ɨ fɨyini fɨ àŋena ɨ nà sɨ yɨ-a dyala bê na, “Fɨyini fɨ ghesɨ̀nàfɨ gamtɨ meyn fu mbàynɨ̀ ghesɨ̀nà Samsòn a ghesɨ̀nà awu.”

²⁴A nà ghɨ ta ghelɨ Fìlisìyà yeyn Samsòn ɨ nà bemsɨ̂ fɨyini fɨ àŋena bê na,

“Fɨyini fɨ ghesɨ̀nàfɨ fu meyn mbàynɨ̀ ghesɨ̀nà Samsòn

a ghesɨ̀nà awu,

ɨ mbàynɨ̀ zɨ̀ a yì tî bèbsɨ gveynsɨ ghesɨ̀nà.

Wù ti meyn zuètɨ ghelɨ̀ ghesɨ̀nà nô sɨ a idvɨ̀.”

²⁵Àŋena ni yɨ ɨ chem aleŋ a li-a iwuyn i àŋena-i lùm, àŋena nà sɨ byaytɨ̂ nô nɨ̀ gyasɨ tosɨ bê na, “Yì fvɨsɨ gvì nɨ̀ Samsòn wù na nî àwo ghesɨ̀nà ɨ chyeʼtɨ-à.” Ghɨ fvɨ̀sɨ̀ Samsòn, wu nà nî àwo ghelɨ chyeʼtɨ-à. Ghɨ ni lì ŋweyn ɨ ndu tom a nfaynɨsɨ ɨtòʼ ɨ ndo. ²⁶Samsòn ɨ bè sɨ̂ wùl vzɨ̀ a wù n-gûbtɨ̀ jêl nɨ̀ ŋweyn na, “Tom ma alèʼ ta mà kàʼ a mà kum ɨtôʼ vzɨ̀ a wu n-tôʼ ndo ìkòʼsɨ yèyn ateyn ta ka mà yeʼtɨ ateyn.” ²⁷A nà n-ghɨ tì ma ghɨ̀lûmnɨ̀ nɨ̀ ghɨ̀ki luyn meyn a ndo ìkòʼsɨ nɨ̀ àŋena nâ ghè, chyeʼsɨ Fìlisìyàsɨ̀ nô sɨ̀ jɨ̀m ɨ ghɨ kɨmɨ afu baʼsɨ̂ nɨ̀ ghelɨ ghɨ li ghɨ ti atû ndo chem ndû nkamsɨ̀ tal, ki kɨ àwo kì a Samsòn nɨ̀n nî chyeʼtɨ-à. ²⁸Samsòn ɨ kæ dzɨ sɨ̂ Bôbo Fɨyini ɨ bè na, “Bôbo Fɨyini fɨngaŋtɨnɨ fɨ, kfàʼtɨ ma ɨ fi fu adyaʼ sɨ̂ mà lvɨ̂yn mà sɨsɨ iwo zɨ̀ a ghelɨ Fìlisìyà nì nɨ̀ àsɨ à kema.” ²⁹Wu dzɨ̀ tì ɨ nàysɨ ɨ̀wu ŋweyn ɨ lèm ɨtòʼ ghè ɨ̀ bwò a ndo ìkòʼsɨ nâ zɨ̀ nà n-ti ateyn, ɨkœ ɨ two nɨ̀ ŋweyn ɨ nà sɨ duʼ atòʼ àmòʼ, ɨkœ nɨ̂nkœ̀ ɨ duʼ ateyn nɨ a li-a. ³⁰Wu byal ɨ bè na, “À n-jôf na mà kfɨ kɨ̀ ghesɨ̀ ghelɨ Fìlisìyà ghèyn.” Ta wù bè tî ɨ tsɨyn ɨtôʼ ateyn nô nɨ̀ àdyaʼ a ŋweyn à jɨ̀mà. Ndo ìkòʼsɨ àteyn ɨ fe atu nɨ̀ chyeʼsɨ Fìlisìyàsɨ̀ baʼsɨ̂ nɨ̀ ghelɨ ghì a ghɨ nà n-ghɨ ateyn nô ghɨ̀ jɨ̀m. Yi ti n-dyêyn na Samsòn nɨ̀n læ zue ghelɨ achi ghè a wù kfɨ̀ ateyn, ghɨ dvɨ̂ chwô ɨghî a wu n-læ zue bu chi-à.

³¹Woyn nà ŋweyn nɨ̀ ghelɨ isas i ndo nɨ̀ bò ŋweyn nô ghɨ̀ jɨ̀m ɨ kàlì a Gazà ɨ lì ìgvɨyn i ŋweyn ɨ koʼ gvɨ̀mì isè nɨ̀ bò ŋweyn, alèʼ ghè a Zolà nɨ̀ Eshtòl nà n-lêm ighami ateyn. Samsòn nɨn læ tisɨ ghelɨ Isìlæ̀ sɨ a bèŋsɨ̀ mɨ̀vɨm ɨ̀m bò.